هه‌رهین محه‌مه‌د:

زارڤه‌كه‌ر فه‌له‌ك ره‌مه‌زان حاجی ، ددیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: حه‌زژ ڕۆلێن كومێدی ناكه‌م، چونكۆ ل گه‌ل كه‌سایه‌تیا من ناگونجن پتر حه‌زژ ڕۆلێن دایكێ و یێن بهێز دكه‌م و هه‌موو ده‌مان دفلم و درامایاندا ڕۆلێ ژنێن ده‌نگ بلند دده‌نه‌ من و ئه‌ز ب ئه‌وان ڕۆلان یا كه‌یفخۆشم ژی، چونکۆ ژ ده‌رحه‌ق دهێمه‌ده‌رێ و ئه‌ڤ چه‌نده ‌ژی بینه‌ران گۆتیه‌ من و پشكداری فلمێن سینه‌مایی و دڕمایان بوویمه‌ و بۆ من چ جوداهی نینه‌ و هه‌ردوو بۆ من گه‌له‌ك دخۆشن، چونكۆ ده‌مێ ئه‌ز رؤلێ خوە دگێرم ئێكسه‌ر دكه‌ڤمه‌ دئه‌وی ژیواری دا یێ ئه‌ز پێ ڕادبم و من چ مه‌ره‌م ژی نینن و بتنێ من دڤێت ب شیان و حه‌زا خوە خزمه‌تا سینه‌ما و دڕاما كوردی بكه‌م.
هه‌روه‌سا گۆت: ل سالا 2013 ئێكه‌م جار كه‌فتمه‌ د ناڤ مه‌یدانا سینه‌مایێ دا و سوپاس بۆ خۆدێ شیام ڕۆله‌كێ باش ب گێرم و پشتی ده‌رهێنه‌رێن كورد ئه‌ز دیتیم گه‌له‌كا داخواز ژ من كر كو پشكداری فلمێن ئه‌وابم و ئه‌و چه‌نده ‌ژی بۆ من جهێ شانازیێ یه‌ من شییا ب ڕۆله‌كی ناڤ و ده‌نگێن خوە به‌لاڤبكه‌م و سالانه‌ پشكداری فلمه‌ فیستیڤالا دهۆك یا ناڤده‌وله‌تی دبم و سالانه‌ گوهۆرینێن باش بخۆڤه‌ دبینت ژ هه‌موو لایان ڤه‌، به‌لێ ئه‌ڤ ساله‌ بینه‌رێ فلمان گه‌له‌ك یێ كێمبوو ئه‌ڤ چه‌نده‌ژی بۆ ئه‌وێ یه‌كێ دزڤریت فلمێن كوردی گه‌له‌ك دكێمبوون و ل سالێن بوری ده‌مێ خه‌لكی دزانی فلمه‌كێ كوردی یێ ده‌رهێنه‌ره‌كێ دهۆكێ دێ هێته‌ نیشاندان ب هه‌موو جوش دهاتنه‌ فیستیڤالێ و هه‌تا كو جهێ ڕوونشتێ نه‌بوو دهۆلێ ڤه‌ و ل سه‌ر ده‌رجا و شپێرڤه‌ خه‌لك دراوستیان و هه‌روه‌سا دوباره‌یا فلمی ل سینه‌ماكسا دهۆك مۆل خه‌لك دچوو دا كو بینه‌ریا ئه‌وی فلمێ كوردی بكه‌ن، له‌ورا داخازیا من ژ ستافێ سه‌ره‌كی یێ فلمه‌ فیستیڤالێ ئه‌وه‌ پتر گرنگیێ بده‌نه‌ فلمێن كوردی، چونكۆ خه‌لكێ مه‌ تێهنیێ سینه‌ما كوردی یه‌.

دلۆڤان هالۆ:

دەنگبێژێ باکوورێ کوردستانێ دەلیل میرساز د دیدارەکێ دا بۆ ڕۆژناما ئەڤرۆ دیارکر کو داستانا ئەڤینا دەروێشێ عەڤدی و عەدۆلێ ب شێوێ ڤیدیۆ کلیپ ژ لایێ هونەرگەها وەلات ڤە هاتە بەرهەمئینان و کلیپ کرن کو من ئەڤ داستانە ب شێوێ حەیرانەکا درێژ یا ١٦ خۆلەکی گۆتییە.
دەلیل میرساز ئاماژە ب وێ چەندێ ژی کر کو ئەڤ بەرهەمە ژ لایێ من و بێکەس داری و خۆشمان قادو هاتییە بەرهەڤکرن، و سیناریۆ و دەرهێنانا ڤی بەرهەمی ژ لایێ شێرو هیندێ هاتییە کرن، و مۆزیکا بەرهەمی ژ لایێ مەحموود بەرازی ڤە هاتییە بەرهەڤکر و دابەشکرن، هەر دیسان کۆمەکا ئەکتەرێن کورد بەشداری دڤی بەرهەمی دا کرینە.
دڤی بەرهەمی دا ئەکتەرێن کورد ب ڕۆلێ دەروێشێ عەڤدی و عەدولێ ڕابووینە کو تێدا دەروێش ب بەژنوبالا عەدولێ دبێژیت کو ئەگەر عەدول خودانا حەفت برا و بابەکێ بیت و حەفت دەولەتێن جیهانێ لێ کۆم ببن و د ئەشکەنجێ دا بمریت، چ جاران ئەڤینا وێ بۆ من کێم نابیت، عەدول ژی تێدا داخوازێ ژ خودێ دکەت کو بلا ڕووبارێ خابیری ناڤبەرا وان دا نەبیتە ڕێگر و ئەم هەر دوو ل سەر ڕووباری بگەهینە ئێك.
ناڤهاتی گۆت ژی:»داستانا ئەڤینا دەروێشێ عەڤدی و عەدولێ وەکو داستانا مەم و زینێ و لەیلا و مەجنوونی و سیابەند و خەجێ داستانەکا بناڤودەنگا کوردییە، ل دووڤ ڤەگێڕانان داستانا ئەڤینا دەروێشێ عەڤدی و عەدۆلێ ل سالا 1768 ل سەردەمێ تەمەر پاشایێ خێلی ل وێرانشارا پارێزگەها ڕوحا یا باکوورێ کوردستانێ هاتییە ڕوودان».
زێدەتر ژی گۆت:» ژبەرکو دەروێشێ عەڤدی هەموو دەمان دناڤ مالا پاشایی دا بوو کچا وی یا بناڤێ عەدول دبینیت و پەیوەندییا ئەڤینیێ دناڤبەرا وان دا دروست دبیت، پاشا ب ڤێ چەندێ تۆڕە دبیت لەورا دەروێشێ عەڤدی و مالباتا وی دهنێریتە دەڤەرا شنگالێ».

هه‌رهین محه‌مه‌د:

لێده‌رێ ئامیرێ عودێ كاوار عسمه‌ت، ددیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: هه‌ركه‌سه‌كێ كاره‌كێ هونه‌ری بكه‌ت باوه‌رناكه‌م رۆژه‌ك بهێت هه‌ر دگه‌نجاتیا خوه‌ دا وی كاری بهێلیت، چونكۆ هونه‌ر ب گشتی دكه‌ڤیته‌ دناڤ خۆینا مرۆڤی دا و ئه‌و هونه‌ره‌ دبیته‌ رێیه‌ك مرۆڤ خوه‌ پێ ژبیرڤه‌كه‌ت و گه‌له‌ك جاران ژی دبیته‌ ئه‌گه‌رێ په‌یداكرنا پاریێ ژیانێ، به‌لێ ب مخابنی ڤه‌ ل كوردستانێ ب گشتی هونه‌ر نه‌بوویه‌ پیشه‌ هونه‌رمه‌ند پێ بژین.
هێشتاژی گۆت: ژبلی عودێ ئامیرێ جمبشێ و سازێ و پیانویێ ژی دژه‌نم و به‌ری نوكه‌ دچوومه‌ ئاهه‌نگ و روینشتنێن به‌رپرسا، به‌لێ نوكه‌ من روینشتن هێلاینه‌ و بتنێ هه‌كه‌ ئاهه‌نگ و لایڤ مۆزیكان و ئه‌و بوو من گه‌له‌ك خوه‌شترن ژروینشتنان ل روینشتنان ل سه‌ر ك مۆزیكێ و سترانان دبێژم و دوه‌ستیێم و من بخوه‌ ژی حه‌زل سه‌ر ئاهه‌نگ و لایف مۆزیكان هه‌یه‌ و دشێم ل ئاهه‌نگان هه‌تا پێنچ ده‌مژمێران بێ راوه‌ستیان مۆزیكێ بژه‌نم و نه‌وه‌ستم.
ل دووماهیێ گۆت: مۆزیك ل هه‌موو ده‌مان یا خۆشه‌ مرۆڤ بژه‌نیت، به‌لێ ب تایبه‌تی هه‌كه‌ مرۆڤ یێ بتنێ بیت ل جهه‌كێ سرۆشتی یان ژی ل نیڤا شه‌ڤێ مرۆڤ یێ بتنێ بیت و بخوه‌ ئاوازێن ئارام بژه‌نیت و ب ئه‌وێ چه‌ندێ ژی دێ بنه‌ راهێنان بۆ مرۆڤی و پتر ده‌ستێ مرۆڤی دكه‌ڤیته‌ سه‌ر ئه‌وێ ژه‌نینێ.