زاخۆ، دلۆڤان هالۆ:

ل تاخێ تلكەبەرێ یێ سەر ب ئیدارەیا سەربخوە یا زاخۆ ڤە مەزنترین پارك دهێتە دروستكرن.
سالح كۆڤلی، وەبەرهێنەرێ پڕۆژەی بۆ ڕۆژناما ئەڤرۆ دیار كر كو ئەو پاركە ب گوژمێ 12 ملیۆن دۆلاران دهێتە دروستكرن، كو مەزنترین پاركە و ل سەر ڕووبەرێ 91 دۆنەمێن ئەردی دهێتە دروستكرن.
سالحی گۆت: «ئەڤ پاركە ژ ئۆتێلەكا پێنج ستێر و مۆلەكا مەزن و نێزیكی 50 ڤیللەیان پێك دهێت، دێ گەلەك جۆرێن یاریێن زاڕۆك و مەزنان و خوارنگەهـ و مەلەڤانگەهێن سار و گەرم یێن ڤەكری و گرتی و باخچە و جهێن ئەنجامدانا فەستیڤالان تێدا هەبن».
گۆتژی: «ژ بۆ مەرەما زێدەكرنا ڕێژا كەسكاتیێ ل زاخۆ، مە گرنگیەكا مەزن دایە چاندنا داروبار و كەسكاتیێ».

هەولێر، قائید میرۆ:

بریكارێ وەزارەتا كارەبێ ئاشكراكر، ل گورەی پلانا حوكمەتا هەرێما كوردستانێ و ل سەر راسپاردەیا مەسرور بارزانی، سەرۆكێ‌ حوكمەتێ‌ هەتا دوماهیا سالا 2026ێ پڕۆژەیێ رۆناهی تەمام بیت و كارەبا نیشتیمانی ل سەرانسەری هەرێما كوردستانێ دێ‌ بیتە 24 دەمژمێری.
كامل قەزاز، بریكارێ وەزارەتا كارەبێ بۆ رۆژناما ئەڤرۆ دیاركر، سەرۆكێ حوكمەتا هەرێما كوردستانێ مەسرور بارزانی یێ رژدە ل سەر بجهئینانا پڕۆژەیێ 24 دەمژمێری و د دەمێ نوكە دا ل چەندین تاخ و دەڤەرێن هەرێما كوردستانێ پڕۆژەیێ رۆناهی دهێتە ئەنجامدان و یێ سەركەفتی بوویە و گۆت: «ل گورەی پلانێ هەتا دوماهیا سالا بهێت دێ كارەبا سەرانسەری هەرێما كوردستانێ بیتە 24 دەمژمێری».
كامل قەزاز گۆتژی: «ل گەل ئەنجامدانا پڕۆژەیێ رۆناهی بەرهەمئینانا كارەبێ ژی دێ هێتە زێدەكرن و پڕۆژەیێن ستراتیژی بۆ زێدەكرنا بەرهەمی هەنە، ژ وان ژی: وەستگەها خۆرمەلە، كو بڕیارە ل بهارا ئەڤ سالە تەمام ببیت و 500 میگاواتێن كارەبێ دێ بەرهەم ئینیت».

رەمەزان زەكەریا

دەمێ چەندین سالایە خەلكی ئاكرێ چاڤەرێ تمامبوونا پرۆژێ شارێ یاریان دكەن، بۆ وێ چەندێ رۆژێن بهێنڤەدان و سەر سال و جەژنا  دەمێن خو ل ناڤ دا دەرباز بكەن، بەلێ هەتا نوكە بەلێندەرێ پرۆژەی نەشیایە دووماهیێ ب وێ چاڤەرێبوونێ بینیت.

عەباس ئەحمەد، وەلاتیەكێ دەڤەرا ئاكرێیە بۆ ئەڤرۆ گۆت: دەما پرۆژە دهێنە چێكرن، دڤێت دووڤچوونەك هەبیت ژلایێ حكومەتێ و كابینێن بوری، نە یا بەرئاقلە بەلێندەرەك بهێت كارەكی بكەت ١٠ سالان دا ١٠ ژ سەدێ كار نەكەت، دڤێت دووڤچوون بهێتەكرن كا بۆچی پرۆژە راوەستیایە و بەلێندەر ل كیڤەیە و ئەگەر چنە.
سدقی سالح ، وەلاتیەكێ دن یێ دەڤەرێیە بۆ ئەڤرۆ گۆت: بۆ مە گەلەك گرنگە، ژبەر كو ئەم وەك خێزان دەمێن خۆ ل وێرێ ببورینن و دخوازن ئەو پروژێ شارێ یاریان بهێتە تەمامكرن كو هەم زارۆ و خێزان بشێن سەرەدانێ لێ بكەن.
محەمەد ئەمین ، وەلاتیەكێ دەڤەرێیە بۆ ئەڤرۆ گۆت: باژێرێ ئاكرێ باژێرەكێ رەنگێن و سەرنجا گەشتیاران بۆ خۆ رادكێشیت و ژبلی ناڤخۆ گەشتیارێن باشور و ناڤەراستا عیراقێ ژی قەست دكەنێ، ئەم وەك خەلكێ دەڤەرێ و گەشتیار زور دخوازین دەمێن خۆ ل ئاكرێ ب بورینین، بەلێ دەما پرۆژەێ شارێ یاریان تەمام دبیت دێ پتر گەشتیار مفای لێ بینن.
بلند رەزا، سەرۆكێ باژێرڤانیا ئاكرێ بۆ ئەڤرۆ گۆت: د نوكە دا ئەم كار لسەر دكەین بەری نوكە كومپانیایەكا دیتر هات مە هەولدان كو ئەو كومپانی بهێتە جێبەجێ بكەی، بەلێ وێ خۆ ڤەكێشا، نوكە كومپانیا كوردلاند دووماهی نڤیسار هاتیە كو ئەو كومپانی ڤی پرۆژەی جێ بە جێ بكەت، بەلێ ل دەستپێكا نڤیسارا خۆ دا داخوازا زێدەتر ژ دونەمێن ئەردی كریە كو بۆ تەرخان بكەین.

زاخۆ، دلۆڤان هالۆ:

ڕۆژانە ل ئیدارەیا سەربخوە یا زاخۆ، گلێش و بەرمایكێن خوارنا وەلاتیان و خوارنگەهـ و هۆلێن شەهیانان ژ لایێ كۆمپانیا ڕاكرنا گلێشێ باژێڕی دهێتە ڕاكرن كو پتریا وان بەرمایكان خوارنە، ب تایبەت یێن خوارنگەهـ و هۆلێن شەهیانان.

مستەفا كەریم، خودانێ خوارنگەهەكێ یە ل زاخۆ بۆ ڕۆژناما ئەڤرۆ دیار كر، خوارنەكا زێدە ژلایێ وەلاتیان ژ مە دهێتە داخوازكرن، یا مە ژی خزمەتە ئەم نەشێن بێژین كەسێ ئەڤ خوارنا تە داخواز كری گەلەكە و تو هەموویێ ناخۆی، باوەركە مە حالەت یێن هەین كەسێ هاتی ڤێرێ یا گۆتی مێزا من تژی بكە ب تنێ ژبەر گرتنا وێنە و سناپان، هندەك ژ وان تشتێن مە بۆ ئامادە كری ب تنێ یا تام كریێ و نە خواریە، و ئەم ژی نەچارین بهاڤێژین، ب مخابنی ڤە ژی ئەڤ چەندە یا بوویە دیاردە و چاڤلێكرن.
ئەمین عادل، وەلاتیەكێ زاخۆیە، دبێژیت:»ئەز و هەڤالێن خوە هندەك جاران خوارنێ ل خوارنگەهان دخۆین، لێ كێم خوارنێ داخواز دكەین و ئەگەر مە خلاس كر و پێ تێر نەبووین، دووبارە هندەك دی داخواز دكەین ب تنێ دا نە مینیتە ل سەر مێزێ و بهێتە ڕشتن، و هەم دا گەلەك مەسرەف ژی نەچیت، لێ ئەز هندەك كەسان دبینم دهێنە خوارنگەهێ دوو كەسن، لێ خوارنا سێ یان چار كەسان یا داخواز كری و هەمی نەخوارییە ب تنێ ژ بۆ مەرەما مەدحە و گرتنا وێنە و ڤیدیۆیان بوویە».
شڤان كۆچەر، ڕێڤەبەرێ كۆمپانیا ڕاكرنا بەرمایك و گلێشی ل زاخۆ گۆت:»ڕۆژانە350 تەنێن گلێش و بەرمایكێن وەلاتیان و خوارنگەهـ و هۆلێن شەهیانان ژ لایێ كۆمپانیا مە ڤە دهێتە ڕاكرن، ب ڕێژا60٪ بەرمایكێن وەلاتیان خوارنە، و ب ڕێژا 70٪ بەرمایكان ل خوارنگەهـ و هۆلێن شەهیانان ژی هەر خوارنە».