قەیس وەیس:
ب دووماهی هاتنا یاریێن گەڕا هەشتێ ژ خولا ستێرێن ئیراقێ یا فوتبۆلێ، ئەنجامێن هەر پێنج یانەیێن كوردستانی د ناڤبەرا سەركەڤتن، وەكهەڤی و خوسارەتی و پاشڤەچوون و باشترنا ڕێزبەندیێن خوە دناڤ لیستەیا خولێ دا دیاربوو و ژلایەكێ دووڤە نەڕازیبوون و گازندە ژی ل دووڤ خوە هێلان.
ئەلهۆیێن چیا جهێ خوە پاراست
تیما یانەیا دهۆكێ جهێ خوە دناڤ ڕێزبەندییا خولێ دا پاراست پشتی وەكهەڤییا بەرانبەر یانەیا مینا یا بەسرایی ب گۆلەكێ، ئەلهۆیێن چیا نەهـ خال كۆمكرینە ژ ئێك سەركەفتن بەرانبەر یانەیا جەوییە 2-1 گۆلان، شەش وەكهەڤی بەرانبەر ئەلغراف 1-1، بەرانبەرتەلەبە 3-3، بەرانبەر نەفت 1-1، بەرانبەر نەورۆز چنە-چنە، بەرانبەر مینا 1-1، و ئێك خوسارەتی هەیە بەرانبەر كەرخ 3-2 گۆلان، هەروەسان 11 گۆل تۆماركرینە و 11 گۆل ژی هەنە ڕێزا هەشتێ پاراست،
ئەنجامێن زاخۆ نە د جێگیرن
ژلایێ خوەڤە تیما یانەیا زاخۆ پاشڤە چوو ڕێزا 11ێ پشتی خوسارەت بووی بەرانبەر خودانا ئەردی یانەیا ئەلگەرمە ب گۆلەكێ بێ بەرانبەر و ب هژمارەیا نەهـ خالان ڕاوەستیایە، ژ دو سەركەفتنان بەرانبەر غازئەلشیمال ب گۆلەكێ بێ بەرانبەر و مووسل 2-1 گۆلان، سێ وەكهەڤیان بەرانبەر دیالا 2-2 گۆلان، بەرانبەر تەلەبە چنە-چنە، بەرانبەر جۆلان 1-1 گۆلان، سێ خوسارەتی هەنە بەرانبەر مینا 1-2، بەرانبەر زەورا 4-چنە، بەرانبەر ئەلگەرمە ب گۆلەكێ، كوورێن خابووری حەفت گۆل هەنە لێ 11 گۆل یێن ل سەر بووین.
هەولێرێ ڕێزا سێیێ پاراست
ژلایێ خوەڤە یانەیا هەولێر ڕێزا سێیێ ل سەر ئاستێ ڕێزبەندییا خولا ستێرێن ئیراقێ پاراست ب كۆمكرنا 17 خالان پشتی سەركەفتنەكا باش ل سەر كەربەلا ب سێ گۆلێن پاقژ، تیما كوردستانی د ڕەوشەكا باش دایە و هەڤڕكە بۆ سەرێ لیستێ ئەوا پێنج سەركەفتن هەین بەرانبەر هەر ئێك ژ كارەبا 2-چنە، كەرخێ 1-چنە، مینا 2-چنە، دیالا 2-چنە و دووماهیێ بەرانبەر كەربەلا بوو، دو وەكهەڤی بەرانبەر جەوییە 1-1 و شورتە چنە-چنە و خوسارەتیەكێ بەرانبەر ئەلگەرمە ب 1-چنە، هەروەسان 12 گۆل هەنە و سێ ل سەر بووینە.
نەورۆز یا پێشڤە دچیت
جەماوەرێ تیما یانەیا نەورۆز كەیفخوەشن ب ئاست و ئەنجامێن تیما خوە ئەوا هەتا نوكە 15 خال كۆمكرین و د ڕێزبەندیێ دا پێشڤە هاتیە و گەهشتییە ڕێزا چارێ ژ چار سەركەفتن بەرانبەر یانەیێن تەلەبە، نەفت میسان، مووسل و جۆلان، ، سێ وەكهەڤی بەرانبەر جەوییە، دهۆك و غاز ئەلشیمال و خوسارەتیەك بەرانبەر ئەلغراف، یاریزانێن وێ 13 گۆل تۆماركرینە و چار ل سەر هاتینە تۆماركرن.
غاز ئەلشیمال پاشڤەهات
تیما پێنجێ یا كوردستانی د خولا ستێرێن ئیرقاێ دا غاز ئەلشیمال ئەوا بۆ جارا ئێكێ د دیرۆكا خوە دا هاتییە ڤێ خولێ د ڕێزبەندیەكا بن ناڤنجی دا كو هەشت خال كۆمكرینە ل رێزا 13ێ دهێت ژ سەركەفتنەكێ بەرانبەر ئەلغراف، پێنج وەكهەڤییان بەرانبەر كارەبا، جەوییە، دهۆك، شورتە و نەورۆز و دو خوسارەتیان بەرانبەر زاخۆ و جۆلان، چار گۆل هەنە و چار ل سەر بووینە.
ڕاهێنەرێ دهۆكێ ڕازی نینە بچیت
ل دووڤ دەنگۆباسێن نێزیك ژ یانەیا دهۆكێ ژبەر ئەنجامێن لاواز یێن تیمێ بزاڤ دهاتنە كرن ڕاهێنەرێ تیمێ یێ ئیرانی یەحیا گولمحەمەد دەست ژ كارێ خوە بەردەت، ژبەركو ئەڤ ئەنجامێن هاتین بوویە جهێ نەڕازیبوونێ و توورەبوونێ ژلایێ كارگێریێ و جەماوەری ڤە، لێ ڕاهێنەرێ ناڤبری ڕەدكرییە ئەز دەست ژ كارێ خوە بەردەت و گۆتییە هەتا هەردو یاریێن بهێت بەرانبەر زەورا و جۆلان دێ مینم هەكە ئەنجام د باش نەبن دێ دەست كاركێشم، ئانكو هەكە د پێنج یارییان لدووڤ ئێك ئەنجام د باش نەبن گرێبەست دێ هێتە هەلوەشاندن.
ژلایێ خوەڤە كارگێرییا یانەیا دهۆكێ چەند مەرجەك داناینە بەرسنگێ ڕاهێنەری ژ وان مەرجان، دڤێت شێوازێ یارییا خوە ب گوهۆڕیت، دڤێت زێدەتر خۆ نێزیكی یاریزانان بكەت، هەروەسان دڤێت ئەو شێوازە بهێتە گوهۆڕین كو ڕاهێنەر پلان ل سەرهەیە یاریزانێ د یاریەكێ دا سەرەكی بیت د یارییا دووڤدا دەمێ یەدەك بیت بچیتە ل سەر پەلۆكێن یاریگەهێ، ئەڤ مەرجە تا ڕادەیەكی ڕاهێنەر ڕازییە دێ چارشەمبییا بهێت ڤەگەڕێتە ڕاهێنانان.
هەردڤێ چارچووڤەی دا كارگێرییا یانەیێ بڕیاردا ب بڕینا 15% ژ مووچەیێ یاریزانان و ستاڤێ ڕاهێنانێ و دیاركر ئەڤ بڕیارە ژبۆ ڕاستڤەكرنا ڕێرەوی و چاككرنا ئەنجامایە و بلندكرنا ئاستێ تیمێ یە ب ئاوایەكی كو دگەل هیڤی و ئارمانجێن یانەیێ و جەماوەری بكۆنجیت.
ڕاهێنەرێ زاخۆ گازندە ژ دادڤانان هەنە
د پرێسكۆنفرانسێ رۆژنامەڤانی دا یێ قەتەری تەلال ئەلبلۆشی ڕاهێنەرێ تیما زاخۆ دەستخوشییا یاریزانێن خوە كر و گازندە ژ دادڤانان كر و گۆت: یاریزانێن مە ئاستەكێ باش نیشان دا هەر ژ دەستپێكا یاریێ هەتا دووماهیێ بزاڤێن گۆلكرنێ و گڤاشنان هەبوو، لێ مخابن دادڤانێ یاریێ چ خوەش بۆ یاریێ نەهێلا، پەنەلتییەكا دروست بۆ مە چێبوو نە هژمارت، ئەو كارتا سۆر یا یاریزانێ مە یا دروست نەبوو، ب راستی ژی دادڤانی یێ بێ لایەن نەبوو، بەلكو شاشیێن بەرچاڤ هەبوون و دبەرژوەندییا تیما گەرمە دا بوو، دڤیابا كارێ خوە ب دروستی كربا نەك ل بن گڤاشتنا جەماوەری یان لایەنەكی، ڕاستە یارییەكا بهێز بوو و تیما ئەلگەرمە هەڤڕكەكا بهێز بوو لێ ئەم باشتربووین.
فدراسیۆنا فوتبۆلا ئیراقێ ڕاگەهاند دێ هەڤڕكیێن خولا ستێرێن ئیراقێ هێتە ڕاوەستاندن ژبەر پشكدارییا هەلبژارتیێ ئیراقێ د كۆپا كەنداڤی دا، یاریێن گەڕا هەشتێ دبیت هەتا پشتی ب دووماهی هاتنا كۆپایێ ڕاوەستیایی بیت، لێ هەر دەمێ ئیراق ژ قارەمانیێ دووركەفت دێ حەفتییا دووڤدا خول دەستپێكەت.
لیستا گشتی یا ڕێزبەندیێ ب ڤی شێوەی یە
1- ئەلگەرمە 20 خال.
2- زەورا 18 خال.
3- هەولێر 17 خال.
4- نەورۆز 15 خال.
5- شورتە 15 خال.
6- نەفت 15 خال.
7- جۆلان 10 خال.
8- دهۆك نەهـ خال.
9- دیالا نەهـ خال.
10- مینا نەهـ خال.
11- زاخۆ نەهـ خال.
12- جەوییە هەشت خال.
13- غازئەلشیمال هەشت خال.
14- مووسل هەشت خال.
15- كەرخ حەفت خال.
16- كارەبا خەفت خال.
17- تەلەبە حەفت خال.
18- نەفت میسان حەفت خال.
19- ئەلغراف پێنج خال.
20- كەربەلا پێنج خال.
نيشاندان