رەمەزان زەكەریا:

ب هەلكەفتا 43 سالیا جینۆسایدا بارزانیان، رێورەسمەك ل فەرماندەیا پێشمەرگەیێ زێرەڤانیێ هاتە رێكخستن و وەزیرێ ناڤخۆ یێ هەرێما كوردستانێ دبێژیت: ئەنفالێ نەشیا ئیرادا گەلێ مە بشكێنیت، ئەنفال بزاڤەكا سەرنەكەفتی بوو بۆ ژێبرنا ناسنامەیا گەلێ كوردستانێ، بەلێ ئیرادا گەلێ مە سەركەفت.
ڕێبەر ئەحمەد، وەزیرێ ناڤخۆ یێ حوكمەتا هەرێما كوردستانێ د گۆتارەكێ دا ل بیرەوەریا 43 سالیا جینۆسایدا بارزانیان ل ژێر ناڤونیشانێن «مرنەك پێخەمەت مانەڤا نیشتیمانی» گۆت: «كارەساتا جینۆسایدا بارزانیان مەزنترین كۆمەلكوژیا دلتەزینە د دیرۆكا هەڤچەرخ دا».
گۆت ژی: «ئەنفال بزاڤەكا سەرنەكەفتی بوو بۆ ژێبرنا ناسنامەیا گەلێ كوردستانێ، بەلێ ئیرادا گەلێ مە سەركەفت، جهێ خۆیە دەستێن وان دایك و خووشكێن مەزن ماچی بكەین كو پشتی شەهیدبوونا باب و هەڤژین و برایێن خۆ، وەكو مێرخاسان بوونە هێڤێنێ شۆرەشا بەرخودانێ و پەروەردەكرنا نڤشەكێ كو نوكە دژی تاریاتی و زۆلمێ شەڕی دكەن».
ڕێبەر ئەحمەد دوپاتی ل پێگیربوونا حكومەتێ كر بۆ هەماهەنگیێ ل گەل حكومەتا فیدرال و ناڤەندێن جیهانی ب مەرەما ڤەكرنا گۆڕێن ب كۆم و نیاسین و ڤەگەڕاندنا روفاتان بۆ كوردستانێ و گۆت: «ب بزاڤێن جەنابێ سەرۆك بارزانی، هەتا نوكە روفاتێن پتر ژ 700 شەهیدان هاتینە ڤەگەڕاندن».

ل رۆژا سێشەمبی ١١/ ٨/ ٢٠٢٦، د. سالار عوسمان، بەرپرسێ بەشێ ڕۆشنبیری و ڕاگەهاندنا پ.د.ک، کۆڕەکێ ڕۆشنبیری و میدیایی ل ژێر ناڤونیشانێ (پەیام و هاووڵاتیێ میدیاکار) پێشکێشکر.
​دەستپێكا کۆڕێ، ب دەقیقەکا بێدەنگی بۆ گیانێ پاکێ شەهیدان، سەرکاروانێ وان (بارزانیێ نەمر و کاکە ئیدریسێ هەمی دەمان ل بیر) دەستپێکر.
​ئەڤ کۆڕە ژ لایێ (لیوایا هەولێر) یا سەر ب فەرماندەییا پێشمەرگەیێن زێرەڤانیێ ڤە هاتبوو ڕێکخستن، جهێ گرنگی و سەرنجا ئامادەبوویان بوو، کو تێدا ژمارەکا بەرچاڤ ژ ئەفسەر، پلەدار و پێشمەرگەیێن زێرەڤانیێ ئامادەببوون.
​د ناڤا کۆڕێ دا، د. سالار عوسمان ب شیکارکرنەکا هوور و سەردەمیانە، تیشک ئێخستە سەر گرنگییا هەردو چەمکێن (پەیام و هاووڵاتیێ میدیاکار)، د ئاخفتنێن خۆ دا جەخت ل سەر پێدڤییا هۆشیارییا میدیایی و نەتەوەیی کر، ب تایبەتی بۆ هێزێن پێشمەرگەی وەک پارێزەرێن سەروەری و ئاسایشا کوردستانێ.

زاخۆ، دلۆڤان هالۆ:

گوهدار شێخۆ، سەرپەرشتێ ئیدارەیا سەربخوە یا زاخۆ د كۆنگرەیەكێ ڕۆژنامەڤانی دا دیاركر كو ل ئیدارەیا سەربخوە یا زاخۆ، شەش ئەندەرپاس و ئۆڤەرپاس ل سەر جاددەیا سەرەكی یا نێڤدەولەتی یا ئیبراهیم خەلیل دێ هێنە دروستكرن.
ناڤهاتی ئاماژە ب وێ چەندێ ژی كر كو ئەڤ شەش ئەندەرپاس و ئۆڤەرپاسە هەر ژ دەرگەهێ نێڤدەولەتی یێ ئیبراهیم خەلیل هەتا ئۆڤەرپاسا زاخۆ دێ هێنە دروستكرن و كەڤنە د خزمەتا خەلكێ دەڤەرێ دا.
سەرپەرشتێ ئیدارەیا سەربخوە یا زاخۆ گۆت: «دیزاینا ڤان ئەندەرپاس و ئۆڤەرپاسان ب شێوەیەكێ جوان و سەردەمیانە هاتیە دروستكرن، ب تنێ یا مای بكەڤنە د وارێ بجهئینانێ دا».
گۆت ژی: «د پلان دایە كۆمەلگەها ئاكنجیبوونێ یا ئیبراهیم خەلیل بهێتە ڕاكرن و خەلكێ وێ كۆمەلگەهێ بهێنە قەرەبووكرن».

دهۆك، دلۆڤان ئاكرەیی:

سەلوان ئاكرەیی، ئەندامێ فراكسسیۆنا پارتی ل جڤاتا نوونەرێن ئیراقێ بۆ رۆژنامەیا ئەڤرۆ ئاشكرا كر، وان وەكو فراكسیۆنا پارتی سەرەدانا وەزیرێ دارایی یێ ئیراقێ كریە و پسیارا ژڤانێ هنارتنا مووچەیێ مووچەخۆرێن هەرێما كوردستانێ ژێ كریە و دبێژیت: وەزیرێ دارایی یێ‌ ئیراقێ‌ گۆتە مە: نوكە ب تەمامی بەلاڤكرنا مووچەیێ هەمی مووچەخۆرێن ئیراقێ تەمام بوویە و 600 ملیار دینار هاتینە كۆمكرن بۆ دابینكرنا مووچەیێ هەرێما كوردستانێ، كو مووچەیێ‌ هەرێمێ پێدڤی ب 840 ملیار دیناران هەیە.
ناڤهاتی گۆت: «ژ بەر ڤێ چەندێ وەزیرێ دارایی سۆز دایە مە، هەتا حەفتەیا بهێت پارە ب تەمامی دێ‌ هێتە كۆمكرن و هنارتن، فراكسیۆنا پارتی ژی داخواز ژ وەزیرێ دارایی یێ ئیراقێ كریە، كو ئەو پارەیێ هاتیە كۆمكرن بۆ چو بیاڤەكێ‌ دی نەهێتە مەزاختن، هەتا مووچەیێ خەلكێ كوردستانێ دهێتە هنارتن».

سندس سالح سلێڤانەی:

رێڤەبەریا ئاڤا دهۆكێ ب مەرەما چارەكرنا ئاریشەیا ئاڤێ‌ ل گوندێ‌ ئێمینكێ‌، ل سەر بودجەیا گەشەپێدانێ‌ و پلانا سالا (2023) ب گوژمێ پتر ژ 118 ملیۆن دیناران، عمبارەكا كۆنكریتی یا ئاڤێ‌ ل گوندێ ناڤبری بجه دئینیت، كو شیانێن عمباركرنا 500 مەترێن سێجار یێن ئاڤێ هەنە.
ئەڤ پڕۆژە دێ ئاڕێشەیا ئاڤێ ل گوندێ‌ ئێمینكێ ب تمامی چارەسەر كەت و 600 خێزان دێ‌ ژێ‌ مفادار بن.

هەولێر، قائید میرۆ:

بریكارێ وەزارەتا بازرگانی و پیشەسازی یا هەرێمێ‌ ئاشكرا كر، چاڤدێریەكا هوور ل سەر پێدڤیێن رۆژانە هەیە و هەر كەسەكێ پێگیریێ‌ ب بهایێن حوكمەتێ نەكەت، دێ هێتە سزادان و دبێژیت: گرانبوونا بهایێ كەلوپەلان زێدەتر گرێدایی بازاڕێ جیهانێ و رەوشا دەڤەرێ یە.
سەروەری هاواری، بریكارێ وەزارەتا بازرگانی بۆ رۆژناما ئەڤرۆ دیاركر، گرانبوونا بهایێ كەلوپەلان بۆ چەند ئەگەرەكان ڤەدگەڕیت، ژ وان ژی: بلندبوونا بهای ل ژێدەرێ بەرهەمئینانێ و ئاستەنگێن ڤەگوهاستنێ و جێهگیركرنا سیستەمێ ئەسیكۆدا و گۆت: «ئەڤە هەموو بووینە ئەگەر بها گران ببیت، دەمێ‌ خواست ل سەر كەلوپەلان زێدە دبیت و وەكی پێدڤی نەگەهن، ئەڤە بێگومان دێ كاریگەری ل سەر بهای هەبیت، ل سەرانسەری جیهانێ ژی گوهۆڕین پەیدابووینە و هەڤبەركرن ل گەل سالێن بۆری كەلوپەل گرانتر لێ‌ هاتینە».
گۆت ژی: «هندەك پێدڤیێن رۆژانە هەنە لیژنەیێن چاڤدێریا بازاڕی بەردەوام دووڤچوونێ ل سەر دكەن و تیمێن حوكمەتێ رێكێ نادەن بهایێ هندەك كەلوپەلێن رۆژانە بلندببیت، بۆ نموونە: چاڤدێریەكا زۆر لسەر نانپێژیا هەیە و رێكێ نادەین كاریگەری لسەر نانی هەبیت، هەروەسا چەندین پێدڤیێن دی ژی هەنە، ئەگەر بزانین هندەك كەس دێ ئەڤێ رەوشێ وەكو دەلیڤە بكارئینن بۆ گرانكرنا بهایان، ل گورەی قانوون و رێنمایێن حوكمەتێ ئەو كەسە دێ هێنە سزادان».