ئه‌ڤرۆ، هه‌رهین محه‌مه‌د:
ماموستایه‌كێ زانكۆیێ ئاشكراكر كو سالانه ژ پرۆژێن ده‌رچوونا قوتابیان ب رێژه‌كا مه‌زن یا ڤه‌كۆلینێن زانستی دهێنه چێكرن، به‌لێ پتریا وان ڤه كۆلینێن دهێنه چێكرن ژلایێ قوتابیان ڤه نه د ئاست دانه و چێكرنا ڤه‌كۆلینێ بتنێ بوویه مه‌رجه‌ك قوتابی ل سه‌ر ملێن خوه رادكه‌ن .
هلوڤان حوسنی، ماموستا و هاریكارێ راگرێ كولیژا كارگێری و ئابوری ل زانكۆیا نه‌ورۆز بۆ به‌رپه‌رێ په‌روه‌رده و زانكۆ یێ رۆژناما ئه‌ڤرۆ گۆت: مه‌ره‌م ژ چێكرنا ڤه‌كۆلنێن زانستی ئه‌وه چاره‌كرنا ئاریشه‌كێ یه، چونكو دبنیاتێ ڤه‌كۆلینا زانستی دا مرۆڤ لێگه‌ریانه‌كێ ل دور دیاركرن و دیتنا ئاریشه‌كێ و بزاڤكرن ژبۆ چاره‌كرنا وێ ئاریشێ و هه‌رل ده‌ستپێكا ڤه‌بوونا زانكویێ ئێك ژمه‌رجێن وان ئه‌وه دڤێت قوتابی ڤه‌كۆلینه‌كێ چێكه‌ت دبێژنێ ڤه‌كۆلینا زانستی كو هه‌رچه‌ند قوتابی خوه ده‌نه ئێك و رادبن ب چێكرنا وێ ڤه‌كۆلینێ و چێكرنا ڤه‌كولینا زانستی بۆ قوتابی گه‌له‌ك یاگرنگه و قوتابی فێردكه‌ت، كادێ چه‌وان خوه ل ئاریشان كه‌ته خودان و دێ قوتابی ئه‌گه‌رێن وێ ئاریشێ زانیت ودێ زانیت دێ چه‌وا چاره كه‌ت، و هه‌كه سه‌حكه‌ینه وه‌لاتێن پێشكه‌فتی یێن وه‌كو وه‌لاتێ ئه‌مریكا ڤه‌كۆلینێن مه‌زن دهێنه‌كرن و داكو ئاریشان ببین و بزاڤێ بكه‌ن وان ئاریشان چاره بكه‌ن و دبیت ل وه‌لاتێن پێشكه‌فتی گه‌هشتیه وی راده‌ی ئاریشه نه‌بن و بزاڤێ بكه‌ن چاره‌سه‌ربكه‌ن به‌ری ئه‌و ئاریشه چێبیت و دبینم مرۆڤ ل كیژ وه‌لاتی بیت و ل كیرێ ئه‌نجام بده‌ی و مرۆڤ چه‌ندێ پێشكه‌فتی و پاشكه‌فتی بیت ڤه‌كۆلین هه‌ر ڤه‌كولینه و دڤێت ئاریشه‌ك هه‌بیت و ل دووماهیا وێ ڤه‌كۆلینێ ده‌رئه‌نجامه‌ك هه‌بیت كا ئه‌و ئاریشه ژ چو په‌یدابوویه و دێ چه‌وا چاره‌سه‌ركه‌ت و هه‌كه پرسیاربكه‌ین بۆچی ل وه‌لاتێن پێشكه‌فتی ڤه‌كۆلینێ رولێ خوه هه‌یه ل ده‌ڤ مه‌نینه و ئه‌م ژی وه‌كو وان رێكو رێكارو سیاسه‌تان دگرینه به‌ر و جێبه‌جێ دكه‌ین بۆچی لده‌ڤ مه ئه‌و ئه‌كتیڤیه نینه بۆ ڤێ چه‌ندێ ژی من نمونه‌ك هه‌یه ئه‌و ژی وه‌كو جوداهیێ ل بكه‌ین د ناڤبه‌را دو جیرانان دا كو جیرانێ مه خانیێ خوه یێ ئاڤاكری و گه‌له‌ك قوناغێن ئاڤاكرنێ تێپه‌راندبن و دبیت هنده‌ك گوهۆرینێن دی دخانیێ خوه دا بكه‌ت، و ئه‌م جیرانێن وی نه و مه پارچه‌كا ئه‌ردی یا هه‌ی و دبیت دوێ پارچێ دا مه گه‌له‌ك ئاریشه هه‌بن و هێشتا مه نه ئاڤاكریه ئه‌م وه‌كو جیرانێ خوه ل دیكۆری دگه‌رین و نوكه ئه‌م یێن هنده‌ك ڤه‌كۆلینێن زانستی چێدكه‌ین دزمانێ عه‌ره‌بی دا نین و دێ چینه ئینگلیزی گه‌له‌ك یا كێمه و هه‌كه تو ل ڤه‌كۆلینه‌كێ چێكه‌ی و لێبگه‌ری و هێشتا ئینگلیزی یا كێمه و هێشتا نه‌گه‌هشتینه و كه‌سێ خوه لێنه‌كریه خودان رامان ژێ ئه‌وه ئه‌و نه‌گه‌هشتینه وی ئاستی و شاره‌زا نه بووینه دوی بابه‌تی دا.
زێده‌تر گۆت: هه‌موو ڤه كۆلینێن مه بهوسته‌كا توزێ یا كه‌فتیه سه‌رد په‌رتوكخانێن مه‌دا و هه‌كه جاره‌كێ كه‌سه‌ك مفادار بیت هه‌ربۆ ڤه كولینه‌كا دی یا زانستی یه و دبیت د هنده‌ك وارێن دی دا مفا بهێته وه‌رگرتن وه كو چاندنێ، به‌لێ ژلایێ مرۆڤایه‌تی وه‌كو كولیژێن مرۆڤایه‌تی ل ده‌ڤ مه وه‌كو كارگێری و ئابوری و تایبه‌تمه‌دێن دی یێن سلوكی هند ڤه‌كۆلینێ رولێ خوه نه‌بوویه.
هاریكارێ راگرێ كولیژا كارگێری و ئابوری گۆتژی: د كه‌توارێ مه دا نه شێن بێژین سه‌د ژ سه‌دێ كو قوتابیان مفا ژ وێ ڤه‌كۆلینێ دیتیه یا وان دروستكری، چونكو مه رازوه‌ستیان ل سه‌ر ئه‌دا ماموستا و قوتابی هه‌یه دچێكرنا وێ ڤه‌كۆلینێ دا ب ره‌نگه‌كێ دروست ناهێته ئه‌نجامدان و گه‌له‌ك ئه‌گه‌ر هه‌نه و ئه‌ڤه بابه‌ته‌كێ دیرو درێژه و دبیت ژی ژینگه‌ها مه نه‌یا هاریكاربیت قوتابی مفای ژێ وه‌رگرن و گه‌له‌ك جاران ژی ئه‌م وه‌كو لایه‌نێن په‌یوه‌ندی دار ل گه‌ل قوتابی و هند گرنگیێ ب وێ ڤه‌كۆلینێ نه‌ده‌ین بتنێ مه‌رجه‌كه و بزاڤێ بكه‌ین وی مه‌رجی بجه بینین، به‌لێ پتریا ڤه‌كۆلینێن ده‌رچوونا قوتابیان نه ل ئاستێ پێدڤی دانه، به‌لێ مه‌هنده‌ك قوتابی هه‌نه وه‌سا ڤه‌كولینا خوه یا زانستی چێدكه‌ن مرۆڤ دشێت پشت به‌ستنێ ل سه‌ر بكه‌ت بۆ ناما ماسته‌رێ و دكتورایێ، لێ رێژا هه‌ره مه‌زن نه‌ل ئاست دانه .
نيشاندان