ئەڤرۆ

بڕیارە ئەڤرۆ ل دەمژمێر چارێ‌ ئێڤاری تیما باسكێت بۆلا یانەیا زاخۆ ل هۆلا گرتیا بنگەهێ‌ لاوان مێڤانداریا یانەیا نەفت یا بەغدایی بكەت ژ چارچووڤێ‌ قۆناغا پلەیی ئۆڤ و یاریا سێیێ‌ یا دەربازبوون بۆ دووماهیا خولا پلا نایابا ئیراقێ‌.
د یاریا ئێكێ‌ یا كوڕێن خابۆری ژ قۆناغا پلەیی ئۆڤ دا شیابوون سەركەفتنەكا گرنگ ل سەر نەفتێ‌ بینن ب 83 خالان بەرانبەر 75ێ‌ خالان، یاریا ئەڤرۆ یا زاخۆ گەلەك گرنگە و سەركەفتن دێ‌ دەلیڤەكا زێرین بۆ دووماهیا خولێ‌ پەیداكەت و بۆ یاریا چارەنڤیس یا چارێ‌ ئەوا بڕیارە ل دەستپێكا هەیڤا بهێت باژێرێ‌ بەغدا بهێتە كرن دێ‌ ڤەبڕ بیت بۆ پلێتا یاریا دووماهیێ‌.
ل دور دووماهی بەرهەڤیێن تیما زاخۆ جۆتیار عەلی بۆ رۆژناما ئەڤرۆ دیار كر یاریا ئەڤرۆ بۆ وان چارنڤیسە و دڤێت سەركەفتنێ‌ بینن هەكە نە دێ‌ پلێتا یاریا دووماهیێ‌ ژ دەست دەن و گۆت: د یاریا بۆری دا ئەم شیاین ل سەر ئەردێ‌ وێ‌ سەركەفتنێ‌ بینن ئەڤە ژی پالدەرەكێ‌ بهێزە بۆ مە یا ئەڤرۆ سەركەفتنێ‌ دۆبارە بكەین، ئەم دێ‌ دناڤ ئەرد و جەماوەرێ‌ خوە دا كەین و گیانێ‌ كۆم و زاخا یاریزانان بۆ ڤێ‌ یاریێ‌ یا بلندە سەرباری كاپتنێ‌ تیمێ‌ جەگەر عەلی ژبەر هنگاڤتنێ‌ نەشێت بكەت لێ‌ ئەم رژدین بۆ ئارمانجا خوە سەركەفتنا دویێ‌ بینن ژبۆ نێزیك بوون بەر ب یاریا دووماهیێ‌.
تیما زاخۆ دەربازبوو قۆناغا پلەیی ئۆڤ و چارگۆشەیا زێرین پشتی 16 سەركەفتن بەرانبەر حەفت خوسارەتی تۆماركرین ل رێزا چارێ‌ هات ب38 خالان دگەل زێدەكرنا خالەكا تیما تازەپێكەهشتیان بوویە 39 خال ب هەڤپشكی دگەل یانەیێن نەفت، شورتە و حەشدا شەعبی دەربازبوویە كو دبیتە جارا ئێكێ‌ د دیرۆكا خوە دا تیما زاخۆ بگەهیتە ڤێ‌ قۆناغێ‌.

ئەڤرۆ

كارگێریا یانەیا دهۆك ب فەرمی دەست ژ كاركێشانا راهێنەرێ‌ تیما خوە یا تەپا پێی سلێمان رەمەزان رەدكر و دۆباری باوەری دایێ‌ بۆ یاریێن بهێت یێن خولا پلا نایابا ئیراقێ‌.
د كۆمبوونا خوە یا ئاسایی دا كارگێریا یانێ‌ بڕیاردا راهێنەر سلێمان رەمەزان بەردەوامیێ‌ ب دەتە كارێ‌ خوە وەكو راهێنەرێ‌ تیمێ‌ و دەست ژ كاركێشانا وی هاتە رەدكرن ئەوێ‌ پشتی تیما وی خوسارەت بوویی دگەل دگەل یانەیا تەلەبە ب دو گۆلان بێ‌ بەرانبە ژ چارچووڤێ‌ گەڕا 25ێ‌ یا خولا پلا نایابا ئیراقێ‌ ئەوا ل دوشەمبیا بوری ل یاریگەها یانەیا دهۆك هاتیە كرن و دەرئەنجامێ‌ گڤاشتنێن چەندەك ژ جەماوەرێ‌ یانێ‌ ل سەر راهێنەرێ‌ تیمێ‌.
د راگەهاندنەكا فەرمی یا یانێ‌ دا هاتیە كو راهێنەرێ‌ ناڤهاتی جهێ‌ شانازیا هەمی خەلكێ‌ پارێزگەها دهۆكێ‌ یە و ئەوا دگەل یانەیا دهۆكێ‌ كر دبیت گەلەك كەسان ئەو پێشبینی نەدكر و دڤێت بهێتە زانین ئەو ئەگەرێ‌ سەرەكی یێ‌ دەربازبوونا تیمێ‌ یە بۆ پلا نایاب و ئەنجامێن وان د خولێ‌ دا جهێ‌ رازەمەندیا كارگێریێ‌ نە و پلانێن باشتر هەنە بۆ وەرزێ‌ بهێت.
هەروەسان دیاركریە ل سەر گەهاندنا چەندین نامە یێن پشتەڤان و حەز ژێكەرێن یانێ‌ بۆ ئەوان هاتین هەمی ئەندامێن كارگێریێ‌ ب باشی دزانن كو دەست ژ كاركێشانا سلێمان رەمەزان بهێتە رەدكرن و زێدەتر پشتەڤانیا كوڕێ‌ پارێزگەها دهۆكێ‌ بكەین تایبەت د كاودانێن نوكە یێن هەستیار دا.

ئەڤرۆ

قەیس وەیس:

سەرۆكێ‌ ئێكەتیا تەپا پێی یا كوردستانێ‌ د كۆنگرەیێ‌ رۆژنامەڤانی دا دیار كر ئەو پێدڤی ب كۆژمەیێ‌ ملیۆنەك و 800 هزار دۆلاران هەنە ژبۆ مەزاختیێن مێڤانداریكرنا قارەمانیا كۆنیفا یا هەرێما ل سالا 2024ێ‌، ئەوا بڕیارە 16 هەلبژارتیێن هەرێمان ل خزیرانا سالا بهێت پشكداریێ‌ تێدا بكەن.
زێدەتر تارق عەبدولرەحەمان گۆت: بەری ئەم بادەكا كوردستانێ‌ بۆ مێڤانداریكرنا مۆندیالا هەرێمان پێشكێشی ئێكەتیا كۆنیفایێ‌ بكەین مە راپۆرتەكا تەسەل بۆ حوكمەتا هەرێما كوردستانێ‌ هنارت بوو و رازەمەندی ل سەر هاتبوو دان كو مەزاختیێن وێ‌ دگەهنە ملیۆنەك و 800 هزار دۆلار و گەشبینن دێ‌ ئەڤ كۆژمە هێتە پارڤەكرن ژبەركو سەركەفتنا وێ‌ دێ‌ بۆ هەرێما كوردستانێ‌ ڤەگەڕێت و ئەم ب هیڤی نە دەستەكەفتێ‌ 2012ێ‌ یێ‌ كۆپا كۆنیفایێ‌ دۆبارەبكەین.
ژلایەكێ‌ دووڤە ناڤهاتی دیاركر ژبۆ پێكهئینانا هەلبژارتیێ‌ كوردستانێ‌ دێ‌ دەمەكێ‌ نێزك دا دەست ب دووڤچوونێ‌ كەن لێ‌ یا گرنگ ئەو پێدڤی ب راهێنەرەكی نە تایبەت یێ‌ بیانی بیت ژبەركو دێ‌ پشكداریا مە بۆ هەڤڕكییا ناسناڤی بیت سەرباری قارەمانیەكا بهێز بیت ژبەر هەبوونا هەرێمێن ل وەلاتێن فرەنسا، رۆسیا، مەكسیك، هند، سوید، فلبپین، ڤێتنام خودان شیانن و مە باوەری ب یاریزانێن خوە هەنە دێ‌ شێن باشترین ئاست و ئەنجام دەستڤە ئینن.

ئەڤرۆ

زاخۆ، عەلی حاجی:

ب گورەیی زانیاریێن ب دەست رۆژناما ئەڤرۆ کەفتین پشتی وان ئەنجامێن لاواز یێن یانه‌یا زاخۆ د خولا نایابا ئیراقێ یا تەپاپێی دا تومار کرین و نەرازیبونا جەماوەری لدووف دا هاتی،سەروکێ یانه‌یێ دەست ژکار کێشانا خوە راگه‌هاندیه‌.
ژێدەرەکێ باوەرپێکری بۆ ئەڤرۆ دیار کر پشتی یاریا تیما زاخۆ یا تەپا پێی بەرامبەر یانه‌یا ئه‌لقاسم وەکهەڤ بوویی جەماوەرێ یانێ خوە نەرازیکر ل بەردەم یاریگەها زاخۆ داخازا دەست ژ کارکێشانا دەستەکا کارگێریا یانێ و راهێنەرێ تیمێ کرن،سەروکێ یانه‌یێ بلند شه‌فیق دگەل جەماوەرێ یانێ کومبوو و بۆ جەماوەری دیار کر کو وی دەست ژ کارکێشایە و ب گورەیی ئاخڤتنێن وی ژێدەری ژی کو ژبەریا هەیڤەکێ یە راهێنەرێ نوکە یێ یانه‌یا زاخۆ حەیدەر عەبدولئەمیری دەست ژ کارکێشانا خوە پێشکێشی دەستەکا کارگێریا یانێ کربوو لێ رەزامەندی ل سەر نەهاتە دان.
هەر وی ژێدەری گۆت ژی: هەکە سەرۆکێ یانێ ب شێوەیەکێ فەرمی ڕاگەهاند و دەست ژ کارێ خوە کێشا ئەندامێن یانێ ژی دێ دەست ژ کارێ خوە کێشن و بەردەوام نابن وەکو ئەندامێن دەستەکا کارگێریێ،لێ هێشتا ب شێوەیەکێ فەرمی دەست ژ کارکێشانا سەروکێ یانێ ژلایێ دەستەکا کارگێریێ ڤە نەهاتیە قەبیل کرن.

ئەڤرۆ

هەردو یانەیێن دەڤەرا بەهدینان تیما یانەیا دهۆك و یانەیا زاخۆ مفا ژ ئەرد و جەماوەرێ‌ خوە وەرنەگرتن پشتی دگەل مێڤانێن خوە ب خوسارەتی و وەكهەڤی یاری ب دووماهی ئیناین، ژ چارچووڤێ‌ هەڤڕكیێن گەڕا 25ێ‌ یا خولا ئیراقێ‌ یا تەپا پێی بۆ یانەیێن پلا نایاب هاتیە كرن.
• خوسارەتیا دهۆكێ‌ یا چاڤەڕێ‌ كری بوو؟
تیما تەپا پێی یا یانەیا دهۆك ب دو گۆلان بێ‌ بەرانبەر دگەل مێڤانا خوە یانەیا تەلەبە یا بەغدایی خوسارەت بوو، دیاریا واندا ئەوا ل دووشەمبیا بۆری یاریگەها سەرەكی یا یانێ‌ هاتیە كرن، هەرچەندە یاریزانێن دهۆكێ‌ ئاستەكێ‌ باش نیشان دا و چەندین دەلیڤەیێن گۆلكرنێ‌ ژ دەستدان ژوانا پەنەلتیا یاریزان وەلید سەلمان د خولەكا 54ێ‌ دا، ئەڤ خوسارەتیە ل دووڤ ئاست و شیانێن هەردو یانەیان بۆ دهۆكێ‌ یا چاڤەڕێ‌ كری نەبوو لێ‌ ئەو یاریزان و بەرهەڤیێن تیما تەلەبە هەین و رژدیا وان بۆ هەڤڕكیا سەرێ‌ لیستێ‌ بەرۆڤاژی یێن دهۆكێ‌ بوون، دەرئەنجامێ‌ گڤاشتنا چەند ژ جەماوەرەكێ‌ یانێ‌ بوو ئەگەر راهێنەر سلێمان رەمەزان بڕیارا دەست ژ كاركێشانا خوە پێشكێشی كارگێریێ‌ بكەت ئەوا لێ‌ نە هاتیە قەبولكرن.
• خەلەتیا گۆلپارێزی زاخۆ ژ سەركەفتنێ‌ بێ‌ بەهركر
تیما یانەیا زاخۆ نەشیا سەركەفتنا خوە ب پارێزیت پشتی ب گولەكێ‌ دگەل یانەیا ئەلقاسم وەكهەڤبوویی، د یاریا وان دا ئەوا ل هەمان رۆژ یاریگەها زاخۆ یا نێڤدەولەتی هاتیە كرن، هەرچەندە تیما زاخۆ شیان گڤاشتنێن باش بكەن و گۆلا ئێكێ‌ د خولەكا 30ێ‌ دا ژلایێ‌ یاریزانێ‌ خوە عومەر مەنسۆری بینن لێ‌ پشتی دو خولەكان ژ خەلەتیەكا گۆلپارێز محەمەد سالح تیما مێڤان شیان گۆلا وەكهەڤیێ‌ بینن، د دەمێ‌ مایی یی یاریێ‌ دا یاریزانێن زاخۆ بەردەوامی دا بزاڤێن خوە لێ‌ چ ژ ئەنجامێ‌ یاریێ‌ نە هاتە گوهۆڕین و یاری ب وەكهەڤی ب دووماهی هات.
• بۆچی رێژەیا جەماوەرێ‌ دهۆك و زاخۆ كێم بووینە؟
هەرچەندە ل دەستپێكا خولێ‌ و هەتا یاریێن ڤێ‌ دووماهیێ‌ جەماوەرەكێ‌ ئێكجار زوور دهاتنە پێش یاریێن دهۆك و زاخۆ ل باژێرێن خوە بۆ پشتەڤانیا تیمێن خوە یێن تەپا پێی، لێ‌ د ئەڤە بۆ ماوەیێ‌ سێ‌ یاریە ئەوێن دناڤ یاریگەهێن خوە دا كەن رێژەیا جەماوەری بەر ب كێم بوونێ‌ ڤە دچیت، ل گۆرەیی دووڤچوونا مە كو ژبەركو ئاست و ئەنجامێن هەردو تیما لاواز بووینە جەماوەرێ‌ وان وەكو نەرازیبوونەك پرانیا وان چوونا خوە بۆ ناڤ یاریگەهێ‌ هەلاویستینە.
• ئامارێن هەردو یانەیان د مەترسی دارن
تیما دهۆكێ‌ ب تنێ‌ ل سەرجەمێ‌ 10 یاریێن بۆری د خولێ‌ دا پێنج خوسارەتی ئیناینە دگەل یانەیێن كارەبا، شورتە، نەفت، تەلەبە و هەولێر، سێ‌ وەكهەڤی دگەل حدوود، زەورا و نەفت ئەلوەسەت و دو سەركەفتن دگەل نەفت میسان و دیوانیە، ئانكو سەرجەمێ‌ 30 خالان نەه خال دەستڤە ئیناینە، ژلایێ‌ خوەڤە تیما زاخۆ ژ سەرجەمێ‌ 10 یاریان دو سەركەفتن دگەل تەلەبە و كەرخ، چار وەكهەڤی بەرانبەر یانەیێن هەولێر، سیناعە، زەورا و ئەلقاسم، چار خوسارەتی بەرانبەر جەویە، نەفت بەسرا، نەورۆز و نەجەف، ژ سەرجەمێ‌ 30 خالان بتنێ‌ 10 خال كۆمكرینە.

ئەڤرۆ

هەرهین محەمەد:

داخویانیەكێ‌ دا ئومێد ئەحمەد جەبار بۆ رۆژنامەیا ئەڤرۆ دیاركر ئەوی دەست ژ یاریێ‌ بەردایە و ئێدی نەیێ‌ بەرهەڤە یاریێ‌ بۆ چو یانەیان بكەت، چونكو د ئەڤ سالەدا تووشی گەلەك هنگافتنان بوویە و گەلەك دەلیڤە ژدەست داینە و ئاستێ‌ وی هاتیە خوارێ‌.
زێدەتر ناڤهاتی خویاكر پرانیا یاریزانێن خێزاندار نەشێن پشت بەستنێ‌ ل سەر وی مووچەی بكەت ئەوێ‌ ژلایێ‌ یانەیێ‌ بۆ دهێتە دابینكرن، چونكو نە مووچەكێ‌ بەردەوام و یانەیان ژی ئەو كێشە هەیە و گۆت: بەری دو سالان بوویمە خودانێ‌ باوەرناما سیێ‌ ب راهێنەریێ‌ و ئەگەر دەلیڤە پەیدابوو دێ‌ بمە راهێنەر، لێ‌ وەكو یاریزان ب چ رەنگان یاریێ‌ ناكەم پشتی چەند سالێن بوری دا من یاری بۆ یانەیا گارە، پێشمەرگەیا هەولێر، دهۆك و تەناهی كریە و خوە جارەكێ‌ ژی من كارتا سۆر نە وەرگرت و ئەڤە ژی بۆ من دەستكەفتەكا مەزنە و من ل ڤان یانەیان دەستكەفتێن مەزن ژی هەبووینە.
ل دووماهیێ‌ ئومێد ئەحمەد گۆت: حەز دكەم یانەیێن مە گرنگیێ‌ بدەنە یاریزانێن خوە هەتا رادەكی یانە هاریكار نینن دگەل یاریزانێن خوە، دەمی یاریزان یاریێ‌ دكەت دەست ژ هەموو كارێن دی بەردەت و بتنێ‌ گرنگیێ‌ ب تەپاپێی د دەت و ئەگەر داهاتەك و چاڤدانەكا باش نەبیت یاریزانی ئەو ئاستە نابیت یاریەكا باش و جوان پێشكێش بكەت.