بەرپرسەکێ ئاکپارتیێ دیار دکەت حەفتیا بهێت دێ سەرۆک کۆمارێ تورکیا ل گەل شاندێ ئیمرالیێ کۆمبیت و هەتا وی دەمی دێ گرۆپەک ژ چەکدارێن پەکەکێ چەکێن خوە رادەست کەن و ئەو یەک ژی دێ بیتە پێنگاڤەکا نوو و دیرۆکی ژ بۆ پێشڤەبرنا قووناغا ئاشتیێ.
بەرپرسەکێ ئاکپارتیێ کو نەخواستیە ناڤێ وی بهێتە ئاشکرا کرن بۆ کەنالێ ئیکۆل یێ تورکیا دیار کریە، حەفتیا بهێت کو دبیت رۆژا ٩ مەهێ بیت، دێ سەرۆک کۆمارێ تورکیا رەجەب تەیب ئەردۆغان ل گەل شاندێ ئیمرالیێ کۆمبیت و دێ بەحسێ چاوانیا پێشڤەچوونا قووناغا ئاشتیێ کەت، بێگومان هەتا وی دەمی دهێتە چاڤەرێکرن، کو گرۆپەک ژ چەکدارێن پەکەکێ چەکێن خوە رادەست بکەن، بێگومان ئەو یەک دێ بیتە پێنگاڤەکا نوو و دیرۆکی ژ بۆ پێشڤەبرنا قووناغا ئاشتیێ و هەموو تورکیا چاڤەرێی ڤێ یەکێ یە.
هەمان بەرپرسی ئەو یەک ژی دیار کریە، ل ڤێ مەهێ دێ پێشڤەچوونێن گەلەک مەزن و دیرۆکی روو دەن، چونکی پشتی هەڤدیتنا شاندێ ئیمرالیێ ل گەل سەرۆک کۆمارێ تورکیا دێ شاندێ ئیمرالیێ سەرەدانا ئۆجەلانی کەت و دبیت ئۆجەلانی ژی پەیاما خوە هەبیت و بێگومان وەسا دێ گەلەک گوهۆڕینێن باش روو دەن، کو ژ بۆ تورکیا و ژ بۆ ئاشتیێ و پێکڤەژیانێ گەلەک یا گرنگە.
ل ئالیێ دی دوهی چەندین دەزگەهێن راگەهاندنا تورکیا ژی دیار کرن کو دهێتە چاڤەرێکرن د دەمەکێ نێزیک دا گرۆپەک ژ چەکدارێن پەکەکێ ل هەرێما کوردستانێ و ل بەر چاڤێن دەزگەهێن راگەهاندنێ چەکێن خوە رادەست بکەن و پشتی وێ ژی دێ ل تورکیا گوهۆڕینێن باش روو دەن، چونکی پەکەکە چاڤەرێیە پشتی رادەستکرنا چەکان ب رێیا پەرلەمانێ تورکیا قووناغا ئاشتیێ بەر ب پێشڤە بچیت و چاکسازیێن قانوونی و سیاسی بهێنە کرن، بێگومان هەڤدیتنا سەرۆک کۆمارێ تورکیا و شاندێ ئیمرالیێ ژی دێ گەلەک یا گرنگ بیت.
چاڤدێرێن سیاسی ل تورکیا ژی دیار دکەن، ئاستەنگی ل هەمبەر پێشڤەچوونا قووناغا ئاشتیێ ل تورکیا هەنە، چونکی هەتا نها ژی باوەریا دەولەتا تورکیا ب پەکەکێ ناهێت و ل هەمبەر دا پەکەکە ژی باوەر ناکەت دێ تورکیا گوهۆڕینان کەت و ژ بەر ڤێ یەکێ ژی قووناغا ئاشتیێ وەکو دهێتە چاڤەرێکرن بەر ب پێش ناچیت، لێ دبیت پشتی هەڤدیتنا شاندێ ئیمرالیێ ل گەل ئەردۆغانی و پاشی ژی ل گەل ئۆجەلانی گوهۆڕینێن باش روو بدەن و هندەک ئاستەنگی نەمینن.
ل گۆر باوەریا چاڤدێرێن سیاسی هندەک ژ بەرپرسێن پەکەکێ وەسا دبینن دڤێت پشتی، کو گرۆپەک ژ چەکدارێن پەکەکێ چەکێن خوە رادەست کرن ل ئالیێ دەولەتا تورکیا ڤە ب کریاری هندەک تشت بهێنە کرن.
نيشاندان