هەولێر، قائید میرۆ:
ئەندامەكا لیژنا خواندنا بلند ل پەرلەمانێ ئیراقێ خویا كر، بزاڤ دهێنە كرن بۆردا ئیراقی یا پێدانا باوەرنامێن نۆشداری دانپێدانێ ب بۆردا هەرێما كوردستانێ بكەت و دبێژیت: لیژنە دخوازیت ئاریشەیا دانپێدانا باوەرنامەیان د ناڤبەرا هەرێم و بەغدا دا بهێتە چارەسەركرن.
دكتۆرا نەهلا ئەفەندی، ئەنداما لیژنا خواندنا بلند ل پەرلەمانێ ئیراقێ بۆ رۆژناما ئەڤرۆ دیار كر، حەفتیا بۆری ئەمو ل گەل سەرۆكێ بۆردا ئیراقی كۆمبووینە و گۆت: «مە نڤیسارەك ئاراستەی لیژنێ كریە، كو مێهڤانداریا هەردو بۆردێن كوردستانێ و ئیراقێ بهێتە كرن ب مەرەما چارەسەركرنا دانپێدانا باوەرنامێن وان، تێكگەهشتن هەبیت ل گورەی دستوورێ ئیراقێ، چونكی بۆردا ئیراقی دانپێدانێ ب باوەرنامەیێن نۆشدارێن هەرێما كوردستانێ ناكەت یێن بۆردا كوردستانی هەین».
دكتۆرا نەهلا ئەفەندی گۆت: «بۆردا كوردستانی بۆ زانستێن نۆشداری ب بڕیارا پەرلەمانێ كوردستانێ هاتیە دامەزراندن و چەندین باوەرنامە داینە نۆشدارێن هەرێما كوردستانێ، بەلێ ئاریشەیا دانپێدانێ د ناڤبەرا هەرێم و بەغدا دا هەیە، هەتا ژبلی بۆردێ ئاریشە ل سەر دانپێدانا هەژمارەكا زانكۆیان ژی د ناڤبەرا هەردو حوكمەتان دا هەیە، ئەم وەك لیژنە یێ كار دكەین ئاریشەیا دانپێدانێ بهێتە چارەسەركرن».
نيشاندان