وه‌كو كارێ وی یێ به‌رده‌وام، ستران عه‌بدولا، ل سه‌رهێرشكرنێ ل دژی پارتی یێ به‌رده‌وامه‌، ڤێجارێ داستانا كورێ یا پێشمه‌رگێن قه‌هره‌مانێن كوردستانێ كریه‌ بیانوو، ئاخڤتنێن سترانی بۆ وێ چه‌ندێ دچن كو پارتی دخوازیت ده‌ستكه‌فت وئازایه‌تیا خه‌لكێ دی بۆ خوه‌ ببه‌ت !! ئه‌ڤه‌ بوختانه‌كا ئاشكرایه‌ ب دوهی و ب تمامی دژبه‌ره‌ ل گه‌ل ره‌وشا نوكه‌ یا كوردستانێ.

به‌ری به‌رسڤه‌كا سه‌رپێ یا ڤێ په‌لاماردانێ بده‌ین، بلا ژ بیانوویێ ب خوه‌ ده‌ست پێ بكه‌ین، خه‌لكێ كوردستانێ و هه‌موو ئه‌وێن چه‌نده‌ك ئاگه‌هداری روودانێن كوردستانێ دزانن، داستانا كۆرێ، پێشمه‌رگێن پارتی دیموكراتی كوردستان و سه‌ركرده‌ و فه‌رماندێن پارتی ب هاریكاریا هه‌ژماره‌كا پێشمه‌رگێن ئالیێن دی و ب خوینا شه‌هیدێن وێ داستانێ هاتیه‌ تۆماركرن، ئه‌ڤه‌ دیرۆك.. راستیا دیرۆكی، بۆختانا وه‌كو ئه‌وا ستران بۆ دكه‌ت، بۆ رازیكرنا ڤی و یێدی دهێته‌ شێواندن، به‌لێ ب هیچ شێوه‌كی كاریگه‌ری ل سه‌ر راستیا روودانان و ڤه‌رێژێن وان یێن دیرۆكی نابیت.

پارتی، كو ل رۆژا ئێكێ هه‌تا ئه‌ڤرۆ، باوه‌ریا پتریا خه‌لكێ كوردستانێ و نه‌ته‌وێ كورد یا هه‌ی، چ پێدڤی ب وێ چه‌ندێ یه‌ خوه‌ ژ كارێ خه‌لكێ دی بكه‌ته‌ خودان؟ پارتی كو ئه‌ڤ هه‌موو سه‌روه‌ریا دیرۆكی و خودانا گه‌له‌ك ده‌ستكه‌فتێن نیشتمانی و نه‌ته‌وی یه‌، چاوان دێ خوه‌ كه‌ته‌ خودانا كارێن سه‌قه‌ت یێن خه‌لكێ دی؟ دیرۆكا كوردستانێ دیده‌ڤانه‌، پارتی هه‌میشه‌ ده‌ستپێشخه‌را داكۆكیێ ژ كوردستانێ و خه‌لكێ وێ بوو و سه‌ربه‌ستانه‌ هه‌لویست وه‌رگرتیه‌، خوه‌ ژی ب خودانا وان زانیه‌ و به‌رگری ژێ گریه‌ و به‌رهه‌ ڤا ئه‌نجامان وباجێ ژی بوو، ئه‌و خه‌لكێ دی یه‌ پێدڤی ب چاڤه‌رێیا ئه‌نجامان و چاڤرێكرنێ و كرین و فرۆشتنێ هه‌بوو و هه‌یه‌، دووماهیا چاڤلێكرنێ ژی دیاره‌ و هه‌ر ئه‌و دێ ژێ شین بیت كو ئه‌ڤرۆ مخابن ل باژێرێ هه‌لمه‌ت و قوربانیێ، باژێرێ سلێمانیێ دبینین… نسكۆیا شۆره‌شا ئیلوونێ، له‌وما روودا هه‌تا كه‌ركووك و ده‌ڤه‌رێن كوردستانیێن مادا 140 دستوورێ نوكه‌، ژ ده‌ست نه‌هێنه‌ دان، به‌لێ خه‌لكێ دی چ كر؟ هاتن خوه‌ وه‌كو به‌دیلێ پارتی نیشاندا، ب ڤێ نیشادانێ و چاڤلێكرنێ، خه‌نجه‌ره‌كا ژه‌هراوی ل نیشتمانی و خه‌لكێ وان ده‌ڤه‌ران و هه‌موو نه‌ته‌وێ كورد دا كو برین و خه‌مه‌كا نه‌ته‌وی یا كوور ژێ په‌یدابوو.

ئاگه‌ه ژێ نه‌بوون عه‌یب نینه‌، عه‌یب ئه‌وه‌ ئاگه‌ه ژێ نه‌بیت ووه‌سا نیشان بده‌ی كو یێ ئاگه‌هداری. د به‌رنامه‌ دارێشتنا سه‌رهلدانێ دا كو ستران بزاڤێ دكه‌ت ژ سه‌روه‌ریێن نه‌ته‌وی بچووك بكه‌ت بۆ چالاكیه‌كا حزبی ! ره‌حمه‌تی مام جه‌لال ل كوردستانێ نه‌بوو، ده‌مێ ب رێیا فیشخابووری زڤری كوردستانێ پشكا هه‌ره‌ مه‌زن یا سه‌رهلدانا باژێرێن كوردستانێ ب دووماهی هاتبوو.

هه‌ر ل دۆر به‌حسێ كه‌ركووكێ و سه‌رهلدانا ئادارا 1991 یا خه‌لكێ كوردستانێ، شه‌هیدێن سه‌ربازگه‌ها خالد و ئازایه‌تیا فه‌رمانده‌ و پێشمه‌رگێن پارتی، دیده‌ڤانێن پشكه‌كا كێمن ژ سه‌روه‌ریێن پارتی و به‌رگریكرنا به‌رده‌وام یا پارتی نه‌ ژ كه‌ركووكێ و هه‌موو وان ده‌ڤه‌ران و نه‌راستیا گۆتنێن سترانی ژی دیاردكه‌ن .

جه‌واشه‌كاری و ئاخڤتنێن سترانی ل دۆر سه‌رهلدانێ، نه‌شێن راستیێن دیرۆكی بگوهۆرن، ناڤبری دبێژیت پاشه‌رۆژ یا مه‌یه‌ !! ئاخڤتن و گوتنا درووشمان یا ب ساناهیه‌، به‌لێ ب چ یا دیاره‌ كو پاشه‌رۆژ یا هه‌وه‌یه‌؟ ب كارێن هه‌وه‌ یێن جوان به‌رانبه‌ر خه‌لكێ سلێمانیێ و گه‌رمیان؟

ب تالانكرنا به‌نكێن سلێمانیێ و دزینا پاره‌ و مووچێن فه‌رمانبه‌ران و پارێن خزمه‌تگوزاریێن سلێمانیێ؟ ب وه‌رگرتنا پارا و ده‌ركرنا سه‌رمایه‌دارێن باژێری؟ ب ده‌ستخوه‌شی و باوه‌شگرتنا ئه‌وێن مووشه‌كان ئاراسته‌ی هه‌ولێرێ دكه‌ن؟ ب ده‌ستخوه‌شی لێكرنا ئه‌وێن درۆنا دهنێرن تاكو ئارامی و سه‌قامگیریا كوردستانێ تێكبده‌ن و دربان ل ژێرخانا وێ بده‌ن؟ ب راستی ئه‌وێ گه‌له‌ك ب ئاشكرا  ڤان كاران ئه‌نجام بده‌ت و بانگه‌شه‌یا خودانیا پاشه‌رۆژێ بكه‌ت، ژ بلی سڤك سه‌حكرنا خه‌لكێ كوردستانێ چ رامانه‌كا دی هه‌یه‌؟

به‌حسێ ره‌وشێ نوكه‌ دكه‌ت، بێی ئاگه‌ه ژێ بوون كو ره‌وشا نوكه‌ یا كوردستانێ به‌رهه‌مێ باوه‌ریا خه‌لكێ كوردستانێ یه‌، پاشه‌رۆژ ژی ب درووشمبازیێ و چه‌واشه‌كاری و به‌رۆڤاژیكرنا راستیان، ناگوهۆریت، كا چاوا ره‌وشا نوكه‌ ئه‌نجامێ باوه‌ریا خه‌لكێ كوردستانێ یه‌، داهاتی وپاشه‌رۆژ ژی، باوه‌ریا هه‌مان وی خه‌لكی یه‌ بریارێ ل سه‌ر بده‌ت.

ده‌مێ پارتی دیموكراتی كوردستان شۆره‌ش راگه‌هاندی، ل سه‌ر مه‌یدانا كوردستانێ خه‌لكه‌كێدی ژی هه‌بوو، به‌لێ ئه‌و خه‌لكێ كوردستانێ و پتریا هه‌ره‌ پتر یا نه‌ته‌وێ كورد بوو كو باوه‌ری دایه‌ سه‌ركردایه‌تیا وێ شۆره‌شێ، ئه‌وێن وی ده‌می و نوكه‌ ژی باوه‌ریا خه‌لكێ كوردستانێ و نه‌ته‌وێ خوه‌ ب ده‌ستڤه‌نه‌ئینابیت، باشتره‌ ب خوه‌ و سیاسه‌ت و هه‌لویستێن خوه‌ دا بچن نه‌كو هێرشا ل سه‌ر پارتی بكه‌ن.

ئه‌وێ پیچه‌كێ ژ سیاسه‌تێ بزانیت، دزانیت كو باوه‌ریا خه‌لكی ب سیاسه‌تا راست و ره‌وا، دێ خزمه‌تكرنا خه‌لكی بده‌ستڤه‌هێت، باوه‌ریا خه‌لكی پێدڤی ب وان مرۆڤێن مه‌زنه‌ كو د خه‌ما نیشتمان و خه‌لك و نه‌ته‌وێ خوه‌ نه‌، خه‌لكی باوه‌ری یا ب وان ئالی و سه‌ركردان هه‌ی كو گیانێ وان ب سه‌ر هه‌ڤال و هه‌ڤكارێن وان ده‌ردكه‌ڤیت، نه‌كو ب فۆتۆشوپی بزاڤا ناڤزراندنا وان بده‌ن، یان بێ مروه‌تانه‌ تاكو ئاستێ مرنێ، برا و هه‌ڤالێن خوه‌ ژه‌هراوی بكه‌ن.

ل دووماهیێ ئه‌م دزانین ستران عه‌بدوللا و خه‌لكێن وه‌كو وی، د یاریا مار و په‌ییسكی دای ێن گه‌هشتینه‌ جهێ خوه‌ یێ نوكه‌، له‌وما ب دیتنا وان ب هێرشكرنێ ل سه‌ر پارتی، دێ جهێ خوه‌ موكمتر لێكه‌ن، به‌لێ دیرۆكا ململانێیا سیاسی ل كوردستانێ ئه‌و راستیه‌ یا سه‌لماندی، ئه‌وێ ب په‌ییسكا هێرشكرنێ ل سه‌ر پارتی چووبیته‌ سه‌ر، رۆژه‌كێ ب رێیا ماری دێ بۆ خوارێ گرێل بیت.

پشكا رۆژنامه‌ڤانیا ده‌زگه‌هێ ره‌وشه‌نبیری و راگه‌هاندنێ

پارتی دیموكراتی كوردستان

له‌یلا عه‌بدولجه‌بار ئه‌نداما په‌رله‌مانێ كوردستانێ ژ فراكسیۆنا پارتی دیاركر هه‌موو بزاڤان دێ كه‌ین بۆ ئه‌نجامدانا كۆمبوونێن په‌رله‌مانی و ئێكلاكرنا پرسا هه‌لبژارتنان و دیاركر پارتی پێشتر و نوكه‌ ژی بزاڤه‌ك كریه‌ بۆ ئه‌نجامدانا كۆمبوونا په‌رله‌مانی و ئێكلاكرنا پرسا ئه‌نجامدانا هه‌لبژارتنێن هه‌رێما كوردستانێ، هه‌تا نوكه‌ پارتی یا جدیه‌ ل سه‌ر وێ چه‌ندێ كو پێدڤیه‌ هه‌لبژارتن ل ژڤانێ خوه‌ یێ قانوونی بهێنه‌ ئه‌نجامدان و فه‌رمانا سه‌رۆكایه‌تیا هه‌رێمێ ژی بۆ هاتیه‌ ده‌ركرن، ئاماژه‌كر پێدڤیه‌ ئالیێن سیاسی بكه‌هنه‌ رێككه‌فتنێ د ده‌مه‌كێ زوو دا تاكو كۆمسیۆن بشێت به‌رهه‌ڤیان بۆ ئه‌نجامدانا هه‌لبژارتنان ل ئێكێ چریا ئێكێ بكه‌ت، گۆت ژی، هه‌تا نوكه‌ ئالیێن سیاسی د ناكۆكن ل سه‌ر ئه‌نجامدانا هه‌لبژارتنان و هه‌كه‌ قانوونا هه‌لبژارتنان بهێته‌ راستڤه‌كرن وكۆمسیۆن بهێته‌ كاراكرن، ڤێ چه‌ندێ پێدڤی ب ده‌مه‌كێ زۆر هه‌یه‌.

سه‌رۆكێ پێشتر یێ كۆمسیۆنا هه‌لبژارتنان ل ئیراقێ، سه‌ربه‌ست مسته‌فا راگه‌هاند، یا گرنگ ئه‌وه‌ هه‌لبژارتنێن په‌رله‌مانێ كوردستانێ ل ده‌مێ خوه‌ یێ دیاركری دا بهێنه‌ ئه‌نجامدان و هه‌كه‌ ئێك بازنه‌ ژی بیت د به‌رژه‌وه‌ندیا هه‌موو ئالیه‌كی دایه‌ و ئه‌ندامێن په‌رله‌مانی ژی نابنه‌ نوونه‌رێن ده‌ڤه‌ره‌كێ ب تنێ به‌لكو دێ بنه‌ نوونه‌رێن هه‌موو خه‌لكێ كوردستانێ و ئاماژه‌كر ئێك بازنه‌یی د به‌رژه‌وه‌ندیا هه‌موو حزبان دایه‌ ب گشتی و ب تایبه‌تی حزبێن بچووك كو ده‌نگێن وان ژی كۆم دبن، له‌وما ئێك بازنه‌یی د به‌رژه‌وه‌ندیا گشتی دایه‌ و ب ڤی سیسته‌می ده‌نگێن هه‌موو حزبان ل هه‌موو ده‌ڤه‌ران دهێنه‌ كۆمكرن له‌وما ده‌نگێن وان ب هه‌ده‌ر ناچن و دبیت كورسیێن وان ژی زێده‌ ببن، به‌لێ د فره‌ بازنه‌ییێ دا ب وی شێوه‌ی نینه‌.