ئامێدیێ، مەحمود نهێلی:

بەهرام عریف یاسین، بەرپرسێ لقێ 18 یێ پارتی ل ئامێدیێ‌ دیار كر، هیڤیا وان ئەوە د دەمكێ نێزك دا خەلكێ دەڤەرێ‌ قەستا سەر گوندێن خوە بكەن و ب دیتنا گوندێن خوە شاد ببن.
بەرپرسێ لقێ 18 د سمینارەكێ‌ دا بۆ پێشمەرگەیێن ئیلۆنێ و خەلكێ دەڤەرێ گۆت: «پرۆسێسا ئاشتیێ ل توركیا بەرەڤ باشێی و دووماهیێ دچیت و هێدێ هێدی رێیێن دەڤەرێن جودا یێن كوردستانێ یێ‌ ڤەدبن، ئەم ب هیڤیا وێ یەكێ نە ل دەڤەرا مە ژی رێیێن گوندان ڤەببن و خەلك ئێدی ب سەربەستی بچنە سەر گوند و وارێن خوە».
ناڤهاتی دوپات ژی كر، ئەڤ شەڕ و ئالۆزیێن هندە سالە ل دەڤەرێ دروست دبن، نە دوور و نێزك ئەو نە هەڤپشكن دگەل دا و ب تنێ زیانێن وی شەڕی بۆ خەلكێ وان بووینە و گۆت: «پرۆسێسا ئاشتیێ ل دەڤەرێ دێ د بەرژەوەندا خەلكێ دەڤەرا مە دابیت، ئەم د وێ باوەریێ داینە د دمەكێ نێزیك دا ئەڤ پرۆسێسە بچیتە د قووناغێن نوودا و هەر كەسەك بچیتە سەر گوند و وارێن خوە و بشێن دەستێ وان بگەهیتە رەز و ملكێن وانا».
دهێتە زانین ژ ئەگەرێ شەڕێ د ناڤبەرا گەریلایێن پەكەكێ و لەشكرێ توركیا دا د سالێن بۆری و داگیركرنا پشكەكا گوندێن دەڤەرێ ژ لایێ توركیا و پەكەكێ ڤە، هەژمارەكا زۆرا وەلاتیێن قەزا ئامێدیێ بێ بەهربوون ژ دەرامەتێن گوندێن خوە و ئەڤێ یەكێ كارتێكرن كریە سەر رەوشا ئابووریا وان و داخازیا خەلكێ دەڤەرێ ژی ڤەكرنا رێیێن گوندێن وان بوویە.

شڤان عەبدی، بەرپرسێ ڕاگەهاندنا ئیدارەیا سەربخوە یا زاخۆ بۆ ڕۆژنامەیا ئەڤرۆ دیاركر كو گوهدار شێخۆ، سەرپەرشتێ ئیدارەیا سەربخوە یا زاخۆ، پەردە ل سەر خەلاتێ جیهانی یێ زەبێست یێ باشترین جەماوەرێ جیهانێ یێ جەماوەرێ یانەیا زاخۆ یا وەرزشی ل كۆڕنیشێ پرا دەلال هاتە ڕاكرن.
بەرپرسێ ڕاگەهاندنا ئیدارەیا سەربخوە یا زاخۆ ئاماژە ب وێ چەندێ ژی كر كو گوهدار شێخۆی سوپاسیا هەموو خەلكێ خوەشتڤی و جەماوەرێ كوردستانێ و جیهانێ كر، یێن دەنگ ب یانەیا زاخۆ یا وەرزشی داین، ژ بۆ بدەستڤەئینانا ڤی خەلاتێ جیهانی یێ مەزن.
شڤان گۆت: «ئەڤ هەلكەفتا پەردەڕاكرنێ ل سەر خەلاتێ زەبێست یێ جیهانی، ب ئامادەبوونا چیا ئەمین، سەرۆكێ یانەیا زاخۆ یا وەرزشی و فەرهاد عەمار، سەرۆكێ پێشتر یێ یانەیا زاخۆ و دەزگەهێن ڕاگەهاندنێ هاتە ئەنجامدان».

سەربەست كەرەم زەینەل:

سەربەست كەرەم زەینەل، ژ لژنەیا ناوچا سویسرا یا پارتی دیموكراتی كوردستان بۆ ئەڤرۆ دیار كر، ل دووڤ رێنومایێن جەنابێ سەرۆك بارزانی و سەرۆكاتیا هەرێمێ‌ و سەرۆكێ‌ حكومەتا هەرێمێ‌ و كاك شیفا بارزانی، سەرپەرشتیارێ‌ گشتی یێ‌ رەڤەندا كوردی ل ئورۆپا، ئەم راسپاردینە كو ئەم ب تنێ‌ كوردایەتیێ‌ بكەین.
دیار ژی كر، دەربارەی ئەو گەنجێ‌ كورد، ئەوێ‌ ل سویسرا د رووبارێ‌ راینفال دا خەندقی، ناڤێ‌ وی (محەمەد رەحمان محەمەد خەیلانی)یە، ژ دایكبوویێ‌ سالا 2002 یە ل باژێڕێ‌ هەڤلێرێ‌، ئەو گەنجە چوویە وەلاتێ‌ سویسرا ل كەمپا شەفهاوزن داخوازا پەنابەریێ‌ كریە.
سەربەستی گۆت: «ئەو گەنجە ل رۆژا ئەینی 4/9/2026 دچیتە سەر رووبارێ‌ راینفال، د هەمان باژارێ‌ شەفهاوزن دا، ئەو جهێ‌ گەلەك ترسناك دكەڤیتە د ئاڤێ دا و دخەندقیت. ل رۆژا چارشەمبی 9/9/2026 ب هاریكاریا كاك موریس زاخۆیی و هەڤال دژوار مەسعود نێروەیی ئەڤ كەسە هاتیە نیاسین و ئەم هاتینە ئاگەهداركرن. پشتی كۆمپانیا فرات هاتیە ئاگاداركرن، داخوازا گارانتیا پێنج هزار فرەنكێن سویسری ژ مەكرن، پشتی رازیبوونا لژنا مە، رۆژا ئەینی 11/9/2026 ل باژارێ‌ زۆریخ، د ناڤ گۆڕستانا موسلمانان ب رێورەسمەكێ‌ ژ هەژی ب شووشتن و نڤێژ لێكرن هەمی كار تەمام بوون».
سەربەست كەرەم زەینەل گۆت ژی: «رۆژا دوشەمبی 14/9/2026 ل بالیۆزخانا ئیراقێ‌ تابیتا خودێ‌ ژێ‌ رازی هاتە مۆركرن، دوهی رۆژا سێشەمبی 15/9/2026 هەمی رێكارێن یاسایی و مەزاختی ل گەل ئەو هاریكاریا لژنێ‌ ل گەل هەڤالێ‌ مە كاك زەكی كۆچەر، دێ‌ ل فڕۆكخانەیا زۆریخ بۆ ستەنبوولێ‌ ترانزێت بیت، بڕیارە ئەڤرۆ رۆژا چارشەمبی 16/9/2026 ب ئانەهیا خودێ‌، ل دەمێ‌ سپێدەیێ‌ دێ‌ گەهیتە فڕۆكخانەیا هەڤلێرێ‌«.
ناڤهاتی گۆت ژی: «ئەم بناڤێ‌ خۆ، ئێك دونیا سوپاسیا وی هەلویستێ‌ جوانێ‌ كوردایەتیێ‌ و مرۆڤایەتیا دەستەیا كارگێری یێ‌ لژنا ناوچا سویسرا یا پارتی دیموكراتی كوردستان و هەمی دەستەیا كارگێریا رێكخراوێن ب سەر لژنا ناوچێ‌ و گشت رێكخستی و دوست و لایەنگر و هەمی كوردێن دیاسپۆرا ل سویسرا دكەین، ژ بو وێ‌ هاریكاریا پێشكەش كرین. ئەم بناڤێ‌ هەمی كوردێن سویسرا پرسە و سەرخوشیێن خۆ دگەهینینە مالباتا محەمەد رەحمان محەمەد خەیلانی، خودێ‌ جهێ‌ وی ل بەهەشتا خو شاد بكەت، دووماهی نەخۆشیا مالباتا وان بیت».

دهۆك، دلۆڤان ئاكرەیی:

سەروەر ڕەئووف، سەرۆكێ لقێ دهۆك یێ ئێكەتیا مامۆستایێن كوردستانێ بۆ رۆژنامەیا ئەڤرۆ دیار كر، مامەلە و دۆسیێن هەمی پەروەردەیان هووربینی بوو هاتینە كرن، كا هەر مامۆستایەك شایستەی چەند پلە بلندكرنایە و دۆسیە بۆ وەزارەتا پەروەردەیێ و ژ وێرێ ژی بۆ وەزارەتا دارایی هاتینە هنارتن.
ناڤهاتی گۆت: «نوونەر و پارێزەر ب وەكالەت ل بەغدا هاتینە ڕاسپاردن و هاتینە ئاگەهداركرن، داكو ژ نێزیك دووڤچوونا بابەتی بكەن و بزانن كار گەهشتییە كیڤە، د نوكە دا بەرنامە هەیە، پشتی ب دووماهی هاتنا كارێ هەمی پەروەردەیان، شاندەك ژ پارێزەر و مامۆستایان بۆ دووڤچوونێ قەستا بەغدا بكەت، ئەم گەشبینین ب زووترین دەم مژار و دەنگوباسێن خۆش ل دۆر پلە بلندكرنێ و چارەسەركرنا پرسا مامۆستایێن گرێبەست بهێنە راگەهاندن

د چارچووڤەیێ پڕۆژەیێ چێكرنا هەژمارەكا ڕێك و ئۆڤەرپاس و ئەندەرپاسان دا ل سنۆرێ دەڤەردارییا سێمێلێ و ناوچەداریێن ب سەرڤە، كار لسەر چێكرنا یۆتێڕنا سێمێلێ‌ لسەر جادەیا گشتی یا نێڤدەولەتی و چێكرنا ڕێكێن دەوروبەر یێن خزمەتگوزاری بەردەوامە و هەتا نوكە 20% كار لسەر هاتیە ئەنجامدان.
ل سەنتەرێ دەڤەردارییا سێمێلێ‌ و دەوروبەران كار لسەر 10 پڕۆژەیێن دی یێن خزمەتگوزاری یێن جودا جودا بەردەوامە.
ئەڤ پڕۆژە ب سەرپەرشتییا ڕێڤەبەرییا گشتی یا باژێرڤانیێن دهۆكێ‌ دهێنە بجهئینان.

رەمەزان زەكەریا

پشتی حكومەتا هەرێما كوردستانێ بوویە ئەندام د ئێكەتیا نێڤدەولەتی دا بۆ پاراستنا سروشتێ، دەڤەرا بارزان هەموو مەرجێن ئێكەتیا نێڤدەولەتی بۆ پاراستنا سرووشتی تێدایە.

ئەندازیار عەبدولڕەحمان سدیق، ڕاوێژكارێ بوارێ ژینگەهێ ل ئەنجومەنێ وەزیران گۆت: دەڤەرا بارزان هەموو مەرجێن ئێكەتیا نێڤدەولەتی بۆ پاراستنا سروشتێ تێدانە كو ببیتە دەڤەرەكا پاراستیا سروشتی ل سەر ئاستێ جیهانێ، ژ ڕوویێ پاراستنا سروشتی ڤە، پێكدهێت ژ هەر ڕووبەرەكێ ژ ئەردی یان ژ ئاڤێ، كو ڕەهەندەكێ جوگرافی یێ دیاركری هەیە، سیستەمەكێ سروشتی یان زیندی یان نەزیندی ب خۆڤە دگریت، ژ بەر بهایێ وان سیستەمان ژ ڕوویێ كەلتووری، زانستی، گەشتیاری و جوانیێ ڤە پاراستنەكا زێدەتر یا یاسایی ب مەبەستا پاراستن و بەردەوام پێدانا وان دكەڤیتە سەر.
ناڤبری گۆتژی: ئارمانج ژ پاراستنا سروشتی، پاراستنە ژ ژێدەرێن سروشتی وەكی فرەچەشنیا بایۆلۆجی و جیۆلۆجی یا جهێ سروشتی و كەلتووری و كەلەپوورێن تایبەت یێن جهێ ئاكنجیبوونا ڕەسەن یا دەڤەرێ و ب دیهێنانا گەشەپێدانێ تێدا، دوور ژ كاریگەریا نەرێنی یا چالاكیێن مرۆڤی و ڤەكۆلینا زانستی و پێشكێشكرنا ئاسانكاری بۆ ڤەكۆلەران و هاندانا گەشتوگۆزارا ژینگەهی یا بێ زیان گەهاندن ب ژێدەرێن سروشتی.
ناڤهاتی گۆت: مەرجێن دەڤەرێن پاراستیا سروشتی دەولەمەند بیت ب پێكهاتەیێن فرەچەشنیا بالندەیان، هەبوونا جۆرەكێ یان پتر ژ جۆرێن تایبەت یان ئەوێن مەترسیا ژناڤچوونێ ل سەر، ئەرد خودان بهایەكێ زانستی و مێژوویی یان جڤاكی یان كەلتووری هەبیت، هەبوونا وان جهێن كو بایەخدارن بۆ ڤەكۆلینا زانستی یا درێژ، بایەخدار بیت ژ ڕوویێ گەشتوگۆزارا ژینگەهی ڤە و ژ دەڤەرێن گرنگێن جیۆلۆجی بیت كو مێژوویەكا گرنگا جیۆلۆجی هەیە.
ئاشكراكر: پشتی كو ژ ئوكتۆبەرا ٢٠٢٥ ڤە حكومەتا هەرێما كوردستانێ بوویە ئەندام د ئێكەتیا نێڤدەولەتی بۆ پاراستنا سرووشتێ دا، ئەڤە ژی هەرێما كوردستانێ ئێخستە ڕێزا وان دەولەت و هەرێمان كو پابەندن ب پاراستنا هەمەجۆریا بالندەیان و گەشەپێدانا بەردەوام ڤە، نوكە كار ل سەر ب فەرمی تۆماركرنا ٤٥ دەڤەرێن پاراستیا سروشتی دهێتە كرن د ئێكەتیا نێڤدەولەتی بۆ پاراستنا سروشتێ دا چونكی ژ كۆما ٨٢ دەڤەرێن پاراستیا سرووشتی ل ئیراقێ، نێزیكی ٤٥ دەڤەر دكەڤنە هەرێما كوردستانێ ڤە، ئەڤە ژی وەكر كو كوردستان ل سەر ئاستێ ڕۆژهەلاتا ناڤین دەولەمەندترین دەڤەر بیت ژ ڕوویێ هەمەجۆریا بالندەیان ڤە، د ناڤ ڤان ٤٥ دەڤەران دا كو كارەكێ باش ل سەر هاتیە كرن د پێشترین دەڤەرا بارزانە.