ئەڤرۆ
سالار محەمەد دۆسكی:
رێڤەبەرێ رێكخستنا پلێتێن ئاهێن خوارنێ ل پارێزگەها دهۆك ئاشكراكر، دەست ب دابەشكرنا پلتێن ئاهێن خوارنێ یێن ئەلكترونی كریە و هەر كەسەك دشێت پشتی وەرگرتنێ كارتا خوە ل بنگەهێن دەست نیشانكری كارا بكەت و گۆت: هەتا 1100 خێزانان ل دهۆك هەنە كارتا ئەلكترونی هەنە، لێ ئەرزاقێ وان ناهێتەدان، چونكە مووچێ وان زێدەترە ژ ملیون و نیڤان.
حسێن سەبری، رێڤەبەرێ رێكخستنا پلێتێن ئاهێن خوارنێ ل پارێزگەها دهۆكێ بۆ رۆژناما ئەڤرۆ گۆت:281 هزار پلێتێن ئەلكترونی ژ بەغدا گەهشتینە پارێزگەها دهۆكێ، نوكە كار ل سەر دهێتەكرن ل سەر بریكارێن بەلاڤكرنا ئاهێن خوارنێ بهێنە دابەشكرن ل دووڤ قەزا و ناحیە و تاخان، دا بارسفكی بۆ خەلكی هەبیت و ئەڤان رۆژان دێ ژ بنگەهێ 231 ئانكو تاخێ بەرۆشكێ دێ دەست پێ كەت و 250 فەرمانبەر سەر ب وەزارەتا بازرگانیا هەرێمێ ل گەل فەرمانگەها پارێزگەها دهۆك دێ ب ڤی كاری رابن و گەلەك هاریكارن.
زێدەتر گۆت: هەر خێزانەكا پلێتا خوە وەربگریت دێ قەستا ڤان فەرمانبەران كەت كو ل 44 جهان هاتینە دەست نیشانكرن و ئەڤ فەرمانبەرە دێ پلێتا وان كارا كەن، ئانكو دێ ل كومپیوتەری دەن و ئەڤە دێ بۆ ماوێ دو هەیڤان یا بەردەوام بیت كو دشێت سەرەدانێ بۆ بكەت و ب تنێ سێ خولەك بۆ پێنچ خولەكان بۆ هەر خێزانەكێ تێرا هەنە و دڤێت سەرۆك خێزان یێ بەرهەڤ بیت ل گەل پێدڤیێن وی یێن رەسەن ئانكو ئەسلی.
رێڤەبەرێ رێكخستنا پلێتێن ئاهێن خوارنێ ئەو ژی گۆت: پشتی دو هەیڤ دەربازدبن دێ گەلەك كار ب ساناهی كەڤیت، نەفەرەك ل خێزانێ بهێتە زێدەكرن یان ئێك بهێتە كێمكرن یان خوە ب ڤەگوهێزیت یان بچیتە پارێزگەهەكا دی دێ ب رێكا ڤێ كارتێ كارێ خوە كەی و سەرەدانا چ فەرمانگەهێن حوكمەتێ ناكەت، بەلكو دێ ل مالا خوە ڤی كاری كەت.
هێشتا گۆت: هەتا 1100 خێزانان ل دهۆك هەنە كارتا ئەلكترونی هەنە، لێ ئەرزاقێ وان ناهێتەدان، چونكە مووچێ وان زێدەترە ژ ملیون و نیڤان، یان بازرگانەكە ئەرزاقی ناوەرگرن و ناڤێن وان ژی هاتینە و دێ هێنە راگەهاندن دا بهێن پلێتێن خوە وەربگرن.
رێڤەبەرێ رێكخستنا پلێتێن ئاهێن خوارنێ ل دهۆكێ ئەو ژی دیاركر كو ل هەر سێ هەیڤێن دەسپێكێ ل ئەڤ سالە شیاینە 1500 خێزانان زێدە بكەن، ئەو ژی حالەتێن پێكئینانا خێزانێ و جودابوون بووینە، هەردو حالەتێن پێكئینانا خێزانێ و جودابوونێ بەرەف زێدەبوونێ نە، چونكو خەلكێ زێدەبووی و باژێرێ مەزن بووی.
هێشتا گۆت: گەلەك خێزانێن كوردان ژ دەرڤە دهێنە كوردستانێ و پێشكێش دكەن و ئێدی ناچنە دەرڤە و مە قەت باوەرنە دكر ب ڤێ رێژێ دێ خەلكێ مە قەستا كوردستانێ كەت و ئێدی ناچیتە دەرڤە و تیمێن رێڤەبەریێ سێ جاران سەرەدانا وێ خێزانێ دكەن ب رێكا بریكارێ ئەرزاقی و دبیت ئەڤ خێزانە نەچوویە و هەمان دەم ل دووڤ سیستەمێ وەزارەتا بازرگانی ئەو كەسێ ل دەرڤە ژی ماف هەیە پلێت هەبیت لێ ئەرزاق نینە، بەلێ هەكە هات و دیاركر كو ناچیتە دەرڤە ب رێكا تیمەكا رێڤەبەریێ دێ دووڤچوون ل سەر هێتەكرن و دێ ئەرزاق ژی بۆ هێتەدان وەك وەلاتیەكێ عیراقی و ئەڤە مافەكێ وی یە.
حسێن سەبری ئەو ژی گۆت: رێڤەبەریا مە ل پلا ئێكێ دهێت ل عیراقێ لێ وەزارەتا بازرگانیا عیراقێ نەدڤیا ئەڤ ناڤە بۆ دهۆك بیت، رابوو كرینە هژمارە دوو و نەجەف كرە هژمارە ئێك و ئەڤە دەلیڤەیە خەلكێ مە كارتێن خوە كارا بكەن و ئێدی كار دێ گەلەك ب ساناهی كەڤیت، گرنگە وەلاتیێ مە رۆژا ئێكێ كارتا خوە وەربگریت هەر ئێكسەر بچیت كارتا خوە كارا بكەت و قەستا بنگەهێن دەست نیشانكری بكەت.
نيشاندان