پەیڤدارا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: حوكمەتا هەرێما كوردستانێ دخوازیت ب رێكا دانوستاندنێ كێشەیان ل گەل بەغدا چارەسەر بكەت ب شێوەیەكێ ریشەیی نەك مەهانە ئەو كێشە دوبارە ببن.
ڤیان دەخیل، پەیڤدارا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» ئەم وەكو هەرێما كوردستانێ دخوازین ب رێكا دانوستاندنێ كێشەیا د ناڤبەرا هەرێما كوردستانێ و بەغدایێ دا ل دۆر مافێ خەلكێ كوردستانێ بهێتە چارەسەركرن، بەلێ بەغدا پێگیری رێككەفتنان نابیت، ئەگەر نە حوكمەتا هەرێما كوردستانێ پێگیری هەموو رێككەفتنایە و ئەركێن خوە بجهئیناینە، بەلێ ئەو نە هنارتنا مووچەی وەكو كارتەكا سیاسی بەرامبەر خەلكێ هەرێما كوردستانێ بكاردئینن، كو ماف نینە ب وی شێوەی رەفتارێ ل گەل هەرێما كوردستانێ بكەن و مووچەیێ خەلكێ هەرێما كوردستانێ نە هنێرن».
پەیڤدارا فراكسیۆنا پارتی دیموكراتی كوردستان گوت ژی» بەغدا بەردەوام بەهانەیان ل بەرامبەر هەرێما كوردستانێ دئینیت ژ داهاتێ ناڤخوە و خالێن سنووری و پەترۆلێ، هەموو ژی بەهانەنە و وەكو كارتەكا فشارێ بۆ مەرەمێن سیاسی ل سەر هەرێما كوردستانێ، چونكە ئەم نێزیكی هەلبژارتنان بووینە و دخوازن ب وی جۆری دەنگێن زێدەتر ل ئیراقێ ب دەستڤەبینن، لەوما نابیت مووچەیێ فەرمانبەران وەكو كارتەك بۆ مەرەما هەلبژارتنان بكاربینن، چونكە نوكە هەموو كارەكی دكەن بۆ وێ چەندێ بشێن دەنگان د هەلبژارتناندا ب دەستڤەبینن، هندەك ئالی ژی هەموو رێكان دژی هەرێما كوردستانێ بكاردئینن و دخوازن ب وی شێوەیی دژایەتییا هەرێمێ بهێتە كرن».
ڤیان دەخیلێ دیاركر ژی» پێدڤییە ل دووڤ قانوونێ و دستووری ئیراق مافێ خەلكێ هەرێما كوردستانێ بدەتێ و نابیت ئەو بێژن ئەم ب هێزین و ناهنێرین، لەوما پێدڤییە هەر چاوان بیت مافێ خەلكێ هەرێما كوردستانێ بهێتە هنارتن و نابیت مەهانە ئەو گرفتە بۆ خەلكێ هەرێما كوردستانێ بهێتە دروستكرن و پێدڤییە چارەسەرییەكا ئێكلاكەر بۆ وێ كێشەیێ بهێتە دیتن، چونكە مخابن ئیراق خودانا سۆزا خوە نینە د جهئینانا رێككەفتن و سۆزێن ددەت».

ئەندامەكێ جڤاتا نوونەرێن ئیراقێ ژ فراكسیۆنا (تەقەدووم) راگەهاند: فەرمانبەرێن هەرێما كوردستانێ هیچ گونەها خوە نینە مووچەیێن وان بهێنە بڕین، هەروەسا دیاركر نابیت مووچەیێ خەلكێ كوردستانێ تێكهەلی كێشەیا سیاسی بهێتە كرن.
عەبدولكەریم عەبتان، ئەندامێ جڤاتا نوونەرێن ئیراقێ ژ فراكسیۆنا (تەقەدووم) و جێگرێ سەرۆكێ لژنەیا قانوونی ل جڤاتا نوونەران گوت» فەرمانبەرێن هەرێما كوردستانێ چ گونەهەك هەیە مووچەیێ وان ناهێتە دان؟ ئەم هەموو دزانین مووچە قووتێ خەلكییە، لەوما پێدڤییە ناكۆكیێن د ناڤبەرا حوكمەتا هەرێما كوردستانێ و حوكمەتا ئیراقێ ب گۆڕەی دستووری بهێنە چارەسەركرن».
هەروەسا دوپاتكر» نابیت بابەتێ مووچەیێ فەرمانبەرێن هەرێما كوردستانێ تێكهەلی هیچ كێشەیەكا دی بهێتە كرن».
عەبدولكەریم عەبتان ئاماژە ب وێ چەندێ ژی كر» هەر كێشەیەك ل دۆر هنارتنا پەترۆلێ و فرۆكخانەیان و سنووران، پێدڤییە ب گۆرەی دستووری و ب ئارامی و ب زەلالی د ناڤبەرا حوكمەتا هەرێما كوردستانێ و حوكمەتا فیدرالیدا بهێتە چارەسەركرن».
ل 28/5/2025، تەیف سامی، وەزیرا داراییا ئیراقێ، ب نڤیسارەكێ حوكمەتا هەرێما كوردستانێ ئاگەهداركر كو ئێدی نەشێت د هنارتنا مووچەیدا بەردەوام بیت، ب بەهانەیا وێ چەندێ، هەرێما كوردستانێ گۆژمەیێ بەهرا دیاركرییا خوە ژ قانوونا بودجەی دەربازكریە و ئەو چەندە گرێدا ب پێگیرینەبوون ب بڕیارا دادگەها فیدرالی و قانوونا بودجەیا گشتی.

چاڤدێرێن سیاسی ل تورکیا و باکورێ کوردستانێ دیار دکەن، پشتی گرۆپەک ژ چەکدارێن پەکەکێ چەکێن خوە رادەست بکەن، دڤێت ل هەمبەر دا ل تورکیا گوهۆڕینێن مەزن دروست ببن، دڤێت د پێنگاڤا ئێکێ دا قەدەغەیێن ل سەر زمانێ کوردی رابن و گرتیێن سیاسی ژی بهێنە ئازاد کرن.

دەزگەهێن راگەهاندنا تورکیا بەحسێ ڤێ یەکێ دکەن کو دێ هەتا ١٢ ڤێ مەهێ گرۆپەک ژ چەکدارێن پەکەکێ ل هەرێما کوردستانێ دەست ژ چەکێن خوە بەردەن و وەکو نیەت پاکی دێ چاڤەرێی پێنگاڤێن دەولەتا تورکیا بن.
د ڤێ دەربارێ دا ئەحمەد گولابی دەرە چاڤدێرێ سیاسی دیار کر، پەکەکێ دڤێت وەکو نیەت پاکی کارەک وەسا بکەت دا چو بەهانە د دەستێ دەولەتا تورکیا دا نەمینیت، چونکی بەرپرسێن تورکیا هەر رۆژ دبێژن هەتا چەک د دەستێن پەکەکێ دا بن ئەو نەشێن چو گوهۆڕینان بکەن، ژ بەر ڤێ یەکێ ژی کورد چاڤەرێ نە، کو پشتی گرۆپەک ژ چەکدارێن پەکەکێ چەکێن خوە رادەست کرن ل هەمبەر دا وەکو پێنگاڤا ئێکێ هژمارەک زێدە ژ گرتیێن سیاسی یێن کورد بهێنە ئازاد کرن و هەروەسا قەدەغەیێن ل سەر زمانێ کوردی ژی نەمینن و دووماهی ب سیاسەتا قەیوومان ژی بهێت.
عەلی کوچوک چاڤدێرێ یێ کورد ژی دیار کر، دڤێت دستوورێ نها یێ تورکیا بهێتە گوهۆڕین و د دستوورێ نوو دا هەبوونا گەلێ کورد ب فەرمی بهێتە قەبوول کرن، دڤێت کوردان ژی هەمان ماف هەبیت کو تورکان ل تورکیا هەیە، ئاستەنگێن ل هەمبەر زمانێ کوردی و گەلەک خالێن دی ژی بێگومان دێ چارەسەر بن، لێ یا هەری گرنگ دڤێت د دستوورێ نوو یێ تورکیا دا ب فەرمی هەبوونا گەلێ کورد بهێتە قەبوول کرن و گۆت: (پشتی گرۆپەک ژ چەکدارێن پەکەکێ چەکێن خوە رادەست بکەن، دڤێت دەولەتا تورکیا ژی ب کریاری نیشا بدەت کو وێ ژی ئاشتی دڤێت، چونکی هەتا نها دەولەتا تورکیا ب کریاری چو نەکریە، ئەو یەک ژی بوویە جهێ دلگرانیا هەموو کوردان، باوەریا کوردان ب سۆزێن تورکیا ناهێت، ئەم دێ چاڤەرێ بین دا بزانین کا دێ ڤێ مەهێ چ روو دەت).
گالیب ئەنساری ئۆغلۆ پەرلەمانتارێ ئاکپارتیێ ژی دیار کر، پشتی پەکەکە چەکێن خوە رادەست بکەت دێ قووناغەکا گەلەک نوو و گرنگ ل تورکیا دەستپێ کەت و دێ ژ بۆ چارەسەرکرنا پرسا کوردی ژی کارێن گەلەک باش هێنە کرن و گۆت: (دێ چاکسازیێن قانوونی و سیاسی یێن مەزن ل تورکیا هێنە کرن، بێگومان ئەو یەک دێ بیتە ئەگەر پرسا کوردی و پرسێن دی یێن تورکیا ژی بهێنە چارەسەرکرن، ژ بەر ڤێ یەکێ ژی چەندین جاران مە دیار کریە، کو دڤێت پەکەکە دەست ژ چەکان بەردەت).