ئامێدیێ، مەحمود نهێلی:

د سەرەدانەكی دا بۆ دەڤەرا ئامێدیێ‌، پارێزگارێ‌ دهۆكێ‌ و شاندەكێ‌ د گەل دا بەرێ‌ بنیاتی بۆ هەژمارەكا پڕۆژەیان دانا.
د. عەلی تەتەر، پارێزگارێ‌ دهۆكێ‌ د كۆنگرەكێ‌ رۆژنامەڤانی دا دیار كر، ب مەرەما دانانا بەرێ‌ بنیاتی بۆ هەژمارەكا پڕۆژەیان، وان سەرەدانا دەڤەرا ئامێدیێ‌ كریە و گۆت: «كۆمەكا دی یا پڕۆژەیان ل سنوورێ‌ دەڤەرداریا ئامێدیێ‌ رادگەهینین ب گوژمێ‌ 22 ملیار و 800 ملیۆن دیناران، ل ڤێ‌ دەڤەرێ‌ دێ‌ هێنە بجهئینان و كەڤنە د خزمەتا خەلكێ‌ دەڤەرێ‌ دا، هند ژ وان پڕۆژەیان پشتی سەرەدانا جەنابێ‌ سەرۆك مەسعود بارزانی بۆ دەڤەرێ‌ رازیبوون ل سەر كریە و سۆز پێ‌ دایە خەلكێ‌ دەڤەرێ‌ وەك چێكرنا ئاڤاهیێ‌ كۆلیژا پەروەردا ئامێدیێ‌ و ئاڤاهیێ‌ دادگەهێ‌«.
پارێزگاری گۆتژی: «سەرۆكێ‌ حوكمەتێ‌ گرنگیەكا تمام ب ڤێ‌ دەڤەرێ‌ دایە و بەردەوام دووڤچوونا ئاریشەیێن خەلكێ‌ دەڤەرێ‌ دكەت، جەنابێ‌ وی ئەم یێن راسپاردین دەڤەرێن دووری دەست پتر گرنگی پێ‌ بهێتەدان و پڕۆژە پتر لێ‌ بهێنە ئەنجامدان، لەو كۆمەكا دی یا پڕۆژەیان ل سەرانسەری دەڤەرداریا ئامیدیێ‌ دێ‌ هێنە ئەنجامدان بێ‌ جوداهی، بەلێ‌ قووناغ ب قووناغ».
پارێزگارێ‌ دهۆكێ‌ زێدەتر گۆت: «سەرۆكێ‌ حوكمەتێ‌ ئەم راسپاردینە یا مە پێچێ ببیت بۆ چارەكرنا ئاریشەیێن ڤێ‌ دەڤەرێ‌ خەمساریێ‌ نەكەین، ئەم سوپاسیا سەرۆكێ‌ حوكمەتێ‌ دكەین، كو بەردەوام چاڤێ‌ خوە دایە ڤێ‌ دەڤەرێ‌ و پڕۆژەیێن باش بۆ خەلكێ‌ دەڤەرێ‌ هاتینە ئەنجامدان پرانیا وان پڕۆژەیان ژی ب دووماهی هاتینە، ب تنێ‌ پڕۆژەیێ‌ نەخوشخانا 100 تەختی یا دێرەلۆكێ‌ مایە و ئەو ژی د دەمێ‌ خوەیێ‌ دیار كری دا دێ‌ ب دووماهی هێت».

ئەڤرۆ، لەزگین جوقی:

بەرپرسێ لژنا پارتی ل شنگالێ دیار كر، تەرمێ سێ وەلاتیان ل نێزیك تل قەسەب ل شنگالێ هاتە دیتن، ئەڤە چەندین جاران حالەتێن كوشتنێ ل شنگالێ دووبارە بوون و تاوانبار ئاشكرا نابن و دبێژیت: كوشتنا وەلاتیان ل شنگالێ‌ یا بوویە دیاردە.
سلێمان حەسەن، بەرپرسێ لژنا پارتی ل شنگالێ بۆ ئەڤرۆ راگەهاند، تەرمێ سێ وەلاتیێن ئەندامێن ئێك خێزان ل نێزیك تل قەسەب ل شنگالێ هاتنە دیتن و ناسنامەیێن وان ژی ئاشكرابووینە و گۆت: «هەرسێ كوردێن ئێزدی نە و زەلامەك و ئافرەتەك و زارۆكەك هاتینە كوشتن و هێشتا ئەگەرێن كوشتنا وان ئاشكرا نەبووینە ون اسنامەیێن تاوانباران ژی ئاشكرا نەبووینە».
ئاشكرا ژی كر، حالەتێن كوشتنا وەلاتیان ل شنگالێ د زێدەبوونێ‌ دانە، ئەڤە چەندین حالەتێن كوشتنێ چێبوون بێ تاوانبار بۆ خەلكی بهێنە ئاشكراكرن، ئەڤە ژی بوویە ئەگەر خەلك نەشێن بچنە شنگالێ، لەورا خەلكێ شنگالێ داخواز بجهئینانا رێككەفتنا شنگالێ و زڤڕینا پیشمەرگەی بۆ شنگالێ دكەن، داكو حالەتێن كوشتنێ بهینە كونترۆلكرن.

ئاكرێ‌، رەمەزان زەكەریا:

ل دەڤەرداریا ئاكرێ و دەوروبەران چەندین پڕۆژەیێن خزمەتگوزاری ب گوژمێ‌ 70 ملیار دیناران تەمامبووینە و هندەك ژی د قووناغا بجهئینانێ دانە.
شەعبان خەلیل بەرواری، دەڤەردارێ ئاكرێ ب وەكالەت بۆ ئەڤرۆ گۆت: «ئەو پڕۆژەیە د بیاڤێن جودا دانە، مینا رێ و رێباران، پەروەردێ‌، ساخلەمیێ‌ و وەرزشێ‌ و… هندەك ژ وان پڕۆژەیان تەمامبووینە و كەفتینە د خزمەتا وەلاتیان دا و هندەك ژی نوكە د قووناغا بجهئینانێ‌ دانە و د دەمەكێ‌ نێزیك دا ئەو ژی دێ‌ تەمام بن و كەڤنە د خزمەتا وەلاتیان دا».
ناڤهاتی گۆتژی: «ئەڤ پڕۆژە هندەك ژ وان هاتینە بجهئینان و هندەك ژی د قووناغا بجهئینانێ دانە و هندەك ژی هاتینە راگەهاندن و گوژمێ وان هەمووان دگەهیتە 70 ملیار دیناران».

بڕیارە ئەڤرۆ 25/10/2023 ب چاڤدێریا دكتۆر عەلی تەتەر، پارێزگارێ‌ دهۆكێ‌ ل كۆمەلگەها بریفكا یا سەر ب ناوچەداریا كانی ماسێ‌ ڤە ل دەڤەرا بەرواری ژووریان فەستیڤالا بەرهەمێن خۆمالی بهێتە ڤەكرن و بۆ دەمێ‌ سێ‌ رۆژان دێ‌ یا بەردەوام بیت.
ئارمانج ژ ڤەكرنا ڤێ‌ فەستیڤالێ‌ نیشادانا بەرهەمێن ناڤخوەیی نە یێن ل دەڤەرێ‌ دهێنە بەرهەمئینان و پەیداكرنا بازاریە بۆ وان.
دەڤەرا بەرواریان یا ناڤدارە ب چەندین بەرهەمێن خۆمالی، مینا سێڤان و بۆ ئێكەم جارە ژی فەستیڤالەكا بەرهەمێن ناڤخوەیی ل بن درووشمێ (سێڤا بەرواریان) بهێتە ڤەكرن.

ئامێدیێ، مەحمود نهێلی:

حكمەت عابد، بەرپرسێ راگەهاندنا گەشتوگوزارا ئامێدیێ بۆ رۆژناما ئەڤرۆ دیار كر، پڕۆژەیێ نووژەنكرنا ئۆتێلا بەری ل سەرسنكێ ئێكە ژ پڕۆژەیێن وەبەرهێنانێ ل سنوورێ دەڤەرداریا ئامێدیێ و نوكە كار تێدا بەردەوامە و ب رێژەیا 90% كار تێدا ب دووماهی هاتیە.
ناڤهاتی گۆت: «ب دووماهی هاتنا ڤی پڕۆژەی دێ دەلیڤەیێن كاری بۆ هەژمارەكا وەلاتیێن دەڤەرا ئامێدیێ پەیدا كەت، ب تایبەت ل ناوچەداریا سەرسنكێ».
دیار ژی كر، ئۆتێلا بەری ل سەرسنكێ ل سالێن پێنجیان یا چەرخێ بۆری هاتیە چێكرن و ئێكە ژ ئوتێلێن كەڤنار و دێرین و جوان و ناڤودەنگیەكا زۆر ل سەر دەمێن بەرێ پەیدا كر بوو، ژ بەر وێ یەكێ ژی دێ هەژمارەكا زۆرا گەشتیاران قەست كەنێ.

لەزگین جوقی:

پڕۆژەیێ جۆتسایدێ شێخان ب گوژمێ ملیار دیناران دهێتە بجهئینان ل سەر بودجەیا حوكمەتا هەرێما كوردستانێ.
خالد نەرمۆ، سەرۆكێ باژێرڤانیا شێخان دیار كر، دووڤچوونا پڕۆژەیێ دروستكرنا جۆتسایدێ دەرگەهێ‌ باكوورێ شێخان هاتە كرن و داخواز ژ كۆمپانیا بجهئینەر هاتە كرن، كو ب زووترین دەم و باشترین شێوە كار بهێتە ئەنجامدان، هەروەسا ئاستەنگ و رێگریێن د كەڤنە پێشیا كاری هاتنە گەنگەشەكرن ب شێوەكێ مەیدانی و چارەسەری بۆ هاتنە پێشنیاركرن.
ناڤهاتی گۆت: «درێژاهیا پڕۆژەی كیلۆمەترەك و 200 مەترن و ب گوژمێ ملیارەك و 500 ملیۆن دیناران ل سەر بودجەیا حوكمەتا هەرێما كوردستانێ نوكە پڕۆژە د قووناغا بجهئینانێ دایە».