لقێ‌ ئێكە یێ‌ پارتی دیموكراتی كوردستان، ب هەلكەفتا سالڤەگەڕا رۆژنامەیا ئەڤرۆ پەیامەكا پیرۆزباهیێ‌ بەلاڤكر و تێدا هاتیە: ب هەلكەفتا دەربازبوونا 22 سالان ل سەر دەركەفتنا ڕۆژنامەیا ئەڤرۆ یا ڕۆژانە، گەرمترین پیرۆزباهیان ل خودانێ ئیمتیازێ و سەرنڤیسەر و ستافێ‌ كاری و هەمی خواندەڤان و خەلكێ دهۆكی دكەین.
دیسا د پەیاما لێ‌ دا هاتیە: «ڕۆژنامەیا ئەڤرۆ هەر ل دەستپێكا وەشانا خوە و هەتا ئەڤرۆ، شیایە ببیتە زمانحالێ خەلكێ دهۆكێ و ب شێوەكێ بابەتیانە و د چارچوڤێ یاسا و پیشەیێ ڕۆژنامەگەریێ دا، زێدەباری پێگەهاندنا ب دەهان كادر و ڕۆژناماڤانان، ڕۆلەكێ مەزن د ڤەگوهاستنا ڕاستیان دا بگێڕیت و جهێ خوە ب ئاوایەكێ بەرفرەهـ د ناڤا خەلكێ دهۆكێ دا چێكریە، تەنانەت بوویە پرا پەیوەندیێ د ناڤبەرا خەلكی و حوكمەتێ دا».
لقێ‌ ئێك د دوماهیا پەیاما خۆ دا بەلاڤكریە، دوبارە 22مین سالڤەگەڕا ڕۆژنامەیا ئەڤرۆ پیرۆزبیت و داخوازا پێشڤەچوونا پتر و بەردەوامیێ بۆ دخوازین.
دیسا هەر ب هەمان هەلكەفت، ئێكەتیا نڤیسەرێن كورد / تایێ‌ دهۆكێ‌ ژی برۆسكەكا پیرۆزباهیێ‌ ئاراستەی سەرنڤیسەر و ستافێ‌ كاری و هەمی خواندەڤان و خەلكێ دهۆكی كر.

د. عەلی تەتەر، پارێزگارێ دهۆكێ دوهی 30/7/2025 پێشوازی ل محەمەد ئەلحەسان، نوونەرێ تایبەت یێ سكرتێرێ گشتی یێ‌ نەتەوەیێن ئێكگرتی و سەرۆكێ هنارتیێ یونامیUNAMI ل ئیراقێ و شاندێ د گەل دا كر.
د روونشتنەكێ دا ب ئامادەبوونا ڤیان دەخیل پەرلەمنتارا پەرلەمانێ ئیراقێ بەحسێ رەوشا پێكڤەژیانا ئولی و نەتەوەیی ل دەڤەرێ و پڕۆژەیێن حكومەتا هەرێما كوردستانێ د بیاڤێ ئاڤەدانكرن و گەشتیاری دا و رەوشا ئاوارە و پەنابەران و خەلكێ خۆجهێ پارێزگەهێ و ئەو پشتەڤانیا حكومەتا هەرێما كوردستانێ و سازی و رێكخراوێن خێرخوازی پێشكێشی خەلكێ ناڤ كەمپا و دەرڤەی كەمپان دكەن، هاتە كرن.
هەردو لایان دوپاتی ل سەر هاریكاریێ كر بۆ وێ‌ یەكێ خەلكێ دەڤەرێ ب هەموو پێكهاتە ڤە ب ئارامی و ب ئاسودەیی بژین.
دیسا هەر دوهی ئێڤاری شاندێ نەتەوەیێن ئێكگرتی سەرا كەمپا ئاوارەیێن شنگالێ ل كەمپا شاریا دا و ژ لایێ مەحمود خەلیل دەڤەردارێ سێمێلێ و رێڤەبەرێ كۆچ و كۆچبەران ل پارێزگەهێ و بەرپرسێن كەمپێ پێشوازی لێ هاتە كرن و شاندێ ناڤبری ژ نێزیك سەحكرە رەوشا ئاوارەیێن ئاكنجی ل ناڤ كەمپێ.

رەمەزان زەكەریا:

سالانە ل رۆژا 31ی تیرمەهێ‌ ب بەرهەڤبوونا بەرپرسێن سیاسی و حكومی و كەسوكارێن جینۆسایدكریان رێورەسم دهێنە ئەنجامدان، قەفتێن گولان دهێنە دانان و چەندین چالاكیێن جوراوجۆر دهێنە ئەنجامدان.
ل رۆژا 31/7/1983رژێما بەعسا ئیراقێ ب چەند قووناغان هەشت هزار بارزانی جینۆسایدكرن و هەتا نوكە هێشتا روفاتێن هەموویان بۆ بارزان نەهاتینە زڤڕاندن.
ل سپێدەهیا رۆژا 31/7/1983زێدەتری هەشت هزار بارزانی هاتنە ئەنفالكرن، هەتا نوكە روفاتێن 696 ئەنفالان هاتینە زڤڕاندن، ل سالا 2005 روفاتێن 503 ئەنفالان و ل سالا 2014 روفاتێن 93 ئەنفالان و ل سالا 2022 ژی روفاتێن 100 ئەنفالان و ل گۆڕستانەكا تایبەت ل بارزان هاتینە ڤەشارتن.

شێخان، بارزان مزووری:

سالح حەیدەر، بەرپرسێ لقێ 20 یێ پارتی ل شێخان بۆ رۆژناما ئەڤرۆ دیار كر، ب هەلكەفتنا 16 تەپاخێ سالڕۆژا دامەزراندنا پارتی دیموكراتی كوردستان و ل سەر راسپاردەیا فەرماندە مەنسور بارزانی، دوهی 30/7/2025 ل بارەگایێ لقێ 340 پەكەفتی یێن هەموو پێكهاتەیێن دەڤەرا شێخان بوونە خودان كورسیێن ئەلكترۆنی بێ بەرامبەر، وەكو دیاریەكا تایبەت ژ لایێ جەنابێ سەرۆك بارزانی ڤە بۆ هاتیە دابینكرن.
ناڤبری گۆت: «ئەڤ كورسیە گەلەك د باشن، بێ ئەندامەكێ مالێ ل گەل پەكەفتی بیت، ئەو بخۆ دێ هاتنوچوونێ پێكەت، دیسا بەری حەفتیەكە هەمان كورسی ل سەر 40 پەكەفتیێن دی ژی هاتبوونە بەلاڤكرن و بۆ 380 كەس كورسیێن ئەلكترۆنی وەرگرتین».
ناڤبری زێدەتر گۆت: «بڕیارە ل 16ی تەباخێ‌ شەهیانەكا ب كۆم بۆ 60 كوڕ و كچان بهێتە كرن، نوكە هەر ئێك ژ وان پێج ملیۆن بۆ هاتینە دابینكرن، رۆژا جەژنێ ژی پێنج ملیۆنێن دی دێ بۆ هێنە دابینكرن».

شێخان، بارزان مزووری:

سیروان رۆژبەیانی، جێگرێ پارێزگارێ نەینەوا ژ پشكا پارتی بۆ رۆژناما ئەڤرۆ دیار كر، د ڤی وەرزی دا كێشەیا كێمیا ئاڤا ڤەخوارنێ ل ناحیا كەلەكچی پەیداببوو، ژ بەر كێمیا كارەبا گشتی بۆ كاركرنا بیرێن ئاڤێ و دبێژیت: پشتی كێشە گەهشتیە مە، ژ لایێ لژنا ناوچا پارتی یا وێ ناحیێ ئەم شیاین كێشەیا وان چارەسەر بكەین، كو بۆ ماوێ 24 دەمژمێران ئاڤ بۆ وان بهێتە بەردان.
ناڤبری دیار ژی كر، د ئێكەم پێنگاڤ دا 33 هزار لترێن گازوائیلێ بۆ وان موەلیدان هاتنە دابینكرن، یێن د ناڤ بیرێن ئاڤێ دا، داكو رۆژانە كاربكەن، بۆ دابینكرنا ئاڤا ڤەخوارنێ بۆ مالان و گۆت: «ل نێزیك دێ پێنگاڤێن باش هاڤێین، داكو ئەڤ دەڤەرە بێ ئاڤ نەمینن».

زنار تۆڤی:

سەرۆكێ دەستەیا وەبەرهێنانێ ل هەرێما كوردستانێ دیار كر، حكومەتا هەرێما كوردستانێ ب رێیا دو كۆمپانیان دەست ب وەرگرتنا گەنمی ژ جۆتیارێن هەرێمێ كرییە، ئەو گەنمە بۆ كارگەهێن خۆمالی دێ ب كارهێت و چەندین جۆرێن خوارنان دێ ژێ هێنە دروستكرن.
د. محەمەد شوكری، سەرۆكێ دەستەیا وەبەرهێنانێ بۆ رۆژناما ئەڤرۆ دیاركر، حكومەتا هەرێما كوردستانێ بەرهەمێ گەنمێ وان جۆتیاران ژێ وەردگریت یێن كو بەغدا ژێ وەرنەگرتی، حكومەتا هەرێمێ ئەڤە هەیامەكە ب رێیا دو كۆمپانیان دەست ب وەرگرتنا گەنمی كری و هەتا 15ی تەباخێ‌ وەرگرتنا گەنمی دێ یا بەردەوام بیت، بۆ هندێ ئەو جۆتیارێن گەنم هەی، بهێن گەنمێ خۆ رادەست بكەن.
د. محەمەد شوكری گۆت: «حكومەتا هەرێما كوردستانێ دێ وی گەنمی دەتە كارگەهێن ناڤخۆیی و چەندین جۆرێن خوارنان دێ ژێ هێنە بەرهەمئینان، وەكو ئار، دانهێرك، دانقۆت و ساڤار و هندەك ژی دێ بیتە ئالف بۆ تەرش و كەوالی، مە كارگەهێن ستراتیژی ل هەولێرێ، دهۆكێ‌ و سلێمانییێ هەنە، لەوما ئەو گەنمێ دهێتە وەرگرتن هەموو بۆ پێدڤیێن ناڤخۆ دێ ب كارهێت، چونكی ئارمانجا حكومەتا هەرێما كوردستانێیە ل شوینا ئینانا بەرهەمان ژ دەرڤە ل ناڤخۆ بەرهەم بینیت».