ئەڤرۆ

دهێتە چاڤەڕێ‌ كرن ل ئەینی و شەمبیا بهێت هەر چار یانەیێن كوردستانێ‌ یاریێن خوە یێن گەڕا 21ێ‌ ژ چارچووڤێ‌ خولا پلا نایابا ئیراقێ‌ یا تەپا پێی ئەنجامبدەت.
دهۆك دێ‌ بەرانبەری دووماهی تیما رێزبەندیێ‌ بیت
بڕیارە رۆژا ئەینیا بهێت دەمژمێر 6:15 شەڤ تیما تەپا پێی یا یانەیا دهۆك د ئەركەكێ‌ ب سانەهی دا مێڤانداریا یانەیا دیوانیە د ناڤ ئەرد و جەماوەرێ‌ خوە دا بكەت، ئەلهۆیێن چیا گەشبینن دۆبارە سەركەفتنا خوە ل سەر تیما مێڤان بینن ئەوێن پشتی بۆرینا 20 یاریان ب تنێ‌ ئێك سەركەفتن هەیە و 16 خوسارەتی و سێ‌ وەكهەڤی ب شەش خالان رێزا 20ێ‌ و دووماهیێ‌ دهێت، دیارە هیڤیێن مانا خوە د خولێ‌ دا لاواز بووینە لێ‌ دێ‌ بزاڤێ‌ كەت ب ئەنجامەكێ‌ باش ژ هەرێما كوردستانێ‌ ڤەگەڕێتە باكۆرێ‌ ئیراقێ‌، تیما دهۆك پشتی د یاریا بۆری دا دگەل شورتە خوسارەت بوویی ب گۆلەكێ‌ دێ‌ هەموو بزاڤان كەت جەماوەرێ‌ خوە ئاشتبكەت و ڤەگەڕێتە زنجیرا سەركەفتنا و جهێ‌ خوە ل رێزا شەشێ‌ پارێزیت.
هەولێر ب سەرپەرشتیا راهێنەرێ‌ نوو دێ‌ بزاڤێن سەركەفتنا دویێ‌ كەت
تیما یانەیا هەولێر ب ژڤانە رۆژا ئەینی دەمژمێر چارێ‌ ئێڤاری ببیتە مێڤانا یانەیا كارەبا ل یاریگەها زەورا ئێك ژ یاریێن بهێز بۆ تیما قەلا و منارە ئەوا نوكە ب كۆمكرنا 22 خالان رێزا14ێ‌ دهێت، یانەیا كوردستانێ‌ دێ‌ بۆ یاریا دویێ‌ ب سەرپەرشتیا راهێنەرێ‌ خوە یێ‌ نوو عەباس عوبێد بزاڤێ‌ كەت سێ‌ خالێن دی ب دەستڤە بینت، سەرباری باش دزانیت تیما مێڤاندار ئێك ژ هەسپێ‌ رەش یێ‌ خولێ‌ یە ئەوا 41 خال كۆمكرین و رێزا سێیێ‌ دهێت و هەڤڕكیێ‌ بۆ سەرێ‌ لیستێ‌ كەت، یاری بزەحمەتە لێ‌ دبیت پلان و شێوازێ‌ یاریا راهێنەرێ‌ نوو یێ‌ هەولێرێ‌ ڤەگەڕینتە رێزێن پێشیێ‌.
نەوروز دێ‌ ل بەغدا بۆ سێ‌ خالێن یاریێ‌ جەنكیت
ژلایەكێ‌ دووڤە هەر ل ئەینیا بهێت تیما یانەیا نەوروز دێ‌ هەموو بزاڤان كەت د هەیڤا هەلكەفتێن نەوروزێ‌ دا سەركەفتنا دویێ‌ بینت دەمێ‌ دبیتە مێڤانا یانەیا كەرخ ل باژێرێ‌ بەغدا، د حەفتیا بوری دا سێ‌ خال ژ مێڤانا خوە نەفت ئەلبەسرا وەرگرتبوون، نوونەرا دی یا كوردستانێ‌ د نوكە دا ل رێزا 12 دهێت ب كۆمكرنا 25 خالان، بەرانبەری وێ‌ كەرخ رێزا11ێ‌ دهێت ب26 خالان.
زاخۆ بەرانبەر سیناعە بۆ دۆپاتكرنا سەركەفتنێ‌
ل رۆژا شەمبیی رێكەفتی 18ێ‌ ئادارێ‌ تیما یانەیا زاخۆ دێ‌ ل باژێرێ‌ بەغدا بیتە مێڤانا یانەیا سیناعە دەمژمێر سێیێ‌ ئێڤاری ژبۆ دۆپاتكرنا سەركەفتنا خوە یا گەڕا ئێكێ‌ و بەردەوامی بەر ب رێزێن پێشتر، كوڕێن خابووری ئەوێن رێزا 13ێ‌ ب كۆمكرنا 23ێ‌ خالان، بەرانبەری وێ‌ یانەیا مێڤان بتنێ‌ 12 خال هەنە و رێزا 19ێ‌ و بەری دووماهیێ‌ دهێت، ئەڤ یاریە دەلیڤەكە بۆ زاخۆ سێ‌ خالێن دی ل سەر رێزبەندیا خوە زێدەكەت سەرباری ئەركێ‌ وێ‌ ب سانەهی نابیت بەرانبەری تیمەكێ‌ دێ‌ هەموو بزاڤان كەت بۆ سەركەفتنێ‌ پێخەمەت خوە قۆرتالكرن ژ رێزبەندیا دووماهیێ‌.
یانەیا دهۆك ب سێ‌ ملیۆن دیناران هاتە سزادان
ل دووڤ بڕیارا ئێكەتیا تەپا پێی یا ئیراقێ‌ و دەرئەنجامێ‌ روودان و سەرپێچیێن رێنمایان د یاریا دهۆك و زەورا ژلایێ‌ هندەك ژ جەماوەرێ‌ یانەیا دهۆك ب كارئینانا لێزەری دژی یاریزانێن یانەیا زەورا و كارئینانا یاریێن ئاگری و هاڤێتنا بتلێن ئاڤێ‌ بۆ ناڤ یاریگەهێ‌، دهۆك ب كۆژمەیێ‌ سێ‌ ملیۆن دیناران هاتیە سزادان و دڤێت بۆ ماوێ‌ 72 دەمژمێران سزایا خوە یا دارایی بۆ ئێكەتیا تەپا پێی فرێكەت هەر ژ رۆژا بڕیارێ‌ ئەوا ل دووشەمبیا بۆری هاتیە بەلاڤكرن.

غیاس خالد:

ب فەرمی دەستەكا گشتی یا یانەیا دینارتێ‌ بۆ چار سالێن بهێت هاتە دەستنیشانكر، پشتی د پرۆسێسا هەلبژارتنان دا ئەوا ل هۆلا كۆنگرەیان ل باژێرێ‌ دینارتێ‌ ب پشكداریا 147 كەسان ئەندامێن دەستەكا گشتی بەرهبووین، ئەوا ب سەرپەرشتیا رێڤەبەریا وەرزشی ل دهۆكێ‌ ب شێوەكێ‌ سەركەفتیانە بڕێڤەچوویی، پشتی دەرگەهێ‌ بەربژاركرنێ‌ بۆ ئەندامێن نوو هاتە ڤەكرن 11 كەسان خوە بەربژاركر، دووڤدا پرۆسێسا دەنگدانێ‌ هاتە ئەنجامدان و دەست ب ڤاڤارتنا وان ژی هاتە كرن، ئەوا لدووڤ هژمارا ئامادەبوویان رێژەیا دەنگێن پێدڤی بوو كارگێریێ‌ هاتینە دیاركرن كو بتنێ‌ حەفت كەس هاتنە هەلبژارتن بڤی رەنگی.
رەشید جومعە 121دەنگ وەكو سەرۆكێ‌ یانێ‌ هاتە هەلبژارتن، خەلیل حسێن 116 دەنگ جێگر، بێدار لەزگین 127 دەنگ سكرتێرێ‌ یانێ‌، عمران موسا 117 دەنگ ئەمیندارێ‌ دارایی، هەر ئێك ژ كاروان سمۆ126 دەنگ، سەربەست عەبدوللا 119 دەنگ، شاكر عەبدولرەحمان 85 دەنگ وەكو ئەندام هاتنە هەلبژارتن.
سەفەر جەعفەر رێڤەبەرێ‌ رێڤەبەریا وەرزشی ل دهۆكێ‌ بۆ ئەڤرۆ گۆت: هەلبژارتن بشێوەكێ‌ دیمۆكراسی و رێكخستی هاتینە كرن، ئەڤ هەلبژارتنە ل دووڤ بەرنامێ‌ دیاركری بۆ ئەوا یانەیێن نوو و هەلبژارتنێن خوە نەكرین، سۆپاسیا رێڤەبەرێن پەیوەندیدار دناڤ هولێ‌ دا ئامادەبووین ژبۆ سەركەفتنا پرۆسێسا هەلبژارتنان.

ئەڤرۆ

بڕیارە ئەڤرۆ شاندەكێ‌ ئێكەتیا تەپا پێی یا هەرێمێن جیهانی ب سەرپەرشتیا سەرۆكێ‌ ئێكەتیا كۆنیفایێ‌ یێ‌ سویدی پێر ئەندرێس بیلند و هەردو جێگرێن وی یێ‌ هنگاری كریستۆف ڤێنیزێل و یێ‌ رۆسیایێ‌ دیمێتری پاگاڤا سەرەدانا پارێزگەها دهۆكێ‌ بكەن ژبۆ دووڤچوون بادەكا هەرێما كوردستانێ‌ بۆ مێڤانداریا قارەمانیا هەرێمان 2024ێ‌.
ئازاد محەمەد ئەندامێ‌ ئێكەتیا تەپا پێی یا كوردستانێ‌ بۆ رۆژناما ئەڤرۆ گوت: ب پشتەڤانیا سەرۆكێ‌ حوكمەتا هەرێما كوردستانێ‌ مەسرۆر بارزانی ژبۆ مێڤانداریا قارەمانیێ‌، مە بادەكا رێكخستی و ژێرخانەیا وەرزشی باشترین شێوە بەرهەڤكریە كو هەرێما كوردستانێ‌ مێڤانداریا قارەمانیا كۆنیفایێ‌ بكەت ژبەركو هەرێما ترۆنگ بوو یا فێتنامێ‌ ژی بەربژارە، لەوما پێنچ یاریگەهێن وەرزشی ل سەر ئاستێ‌ هەرێمێ‌ دگەل ژێرخانەیا وەرزشی، ئۆتێل وجهێن پێدڤی دەستنیشانكرینە، دوهی شاندێ‌ ئێكەتیا تەپا پێی یا هەرێمێن جیهانی ل باژێرێ‌ سلێمانیێ‌ بوون، ئەڤرۆ دێ‌ ل دهۆكێ‌ بن و سەرەدانا یاریگەهێن دهۆك و زاخۆ كەن، دیسان ئەو جهێن هاتینە دەستنیشانكرن، سوبەهی ل هەولێرێ‌ بن و كۆمبوونا خوە ژی كەن.
بۆ زانین سەر ئاستێ‌ جیهانێ‌ 48 هەلبژارتی هەنە بناڤێ‌ هەرێمان ئەوێن دێ‌ هەڤڕكیێ‌ بۆ 15 پلێتنێن دەربازبوونێ‌ بەر ب قارمانیا كۆنفایی كەن، دگەل هەلبژارتیێ‌ مێڤاندار دێ‌ بنە 16 هەلبژارتیی كو هەموو هەلبژارتی ژ كێشوەرێن ئۆرۆپا، ئەمریكا باشۆر، ئاسیا، ئەمریكا باكۆر، ئەفریقیا و ئۆقیانۆس پشكداربن.

زاخۆ، عەلی حاجی:

د داخویانیەكێ‌ دا سەرۆكێ‌ یانەیا زاخۆ یا وەرزشی بۆ رۆژناما ئەڤرۆ دیاركر لژنەك ژ چەند ئەندامێن كارگێریا یانێ‌ هاتینە پێكئینان ژبۆ دووڤچوونا كێماسی و ئاریشەیێن تیما وان یا تەپا پیێ‌ ئەوا پشكدار د خولا پلا نایابا كوردستانێ‌ دا.
زێدەتر بلند شەفیق گۆت: هەرچەندە ل دەستپێكێ‌ ئاست و ئەنجامێن تیما مە د خولێ‌ دا گەلەك د باش بوون و تیمەكا رێكوپێك بوو لێ‌ ژ نشكەكێ‌ ڤە ئاست و ئەنجامێن وێ‌ هاتنە گوهۆڕین و بەر ب رەوشەكا دیتر ڤە چوو و ئەڤە ژی بوو مە بوو جهێ‌ حێبەتیێ‌، لەوما ژبۆ ڤێ‌ مەرەمێ‌ مە لژنەك ژ سێ‌ ئەنجامێن كارگێریێ‌ راسپاردینە ژبۆ دووڤچوونا تیمێ‌ و ئەوا كو پێدڤی بیت بۆ تیمێ‌ بهێتە كرن و دڤێت هەموو بزاڤان بكەین تیما خوە ژ رێزێن دووماهیێ‌ قۆرتالبكەین و نەهێلین داكەڤێتە پلا ئێكا كوردستانێ‌، بەری نوكە ناڤێن پێشەكاران د ناڤ تیمێ‌ دا هاتبوونە زێدەكرن لێ‌ د نوكە دا چو پیشەكار نا هێنە زێدەكرن ژبلی ئەو یاریزانێن كوڕێن زاخۆ بوو تیما خولا كوردستانێ‌ هاتینە زێدەكرن و هەردەمێ‌ پێدڤی بیت دێ‌ هێنە بەرهەڤكرن.
ناڤبری گۆت ژی: چو تیمێن مە لایەنێ‌ دارایی ئاریشە نینن و پێكهاتیێ‌ تیما خولا كوردستانێ‌ ئەوا ب پێكهاتیەكێ‌ گەنج بوویە سەربۆرەكا نوو و ئەڤ تیمە پێدڤی ب دەمی هەیە هەتا شارەزاهیەكا باش هەبیت و بشێن ئەنجامێن دلخوەشكەر دەستخوەڤە بینن.

ئەڤرۆ

چاڤەڕێ‌ یە ئەڤرۆ ل دەمژمێر 11 شەڤ دو یاریێن مایی یێن هاتنێ‌ و ئێكلاكەر ژ هەڤڕكیێن قۆناغا 16 یا قارەمانیا یانەیێن ئۆرۆپا قارەمانێن خولا چامپیۆنز لیگ یا تەپا پێی بهێنە ئەنجامدان و هژمارا یانەیێن دەربازبوویی بۆ قۆناغا هەشتێ‌ ب دووماهی بینت و بڤی رەنگی نە.

ریال مەدرید- لیڤەرپۆل
د ئەركەكێ‌ گەلەك ب زەحمەت دا یانەیا لیڤەرپۆل یا ئنگلتەرایێ‌ ل یاریگەها سانتیاگۆ بێرنابیۆ دێ‌ بیتە مێڤانا یانەیا ریال مەدرید یا ئسپانی د یاریەكا ئاگرین دا و بیت یا مەحال بیت بۆ دەربازبوونێ‌ ژبەركو پێدڤی ب ریمۆنتادا یە پێخەمەت دەسڤەئینانا پلێتا هەشتێ‌ ژ قارەمانیێ‌، د یاریا چوونێ‌ یا ئێكێ‌ دا ئەوا ل یاریگەها ئانفێلد لیڤەرپۆل تووشی خوسارەتیەكا گران بوو ب پێنچ گۆلان بەرانبەر دو گۆلان، د یاریا ئەڤ شەڤە پێدڤی ب چار گۆلا بێ‌ بەرانبەر هەیە هەتا دەرباز دبیت، لێ‌ دێ‌ یا بزەحمەت بیت بەرانبەر یانەكا مەزن وەكو ریال مەدریدێ‌ ب دیرۆكا خوە یا چامپیۆنزێ‌ دا ئەوا د یاریا بۆری دا پێنگاڤەكا باش بۆ قۆناغا هەشتێ‌ هاڤێتی، لێ‌ راهێنەرێ‌ لیڤەرپۆل یۆرگن كلۆپ هیڤیێن خوە ژ دەست نەداینە و گۆت: ریال مەدرید هزردكەت یاریا ب دووماهی هات و ئەوان پلێتا مسۆگەر كری، مە 90 خولەك یێن ماین و تەپا پێی دانپێدانێ‌ ب مەزن و بچووكا ناكەت، ئەم یێن هاتین بۆ دەربازبوونێ‌، ژلایێ‌ خوەڤە هەمان هزر یا ئانشلۆتی راهێنەرێ‌ ریالێ‌ بوو ئەوێ‌ گۆتی: ئەم یاریێ‌ دگەل ئێك ژ بهێزترین یانەیێن ئۆرۆپا دكەین و رێزێ‌ لێ‌ دگرین، هێشتا ئەم یێ ل قۆناغا 16ێ‌ و دڤێت ئەڤ شەڤە سەركەفتنا خوە یا بۆری پارێزین پێخەمەت دەربازبوون مسۆگەر بیت، بۆ زانین دادڤانێ‌ ئەلمانی فیلێكس زۆپر دێ‌ یاریێ‌ برێڤەبەت.

د دیدارێن ئاگرین دا ریال باشتر بوویە
ل دووڤ ئامارێن هەردو یانەیان د چامپیۆنزێ‌ دا ژ سەرجەمێ‌ دەه یاریان شەش سەركەفتن بۆ ریالێ‌ بووینە بەرانبەر سێ‌ سەركەفتنێن لیڤەرپۆلێ‌ و ئێك وەكهەڤی، بۆهاترین سەركەفتن یا ریالێ‌ دەستڤە ئینانا چامپیۆنزێ‌ ل سەر كیستێ‌ لیڤەرپۆلێ‌ د وەرزێ‌ بوری دا بوو، لەوما یانەیا ئنگلتەرایێ‌ دێ‌ شەڕی بۆ تۆلڤەكرنێ‌ و شێوازێ‌ یاریا بلەز و هێزێ‌ كەت هەتا بشێت ریمونتادا بینت، ژلایێ‌ خوەڤە ریال دێ‌ ب شارەزاهیا خوە یا چامپیۆنزێ‌ سەرەدەریێ‌ دگەل لیڤەرپۆلێ‌ كەت و ناهێلیت ببیتە رێگر بۆ هیڤیێن وێ‌ یێن ناسناڤێ‌ 15 و پاراستنا چامپیۆنزا وەرزێ‌ بوری.

ناپۆلی – ئانتراخت
د یاریەكا دی یا پری هێز و هەڤڕكی دا ئەوا بڕیارە ئەڤ شەڤە هەمان دەمژمێر بهێتە كرن یانەیا ناپۆلی یا ئیتالی دێ‌ ل یاریگەها خوە دیێگۆ ئارماندۆ مارادۆنا مێڤانداریا ئانتراخت فرانكفۆرت یا ئەلمانی كەت ب هیڤیێن دەستكەفتەكێ‌ نوو یێ‌ قارەمانیا ئۆرۆپا تایبەت د نوكە دا باشترین دەمێ‌ خوە دایە ل خولا ئیتالیا ئەوا سەرێ‌ لیستێ‌ دهێت ب 68 خالان و 18 خالان ژ هەڤڕكا خوە میلان خودانا رێزا دویێ‌ یا دوورە، د یاریا بۆری دگەل ئانتراخت ناپۆلی شیابوو ب دو گۆلێن پاقژ سەركەفتنێ‌ ل یاریگەها یانەیا ئەلمانی بینت و پێنگاڤەكا باش بۆ قۆناغا هەشتێ‌ پاڤێژیت، لێ‌ دبیت مسۆگەر نەبیت بەرانبەر یانەیا ئانتراخت ئەوا راهێنەرێ‌ وێ‌ ئۆلیڤەر چلاسنەر دیاركری دێ‌ بزاڤێن تۆماركرنا ئەنجامەكێ‌ مەزن كەت و پشتگەرمیا خوە ب ستێرێن یانێ‌ راندەل كۆلۆ، دایتشی كامادا و رافائێل بووری، بەرانبەر دا ناپۆلی ناهێلیت خەونا وێ‌ یا چامپیۆنزێ‌ بهێتە بنڕكرن و خودان پێكهاتیەكێ‌ بهێزە ب سەركێشیا فیكتۆر ئۆسمین گۆلكەرێ‌ ناپۆلی و یێ‌ جۆرجی خڤیچا كڤاراچیلا و جیۆڤانی سیمیۆنی.

كەنگی پشككێشانا قۆناغا هەشتێ‌ یە؟
بڕیارە ل ئەینیا بهێت پشككێشانا قۆناغا هەشتێ‌ یا چامپیۆنز لیگ و قارەمانیا ئێكەتیا ئۆرۆپا و كۆپا كۆنگرەیا بهێتە ئەنجامدان، یاریا دووماهیا چامپیۆنزێ‌ دێ‌ ل یاریگەها ئاتاتۆرك یا ئۆلمپی ل باژێرێ‌ ئستەنبۆلا توركیایێ‌ ل دەهێ‌ خزیرانا ئەڤ سالە هێتە كرن.