وەزیرا كار و كاروبارێن جڤاكی ل حكومەتا هەرێما كوردستانێ دیاركر، پڕۆژەیێ هاریكاریكرنا خێزانێن كێم دەرامەت و پێدڤی ل پارێزگەها دهۆكێ دەست پێ كریە و هەر خێزانەكا ل دووڤ پیڤەران شایستە بیت، دێ هاریكاریێ وەرگریت.
كویستان محەمەد، وەزیرا كار و كاروبارێن جڤاكی ل حكومەتا هەرێما كوردستانێ بۆ رۆژنامەیا ئەڤرۆ گۆت: «ئەڤ پڕۆژەیێ هاتیە ڕاگەهاندن، بۆ هاریكاریكرنا سێ‌ هزار و 200 خێزانێن هەژارە د ناڤ سەنتەرێ‌ باژێڕێ دهۆكێ دا، ئەڤ هاریكارییە دێ وان خێزانێن پەنابەر ژی ڤەگریت، یێن د ناڤ باژێڕی دا دژین، وەكو ئەزموون؛ ل دهۆكێ دەست ب پڕۆژەی هاتە كرن، پشتی سەركەفتنا پڕۆژەی ل دهۆكێ، د قووناغێن بهێن دا دێ هێتە بەرفرەهكرن بۆ هەمی خێزانێن كێمدرامەت ل دهۆكێ و پارێزگەهێن پارێزگەهێن هەولێر، سلێمانی، هەلەبجە و ئیدارەیێن سەربخۆ».
گۆت ژی: «ڕێژەیا هەژاریێ ل دهۆكێ، هەڤبەركرن ل گەل پارێزگەهێن دی بلندترە، لەوما ل دهۆكێ‌ دەست ب پڕۆژەی هاتە كرن، پرۆسە ب ڕێیا پڕكرنا فۆرمێ دەست پێ دكەت بۆ وان خێزانێن خۆ ب شایستە دبینن، پاشی تیمێن ڤەكۆلینێ یێن وەزارەتێ دێ سەرەدانا مەیدانی یا خێزانان كەن، دا كو ژ ڕەوشا وان یا ژیانێ پشتڕاست ببن و هەر خێزانەكا ل دووڤ پیڤەران شایستە بیت، دێ هاریكاریێ وەرگریت».

هەولێر، قائید میرۆ:

رێڤەبەرێ گشتیێ بەنداڤ و عمباركرنا ئاڤێ ل هەرێما كوردستانێ خویاكر، ژبەر باران و بەفرا ئەڤ سالە، هەتا نوكە حەفت ملیار مەترێن سێجا یێن ئاڤێ‌ د ناڤ بەنداڤان دا هاتینە كۆمكرن و دبێژیت: 22 بەنداڤ ل سەرانسەری هەرێما كوردستانێ تژی ئاڤ بووینە.
رەحمان خانی، رێڤەبەرێ بەنداڤ و عمباركرنا ئاڤێ بۆ رۆژناما ئەڤرۆ دیاركر، ل هەرێما كوردستانێ، هەتا نوكە ب تنێ‌ سێ بەنداڤ ماینە و تژی ئاڤ نەبووینە، 22 بەنداڤێن دی تژی بووینە و ئاڤ سەردا چوویە و گۆت: «ئەو سێ بەنداڤێن مایی ژی، دیار نینە دێ كەنگی ئەو ژی تژی بن، بەلێ بەنداڤا گۆمەسپان ئەڤ سالە ئاڤ سەرداناچیت، ب شێوەیەكێ گشتی رەوشا بەنداڤان و رێژەیا ئاڤێ د ناڤ بەنداڤان دا د ئاستەكێ باش دایە و هێشتا ژی دەم مایە بارانێن دی ژی بهێن».
گۆت ژی: «رێژەیا گشتی یا ئاڤا د ناڤ بەنداڤێن هەرێما كوردستانێ دا هاتیە كۆمكرن، هەتا نوكە گەهشتیە حەفت ملیار مەترێن سێجا، ئەڤە ژی رێژەیەكا زۆر باشە و دێ كاریگەری ل سەر كەرتێ ئاڤێ ل هەرێما كوردستانێ هەبیت، چونكی ل سالێن بۆری، ژ بەر كێم بارانیێ ئاستێ ئاڤێ د ناڤ بەنداڤان دا وەكو پێدڤی نەبوو».

مەسعود مستەفا، سەرۆكێ باژێڕڤانیا باتیفا بۆ ڕۆژناما ئەڤرۆ دیار كر كو ئەو كار دكەن بۆ زێدەكرنا ڕێژەیا كەسكاتیێ و جوانكرنا سیمایێ باژێڕێ باتیفا ب پڕۆژەیێن نوو یێن دارچاندنێ.
سەرۆكێ باژێڕڤانیا باتیفا، ئاماژە ب وێ چەندێ ژی كر كو بۆ ڤێ مەرەمێ هەوەكا چاندنا داران و كەزاختن و ڕێكخستنا كەسكاتیا جاددەیان ل هەردو باخچەیێن باتیفا و ل جۆتسایدێ سەرەكی یێ باتیفا هاتە ئەنجامدان.
مەسعود گۆت: «ئەڤ كارە پشكەكە ژ پلانێن باژێرڤانیا مە بۆ زێدەكرنا رێژەیا كەسكاتیێ و جوانكرنا سیمایێ باژێڕی، ئارمانجا مە ئاڤاكرنا ژینگەهەكا پاقژ و دیمەنەكێ شارستانیە بۆ هەموو وەلاتیان، لەورا هیڤیا مە ژ خەلكێ خوشتڤی ئەوە، كو د پاراستنا ڤان داران دا هەڤكار بن، داكو پێكڤە ژینگەهەكا ساخلەم بۆ هەمیان دابین بكەین».

رەمەزان زەكەریا:

پشتی سەرەدانا مەسرور بارزانی، سەرۆكێ حكومەتا هەرێما كوردستانێ گرنگیەكا مەزن ب تمامكرنا پڕۆژەیێ ئاڤا ئاكرێ هاتیەدان و كاركرن تێدا بەردەوامە.
ئەندازیار زرار ئەحمەد، رێڤەبەرێ ئاڤا ئاكرێ بۆ ئەڤرۆ گۆت: «چەندین سال بوون پڕۆژەیێ ئاڤا ئاكرێ نەهاتیە تەمامكرن، بەلێ پشتی سەرەدانا مەسرور بارزانی، سەرۆكێ حكومەتا هەرێما كوردستانێ گرنگیەكا زێدەتر ب تمامكرنا پڕۆژەی هاتیەدان».
گۆت ژی: «كاركرن د پڕۆژەی دا بەردەوامە، پارەیێ‌ پێدڤی بۆ تمامكرنا پڕۆژەیێ ستراتیژیێ ئاڤا ئاكرێ هاتیە مەزاختن، كاركرن د پڕۆژەی دا بەردەوامە و نێزیكی 65% پڕۆژە تمامبوویە، نوكە كار ل سەر دانانا بۆڕیا هاتیە كرن و رێژەكا باش یا پڕۆژەی دێ هێتە چێكرن، ب تەمامبوونا راكێشانا بۆڕیێن ئاڤا سەرەكی ژ پڕۆژەی بۆ ئاكرێ».

زاخۆ، دلۆڤان هالۆ:

ئاراس هاشم، ڕێڤەبەرێ نەفت و كانزایان ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو ژ بۆ پاراستنا ساخلەمی و گیانێ وەلاتیان، نابیت ب چو شێوەیەكی وەلاتیێن مە سەرەدانا كارگەهێن پڕكرنا بوتلێن غازێ بكەن.
ڕێڤەبەرێ نەفت و كانزایان ل ئیدارەیا سەربخوە یا زاخۆ گۆت: «ب تنێ وەلاتی دشێن ب رێكا بریكارێن خوە و ب بهایێ 9 هزار دیناران بۆتلێن خوە یێن غازێ وەربگرن».
گۆت ژی: «ڕۆژانە ب شێوەیەكێ ئاسایی و بەردەوام غاز بۆ ئیدارەیا سەربخوە یا زاخو دهێت، و ئاریشەیا نەبوونا غازێ نینە».