لەزگین جوقی
سەرپەرشتێ پرۆژەیێ نووژەنكرنا پەرستگەها لالش دیار كر:» خانا ئێزدی ل پەرستگەها لالش دێ بیتە مۆزەخانەكا كەلەپوری و هەموو جۆرێن كەلەپوری ئێزدیان ناڤدا دهێنە پاراستن، پشتی خانا ئێزی دهێتە نوژەنكرن دێ دەست بجهئینانا پرۆژەیی هێتەكرن».
خالد نەرمۆ، سەرپەرشتێ پرۆژەیێ نووژەنكرنا پەرستگەها لالش راگەهاند:» ئێك ژ پرۆپۆزلێن نوژەنكرنا پەرستگەها لالش ئەو خانا ئێزی بهێتە نووژەنكرن كو خانا ئێزی ئێكە ژ ئاڤاهیێن هەرە كەڤنار ل پەرستگەها لالش، ئەڤە دێ بیتە موزەخانا كەلەپوری بۆ پاراستنا كەلەپورێ ئێزدیان و هەموو كەلەپوری ئولی یێ ئێزدیان دناڤ خانا ئێزی دا دهێتە كۆمكرن و پاراستن، جل و بەركێن كەلەپورێ و موزیك و ئەو كەرەستێن دكەڤندا ئێزدیان بكاردئینان بۆ كارێن چاندنێ و ناڤمالی و هەموو جۆرێن كەلەپورێ دێ دناڤ مۆزەخانا كەلەپورێ ئێزدیان دا هێنە پاراستن».
خۆیا ژی كر:» نوكە پرۆپۆزەل یێ هاتیە بەرهەڤكرن و هێشتا بۆدجە نەهاتیە تەرخانكرن و دەست ب كارێ سەخبێری و نووژەنكرنا خانا ئێزی نەهاتیە كرن، هەر دەمێ لایەنەك پشتەڤانیی بكەت بۆدجەیێ تەرخان بكەت بێگومان دێ دەست بجهئینانا پرۆژەیی هێتە كرن».
ئاشكەرا كر:» مۆزەخانا كەلەپوری ل پەرستگەها لالش دێ بیتە ئەگەر پتر كەلەپورێ ئێزدیان بهێتە پاراستن و دەمێ زیارەتكار و شاندێن بیانێ قەستا لالش دكەن دێ كەلەپورێ ئێزدیان ژی بینن، هەروەسا ژی بۆ گەشت و گوزاریا ئولی ژی ئەڤ موزەخانا كەلەپەرێ یا گرنگە».
سەرپەرشتی پرۆژەیێ نوژەنكرنا پەرستگەها لالش گۆت:» كارێ نووژەنكرن و سەخبێریا پەرستگەها لالش یێ بەردەوامە، هەتا نوكە پتر ژ 30% ل سە شێوازی كەڤنار هاتیە نووژەنكرن و سەخبێریكرن و بەردەوام مەزارگەه و نیشانگەهێن پەرستگەها لالش دهێنە نووژەنكرن و سەخبێریكرن».
نيشاندان