ئاكرێ‌، رەمەزان زەكەریا:

پڕۆژەیێ وەبەرهێنانێ یێ فرۆتنا كەسكاتی و فێقی و گەنم و جەه و برنجی ل ئاكرێ ب رەنگەكێ سەردەمیانە رۆژئاڤایێ ئاكرێ دێ‌ هێتە دروستكرن.
بلند رەزا، سەرۆكێ باژێرڤانیا ئاكرێ بۆ ئەڤرۆ گۆت: «پڕۆژەیێ وەبەرهێنانێ یێ فرۆتنا فێقیی و كەسكاتی و گەنم و جەه و برنجی ل ئاكرێ ب رەنگەكێ گەلەكێ‌ پێشكەفتی دێ هێتە دروستكرن».
گۆتژی: «ئەڤ پڕۆژەیە ب گوژمێ 22 ملیۆن دۆلاران دهێتە بجهئینان، پڕۆژەكێ گرنگ و پێشكەفتیە و ب تەمامبوونا پڕۆژەی دێ جهێ فرۆتنا كەسكاتی و فێقی و گەنم و جەه و برنجی ل ئاكرێ بۆ جهێ نوو دێ‌ هێنە ڤەگوهاستن، كو دكەڤیتە رۆژئاڤایێ دەڤەرداریا ئاكرێ».

هەولێر، قائید میرۆ:

پەیڤدارێ وەزارەتا كار و كاروبارێن جڤاكی ل حوكمەتا هەرێما كوردستانێ‌ دیار كر، بەلاڤكرنا پێشینەیا چاڤدێریا خێزانی گرێدایی رەوشا داراییا هەرێما كوردستانێ یە و بڕیارە فۆرمەكا نوو ل دۆر وان كەسێن مفادار دبن بهێتە بەرهەڤكرن.
ئاریان ئەحمەد، پەیڤدارێ وەزارەتا كار و كاروبارێن جڤاكی بۆ رۆژناما ئەڤرۆ خویا كر، بەری قەیرانا دارایی نێزیكی 100 هزار كەسان ل هەرێما كوردستانێ پێشینەیەكا مەهانە یا چاڤدێریا خێزانی وەردگرت و گۆت: «پشتی شەڕێ داعشێ‌ و قەیرانا دارایی ئەو پێشینە هاتیە راگرتن، خەلكەكێ زۆر ژێ‌ مفادارببوو، بەلێ بێسەروبەریەك پێڤە دیاربوو، ئەو كەسێن مفاداربووین، هەژمارەك ژ وان هەژی وەرگرتنا وێ‌ پێشینەیێ‌ نەبوون و مەرجێن مفاداربوونێ‌ زۆر دگران نەبوون».
ئاریان ئەحمەد گۆتژی: «چەندین جاران وەزارەتا كار و كاروبارێن جڤاكی بزاڤێن ڤەگەڕاندنا پێشینەیا چاڤدێریا خێزانی كریە، بەلێ ژ بەر نەبوونا شیانێن دارایی نەهاتیە دەستپێكرن، بڕیارە فۆرمەكا نوو بهێتە بەرهەڤكرن و مەرجێن نوو ژی بهێنە دانان بۆ كەسێن مفادار دبن، چونكی بەرێ ژنێن بێسەرپەرشت و قوتابیێن زانكۆیێ یێن خێزاندار و كچێن قەیرە و چەندین تەخێن دی مفادار بووینە، لەوڕا پێدڤی ب گوهۆڕین و پێداچوونێ هەیە».

رۆژا جیهانی یا ساخلەمیا دەروونی ل پارێزگەها دهۆكێ‌ ل رۆژا 10/10/2023 و ل دەمژمێر 10ی سپێدێ‌ ل هۆلا كۆنفرانسان یا زانكۆیا دهۆك ب چەندین چالاكیان دێ‌ هێتە ساخكرن و هاتن بۆ هەمیانە.
ب چاڤدێریا د. عەلی تەتەر، پارێزگارێ دهۆكێ، رێڤەبەریا گشتی یا ساخلەمیا پارێزگەها دهۆكێ دێ رابیت ب ساخكرنا (رۆژا جیهانی یا ساخلەمیا دەروونی) تێدا هەژمارەكا بابەتان ل دۆر (ماددەیێن هۆشبەر و چاوانیا كونترۆلكرنا وان) ژ لایێ كەسانێن تایبەتمەند ڤە دێ هێنە پێشكێشكرن.

ئەڤرۆ، زنار تۆڤی:

سەرۆكێ لژنا ئاڤەدانكرنێ ل پەرلەمانێ ئیراقێ دیار كر، ژ بەر بزاڤێن بەردەوام یێن فراكسیۆنا پارتی دیموكراتی كوردستان ل پەرلەمانێ ئیراقێ، بڕیارە پێنج نەخۆشخانە ل سنوورێ پارێزگەها نەینەوا ل دەڤەرێن كوردستانی یێن دەرڤەی ئیدارا هەرێما كوردستانێ بهێنە دروستكرن.
مەحما خەلیل، زێدەتر بۆ رۆژناما ئەڤرۆ گۆت: «ل دەڤەرداریا شنگالێ دێ نەخۆشخانەكا 100 تەختی ب گوژمێ 77 ملیار دیناران هێتە چێكرن، ل سنوونێ و زۆمار نەخۆشخانەكا 50 تەختی دێ‌ هێتە دروستكرن، ل باشیكێ نەخۆشخانەكا 100 تەختی دێ‌ هێتە دروستكرن، ل گرعۆزێر ژی دێ ئێكا 50 تەختی هێتە دروست كرن و پارە ژی بۆ وان پێنج نەخۆشخانێن ل سنوورێ نەینەوا و ل دەڤەرێن كوردستانی یێن دەرڤەی ئیدارا هەرێما كوردستانێ هاتیە تەرخانكرن و هەموو رێكارێن دروستكرنا وان تەمام بووینە، نوكە كەفتیە د قووناغا بجهئینانێ دا».
ناڤهاتی گۆتژی: «ژ بەر بزاڤێن بەردەوام یێن فراكسیۆنا پارتی دیموكراتی كوردستان ل پەرلەمانێ ئیراقێ ئەو نەخۆشخانە دێ هێنە چێكرن، د دەمێ‌ دو سالان دا ئەو نەخۆشخانە هەموو دێ هێنە چێكرن».

ئامێدیێ، مەحمود نهێلی:

د بەردەوامیا گەهاندنا پڕۆژەیێن خزمەتگوزاری بۆ دەڤەرێ دەست ب چێكرنا پڕۆژەكێ ئاڤدێریێ ل سنوورێ ناوچەداریا بامەرنێ هاتیە كرن و پارێ پێدڤی بۆ هاتیە تەرخانكرن.
میران عەبدولرەحمان، رێڤەرا ناوچەداریا بامەرنێ بۆ رۆژناما ئەڤرۆ دیار كر، د بەردەوامیا گەهاندنا پڕۆژەیێن خزمەتگوزاری دا بۆ دەڤەرا وان، ب تایبەت د بیاڤێ‌ پشتەڤانیكرنا كەرتێ چاندنێ دا و چێكرنا جوویێن ئاڤێ و هاریكاریكرنا جۆتیاران، دەست ب چێكرنا پڕۆژەكێ ئاڤدێریێ هاتیە كرن و گۆت: «ئەڤ پڕۆژە پێك دهێت ژ چێكرنا جوویەكا ئاڤێ و ڤەكرنا دەراڤكان و چەندین كارێن دیترێن گرێدایی ب ئاڤدێریێ ڤە، پڕۆژە ب گوژمێ 149 ملیۆن دیناران بۆ هاتینە تەرخانكرن و نوكە د قووناغا چێكرنێ دایە».
گۆتژی: «ب دووماهیك هاتنا ڤی پڕۆژەی دێ خزمەتەكا باش یا جۆتیارێن دەڤەرێ هێتە كرن ب تایبەت د بیاڤێ‌ گەهاندنا ئاڤێ بۆ سەر چەمێن وان و ئاڤدانا دەرامەتێن وانا بۆ سالێن داهاتی».

هەولێر، قائید میرۆ:

شیرەتكارەكێ قانوونی ئاماژە بڤێ چەندێ كر كو قانوونێ چەندین مافێن جودا بۆ وان سنێلەیان دیار كرینە یێن ژ ئەگەرێ هەر تاوانەكێ دهێنە دەستەسەر كرن و زیدانی كرن ژ وانژی مافێ چوون بۆ قوتابخانێ و دابینكرنا پێدڤیێن ژیانێ و گۆت: هەر زارۆیەكێ تەمەنێ وی نە گەهشتبیتە 11 سالیێ چو بەرپرسیاریێن قانوونی نینن.

لوقمان عەزیز، شیرەتكارێ قانوونی بۆ رۆژناما ئەڤرۆ دیار كر كو ل گورەی قانوونێ هەر كەسەكێ تەمەنێ 11 سالی تەمام كربیت و نەگەهشتبیتە 18 سالیێ ب سنێلە دهێتە هژمارتن ئەڤە بۆ هەرێما كوردستانێ، بەلێ بۆ دەڤەرێن باشوورێ عێراقێ كەسێن ژیێ وان دناڤبەرا 9 هەتا 18 سالیێ ب سنێلە هاتینە وەسف كرن و گۆت: (ل گورەی قانوونا هژمار 14 یا سالا 2001ێ هەر كەسەكێ ژیێ وی كێمتر بیت ژ 11 سالیێ چو بەرپرساتیەكا قانوونی ناكەڤیتە سەر ، لەوڕا هەر زارۆكەكێ تەمەنێ وی نەگەهشتبیتە 11 سالیێ بەرپرسیار نینە هەمبەر قانوونێ و ب هیچ شێوەیەكی ناهێنە راگرتن و دەستەسەر كرن).
شیرەتكارێ قانوونی دیار كر ژی، هەتا ڤەكۆلین ژی ل گەل كەسێن ژیێ وان نەگەهشتیە 11 سالیێ ناهێتە كرن، بەلێ سنێلە بەرپرسیارە هەمبەر هەر تاوانەكێ هەكە پشكداریێ تێدا بكەت و دەمێ دەستەسەر كرنێ ژی پێدڤیە بلەز رادەستی پۆلیسێن تایبەت ب سنێلەیان بهێتە كرن، هەروەسا دەمێ دەستەسەر كرنا سنێلەی دڤێت سەمیانێ سنێلەی بهێتە ئاگەهدار كرن لدۆر دەستەسەركرنێ و جهێ دەستەسەر كرنێ و ئەگەرێن دەستەسەركرنێ‌ و گۆت: ( قانوونێ رێك دایە كو دڤێت ل دەمێ ڤەكۆلینێ سەمیانێ سنێلەی بەرهەڤی ڤەكۆلینێ ببیت، نابیت چو كەسێن دی دەمێ ڤەكۆلینێ بەرهەڤی ڤەكۆلینێ ل گەل سنێلەی بن ژبلی وان كەسێن قانوونێ دیار كری).
لوقمان عەزیز ئاماژە بڤێ‌ چەندێ‌ ژی كر، سنێلەی ماف هەیە ل گورەی قانوونێ بێدەنگیێ هەلبژێریت و پارێزەری بكەتە نوونەرێ خوە، پشتی پشتڕاستبوونێ ژ ئەڤێ تاوانا ژلایێ سنێلەی دهێتە ئەنجامدان و سنێلە دهێتە زیندانی كرن، سنێلەی چەند مافەك هەنە ژ وانژی ماف هەیە پەیوەندیێ ل گەل جیهانا دەرڤەی چاكسازیێ بكەت و گۆت: (پێدڤیە سنێلە ژ كەسێن مەزن بهێنە جودا كرن ل دەمێ دەستەسەر كرنێ و زیندان كرنێ، هەروەسا هەموو خزمەتگوزاریێن دەروونی و ساخلەمی ژی بۆ بهێنە دابین كرن).
شیرەتكارێ قانوونی گۆتژی: (هەتا سنێلەی ماف هەیە خوارن و پێدڤیێن ژیانێ بۆ بهێنە دابینكرن و رێك دهێتە دان بچیتە قوتابخانێ ژی، سنێلەیێن رەگەزێ مێ ژی چەند مافەكێن دی هەنە وەكی جوداكرنا وان ژ زیندانیێن نێر و نابیت رەگەزێ نێر پشكنینێ بۆ سنێلەیێن مێ بكەت و رێگری ل هەموو توندۆتیژیەكی ژی بهێتە گرتن ل هەمبەری سنێلەیێن مێ).