ئەڤرۆ، دیدار:

ڤەهێل كەلەش كۆمێنتارێ‌ بەرنیاس یێ‌ وەرزشی ل دەڤەرا بەهدینان و كوردستانێ‌ شیایە د ماوەكێ‌ كێم دا پێنگاڤێن مەزن پاڤێژیت تایبەت د رەوشەنبیركرنا بینەرێ‌ وەرزشی ب بڕێیا زمانێ‌ كوردی، دیسان ئێك ژ حەز ژێكەرێن جەماوەرێ‌ وەرزشی یە و چەندین پەیڤێن وی یێن جوان هاتینە ڤەگۆهاستن، ژبۆ دیدارەكا تایبەت رۆژنامەیا ئەڤرۆ چەند پرسیار و دانۆستاندن دگەل ناڤهاتی كرینە و بڤی شێوەیی بۆ مە دیاركرییە.
ل دەستپێكێ‌ ڤەهێل كەلەشی گۆت: وەكو حەز و ڤیانەك دەست ب كارێ‌ كۆمێنتاریێ‌ كرییە بێ‌ چو لایەنەك پشتەڤانییا من بكەت، هەرچەندە پێنگاڤا من یا ئێكێ‌ د مۆندیالا 2014ێ‌ دا هەرچەندە هاتبوو دانان وەكو پیشكێشكارێ‌ وەرزشی بم لێ‌ هندەك ئەگەر پەیدابوون و رێكا كۆمێنتاریێ‌ بۆ من ڤەبوو كو دەركەفتنا من یا ئێكێ‌ ل كەنالێ‌ داسنیا بیت و ئێكەم یاری ژی یا مۆندیالێ‌ بوو د ناڤبەرا هەلبژارتیێ‌ فرەنسا و سویسرا بوو، دیسان یا نافخۆیی یارییا دهۆك و زاخۆ دگەل كەنالێ‌ كوردستان24ێ‌ بوو، دیسان من سەربۆر ژی دگەل رادیۆیا داسنیا ژی هەبووینە، د نوكە دا ژی ل كەنالێ‌ لایڤ درێم سپۆرت بەردەوامم ژبۆ خزمەتا جەماوەرێ‌ وەرزشی.
ژلایەكێ‌ دووڤە ناڤهاتی كارێ‌ كۆمێنتاریێ‌ ب سانەهی نابینت و گۆت: هەمی كەس نەشێن ئەڤی كاری بكەن ژبەركو چەند مەرج ل دەڤ كۆمنتاری هەبن هەتا یا درۆست ب گەهینیت ژ وانا بەهرەمەندبیت ژلایێ‌ دەنگی و حەز و ڤیان و پێزانین باش ل سەر وەرزشێ‌ هەبن، پێنەڤێت هەبوونا بەهرەداریێ‌ ژی كو خودایێ‌ مەزن ددەتە هندەك كەسان، سەرباری ئەوێ‌ زەحمەت و رەنجا چەندین سالان د كارێ‌ راگەهاندنێ‌ دا مە كری دبیت كێماسی ژی هەبن لێ‌ ئەڤچەندە ژی ژبەر ئەو شیانێن بەردەست بوویە، د دەمەكی دا ل خولێن ئۆرۆپا من كارێ‌ پەخشكرن و د ژۆرا كۆنترۆلكرنێ‌ و كۆمێنتارییا سێ‌ یارییان د رۆژەكێ‌ دا كرییە.
ل سەر پێشكەفتن و بەلاڤبوونا كارێ‌ كۆمێنتارییا كوردی ڤەهیل كەلەشی گۆت: د ڤان سالێن دووماهیێ‌ دا كۆمێنتارییا زمانێ‌ دایك بەر ب پێشڤە دچیت ئەڤەژی جهێ‌ دلخوەشیێ‌ یە، ل كوردستانێ‌ كۆمەكا باش یا گەنجان دیاربووینە لێ‌ یا گرنگ دڤێت پشتەڤانی بۆ كۆمێنتاران ژی هەبیت چو ژ لایێ‌ دەزگەهێن راگەهاندنێ‌ وەكو كەنال یان ژی بەرپرسێن وەرزشی، ب مخابنی ڤە مە دەزگەهەكێ‌ تایبەت یێ‌ وەرزشیی نینە ببیتە هیڤییا وەرزشڤان و راگەهانكارێن وەرزشی و گۆت: ئەز وی دەمی هەست ب شانازیێ‌ دكەم دەمێ‌ ژ یارییەكێ‌ یان دو یارییان یێ‌ دووربم جەماوەرێ‌ وەرزشی پسیاردكەن و غەریبییا دەنگێ‌ من دكەن.
كۆمێنتارێ‌ گەنج ئەوچەندە ژی دیار كر نە بتنێ‌ گرنگە كۆمێنتاریێ‌ بكەت و جەماوەرێ‌ وەرزشی خوەشیێ‌ ژێ‌ بینت بەلكو گرنگتر و ئارمانجا وی ئەوە نفشێ‌ نوو فێركەتە زمانێ‌ كوردی و گۆت: هندی د شیان دا بیت دێ‌ خزمەتا زمانێ‌ كوردی كەم و هەكە داخواز ژی ژ من بهێتە كرن بۆ كۆمێنتارییا عەربی ئەز ناكەم سەرباری كەنالەكێ‌ ئیراقێ‌ داخواز ژ من كر كۆمێنتارییا عەرەبی بكەم بەرانبەر مووچەكێ‌ مەزن لێ‌ من ڕەدكر، بتنێ‌ بۆ زمانێ‌ كوردی وەكو كۆمێنتارەكێ‌ بەهدینان بۆ جارا ئێكێ‌ ل وی كەنالی بكەم كو یارییا هەلبژارتیێ‌ ئیراقێ‌ بوو، هەستەكێ‌ نەتەوەیی بۆ من پەیدابوو بەرانبەر سەدەهان عەرەبان من ب كوردی كۆمێنتاری كری، د وێ‌ یاریێ‌ ژی دا خۆشترین رۆژ بوو من د كەنالەكێ‌ ئیراقی دا دەمێ‌ كۆمێنتاریێ‌ دا من گازی دكر كەركووك دلێ‌ كوردستانێ‌ یە.
ل دووماهیێ‌ بۆچوونا خوە ل سەر بەرهەڤیێن یانەیێن كوردستانێ‌ بۆ وەرزێ‌ نوو یێ‌ خولا ئیراقێ‌ یا پیشەكاران گۆت: ل دووڤ ئەوا دبینین و گوهلێ دبین بەرهەڤیێن وان د ئاستەكێ‌ باش دانە، هەرچەندە ئەڤ خولە ب سیستەمەكێ‌ نوویە و دبیت یا بزحمەت بیت ژبەركو یانەیێن دی ژی بەرهەڤیێن باش كریینە و شێوازێ‌ بڕێڤەچوونێ‌ ژی دێ‌ هێتە گوهۆڕین، ب هیڤی نە وەرزێ‌ نوو یانەیێن كوردستانی ب ئاست و ئەنجام دلێ‌ جەماوەرێ‌ خوە خوەشكەن

عەلی حاجی:

د داخویانیەکێ دا ئەندامێ دەستەیا کارگێریا یانه‌یا زاخۆ یا وەرزشی بۆ رۆژناما ئەڤرۆ دیار کر تیما وان ل وەلاتێ تورکیا دێ سێ یاریێن هەڤالینی ئەنجامدەت .
زێدەتر دلژار عەدنان گۆت: کەمپێ تیما مە ل باژێرێ ئانتالیا به‌رده‌وامه‌ ژبۆ باشترین به‌رهه‌ڤی بۆ وه‌رزێ نوو یا خولا پیشه‌كارێن ئیراقێ یا تەپا پێی و هەتا نوکە یارییەکا هەڤالینی ئەنجامدایە ئه‌وا د پلان دایە دو یاریێن دیتر ژ بكه‌ن، دووڤدا دێ به‌ر ب باژێرێ دیار بەکر چیت بۆ ئه‌نجامدانا یارییەکا هەڤالینی، هەتا نوکە مە گرێبه‌ستا شەش پێشەکاران ئیمزا کریە و نێزیکی ٩٨٪ تیما مە ب دووماهی هاتیە بتنێ ل هێلا بەرەڤانیێ یاریزانەک مایە و نوکە دا ئەم چاڤەرێ بریارا دووماهیێ یا راهێنەری نە هەکە ئێكێ دیتر بۆ وی جهی دڤێت دێ بزاڤێ كه‌ین بۆ په‌یدابكه‌ین، لێ سه‌ره‌رایی وێ چه‌ندێ ئەم دۆفچوونا چەند یاریزانەکان دکەین کو ل وی جهی و هەکە راهێنەری داخاز کربیت ئێکسەر دێ گرێبه‌ستێ دگەل یاریزانەکێ ئیمزا کەین.
ئەو چەندە ژی گۆت: راهێنەرێ مە یێ قەتەرئ ته‌لال ئه‌لبلۆشی ژ ئاستێ هونەری یێ یاریزان محەمەد زیا رازی نەبوو ژبەر هندێ گرێبه‌ستا وی هاتە هەلوەشاندن.
ل دووماهیێ گۆت: یاریگەهێن مە پشتی هاتینە نوژەنکرن نوکە دا بەر ب هندێ ڤە دچین کو بهێتە بەرهەڤکرن ئه‌و چیمەنێ یاریگەها نێڤدەولەتی و یاریگەها تایبەت ب ڕاهێنان ڤە هات بوونە نوژەکرن.

پشتی بۆ زێدەتر هەیڤەكا ژ راهێنانان فیدارسیۆنا ڤۆلی بۆلا ئیراقێ‌ ژ نشكەكێ‌ ڤە نە هێلا دو ستێرێن یانەیا سەنحاریب دگەل تیما خوە پشكداری قارەمانییا ئیراقێ‌ ل سەر ئاستێ‌ كچان بن ئەوا نوكە هەڤڕكیێن وێ‌ ب پشكدارییا 12 یانەیان ل هەولێرا پایتەخت دهێتە كرن.
ژێدەرەكێ‌ نێزیك ژ نوونەرا پارێزگەهێ‌ ئەوێ‌ نەڤیایی ناڤێ‌ وی دیاربیت بۆ رۆژنامەیا ئەڤرۆ دیار كر، تیما یانەیا سەنحاریب بۆ ماوەیێ‌ هەیڤەك و 15 رۆژ بوون بەرهەڤیێن خوە یێن باش بۆ قارەمانییا ئیراقێ‌ كرینە ب لیستەكا یاریزانێن باش كو راهێنەرێ‌ وان ژ ئاستێ‌ وان رازیبوو، دوهی د دەمێ‌ كۆمبوونا هونەری یا دەستپێكرنا قارەمانیێ‌ ئەوا نوكە ل هۆلا ئەكاد ل هەولێرا پایتەخت دهێنە كرن، ژ نشكەكێ‌ ڤە لژنەیا بەریكانا و سەرۆكێ‌ فیدراسیۆنا ڤۆلی بۆلا ئیراقێ‌ نە هێلا هەردو یاریزانێن تیما سەنحاریب سۆز بەهیچ و هەمیشە هوشیار پشكداری هەڤڕكیێن خولێ‌ بن ب بوهانا هەردو یاریزان ل یانەكا دی تۆماركرینە، سەرباری نوونەرا پارێزگەهێ‌ لیستە ب ناڤێ‌ هەردو یاریزانان بۆ فیدارسیۆنێ‌ هنارتبوو و ئەڤە هەیڤەك و 15 رۆژ بوون راهێنان ژی دكرن.
هەمان ژێدەری دیار كر یانەیا سەنحاریب ب بەلگە بۆ فیدراسیۆنێ‌ دیاركر ل دووڤ رێنمایان ئەوان یاریزان ئیناینە دناڤ رێزێن تیما خوە دا ئەوژی مافێ‌ هەر یاریزانەكا ل سەر ئاستێ‌ لاوان دشێت بۆ ئاستێ‌ پێشكەفتیان یاریێ‌ بكەت، یا ئالۆز ئەوە دەستەكا فیدراسیۆنا ئیراقێ‌ بەری هەلبژارتنان ب شێوەیێ‌ رێنما بڕیاردابوو لێ‌ پشتی ئەڤە هاتین ل سەر گڤاشتێن چەند یانەیان و بەرژوەندیێن وان ئەڤ بڕیارە هەلوەشاند و بێ‌ نوونەرا پارێزگەهێ‌ بهێتە ئاگەهداركرن بتنێ‌ د دەمێ‌ كۆمبوونا هۆنەری هاتە زانین و ئەڤچەندە ژی یانەیا سەنحاریب ب غەدر دایە زانین و شەڕێ‌ دەرۆنی دژی خوە دانایە.

ب شێوەكێ‌ فەرمی چەند یاریزان، راهێنەر و دادڤانێن پارێزگەها دهۆك و مووسلێ‌ پلەیا كەمەرێن یارییا كاراتێ‌ بۆ ئاستەكێ‌ دی بلندتر، پشتی د تاقیكرنێن تیۆری و پراكتیكی دا ئەوا ژلایێ‌ فیدراسیۆنا كاراتێ‌ یا پارێزگەهێ‌ ب هەڤكاری دگەل یا ئیراقێ‌ ل هۆلا گرتییا یانەیا دهۆك یا وەرزشی هاتییە كرن.
ل دۆر ڤێ‌ یەكێ‌ گەیلان باپیر سەرۆكێ‌ فیدراسیۆنا كاراتێیا پارێزگەهێ‌ بۆ رۆژنامەیا ئەڤرۆ گۆت: ل دووڤ بەرنامەیێ‌ سالانە یێ‌ فیدراسیۆنا مە و ب هەڤكاری دگەل فیدارسیۆنا ئیراقێ‌ ئەڤ تاقیكرنە هاتیە كرن كو ژلایێ‌ شارەزایێ‌ نێڤدەولەتی د. تێرس عۆدیشۆ ڤە ب شێوەیێ‌ تیۆری و پراكتیكی تاقیكرن بۆ 40 یاریزان، راهێنەر و دادڤانێن كچ و كوڕ ل سنۆرێ‌ پارێزگەها دهۆكێ‌ و هندەك ژی ل مووسل هاتبوو كرن، ب مەرەما بلند كرنا كەمەرێن پشكداران ژ ئاستەكی بۆ یا بلندتر، ئەڤچەندە ژی وەكو مافێ‌ وان ل دووڤ یاسایا نێڤدەولەتی یا یارییا كاراتێ‌.
هەروەسان ناڤهاتی گۆت: ئەڤ پلەكرنە گەلەك یا گرنگ بوو پێخەمەت بۆ ئەوان یاریزانێن بەردەوام پشكدارییان د قارەمانیێن ئیراقێ‌ و دەرڤە دكەت، هەروەسان دێ‌ بیتە باشترین بەرهەڤی بۆ هەمی پشكدارێن مە بۆ قارەمانییا پارێزگەهێ‌ ئەوا دهێتە پێشبینیكرن ل مەها بهێت دەستپێبكەت، سەرباری ئەوان ئاستەنگ و نەبوونا پشتەڤانیێ‌ بۆ یاریزانێن كاراتی ب هیڤی نە ئەڤ تاقیكرنە قۆناغەكا باشتر بۆ پێشكەفتنا یاریێ‌ هەبیت.

قەیس وەیس:

فیدراسیۆنا باسكێت بۆلا ئیراقێ‌ ژڤانێ‌ وەرزێ‌ نوو 2023-2024ێ‌ یێ‌ خولا پلا ئێك و دو دەستنیشانكر دگەل دیاركرنا رێنما یێن بڕێڤەبرنا چالاكییان ژ وانا كۆپا ئیراقێ‌.
حسێن ئەلعمیدێ‌ سەرۆكێ‌ فیدارسیۆنا ئیراقێ‌ یا یارییا باسكێت بۆلێ‌ ژڤانێ‌ وەرزێ‌ نوو یێ‌ خولا پلا دو دیار كر كو دێ‌ ل هەشتی كانوونا ئێكێ‌ یا بهێت دەستپێبكەت، هەروەسان 31ێ‌ كانوونا دویێ‌ یا سالا 2024ێ‌ دانا بۆ ژڤانێ‌ هەڤڕكیێن خولا پا ئێك و ئەو یانەیێن رێزێن ئێكێ‌ و دویێ‌ ب دەستڤە دئینن دێ‌ دەربازبنە پلا نایاب، دیسان بۆ هەڤڕكیێن كۆپا ئیراقێ‌ بڕیارە ل 17ێ‌ چڕییا دویێ‌ یا بهێت دەست وەرزێ‌ نوو بهێتە كرن.
ژلایەكێ‌ دووڤە ناڤهاتی دیار كر ژ رێنمایێن خولا پلا ئێك و دو دڤێت یاریزانێ‌ پشكدار د ژیێ‌ 28 سالی دا زێدەتر نەبیت و بتنێ‌ دو یاریزانێن ل سەر ژیێ‌ 28 سالی پشكداریێ‌ بكەن.
بۆ زانین د وەرزێ‌ نوو دا چو یانەیێن پارێزگەها دهۆكێ‌ پشكداری د هەردو خولان دا نەكرییە، هەرچەندە ل پارێزگەهێ‌ تیمەكا باش دگەل كادرێ‌ راهێنانێ‌ بەردەست هەنە لێ‌ چو یانە خوە لێ ناكەنە خودان ل دووڤ ئەوا هاتییە گوتن ژبەر لاوازی و قەیرانا دارایی، د نوكە دا ب تنێ‌ تیما باسكێت بۆلا یانەیا زاخۆ ل دەڤەرا بەهدینان پشكداری خولا پلا نایاب بوویە.