سەرۆك بارزانی دوپات كر، كو كەركووك دڤێت ببیتە نموونەیا پێكڤەژیان و برایەتییا پێكهاتەیان. هەروەسا دبێژیت: ب چو رەنگەكی د گەل هندێ نینن كو ب رێكا بەردەوامیدان ب سەفەقاتێن مژەوی یێن هۆتێلا رەشید، یاری ب چارەنڤیسێ كەركووكییان بهێتە كرن.
سەرۆك مەسعود بارزانی پێشوازی ل ماكسیم رۆبین، كونسۆلێ گشتی یێ رووسیا ل هەولێرێ كر.
بارەگەهێ بارزانی بەلاڤ كر، د دیدارێ دا قونسلێ گشتی یێ رووسیا ل گەل دووپاتكرنێ ل سەر پەیوەندیێن ستراتیژی و درێژخایەن د ناڤبەرا وەلاتێ خۆ و هەرێما كوردستانێ دا، نرخاندن بۆ هەلوەستێن هەڤسەنگ یێن هەرێما كوردستانێ و پاراستنا ئارامیێ هەبوو.
قونسلێ گشتی یێ رووسیا راگەهاند: وەلاتێ وی گرنگییەكا مەزن ب پێگەهـ و كارتێكرنا سەرۆك بارزانی ددەت و هیڤی خواست پەیوەندیێن د ناڤبەرا رووسیا و هەرێما كوردستانێ دا گەشەكرنەكا زێدەتر ب خۆ ڤە ببینن.
هەروەسا دیتنا وەلاتێ خۆ دەربارەی گوهۆڕین و روودانێن دەڤەرێ بەرچاڤكر و ئاماژە ب وێ چەندێ كر، كو رووسیا دخوازیت بۆچوونا سەرۆك بارزانی ل سەر روودان و پێشهاتێن دەڤەرێ ب بزانیت.
ژ ئالیێ خۆ ڤە، سەرۆك بارزانی دووپاتی ل سەر بهێزكرنا پەیوەندیێن دیرۆكی یێن د ناڤبەرا هەرێما كوردستانێ و رووسیا دا كر.
هەروەسا ئاماژە ب دووماهی پێشهات و گوهۆرینێن دەڤەرێ كر و راگەهاند: كو هەرێما كوردستانێ چو جاران ل گەل هەبوونا شەڕ و ئالۆزییان نەبوویە و چو ئاریشە ب رێكا شەڕ و هەڤڕكیێن سەربازی چارەسەر نابن و دڤێت گرفت ب رێكا دانوستاندن و دیپلۆماسییەتێ بهێنە چارەسەركرن.
سەرۆك بارزانی دوپاتی ل سەر وێ چەندێ كر، كو هەرێما كوردستانێ چو جاران پشكەك نەبوویە و نابیت ژ وان شەڕ و پێكدادانێن ل دەڤەرێ هەین، و پشتەڤانی ل چو ئالۆزییەكا سەربازی و شەڕەكی ل دەڤەرێ نەكریە.
هەڤدەم ئەڤە ژی دیار كر، «مخابن سەرەرای وان هەلوەستێن رۆهن و ئاشكەرا یێن مە، ستەمەكا مەزن ل هەرێمێ هاتییە كرن و ژبەر هێرشێن بەرفرەهـ یێن مووشەكی و درۆنی، هەژمارەكا وەلاتیێن هەرێمێ شەهید و بریندار بووینە».
سەرۆك بارزانی د پشكەكا دی یا ئاخفتنێن خۆ دا، دەربارەی پرسا پارێزگەها كەركووكێ گۆت: ب دیتنا مە دڤێت كەركووك ببیتە نموونەیا پێكڤەژیان و برایەتییا پێكهاتەیان، و پارتی هەردەم ل گەل مافێ هەمی پێكهاتەیان بوویە و گەلەك جاران ژ پێخەمەت پێكهاتەیان و خەلكێ دی ژ مافێ خۆ خۆش بوویە و قوربانی ب دەستكەفتێن خۆ داینە.
ئەو چەندە ژی دووپات كر، كو ب چو رەنگەكی ل گەل هندێ نینن ب رێكا بەردەوامیدان ب سەفەقاتێن گوماناوی یێن هۆتێلا رەشید، یاری ب ئیرادەیا دەنگدەرێن كەركووكێ و چارەنڤیسێ كەركووكییان بهێتە كرن.

سەرۆك مەسعود بارزانی د پەیامەكێ دا ب هەلكەفتا سالڤەگەرا كیمیابارانكرنا دەڤەرێن بالیسان و شێخ وەسانان و دۆلا خۆشناوەتی دیار كر، كو ئەو تاوانە بوو ئەگەرێ شەهیدبوون و برینداربوونا هژمارەكا مەزن یا وەلاتیێن بێگونەهێن وێ دەڤەرێ. سەرۆك بارزانی ئاماژە ب وێ چەندێ كر كو ئەڤ تاوانە دەسپێكا پرۆسەیا كیمیابارانكرنا وەلاتیێن سڤیل و بەردەوامییا سیاسەتا قڕكرن و ژناڤبرنا گەلێ مە بوو.
سەرۆك بارزانی رۆناهی ئێخستە سەر دڕنداتییا رژێما وی سەردەمی و گۆت: «رژێم ب تنێ ب وێ كیمیابارانێ نەڕاوەستا، بەلكو ب دەهان بریندارێن وێ كارەساتێ پشتی دەستەسەركرنێ، ب شێوەیەكێ گەلەك دڕندانە ب ساخی بن ئاخ كرن، بیرهاتن و ئازارێن ڤێ تاوانێ و هەموو وان كارەساتێن ب سەر گەلێ كوردستانێ دا هاتین، چو جاران پشتگصهـ ناهاڤێژین و ژ بیر ناكەین.»

ل 17 و 18 نیسانا 2026 ێ، باژێڕێ ئەنتالیا ل وەلاتێ توركیا بوو ناڤەندا بڕیار و دیدارێن گرنگ یێن دیپلۆماسی، ل وێرێ نێچیرڤان بارزانی، سەرۆكێ هەرێما كوردستانێ، پشكداری د خولا سێیێ یا كۆڕبەندا دیپلۆماسی یا ئەنتالیا دا كر.
ئەڤ كۆڕبەندە كو ژ ئالیێ وەزارەتا دەرڤە یا توركیا ڤە هاتیە رێكخستن، د بن درووشمێ «رێڤەبرنا رەوشا بێ باوەریێ د نەخشەسازییا پاشەرۆژێ دا» دەست ب كارێن خۆ كر، كو تێدا سەرۆكێ هەرێما كوردستانێ وەك ئەكتەرەكێ سەرەكی یێ ئاشتیێ د دەڤەرێ دا دەركەفت.
د دەسپێكا كارنامەیا خۆ دا، نێچیرڤان بارزانی ژ ئالیێ هاكان فیدان، وەزیرێ دەرڤە یێ توركیا ڤە ب گەرمی هاتە پێشوازیكرن، كو ئەڤە وەك ئاماژەیەكێ بوو بۆ رێز و پێگەهێ بلندێ هەرێما كوردستانێ ل دەڤەرێ. پاشی دیدارەكا گرنگ د ناڤبەرا سەرۆكێ هەرێما كوردستانێ و رەجەب تەیب ئەردۆغان، سەرۆككۆمارێ توركیا بڕێڤە چوو. د ڤێ دیدارێ دا كو ئاژانسا ئەنادۆلێ دیمەنێن وێ بەلاڤكرین، هەردوو ئالییان دووپاتی ل سەر بهێزكرنا پەیوەندیێن دووقۆلی و هەماهەنگیێن ئابووری و ئەمنی د ناڤبەرا هەولێرێ و ئەنقەرەیێ دا كر.
هەر د چارچۆڤەیێ ڤێ كۆڕبەندێ دا، نێچیرڤان بارزانی زنجیرەیەكا دیدارێن ئاست بلند ل گەل سەرۆكێن وەلاتان ئەنجام دان. ل گەل ئیلهام عەلیێڤ، سەرۆككۆمارێ ئازەربایجانێ و شێخ تەمیم بن حەمەد ئال سانی، میرێ قەتەرێ، باس ل گەشەپێدانا پەیوەندییان و هاریكارییا هەڤپشك هاتە كرن. هەروەسا دیدار ل گەل شەهباز شەریف، سەرۆك وەزیرێن پاكستانێ، گرنگییەكا تایبەت هەبوو، ب تایبەت كو پاكستان رۆلەكێ كاریگەر دگێڕیت بۆ ناڤبەریێ و ب دووماهی ئینانا شەڕێ د ناڤبەرا ئەمریكا و ئیسرائیل دگەل كۆمارا ئیسلامی یا ئیرانێ دا.
د تەوەرەكێ دی یێ هەستیار دا، نێچیرڤان بارزانی ل گەل ئەحمەد شەرع، سەرۆكێ سووریێ كۆمبوو. د ڤێ كۆمبوونێ دا سەرۆكێ هەرێمێ دەستخۆشی ل هەولێن حوكمەتا سووریێ كر بۆ ئارامكرنا بارودۆخی و رێككەفتنا ل گەل هێزێن سووریا دیموكرات (هەسەدە). هەردوو ئالی هەڤڕا بوون كو پێدڤییە هەماهەنگی د ناڤبەرا ئیراقێ، هەرێما كوردستانێ و سووریێ دا هەبیت بۆ رووبڕووبوونا مەترسیێن ئەمنی و گەشەپێدانا ئابووری، هەروەسا د كۆمبوونێ دا باس ل رەوشا كوردان ل وی وەلاتی هاتە كرن.
ل سەر ئاستێ نێڤدەولەتی ژی، سەرۆكێ هەرێما كوردستانێ ل گەل تۆم باراك، هنارتیێ تایبەت یێ سەرۆكێ ئەمریكا بۆ كاروباری سووریێ كۆمبوو. د ڤێ دیدارێ دا ب هووری باس ل كارتێكرنا شەڕێن دەڤەرێ ل سەر ئاساییشا ئیراقێ و هەرێما كوردستانێ هاتە كرن و پشتەڤانی بۆ پاراستنا تەناهیێ هاتە دوپاتكرن. هەروەسا ل گەل سەعید خەتیبزادە، جێگرێ وەزیرێ دەرڤە یێ ئیرانێ، دووپاتی ل سەر گرنگییا ئاگربەستێ و بەردەوامییا دیالۆگێ هاتە كرن دا كو دەڤەر ژ شەڕ و ململانێیان دوور بكەڤیت.
د رۆژا دووێ یا كۆڕبەندێ دا، نێچیرڤان بارزانی ل گەل یاشار گولەر، وەزیرێ بەرگریێ توركیا كۆمبوو، كو تێدا گولەر رۆلێ حەكیمانە یێ سەرۆكێ هەرێمێ بلند هەلسەنگاند كو نەهێلایە هەرێما كوردستانێ ببیتە پشكەك ژ ئالۆزیێن سەربازی یێن دەڤەرێ. هەروەسا سەرۆكێ هەرێمێ ل گەل ئەحمەد ئەبولغەیت سكرتێرێ گشتیێ كۆمكارا عەرەبی كۆمبوو و هەردوو ئالییان دووپاتی ل سەر گرنگییا پاراستنا ئارامیێ و رێگریكرن ل زێدەبوونا ئالۆزییان ل رۆژهەلاتا ناڤین كر. هەروەسا كارتێكرن و لێكەفتێن شەڕی ل سەر وەلاتێن دەڤەرێ تەوەرەكێ دی یێ دیدارێ بوو.
ژ ئالییەكێ دی ڤە، نێچیرڤان بارزانی ل گەل بەرپرسێن ئورۆپی و بریتانی وەك لوئیجی دی مایۆ، نوونەرێ تایبەت یێ ئێكەتییا ئورۆپا بۆ كاروبارێن كەنداڤی و هامیش فالكۆنەر، وەزیرێ دەولەتا بریتانیا بۆ كاروبارێن رۆژهەلاتا ناڤین باس ل ئێكڕیزییا ناڤخۆیا هەرێمێ و پشتەڤانییا نێڤدەولەتی بۆ قەوارەیێ هەرێمێ هاتە كرن.
هەر ل بەردەوامییا وێستگەهێن ڤێ گەشتا دپلۆماسی دا، سەرۆكێ هەرێما كوردستانێ ل گەل ئەیمەن سەفەدی، وەزیرێ دەرڤە یێ ئوردنێ كۆمبوو و سوپاسییا پشتەڤانییا بەردەوام یا شاهێ ئوردنێ بۆ گەلێ كورد كر.

نێچیرڤان بارزانی ل سالڤەگەرا كیمیابارانكرنا بالیسان و شێخ وەسانان و دۆلا خۆشناوەتی دا راگەهاند، ئەڤ تاوانا مەزنا سالا 1987ێ، دەسپێكا زنجیرەیەكا تاوانێن دڕندانە بوو ل دژی خەلكێ سڤیل و ئاخ و سروشتێ كوردستانێ.
سەرۆكێ هەرێما كوردستانێ د پەیاما خوە دا دبێژیت: «د ڤێ هەلكەفتا ب ئێش دا، ئەم سەرێ رێزێ بۆ گیانێ پاقژێ شەهیدان د چەمینین و سلاڤان بۆ كەسوكارێن وان یێن سەربلند دهنێرین.» هەروەسا گۆت كو ئەڤ دەڤەرە بنگەهێ نیشتیمانپەروەریێ و پشتەڤانییا شۆڕشێ بوون، لەوما بوونە ئارمانجا هێرشێن رەش، لێ گەلێ كوردستانێ ب خۆڕاگری ما و تاوانكار ژناڤچوون. د دووماهیێ دا، نێچیرڤان بارزانی سلاڤ بۆ گیانێ پاقژێ شەهیدێن خۆشناوەتی و كوردستانێ هنارتن.»

د 39 سالڤەگەڕا تاوانا كیمیابارانكرنا بالیسان، شێخ وەسانان و دۆلا خۆشناوەتی دا، سەرۆكێ حوكمەتا هەرێما كوردستانێ مەسرور بارزانی پەیامەك بەلاڤكر و راگەهاند، پێدڤییە حوكمەتا فیدرال ب شێوەیەكێ هەژی قەرەبوویا كەسوكارێن سەربلندێن شەهیدان و ئەنفالكرییان بكەت.
سەرۆكێ حوكمەتا هەرێما كوردستانێ د پەیاما خوە دا ئاماژە ب وێ چەندێ كر كو ب رێز و شكۆڤە بیرئینانا شەهیدان دكەن و رێزەكا مەزن ل خەبات و قوربانیدانا خەلكێ خەباتكەرێ وێ دەڤەرێ دگرن. هەروەسا دوپات كر كو ئەركێ حوكمەتا فیدرالە قەرەبوویا مادی و مەعنەوی یا كەسۆكارێن قوربانییان بكەت.

سەرۆكێ حوكمەتا هەرێما كوردستانێ هێرشێن ل سەر هەرێما كوردستانێ «پرۆتەستۆ» دكەت و راگەهاند، ژبەر هێرشێن ڤان چەند رۆژێن دوماهیێ، پێنج كەس شەهید بوون و هەژمارەكا زۆرا خەلكی ژی بریندار بوون.
رۆژا شەمبی، 18/4/2026، مەسرور بارزانی پەیامەك دەربارەی هێرشێن ل سەر هەرێما كوردستانێ بەلاڤكر و راگەهاند: «ئەم نە پشكەك بووین ژ وی شەڕی، بەلێ هێرش د دەمێ چەند رۆژێن دەربازبووی دا هەر بەردەوام بوون.»
مەسرور بارزانی ئاماژە ب وێ چەندێ ژی كر كو سەرەرای هەبوونا ئاگربەستێ، هێرش بۆ سەر هەرێما كوردستانێ بەردەوامن و «ئەڤە ژی هەولەكە بۆ تێكدانا ئاگربەستێ و گەهاندنا زیانێن پتر ب دەڤەرا مە.»
سەرۆكێ حوكمەتا هەرێما كوردستانێ دبێژیت: «پێدڤییە حوكمەتا فیدرال پێرابوونێن كریاری وەربگریت بۆ دوماهی ئینان ب ڤان هێرشان.»
د دوماهییا پەیاما خۆ دا، سەرۆكێ حوكمەتا هەرێمێ باس ل وێ دكەت كو «داخواز ژ هەڤپشكێن مە یێن نێڤدەولەتی دكەین كو كەرەستە و ئامیرێن پێدڤی بۆ پاراستنا وەلاتیێن كوردستانێ و ژێرخانەیا وزەیێ، ژ ڤان گەفێن بەردەوام دابین بكەن.»