هشیار فەریق سەرۆكێ‌ ئێكەتیا پایسكلڤانێن هەرێما كوردستانێ‌ دیار كر ڤەگەڕاندنا چالاكیێن وەرزشی یێن یاریا پایسكلان دێ‌ ب شێوەكێ‌ باشتر بیت و پلان و بەرنامە هاتینە دانان ژوانا دروستكرنا هەلبژارتیێن ب ناڤێ‌ كوردستانێ‌ پێخەمەت پشكداری د هەر قارەمانیەكا ڤەكری یا نێڤدەولەتی بهێتە رێكخستن.
زێدەتر ناڤهاتی بۆ رۆژناما ئەڤرۆ گۆت: پشتی ڤەقەتیانەكا درێژ یا سالێن بۆری ژبەر قەیرانا دارایی و رەوشا كوردستانێ‌ و وەلاتێن جیهانێ‌ دەرئەنجامێ‌ بەلاڤبوونا كورۆنایێ‌، دۆبارە وەكو ئێك ژ ئێكەتیێن وەرزشی ل كوردستانێ‌ دەست ب دانانا بەرنامە و پلانێن خوە كرینە و ڤەگەڕیانەكا بهێز بۆ ناڤ چالاكیان، لەوما د دووماهی كۆمبوونا خوە دا چەند بڕیار و راسپاردێن گرنگ هەبوون، ژوانا دەستپێكرنا قارەمانیا كوردستانێ‌ ل22ێ‌ مەها بهێت و پارێزگەها دهۆكێ‌ بۆ مێڤانداریێ‌ هاتیە دەستنیشانكرن ئەوا دێ‌ بۆ چار قۆناغ قارەمانی هێتە دانان و هەر پارێزگەهەك و باژێرەك مێڤانداریێ‌ كەت كو بڕیارە ل سەر ئاستێن، تازەپێگەهشتی، لاوان و پێشكەفتیان بۆ هەردو رەكەزێن كوڕ و كچان.
هەروەسان سەرۆكێ‌ ئێكەتیا پایسكلڤانێن كوردستانێ‌ گۆت: ئێك ژ بڕیارێن دی یێن گرنگ دروستكرتنا هەلبژارتێ كوردستانێ‌ بۆ هەر چار ئاستێ‌ دەستنیشانكری و بۆ ڤێ‌ مەرەمێ‌ لژنەكا تایبەت دێ‌ هێتە پێكئینان د ماوێ‌ هەرچار قۆناغێن قارەمانیێ‌ دووڤچوونا یاریزانێن ئێكەم و زیرەك بهێنە كرن پێخەمەت درۆستكرنا هەلبژارتیێ‌ كوردستانێ‌ و بەرهەڤی بۆ هەر قارەمانیەكا داهاتی یا نێڤدەولەتی و ڤەكری بیت ئەڤەژی دێ‌ بیتە پالدەر زێدەتر یاریزانێن هەرێمێ‌ ئاستێ‌ خوە پێشبێخن و ببیتە ئەگەر پێشكەفتن دڤێ‌ یاریێ‌ دا دیاربیت و دەلیڤە بۆ یاریزانێن مە د قارەمانیێن دەرڤە دا بهێتە دان
ل دووماهیێ‌ ناڤهاتی دەستخووش ل لژنا ئۆلمپیا كوردستانێ‌ كر ژبەر كو پشتەڤانیا كار و پلانێن وان كرینە ل دووڤ شیانێن بەردەست و ئەڤچەندە ژی دێ‌ بیتە ئەگەر ل دووڤ پلانێن خوە بشێن ب گەهینە ئەوێ‌ ئارمانجا مە دڤێت.

ئەڤرۆ

لژنەیا فوتسالا كچان ل ئێكەتیا تەپا پێی یا ئیراقێ‌ پارێزگەها دهۆكێ‌ هەلبژارت بۆ ئەنجامدانا كۆپا ئیراقێ‌ یا وەرزێ‌ 2023ێ‌ ئەوا بڕیارە هەڤڕكیێن وێ‌ ل ناڤەراستا مەها بهێت ب پشكداریا نەه یانەیێن كوردستانێ‌ و ئیراقێ‌ بۆ ماوەیێ‌ هەشت رۆژان بهێتە ئەنجامدان.
د.رەشا تالب ئەنداما ئێكەتیا تەپا پێی یا ئیراقێ‌ بۆ دەزگەهێن راگەهاندنێ‌ گۆت: پشتی كۆمبوون لژنەیا فوتسالێ‌ بۆ ئەنجامدانا كۆپا ئیراقێ‌ یا فوتسالێ‌ و یاریگەهێن ڤەكری بڕیار هاتە دان پارێزگەها دهۆكێ‌ وەكو جهەكێ‌ باش و نموونە بۆ مێڤانداریكرنا كۆپا ئیراقێ‌ و ژڤانێ‌ وێ‌ ژی ل 18 هەتا 26 خزیرانا مەها بهێت ب پشكداریا نەه یانەیان ئەو ژی ئافرەتێن دهۆك، زاخۆ، زەورا، جەوییە، ئافرەتێن هەولێر، تلسقۆف، قەرەقۆش، سیناعات كارەبا و ئال بدێر، هەروەسان بڕیار هاتیە دان د قارەمانیێ‌ دا چو یاریزانێن دەرڤەیی ئیراقێ‌ پشكدار نابن ژبۆ بلندكرنا ئاستێ‌ یاریزانێن نافخۆ و بەرهەڤی بۆ قارەمانیێن دەرڤە، دیسان دڤێت ئەو یانەیا یاریزانەكا ل بن ژیێ‌ 20 سالی دا بەلگەنامەیێن پێدڤی یێن یاریزانێ‌ بۆ لژنەیا فوتسالێ‌ بهێتە هنارتن.
ل دووڤ ژێدەرێن نێزیك ژ یانەیا ئافرەتێن دهۆكێ‌ بۆ ئەڤرۆ دیار كریە ئەوان شیانێن دارایی نینن پشكداری كۆپا ئیراقێ‌ بكەن خوە ژ قارەمانیێ‌ ڤەكێشایە ژبەر كو ئەو هاریكاریا ژ پارێزگەها دهۆكێ‌ بۆ یانەیێ‌ دهێت گەلەك یا كێمە و تێرا مووچە و مەزاختیێن تیمێ‌ ناكەت، سەرباری تیما وان یاریزانێن باش هەبوون دو جاران پشكداری خولا كوردستانێ‌ بووینە جارەك ناسناڤ ئینایە و جارەك تر یا دویێ‌ هاتیە، لێ‌ بۆ كۆپا ئیراقێ‌ نەچاربوون خوە ڤەكێشێن سەرباری ئەڤ قارەمانیە دێ‌ ل پارێزگەهێ‌ هێتە كرن.

پشتی روودانێن نە چاڤەڕێ‌ كرن و ئالۆزی و توندوتیژیا دناڤبەرا جەماوەری د دو یاریێن جودا ژ خول و كۆپا كوردستانێ‌ دا ئەوێن ل حەفتیا بۆری هاتینە پێش، ئێكەتیا تەپا پێی یا هەرێما كوردستانێ‌ لژنەك ژ سێ‌ ئەندامێن خوە پێكئیناینە ژبۆ دووڤچوونێ‌ و وەرگرتنا هەمی پێزانین و بەلگەیێن هەردو یاریێن دهۆك و پێشمەرگەیا هەولێر ژ كۆپا كوردستانێ‌ ل یاریگەها شەهید فرانسۆ حەریری هاتیە كرن و دیسان توندوتیژیا یاریا شێلادزێ‌ و باتیفا ژ خولا پلا دو ئەوێن ل حەفتیا بۆری ل یاریگەها بلێ‌ ل باژێرێ‌ سۆران هاتیە كرن.
ژێدەرێن نێزیك ژ ئێكەتیا تەپا پێی بۆ رۆژناما ئەڤرۆ دیار كر ئەڤە بۆ چار رۆژە ڤەكۆلین بەردەوامن ل سەر روودانێن یاریێن ئالۆزی پەیدابووین و چەند بەلگە و گۆتنێن جودا وەرگرتینە و دووڤچوونەكا تەسەل بۆ دهێتە كرن، ژبۆ پشتراستكرنا ئەگەرێن دروست یێن توند و تیژییا یاریگەهان ژلایێ‌ جەماوەری و چەند كەسێن دی و بزانن كی ل پشت ئەڤان روودانا بوو.
هەروەسان هەمان ژێدەری دیار كر پشتی ب دووماهی هاتنا دووڤچوون و كۆمكرنا هەموو بەلگەیان دێ‌ كۆمبوونەكا تایبەت یا ئێكەتیا تەپا پێی هێتە رێكخستن و ل دووڤ رێنما و یاسا دێ‌ بریار هێنە دان و ب توندی دێ‌ ئەنجامدەرێن ڤان روودانا هێنە سزادان و دگەل لایەنێن پەیوەندیدار چەند پێنگاڤەكێن دی هەبن ژبۆ پاراستنا گیانێ‌ وەرزشی و پشتەڤانیەكا شارستانی، هیچ رەنگەكی ناهێلین هندەك كەس ببنە ئەگەرێن تێكدانا چالاكیێن وەرزشی یێن كوردستانێ‌.

پشتی ب دووماهی هاتنا وەرزێ‌ 2022-2023 یێ‌ خولا پلا نایابا ئیراقێ‌ یا باسكێت بۆلێ‌ ب دەستڤەئینانا تیما یانەیا نەفت ناسناڤێ‌ قارەمانیێ‌ و زاخۆ ل رێزا سێیێ‌ هاتی، باشترین یاریزانێن نافخۆ و پیشەكار هاتنە دەستنیشان كرن ئەوێن ل دووڤ ئارمار و هژمارا پۆینتێن هاتنە تۆمار كرن د لیستەیا یاریزانێن خولێ‌ دا و بڤی رەنگی بوون:
ل سەر ئاستێ‌ یاریزانێن نافخۆ، ئیهاب حسێن ژ یانەیا دیفاع ئەلجەویە باشتر یاریزان 481 پۆینت بۆ تیما خوە ئینابوون، یاریزانێ‌ یانەیا زاخۆ موراد عەلی ب 475 پۆنیت بۆ وەرزێ‌ ئەڤسالە ل رێزا دویێ‌ هات، ل سەر ئاستێ‌ پیشەكاران، یاریزانێ‌ نەفت ئەنتۆان ویگینس ب تۆماركرنا 830 پۆنیت یێ‌ ئێكێ‌، هەردو پیشەكارێن زاخۆ ئاساك بانكس ب 747 پۆنینت و كۆرتنی بیلگێر ب 629 پۆینت (ئانكۆ تۆماركرنا خالان) رێزێن دویێ‌ و سێیێ‌ هاتن.
ل دۆر ڤێ‌ یەكێ‌ جوتیار عەلی هاریكارێ‌ راهێنەرێ‌ زاخۆ ئەڤ رێزبەندیە ب دەستكەفت دا زانین و گۆت: د وەرزێ‌ ئەڤ سالە دا تیما یانەیا زاخۆ ل بن گەلەك گڤاشتنان شیایە ببیتە ئێك ژ هەڤڕكێن ناسناڤی و باشترینێن ئیراقێ‌ و دەستڤە ئینانا یاریزانێن مە رێزبەندیێن دویێ‌ و سێیێ‌ دهێتە هژمارتن دەستكەفت، ژبەركو ئەو رێزبەندیە ب ئامارێن باوەرپێكریە كو ل دووڤ لژنەكا دادڤانان تۆماركرینە، ئەڤە ژی وێ‌ چەندێ‌ دیار دكەت كو زاخۆ بهێز بوو، هەكە كاودانێن دارایی باشتر لێهاتن دێ‌ ئارمانجا ناسناڤی رژدی بیت بۆ مە، دەستخووشیا یاریزانان و سۆپاسیا كارگێریێن یانێ‌ و سەرپەرشتێ‌ ئیدارا سەربەخوە گۆهدار شێخۆ دكەم ئەوێ‌ هەردەم پشتەڤان بووی.

ئەڤرۆ

دەنگۆباسێن رۆژنامەڤانی ل ئۆرۆپا دۆپات دكەن كو یاریزانێ‌ كورد خەلكێ‌ كوردستانا رۆژئاڤا مەحموود داود یاریزانێ‌ یانەیا بۆرۆسیا دۆرتمۆند یا ئەلمانی نێزكی خولا ئنگلتەرایێ‌ بوویە.
ل دووڤ داخویانیا رۆژنامەڤانێ‌ بەرنیاس فابریزۆ رۆمانۆ چوونا یاریزانێ‌ ڕەڤەندا كورد و یانەیا بۆرۆسیا دۆرتمۆند بۆ یانەیا برایتۆن ئێك ژ یانەیێن خولا پرێمەرلیگ یا پلا ئێك ب شێوەیێ‌ دەستپێكی رێكەفتن هاتیە كرن و بڕیار هاتیە دان مێركاتۆیا هاڤینێ‌ گرێبەستێ‌ دگەل یانەیا ئنگلتەرایێ‌ ئیمزا بكەت پشتی كو دبیتە یاریزانێ‌ ئازاد و یانەیا بۆرۆسیا چو ماف ل سەر نامینن و دهێتە پێشبینیكرن ل خزیرانا بهێت گرێبەستا وی ب دووماهی بهێت.
بۆ زانین مەحمۆد داود ژ دایكبوویێ‌ 1996ێ‌ خەلكێ‌ باژێرێ‌ عامۆدا یا پارێزگەها حەسەكێ‌ ژ دایكبوویە، یاری بۆ یانەیێن بۆرۆسیا مۆنشنگلادباخ، فۆرتۆنا دۆسلدۆرف و بۆرۆسیا دۆرتمۆند كریە و یاریزانێ‌ هەلبژارتیێ‌ ئەلمانیا بۆ ژیێ‌ بن 21ێ‌ سالی دا كریە.