دۆڤچوون: قەیس وەیس

پشتی ب دووماهی هاتنا یاریێن گەڕا دویێ ژ خولا ستێرێن ئیراقێ‌ یا فوتبۆلێ‌، نەرازیبوونەكا ئێكجار مەزن د ناڤا پشتەڤانێن یانەیا زاخۆ دا پەیدابوویە ل سەر ئاست و ئەنجامێن تیما وان، پشتی خوسارەتیەكا نە چاڤەڕێ‌ كری بەرانبەر یانەیا مینا یا بەسرایی ب دو گۆلان بەرانبەر گۆلەكێ‌، ژلایەكێ‌ دووڤە یانەیا دهۆكێ‌ سكالایەكا ب سێ‌ خالان تۆمار كرییە
ڕاهێنەر دێ‌ هێتە گوهۆڕین؟
ژێدەرەكێ‌ تایبەت بۆ رۆژنامەیا ئەڤرۆ دیار كر پشتی خوسارەتییا یارییا بۆری بەرانبەر یانەیا مینا، ئێكسەر كارگێریا یانەیا زاخۆ هزر د گوهۆڕینا ڕاهێنەرێ‌ خوە یێ فرەنسی لۆرانت بانێد دا كرییە كو ل دووڤ هزرا وان یێ‌ سەركەڤتی نینە ل گەل تیمێ‌ و پڕانییا پشتەڤانێن یانەیێ توورەنە و دخوازن بهێتە گوهۆڕین، ئەڤچەندە وەكرییە كو بەرپرسێن ڤێ‌ یانەیێ ڤی بابەتی ب ڕژدی وەربگرن، ل دووڤ ژێدەرێ‌ تایبەت كو دێ‌ گەنگەشێ‌ ل سەر سێ‌ ناڤان كەن بۆ دەستنیشانكرنا ئێك ژ وان ل جهێ‌ یێ‌ فرەنسی.
هەر هەمان ژێدەری دیار كر ئەو ڕاهێنەرێن هاتینە دەستنیشانكرن دبیت ئێك ژ وان سەرپەرشتییا تیمێ‌ بكەت ئەو ژی عەبدولغەنی شەهەد و یێ‌ قەتری تەلال ئەلبلوشی كوپ ێشتر هەردو ڕاهێنەر ئەركێ‌ خوە ل زاخۆ بڕێڤەبریە، یێ‌ سێیێ و دبیت نێزیكتر بیت ئەو ژی مەسعۆد میرال ڕاهێنەرێ‌ پێتشر یێ یانەیا دهۆكێ‌، دهێتە گۆتن دبیت یارییا بهێت دووماهی دەلیڤە بیت بۆ لۆرانتی و دبیت ژی یێ‌ بەرهەڤ نەبیت.
پارێزەرێ‌ یانەیا دهۆك گەشبینە
لدۆر سكالایا یانەیا دهۆكێ‌ ل سەر یانەیا ئەلغراف زنار زوبێر پارێزەرێ‌ یانەیا دهۆكێ‌ گۆت: سكالایا مە ل سەر گۆلپارێزێ‌ یانەیا ئەلغراف حسێن عەلی یە ئەوێ‌ ل یارییا مە یا گەڕا ئێكێ‌ ژ خولا ستێرێن ئیراقێ‌ بوویە سەرەكی، ل دووڤ یاسایا گرێبەستێ ئەوی ل ئێكێ‌ خزیرانا بۆری گرێبەستا یانەیا نەورۆز ئیمزاكر بوو، لێ‌ بێ‌ ئاگەهداربوونا یانەیا نەورۆز و پشترا چوو گرێبەستا یانەیا ئەلغراف ئیمزاكر و مانا خوە ل گەل ئەوێ‌ یانەیێ هێلا بوو، ئەڤچەندە ژی ل دووڤ یاسایا فدراسیۆنا فوتبۆلا ئیراقێ‌ سەرپێچی یە، ئەو یانەیا دویێ هەكە یاریێ پێ بكەت دێ‌ هێتە هژمارتن خوسارەت سێ‌ ب چنە دیسان سزایێن دارایی ل سەر ئەوێ‌ یانەیێ هەبن.
هەروەسان ناڤهاتی گۆت: مە سكالا ل سەر گۆلپارێزی تۆماركرییە كو ل دووڤ یاسایی ناچێبیت گرێبەستا دو یانەیان هەبیت د ئێك وەرز دا و ئەڤە سەرپێچییە، یانەیا نەورۆز دەست بەردان نە دایێ و یاریزانی ژی یاری بۆ یانەیا ئەلغراف كرییە، ل لژنەیا دێسپپلینی مە سكالا خوە تۆماركرییە، گەشبینین سوبەهی یان چوارشەمبیێ لژنەیا ناڤبری بڕیارێ‌ بدەت كو د بەرژوەندییا مە دا بیت و ب سەركەڤتی تیما مە بهێتە هژمارتن.

یانەیێن پارێزگەهێ‌ بەردەوامی دا كۆنترۆلا ڕێزێن پێشیێ و شیان بۆ سالا سێیێ ل دووڤ ئێك ڕێزێن ئێكێ‌ هەتا یا سێیێ‌ ل سەر ئاستێن جودا یا قارەمانییا تیكۆنجتسۆ و سكی یا ئیراقێ‌ بۆ كچان ب دەستخوە ڤە بینن، د هەڤڕكیێن واندا ئەوا ب پشكدارییا 80 یاریزانێن كچا ژ 14 یانەیێن هەرێما كوردستانێ‌ و ئیراقێ‌ ل هۆلا پەیمانگەها ڤیا یا ناحكومی هاتیە كرن و ئەنجامێن ئاستێن جودا بڤی شێوەیی بوون.
ل سەر ئاستێ‌ پێشكەڤتیان
یانەیا ئافرەتێن دهۆكێ‌ ل ڕێزا ئێكێ‌ هاتن
یانەیا دهۆك ل ڕێزا دویێ
یانەیا پیرس ل ڕێزا سێیێ‌ هات.
ل سەر ئاستێن تازەپێگەهشتییان و لاوان
یانەیا دهۆك ڕێزا ئێكێ‌
یانەیا ئافرەتێن دهۆكێ‌ ڕێزا دویێ
یانەیا پیرس ڕێزا سێیێ‌ هاتن
ل دۆر ڤێ‌ قارەمانیێ شیمال محەمەد سەرپەرشتێ‌ گشتی یێ ڤێ‌ یاریێ ل پارێزگەهێ‌ بۆ ئەڤرۆ گۆت: پێخوەشحالین بۆ سالا سێیێ‌ ل دووڤ ئێك كچێن مە شیان ڕێزێن ئێكێ هەتا سێیێ‌ ب دەستڤە بینن و هەروەسان جهێ‌ خوە دناڤا هەلبژارتیێ ئیراقێ‌ دا پارێزین، دەستڤە ئینانا هەرسێ‌ ئاستان بۆ مە گەلەك گرنگ بوو تایبەت ل سەر ئاستێ‌ پێشكەڤتیان ژبەر كو یاریزانێن مە دێ‌ پشكداریێ د قارەمانییا نێڤدەولەتی دا كەت ئەوا بڕیارە ل چریا ئێكێ‌ یا بهێت ل بەغدا بهێتە كرن و هەروەسان قارەمانیەكا دی هەیە ل وەلاتێ‌ مالیزییا ژ سەرجەمێ‌ حەفت یاریزانێن هەلبژارتیێ ئیراقێ‌ پێنچ یاریزان دێ‌ ژ یانەیا ئافرەتێن دهۆكێ‌ بن، ئەڤە ژی دەستكەڤتەكێ‌ دی یە بۆ وەرزشا پارێزگەهێ‌ و كوردستانێ‌، پیرۆزباهییا هەموو سەركەڤتیان دكەم تایبەت یێن یانەیێن پارێزگەهێ‌.
ژلایێ خوەڤە مەحمود ئیبراهیم سەرۆكێ‌ فدراسیۆنا تایكۆنجتسو یا ئیراقێ‌ گۆت: ب هەموو رویەكی ڤە قارەمانی ب سەركەفتیانە ب ڕێڤەچوو، ئەڤە ژی ڤەدگەریت بۆ خالێن گرنگن یێن ڕێكخستنا سەركەفتی یا قارەمانیێ، ژێرخانەیا وەرزشی، سەقایێ ئارام، دلخوەشییا شاندنێن یانەیان، هەڤكاری و پشتەڤانییا بەرپرسێن حوكمی و وەرزش یێن پارێزگەهێ‌، پەیمانگەها ڤیا، لەوما ژی سۆپاسیێن بێ‌ سنۆر ل هەر لایەنەكی پشتەڤانییا مە كری و ئەڤ قارەمانییە مێڤانكرین.

تیما باسكێت بۆلا یانەیا سەنحاریب ناسناڤێ‌ وەرزێ‌ نوو یا قارەمانییا ئیراقێ‌ ل سەر ئاستێ‌ پێشكەفتیان بۆ كچان ژ دەست دا، پشتی د یارییا پێش دووماهیێ دا بەرانبەر یانەیا سایبس یا سلێمانی تووشی خوسارەتیێ بووی ب ئەنجامێ‌ 81 خالان بەرانبەر 42 خالان، د هەڤڕكیێن قارەمانیێ دا ئەوا ل باژیرێ‌ مووسل هاتیە كرن، تێدا یانەیا سایبس ناسناڤێ‌ قارەمانیێ ب دەستڤە ئینا پشتی د فینالێ‌ دا ب سەركەڤتی ل سەر یانەیا پێشمەرگە یا باژێرێ‌ سلێمانیێ ب 67- 73 خالان، د هەڤڕكیێن واندا ئەوا ب پشكدارییا 12 یانەیێن كوردستانی و ئیراقی هاتیە كرن ل سەر چار كۆمان.
د داخویانیەكێ‌ دا داود ڕەبەن سەرۆكێ‌ یانەیا سەنحاریب بۆ ئەڤرۆ دیار كر ب هەبوونا چەند ئەگەران ئەم نە شیانین ناسناڤێ‌ ئەڤ سالە ب دەستڤە بینن و گۆت: بۆ وەرزێ‌ ئەڤ سالە مە تیمەكا نوو دروست كربوو ژ كچێن باژێرێ‌ دهۆكێ‌ و پشت گەرمی پێ‌ هاتبوو كرن، د بەرانبەر دا پرانییا یانەیێن پشكدار یاریزان ژ دەرڤەیی هەرێمێ‌ و ئیراقێ‌ ئینابوو، هەروەسان گوهۆڕین د ژڤانێ‌ قارەمانیێ دا و ناكۆكیێن پەیدابووین ئێك ژ ئەگەرێن دی بوو.
ژلایەكێ‌ دووڤە ناڤهاتی گۆت: هەر دناڤا هەڤڕكیێن قارەمانیێ دا كارتیكرنێن نەرێنی ل سەر تیما مە هاتە كرن و چوونا ئێك ژ باژیرین یاریزانێن مە و هنگاڤتن ئەو ژی ئەگەر بوون، بۆ مە گرنگ سەرهلدانا كۆمەكا یاریزانێن نوو ب ئاستەكێ‌ بلند و هەروەسان وەرگرتنا شارەزایێ بوویە، گەشبینن بۆ قارەمانیێن داهاتی دێ‌ باشتر بەرهەڤبین، دەستخوەشیێ ل كادرێ‌ ڕاهێنانێ‌ و هەموو یاریزانان دكەم، مە ناسناڤ ژ دەست دا لێ‌ مە تیمەكا ڕێكخستی و هەڤڕك چێكر.

چاڤەڕێ دهێتە كرن ئەڤرۆ نوونەرێن پارێزگەها دهۆكێ‌ دەست ب وەرزێ‌ خوە یێ‌ نوو یا خولا پلا دویێ یا كوردستانێ‌ بۆ یارییا فوتبۆلێ‌ ئەنجامبدەن ئەوا 24 یانە پشكدارن و هاتینە بەلاڤكرن ل سەر چار كۆمان، یاریێن وان ب شێوەیێ خول ئێك قووناغ دێ‌ هێنە كرن، پێنچ یانەیێن پارێزگەهێ‌ پشكدارن ئەوێن دێ‌ یاریێن خوە ب ڤی شێوەیی كەن.
پیرس- باتیفا، یاریگەها پیرس، ل دەمژمێر 4:45 ئێڤاری.
دینارتە- بجێل، یاریگەها دینارتە، ل دەمژمێر 4:45 ئێڤاری.
شێلادزێ‌- هەریر، یاریگەها گۆلان ل شێلادزێ‌، دەمژمێر 4:45 ئێڤاری.
یانەیێن پارێزگەهێ‌ و پلێتا دەربازبوونێ‌
لدووڤ بەرهەڤیێن هەر پێنچ یانەیێن پارێزگەهێ‌ د خولا پلا دویێ دا، یانەیا باتیفا ب هێز هاتیە دناڤ خولێ‌ دا و هەتا سێ‌ یاریزانێن پیشەكار ئیناینە دناڤ ڕێزێن تیما خوە ل گەل چەند یاریزانێن پێشتر بۆ یانەیێن زاخۆ، دهۆك چەند یانەیێن دی كرینە، ژلایێ خوەڤە یانەیا پیرس دێ‌ پشت گەرمیێ ب كوڕێن باژێری كەت و ئەو یاریزانێن دگەل دا هەر ژ ئەكادیمیێ، یانەیێن دینارتە و بجێل و شێلادزێ‌ ژی بەرهەڤیێن باش كرینە سەرباری هەبوونا ئاستەنگێن دارایی، ب گشتی هەر پێنچ یانە دروشمێ‌ هەڤڕكیێ بۆ پلێتا دەربازبوونێ‌ بلندكرییە و ب هیڤی نە ب گەهنە پلا ئێكا كوردستانێ‌.

چاڤەڕێ‌ دهێتە كرن ئەڤرۆ كۆمەكا دی ژ گەڕا ئێكێ‌، دویێ یێن خولێن، ئسپانیا، ئیتالیا، ئنگلتەرا و فرەنسا بهێنە كرن، ژ گرنگترین یاریێن ئەڤرۆ ئەوا دێ‌ بڤی شێوەیی بن.
خولا ئسپانیا- گەڕا دویێ
ئەتلەتیكۆ مەدرید- ڤیاریال، دەمژمێر شەشێ‌ بەری مەغرەب.
خیتاڤی- رایسینگ سانتاندێر، دەمژمێر 8:30 شەڤ.
ئێلچی- بەرشەلۆنا، دەمژمیر 10:30 شەڤ.
خولا ئنگلتەرا- گەڕا ئێكێ‌.
برایتۆن- ئاستۆن ڤێلا، دەمژمێر چاری ئێڤار.
مانچستەر ستی- بۆرسمۆن، دەمژمێر چاری ئێڤاری.
نیۆكاسل یۆنایتد- لیڤەرپۆل، دەمژمێر 6:30 بەری مەغرەب.
خولا ئیتالیا- گەڕا ئێكێ‌
ڤێرۆسینۆنی- یۆڤانتۆس، دەمژمێر 7:30 شەڤ.
ئەتلانتا- ساسۆلۆ، دەمژمێر 9:45 شەڤ.
تۆرینۆ- میلان، دەمژمێر 9:45 شەڤ.
خولا فرەنسا- گەرائێكێ‌
ئێنجە- لیل، دەمژمێر چاری ئێڤاری.
لوو هاڤێر- مۆناكۆ، دەمژمێر 6:15 بەری مەغرەب.
رێن- پاریس سانجێرمان، 9:45 شەڤ.