ل ئەینییا بوری هەڤڕكیێن گەڕا 32ێ‌ ژ چارچووڤەیێ‌ خولا ستێرێن ئیراقێ‌ یا فوتبۆلێ‌ هاتبوونە كرن ئەوا ب ئەنجامێن جودا یانەیێن كوردستانی یاریێن خوە ب دووماهی ئینایی، دهۆك، هەولێر وەكهەڤی ئینابوون و زاخۆ تووشی خوسارەتیەكا نە چاڤەڕێ‌ كری بوو و نەورۆز گرنگترین و مەزنترین سەركەفتن د ڤێ‌ گەڕێ‌ دا ب دەستڤە ئینا.

دهۆك بەردەوامە ل سەر دەستدانا خالان

تیما یانەیا دهۆك بەردەوامە ل سەر ئەنجامێن وەكهەڤییان و ژ دەستدانا خالان پشتی د ڤێ‌ گەڕێ‌ دا بەرانبەر خودانێن ئەرد یانەیا كارەبا یا بەغدایی ب گۆلەكێ‌ وەكهەڤبوویی، سەرباری ئەڤی ئەنجامێ‌ لێ‌ تیما دهۆكێ‌ مانا خوە ل رێزا شەشێ‌ پاراست ب 49 خالان كو ژ سەرجەمێ‌ 12 سەركەفتن و 13 وەكهەڤیان و حەفت خوسارەتی هەنە، لێ‌ نەرازیبوونا پشتەڤانێن دهۆكێ‌ ل سەر پلانێن راهێنەرێ‌ تیمێ‌ ئەحمەد خەلەف بەردەوامن كو د تۆرەێن چڤاگی دا داخوازا دوورئێخستنا وی كرینە.
د كۆنگرەیێ‌ رۆژنامەڤانی یێ‌ پشتی یاریێ‌ ئەحمەد خەلەف بۆ دەزگەهێن راگەهاندنێ‌ گۆت: د یارییا بەرانبەر كارەبا دا شەش یاریزانێن مە دووركەڤتی بوون، هیڤیێن مە سەركەفتن بوو لێ‌ مە دەلیڤەیێن گۆلكرنێ‌ مفا ژێ‌ نە وەرگرتن، پشتی راوەستیانا خولێ‌ دێ‌ تیما مە بهێز ڤەگەڕیت ئەوژی پشتی یاریزانێ‌ هنگاڤتی و یێ‌ دووركەفتی ڤەگەڕێن.

زاخۆ دەستڤالا ژ نەجەف ڤەگەڕیا

پشتی بۆرینا 18 یاریێن سەركەفتن و وەكهەڤی تیما یانەیا زاخۆ تووشی ئێكەم خوسارەتی بوو بەرانبەر یانەیا نەجەف ب دو گۆلان بەرانبەر گۆلەكێ‌ كو دبیتە خوسارەتییا چارێ‌ د خولێ‌ دا، د یاریا واندا ئەوا ل ئەینییا بۆری ژ چارچووڤەیێ‌ گەڕا 32ێ‌ ل باژێرێ‌ نەجەف هاتییە كرن، د ڤێ‌ یاریێ‌ دا دادڤانێ‌ یاریێ‌ زەید سامر پەنەلتی بۆ تیما زاخۆ نە هژمارت كو بوو ئەگەر كارگێرییا یانەیێ‌ و جەماوەرێ‌ وێ‌ نە رازیبوونا خوە ل سەر بڕیارێن دادڤانی دیار بكەن، بڤێ‌ ئەنجامێ‌ تیما زاخۆ ب كۆمكرنا 55 خالان رێزا چارێ‌ بۆ هەڤڕكا خوە نەجەف هێلا و پاشڤە چوو رێزا پێنجێ‌ ژ 14 سەركەفتن، 13 وەكهەڤییان، تیما نەجەف ب كۆمكرنا 56 خالان رێزا چارێ‌ وەرگرت.
د پرێس كۆنفراسێ‌ پشتی یاریێ‌ تاها عەبدولحەكیم سەرپەرشتێ‌ تیما زاخۆ گۆت: هەرچەندە خوسارەتییەكا سرۆشتی یە بەرانبەر یانەیا باش و خودان ئەرد یانەیا نەجەف و تیما مە ئاستەكێ‌ گەلەك باش نیشان دا، سەرباری مە ڕەدكر دادڤان زەید سامر یارییا مە دگەل نەجەف ڕێڤە ببەت ئەوێ‌ گەلەك یارییان دای ێ‌ دادی نەبوو د كارێ‌ خوە دا، مە نڤێسارەكا فەرمی بۆ فیدراسیۆنا فوتبیۆلا ئیراقێ‌ هنارت بوو كو دادڤان زەید سامر یاریێن مە بڕێڤە نەبەت لێ‌ فیدراسیۆنێ‌ ڕەدكر.

هەولێرێ‌ وەكهەڤییەكا دی ئینا

هەر د چارچووڤەیێ‌ گەڕا 32ێ‌ یا خولا ستێرێن ئیراقێ‌ دا تیما یانەیا هەولێر بێ‌ گۆل دێ‌ مێڤاندارییا یانەیا نەفت ئەلبەسرا وەكهەڤ بوو، د یارییا واندا ئەوا ل یاریگەها یانەیا دهۆك هاتیە كرن، ئینانا یارییا وێ‌ ل دهۆكێ‌ ژبەر سزایێن فیدارسیۆنا ئیراقێ‌ یە، سەرباری ب سەرپەرشتیا راهێنەرێ‌ باژێرێ‌ هەولێرێ‌ سەمیر بابوو ئەنجامێن باش هەنە و د یارییا بوری دا سەركەفتنەكا باش ئینابوو و هیڤیێن مانا خوە د خولێ‌ دا گەشتر لێكربوو لێ‌ دڤێ‌ یاریێ‌ دا نە شیا بەردەوامیێ‌ بدەنە سەركەفتنان، هەرچەوابیت رێزبەندیا خوە پاراست ب31 خالان ل رێزا 14ێ‌ دهێت.

نەورۆزێ‌ ئاگر ل سەر پشتا ئەلهۆیێن جەوییە هەلكر

تیما یانەیا نەورۆز سەركەفتنەكا مەزن ل سەر ئێك ژ بەربژارێن ناسناڤێ‌ ئەڤ سالە یانەیا جەوییە یا بەغدایی پشتی شیایی ب چار گۆلان بەرانبەر دو گۆلان سەركەفتنێ‌ ل سەر بینت، د یارییا واندا ئەوا ل ئەینییا بوری یاریگەها سلێمانیێ‌ مێڤاندارییا وێ‌ كری كو دهاتە هژمارتن ئێك ژ سەركەفتنێن نە چاڤەڕێ‌ كری د ڤێ‌ گەڕێ‌ دا، بڤێ‌ ئەنجامێ‌ یانەیا نەورۆز ب 48 خالان رێزا حەفتێ‌ پاراست.
ئەنجامێن یاریێن دی یێن گەڕا 32ێ‌، نەفت ئەلمیسان 2-3 شورتە، زەورا 1-چنە مینا، تەلەبە 1-2 نەفت ئەلوەسەت، نەفت 1-1 كەربەلا، كەرخ چنە- چنە ئەمانەت بەغدا، ئەلقاسم 1- چنە حدود.

رێزبەندیا گۆلكەرێن خولێ‌

هەتا نوكە هێرشبەرێ‌ یانەیا جەوییە ئەیمەن حسێن ب 25 گۆلان سەرێ‌ لیستەیا گۆلكەران دهێت، دووڤدا پیشەكارێ‌ نەفت ئەلمیسان یێ‌ سوری عەلائەدین ئەلدالی ب17 گۆلان رێزا دویێ‌، هێرشبەرێ‌ شورتە موهەنەد عەلی ب 16 گۆلان رێزا سێیێ‌ دهێت، گۆلكەرێن ئێكێ‌ یێن ل سەر ئاستێ‌ یانەیێن كوردستانی یێ‌ یانەیا نەورۆز و پیشەكارێ‌ نیجیری ئیبراهیم تۆمیوا ب تۆماركرنا هاتریكێ‌ ل سەر جەوییە 16 گۆل تۆماركرینە، یاریزانێ‌ دی یێ‌ نەورۆز مەروان حسێن و یێ‌ یانەیا هەولێر محەمەد قاسم 10گۆل تۆماركرینە، یێ‌ تونسی و یانەیا دهۆك عیماد ئەللواتی حەفت گۆل هەنە، ستێرێ‌ بەرازیلی و یانەیا زاخۆ فرانك سیدریك حەفت گۆل هەنە.

رێزبەندییا خولێ‌ بەری ب دووماهی هاتنا گەڕا 30ێ‌.

1- شورتە 73 خال.
2- جەویە 66 خال.
3- زەورا 63 خال.
4- نەجەف 56 خال.
5- زاخۆ 55 خال.
6- دهۆك 49 خال.
7- نەورۆز 48 خال.
8- نەفت 43 خال.
9- حدود 42 خال.
10- تەلەبە 41 خال.
11- نەفت ئەلمیسان 39 خال.
12- كارەبا 34 خال.
13- مینا 34 خال.
14- هەولێر 32 خال.
15- كەربەلا 32 خال.
16- كەرخ 31 خال.
17- نەفت ئەلبەسرا 28 خال.
18- ئەلقاسم 25 خال.
19- ئەمانەت بەغدا 23 خال.
20- نەفت ئەلوەسەت 15 خال.

هەڤڕكیێن خولێ‌ دێ‌ هێنە ڕاوەستاندن

ل دووڤ نڤێسارا فەرمی بڕیار هاتیە دان بۆ ماوەیێ‌ دو حەفتییان فیدراسیۆنا فوتبۆلا ئیراقێ‌ خول دێ‌ هێتە راوەستاندن، پشتی ب دووماهی هاتنا یاریێن گەڕا 32 یا خولا ستێران، پێخەمەت بەرهەڤیێن هەلبژارتیێ‌ ئیراقێ‌ بۆ ڤاڤارتنێن هەڤپشك یێن كۆپا ئاسیا و كۆپا جیهانی و دیار كر دێ‌ د ماوەیێ‌ راوەستیانێ‌ دا هندەك یاریێن پاشئخستی هێنە كرن و د یاركر هەلبژارتیێ‌ ئیراقێ‌ دو دیدارا چاڤەڕێ‌ كرن بەرانبەر هەلبژارتیێ‌ ئەندۆنیزیا ل شەشێ‌ خزیرانا بهێتن، دیسان ل 11ێ‌ هەمان مەهـ ل یاریگەها بەسرا یا نێڤدەولەتی بەرانبەر هەلبژارتیێ‌ فێتنامێ‌ بیت بۆ زانین هەلبژارتیێ‌ ئیراقێ‌ بەرهەڤیێن خوە د ڤاڤارتنێن هەڤپشك دا بۆ مۆندیالا جیهانی 2026 و كۆپا ئاسیا د كۆما شەشێ‌ دا بەرانبەر هەلبژارتیێن ئەندۆنیزیا، فلیپین و فێتنام.