د دیدارەكێ‌ دا چیا ئەمین سەرۆكێ‌ یانەیا زاخۆ دوپات كر كو هەردەم یانەیێن كوردستانی ب جوانترین شێوە پێشوازییا هەر شاندەكێ‌ یانەیێن دی یێن ئیراقێ‌ كرینە و مێڤانداریەكا ڕێكخستی ژی بۆ كرییە و خۆشی ئێخستە د خولا ئیراقێ‌ دا، هەردەما پشتەڤانێن وان ژی هاتینە پێشوازیەكا جوان ل وان ژی هاتیە كر، لێ‌ ئەوا ل یاریگەها یانەیا ئەلگەرمە چێبوویی جهێ‌ حێبەتیێ و شەرمزاریێ یە، هەكە فدراسیۆنا فوتبۆلا ئیراقێ‌ پێرابوونان دژی وان ڕەفتاران نە كەن دوور نینە ئەم خوە ژ خولا ئیراقێ‌ ڤەكێشین.
هەروەسان ناڤهاتی گۆت: ئەوا ل یاریگەها ئەلگەرمە چێبووی د یارییا بۆری دا دڤێت دووڤچوونەكا تەسل و ڕژدی ل سەر بهێتە كرن، ژبەركو ڕەفتارێن نە كرێت دژی یانەیا مە و پشتەڤانێن مە هاتینە كرن، نە یا ڕەوایە بەری دەستپێكرنا دو دەمژمێران دادڤانێ‌ سیستەمێ‌ ڤارێ‌ محەمەد سەلمان ل جهێ‌ عەلی حسێن بهێتە دانان بێ ئاگەهدارییا مە، هەروەسان پشتی یاری ب دووماهی هاتی ب پێنج خولەكان كێمتر پشتەڤانێن تیما ئەلگەرمە هاتنە دناڤ یاریگەهێ‌ دا و گەفێن كۆشتنێ‌ ل شاندێ‌ یانەیا مە بكەن،
هەروەسان ناڤهاتی گۆت: ئەڤ روودانە و چەند كارێن دی یێن كرێت نموونە هاڤێژتنا كەرستێن دی بۆ ناڤ یاریگەهێ‌ دا مەرەما وان ترساندنا دادڤانان و یاریزانێن زاخۆ بوویە، هەروسان بوویە ئەگەر دادڤانی لێدانەكا دروست یا سزایی بۆ تیما مە نە هژمارت زێدەباری چەندین بڕیارێن د بەرژوەندییا یانەیا ئەلگەرمە دا هژمارتن، ئەڤ هەموو حالەتە جهێ‌ گومانەكا مەزنن.
سەرۆكێ‌ یانەیا زاخۆ هیڤی خواست فدراسیۆنا فوتبۆلا ئیراقێ‌ ڕژدی ل سەر ڤی بابەتی ڕاوستن و گۆت: دڤێت دووڤچوونا تەسەل ل سەر ڤی بابەتی بهێتە كرن و پێرابوونێن ڕژد هەبن، هەكە چو پێنگاڤ نە هێنە هاڤێژتن، وەكو یانەیا زاخۆ ڕەنگە مە هزر د بژاردەیا خوەڤەكێشانێ‌ ژ خولا ئیراقێ‌ دا كرییە، ژبەركو قەناعەتا چێدبیت كو هەر ژ نوكە خودانێ‌ ناسناڤێ‌ ئەڤ سالە دیاربیت، ئەڤە ژی گۆمانەكا مەزن ل دەف هەموو یانەیێن پشكدار پەیداكرییە و دێ‌ لاوازیەكا مەزن د خولێ‌ دا هەبیت.
بۆ زانین تیما یانەیا زاخۆ د یارییا بۆری دا بەرانبەر یانەی ئەلگەرمە ب گۆلەكێ‌ تووشی خوسارەتیێ بوو ژ گەڕا هەشتێ‌ یا خولێ‌ و پاشڤەچوو ڕێزا 11ێ‌ ب كۆمكرنا نەهـ خالان، یانەیا ئەلگەرمە سەرێ‌ لیستێ‌ دهێت ب كۆمكرنا 20 خالان.

چاڤەڕێ‌ دهێتە كرن ئەڤرۆ دەست ب هەڤڕكیێن قووناغا پێش دووماهییا خولا پلا دویێ یا كوردستانێ‌ دناڤبەرا چار یانەیان بهێنە كرن ژبۆ ب دەستڤە ئینانا پلێتا دەربازبوون بۆ فینالێ‌ ل هەردو یاریگەهێن بازیان و ئاكرێ‌ بهێنە كرن، هەرچەندە هەر چار یانەیان دەربازبوونا خوە بۆ پلا ئێكا كوردستانێ‌ یا فوتبۆلێ‌ مسۆگەر كرییە، لێ‌ دێ‌ شەڕی بۆ ناسناڤێ‌ ئەڤ سالە ژی كەن و هەردو یاری ب ڤی شێوەیی نە.
یانەیا باتیفا- یانەیا ڕەواندۆز، یانەیا حاجیاوا- یانەیا كەلار، بۆ وانین هەردو یاری ل دەمژمێر 3:30 ئێڤاری هێنە كرن.
باتیفا بەرانبەر دیرۆكەكا نوو
نوونەرا ئیدارا سەربەخوەیا زاخۆ دێ‌ ل یاریگەها ئاكرێ‌ مێڤاندارییا یانەیا ڕەواندز كەت د یارییەكا دیرۆكی و ئێكلاكەر دا بۆ فینالێ‌ كو دهێتە هژمارتن ئێكەم جارە د دیرۆكا خوە ژی دا بگەهیتە ڤێ‌ قووناغێ‌ هەر ژ دەستپێكا دامەزراندنا خوە یا 2021ێ‌، تیما باتیفا وەكو سەركێشا كۆما چارێ‌ گەهشتە ڤێ‌ قووناغێ‌ پشتی ل ڕێزا ئێكێ‌ هاتی ب كۆمكرنا 13 خالان، ژچار سەركەفتن و وەكهەڤییەكێ‌ بێ خوسارەتی، ژلایێ خوەڤە ڕۆاندز ژی سەركێشا كۆما سێیێ‌ دەربازبوویە ب كۆمكرنا 13 خالان، ژچار سەركەفتن، وەكهەڤییەك و بی خوسارەتی، ئانكو یارییەكا ئاگرینە دناڤبەرا دو تیمان دا.
لدۆر بەرهەڤیێن وان دلۆڤان سالح كاپتنێ‌ تیما باتیفا گەشبینییا خوە دیار كر و گۆت: پشتی ب سەرفەرازی دەربازبوونا خوە بۆ پلا ئێكا كوردستانێ‌ مسۆگەر كری، د نوكە دا مە ئارمانجەكا دی هەیە ئەوژی ب دەستڤە ئینانا ناسناڤێ‌ خولا پلا دویە ژبۆ نڤێسینا دیرۆكەكا دێرین بۆ خەلكێ‌ باتیفا و دەڤەرا بەهدینان، گەهشتن بۆ ئارمانجان پێدڤی ب ئێگكرتنا كۆمە ئەڤە ژی د یاریێن بۆری دا دیاربوو كو ئەم هەموو ب مۆرالەكا بلند یاری دكر، هیڤییا مە ئەوە د یارییا ئەڤرۆ دا بگەهینە ئەوێ‌ ئارمانجێ‌.

د دیدارەكا رۆژنامەڤانی دا یێ فرەنسی ماتیێس تێل هێرشبەرێ‌ یانەیا توتنهام یا ئنگلتەرایێ ڕەخنەیێن دژوار ل هەموو یاریزانان گرت و بەرپرسێن سەرەكی یێن ژ دەستدانا خالان و خوسارەتییان دا دیاركرن، ئەڤچەندە هات پشتی بۆرینا پێنج یارییان و تیما تۆتنهام ل ڕێزا دووماهیێ یە ب كۆمكرنا دو خالان.
ماتیێس تێل گۆت: ئەم هەموو یاریزان ئەگەرێن ئەنجامێن خرابین یێن تیمێ‌ دخولێ‌ دا، مافێ‌ پشتەڤانایە ژ مە توورە بن، ئامارێن پێنج یاریێن بۆری د باش نینن، دو خال و ڕێزا دووماهیێ، دڤێت یاریزان ب گیانێ‌ هەڤڕكیێ و ڕێزگرتنا لۆگۆیێ یانەیێ یاریێ بكەت، شاشیێن بەرچاڤ دهێنە كرن دڤێت ل خوە بزڤین و چارەسەربكەین.

د داخۆیانیه‌كێ دا جێگرێ سه‌رۆكێ فیدراسیۆنا فوتبۆلا پارێزگه‌ها دهۆكێ بۆ رۆژنامه‌یا ئه‌ڤرۆ دیاركر داكو ل پاشه‌رۆژێ پێدڤی ب یاریزانێن بیانی و ده‌رڤه‌ نه‌بین، مه‌ ئه‌ڤ جوره‌ قاره‌مانیه‌ بۆ گه‌نج و پشكۆژێن ده‌ڤه‌رێ ڤه‌كر، پێخەمەت بشێین پێگه‌هه‌كێ باش و به‌رفره‌هـ لسه‌ر بناغەیە‌كێ زانستی په‌یدا بكه‌ین ل پاشه‌رۆژێ مفا ژلایێ‌ یانه‌یێن مه‌ بهێته‌ وه‌رگرتن.
ناڤهاتی زێده‌تر گۆت: پشتی ئه‌ڤ قاره‌مانییه‌ هاتیه‌ ڤه‌كرن گه‌له‌ك ڕاهێنه‌ر و كه‌سانێن بسپۆر ژ دهۆكێ و ئیداره‌یا سه‌ربه‌خۆیا زاخۆ ته‌ماشه‌ی یاریان دكرن ژبۆ ژێگرتنا یاریزانێن خۆدان شیان بۆ ناڤ رێزێن تیمێن خوە و چه‌ندین یاریزان هاتینه‌ ده‌ستنیشانكرن بو ڤێ مه‌ره‌مێ.
ژلایه‌كێ دووڤه‌ ئەحمەد حسێنی گۆت: هه‌رچه‌نده‌ مه‌ هنده‌ك كێماسی هه‌بوون ژبه‌ركو ئه‌ڤه‌ سالا ئێكێ یه‌ ئه‌ڤ قاره‌مانیه‌ هاتیه‌ ڤه‌كرن، ‌لێ مفا گه‌هاندیه‌ یاریزانێن پشكدار ژی كو شیاین یاریێ ل یاریگه‌هێن مه‌زن بكه‌ن و گەشبینین ل سالێن بهێت ئه‌ڤ جوره‌ قاره‌مانیه‌ دبه‌رده‌وام بن، ب هیڤییا وێ یه‌كێ شه‌نگسته‌كێ بهێز و موكوم بۆ فوتبۆلا پارێزگه‌هی بهێته‌ دانان و یاریزانێن بیانی دناڤ یانه‌یێن مه‌دا كێم ببن.
بۆزانین دڤێ قاره‌مانیێ دا پتری 600 یاریزانان ژ 30 ئه‌كادیمیان ل پارێزگه‌ها دهۆكێ پشكداری تیدا كربوو، ل دووماهیێ ئه‌كادیمیا یانه‌یا زاخۆ بناسناڤێ قاره‌مانیێ هاته‌ خه‌لاتكرن پشتی د یاریا دووماهیێ دا سه‌‌ركه‌فتی لسه‌ر ئه‌كادیمیا چیا ب سێ گۆلان بێ به‌رامبه‌ر، د یاریا واندا ئه‌وا ل یاریگه‌ها كولیژا په‌روه‌رده‌یا زانستی ل زانكویا دهۆك هاتیه‌ ئه‌نجامدان