زنار تۆڤی:

ئەحمەد جەمیل، رێڤەبەرێ گشتیێ چاندنێ ل پارێزگەها دهۆكێ، بۆ رۆژناما ئەڤرۆ دیار كر، د مەها بۆری دا 64 هزار و 127 تەنێن بەرهەمێ خۆمالی یێ پارێزگەها دهۆكێ بۆ دەڤەرێن ناڤەراست و باشوورێ ئیراقێ هاتینە هنارتن.
ناڤهاتی گۆت: «پارێزگەها دهۆكێ ب بەرهەمێ ناڤخۆیی یا ناڤدارە و سالانە رێژەكا زۆر یا كەسكاتی و فێقی ژی لێ دهێتە بەرهەمئینان، ب مەرەما پەیداكرنا بازاری بۆ ڤی بەرهەمی، كابینا نەهێ یا حكومەتا هەرێما كوردستانێ ئاسانكاریێن باش كرینە».
گۆتژی: «د ئەڤ سالەدا هەر ژ 2/1/2025 هەتا 30/6/2025، پتر ژ 81 هزار تەنێن بەرهەمێ خۆمالی یێ پارێزگەها دهۆكێ بۆ ناڤەراست و باشوورێ ئیراقێ هاتینە هنارتن، كو پێك دهێن ژ: پتات، باجانسۆرك، خیار، فلفل، شۆتی، خۆخ، باجانرەشك، گوندۆر و مشمش».

سندس سالح سلێڤانەیی:

ب بڕیارەكا سەرۆكێ حوكمەتا هەرێما كوردستانێ داخواز هاتیەكرن، ژ نوكە وێڤە ل هەر پرۆژەیەكێ وەبەرهێنانێ ب رێژەیا 75% كرێكارێن خۆمالی لێ كاربكەن، د سالا بۆری دا دەلیڤەیا كاری بۆ پتر ژ (2000) كرێكارێن خۆمالی هاتە دابینكرن و ڤێ بڕیارێ ئەو دلخۆشكرینە و رێڤەرێ وەبەرهێنانێ ژی ل پارێزگەها دهۆكێ دیاردكەت كو د سالا 2024 دا موولەتا كاركرنێ ب 35 پرۆژەیێن وەبەرهێنانێ هاتیە دان و ب رێژەیا 95% كرێكارێن خۆمالی ل وان پرۆژەیان كاركریە.

ئەحمەد سادق كرێكارەكێ خەلكێ دهۆكێ یە دبێژیت: ئەو بڕیار گەلەكا د جهێ خوە دا بوو، چونكو د سالا بۆری دا كارێ مە یێ باش بوو، هەروەسا دەلیڤەیا كاری بۆ ب سەدان گەنجێن باژێری هاتە دیتن و ئەم دەستخۆشیێ ل سەرۆكێ حكومەتا هەرێما كوردستانێ دكەین بۆ وێ بڕیارا د جهێ خوە دا.
قادر حسێن، كرێكارەكێ دی یە دبێژیت: بەری وێ بڕیارێ هەتا رادەیەكی كارێ مە یێ كێم بوو، لێ پشتی ئەو بڕیار دەركەفتی ئەم وەكو كرێكارێن خۆمالی دلخۆشكرین و پتریا رۆژان ئەم دچووینە كاری و هیڤیا من ئەوە د ئەڤ سالەدا پتر بڕیار د بەرژەوەندا كرێكاران دا دەركەڤن.
خەلیل حسێن، سەرپەرشتێ پرۆژەیەكێ وەبەرهێنانێ یە دبێژیت: مە ب دروستی پێگیری ب وێ بڕیارێ كریە و پتر ژ 90% كرێكارێن ل گەل مە كاركرین خەلكێ دەڤەرێ بوون، ئانكو ئەز دشێم بێژم پتری (600) كرێكارێن خۆمالی ل سالا بۆری ل دەف مە كاركرینە و هیڤیا مە ئەوە د ئەڤ سالە زێدەتر لێ بهێن.
هەڤال ئاكرەیی رێڤەبەرێ گشتیێ‌ وەبەرهێنانێ ل پارێزگەها دهۆكێ دبێژیت: پشتی ل 22 ئیلۆنا سالا 2022 ئەو بڕیار ژلایێ سەرۆكێ حكومەتێ ڤە دەركەفتی، مە ب دروستی پێگیری پێكر و بۆ هەر پرۆژەیەكێ وەبەرهێنانێ مە كرە مەرج كو پێدڤیە ب رێژەیا 75% كرێكارێن خۆمالی لێ كاربكەن و ئەوێن دی بیانی بن، هەروەسا مەرج بوو كرێكارێن بیانی ژی كاری نیشا كرێكارێن مە یێن خۆمالی بدەن و د سالا بۆری دا مە مۆلەتا ئاڤاكرنێ دایە 35 پرۆژەیێن وەبەرهێنانێ و ئەز دشێم بێژم پتری دو هزارا كرێكاران ل وان پرۆژەیان كاركریە و ب رێژەیا 95% كرێكارێن خۆمالی بوون و ئەم وەكو حوكمەتا هەرێما كوردستانێ ڤێ چەندێ ب ئەركێ خوە دزانین كو دەلیڤەیا كاری بۆ كرێكارێن خوە پەیدابكەین، چونكو هەردەم كرێكارێن خۆمالی ب دلسوزانە كاردكەن.

ئامێدیێ‌، مەحمود نهێلی

ژ بەر خرابیا رێیا هاڤینگەها بیاوێ‌ ل سنورێ‌ ناوچەداریا دێرەلۆك، رێژا هاتنا گەشتیاران ل وێ‌ دەڤەرێ‌ كێم كریە، گەشتیار و خودانێن جهێن گەشتیاری ژی داخواز دكەن جادەیا وێ‌ دەڤەرێ‌ بهێتە چێكرن.

قاسم عوبەید ئێك ژ وان گەشتیاران بوویە یێن سەرەدانا ڤێ‌ هاڤینگەهێ‌ دكەت بۆ رۆژناما ئەڤرۆ دیار كر، ئەو بەردەوام سەرەدانا ڤێ‌ هاڤینگەهێ‌ دكەن، ئەڤ هاڤینگەهە ئێك ژ هاڤینگەهێن گەلەك خوەشە ل دەڤەرێ‌ و رۆژانە خەلكەكێ‌ زۆر قەست دكەنێ‌، لێ‌ مخابن رێیا ڤێ‌ هاڤینگەهێ‌ گەلەكا بێ‌ سەروبەرە و داخواز دكەت، ئەو رێ بهێتە چێكرن، بۆ وێ‌ یەكێ‌ گەشتیار ب ساناهی سەرەدانا وێ‌ دەڤەرێ‌ بكەن.
نەوزاد موحەمەد خودانێ‌ ئێك ژ جهێن گەشتیاریە ل بیاوێ‌ دیار كر، ئەوان مەزاختنەكا زۆر ل جهێ‌ خوە یێ‌ گەشتیاری كریە و ب رەنگەكێ‌ گەلەك جوان چێكریە، بۆ وێ‌ یەكێ‌ گەشتیار قەست بكەنێ‌ و گۆت: رۆژانە هژمارەكا زۆرا خەلكی قەستا جهێن مە دكەن، لێ‌ گازندا هەموویان ئەوە رێیا وان یا بێ‌ سەروبەر و خرابە.
عومەر هاریكی كەسەكی دی یێ‌ خودانێن جهێن گەشتیاری یە گۆت: ڤێرێ‌ دەڤەرەكا گرنگە بۆ جهێن گەشتیاری رۆژانە گەشتیارێن ناڤخوە و یێن عیراقێ‌ ژی سەرەدانا جهێ‌ مە دكەن و گۆت: ئەم شیاینە چەندین گەنجێن بێكار ل ڤان جهان بدەینە كاری و نێزیكی 100 جهێن گەشتیاری هەنە و یێن گەنجان جودانە و یێن خێزانی ژی جودانە و جهێن خوەش و دیمەنێن دلڤەكەر ل ڤێرێ‌ هەنە.
هەلبژێرێ‌ گوندێ‌ بیاوێ‌ بۆ رۆژناما ئەڤرۆ دیار كر، ئەوان گەلەك جاران بزاڤ كرینە و داخوازا خوە گەهاندیا ناوچەداریێ‌ و هەتا پارێزگەهێ‌ ژی، لێ‌ هەتا نوكە رازیبوون ل سەر نەهاتیە كرن و گۆت: زێدەباری هندێ‌ ئەڤە جهەكێ‌ گەشتیاری یە، لێ‌ ژیانا هژمارەكا زۆرا جوتیاران ژی ل سەر چەمێن ڤی گوندی نە و گۆت: ئەڤە گوندەكی ئاڤەدانە و یێ‌ خراب.
رێبەر سادق رێڤەبەرێ‌ ناحیا دێرەلۆك بۆ رۆژناما ئەڤرۆ دیاركر، ڤەدیتن بۆ رێیا گوندێ‌ بیاوێ‌ كو دكەڤیتە سنورێ‌ ناوچەداریا دێرەلۆكێ‌ كرن و هاتیە بلندكرن كو ببیتە پلان دگەل پرۆژێن سالانە ل دەڤەرێ‌ دهێنە چێكرن و گۆت: گوندێ‌ بیاوێ‌ جهەكێ‌ گەشتیاری یە و رۆژانە خەلكەكێ‌ زۆر ل سەر وێ‌ جادەیێ‌ هاتن و چونێ‌ دكەن، ژ بەر وێ‌ یەكێ‌ وان ب فەردیت جادا وی گوندی بهێتە چێكرن و ژ بەر وێ‌ یەكێ‌ كریە د پرۆژێن پلانكری دا و ئەو هیڤی دكەن ئەو پرۆژێن ل پارێزگەها دهۆكێ‌ رازیبوون ل سەر دهێتە كرن، ئێك ژ وان پرۆژێ‌ چێكرنا رێیا گوندێ‌ بیاوێ‌ بیت.

رەمەزان زەكەریا

هژمارەكا شوفێرێن ترۆمبێلن بارهەلگر بۆ خوە ڤەشارتن ژ قەپانكرنێ، ب رێكێن نە یاسایی هاتنوچۆنا هەولێرێ دكەن، شوفێرێن ترومبێلێن بارهەلگر ل گوندێ قەرەناز ل دەڤەرا بەردەڕەش ب سەرپێچی هاتن و چوونا هەولێر دكەن. وەلاتیێن وێ دەڤەرێ ژی دخوازن خالێن پۆلیسان ل وان دەڤەرا بهێنە چێكرن.

شیمال یوسف وەلاتیێ گوندێ قەرەنازە بۆ ئەڤرۆ گۆت: شوفێرەكێ بارهەلگر گۆتیە ژبەر كامیرە و قەپانێ، ژ ناچاری ئەم د ڤێ رێیێ ڕا هاتن و چوونێ دكەین، ل جهێ بچیتە بەردەڕەش بۆ كەلەك د رێكا بشیریان را دەربازدبن. شۆفێرێن توركی و خەلكێ سلێمانی و كفرێ و كەلار هەموو هاتن و چوونێ تێدا دكەن. رێیەكا خۆشە بۆ كەلەك، بەلێ زۆرا تەنگە و هزرا روودانا ناكەن و رەوشا خەلكی گەلەك نەخوەش كریە و دخوازین بۆ مە چارەسەر بكەن.
زەید شێرزاد وەلاتیێ گوندێ گربدەو بۆ ئەڤرۆ گۆت: ترۆمبێلێن بارهەلگر بەڵا خۆ ژ مە ڤەناكەن، ئەڤ رێكە نە كامیرە و نە ژی قەپان لێ نینە، نوكە كەس ب رێیا بەردەرەش بۆ كەلەك و گردەپان ناچن، چونكی ل وێرێ قەپان و كامیرە هەنە و د ترسن، ژبەركو زێدەتر ژ قەبارێ خۆ بار دكەن، لەورا د ڤێ رێیێدا دچن.
محەمەد محەمەد وەلاتیێ گوندێ بەنێنانە بۆ ئەڤرۆ گۆت: رێیەكا تەنگە و شیانێن ترۆمبێلێن بارهەلگر نینە و هەر بارهەلگرەك زێدەتر ژ قەبارێ خۆ بار دكەت كو هندەك ٣٠ تەنان بار دكەن و ئەو ب خۆ ژی ١٥تەنە، دبیتە نێزیكی ٥٠ تەنان و ئەڤ جاددەیە تەحەمولا هندێ ناكەن، ئەگەر پۆلیسەكێ هاتن و چوونێ بداننە سەر وێ‌ جادەیێ‌ و سزا بدەن، ئەڤ ئاریشە نامینیت.