زەكەریا حەمید

1
درەنگ هشیاربوو، رۆژا خۆ دیت كو بەرییا وی یا گەهشتی یە ماندیبوون و ئاڤابوونێ‌.

2
گۆتنە وی: تو ب بە «تو»، نە كەسەكێ‌ دی. دەمێ‌ بوویە خۆ؛ ب تنێ‌ هێلا.

3
ئەو ژ مرنێ‌ د ترسییا، لەوا ژییەكێ‌ درێژ بر… بێ‌ ڤیان بێ‌ ژیان.

4
د خۆدیكێ‌ دا تۆقە ل گەل مرۆڤەكی كر كو گەلەك وەكی وی بوو، پشتی هنگی لێبۆرین ژێ‌ خواست؛ چونكی بێ هیڤی كربوو.
5
ب هشیاری دەرگەهێ‌ دلێ‌ خۆ گرت، لێ‌ خەم ل بەر دەرگەهی روینشت بوون.

6
هەر جارا هەولا رەڤینێ‌ ژ بیرهاتنێن خۆ كربا، دا ب گاڤێن خۆ هەلنگڤیت و كەڤیتە د چالا بیرهاتنان دا.

7
گۆت: دێ‌ هەدارێ‌ كێشم. هەدار مەزن بوو، هند مەزن بوو، هیڤی گۆشت.

8
ئەو نە یێ‌ ب تنێ‌ بوو، لێ‌ بۆ وی تنێبوون ژ هەمییان ئەمەكدار تربوو.

9
وەسیەتناما خۆ نڤیسی، پشتی وێ‌ وەكی هاڤییەكی ل خۆ دگەڕییا.

10
دەمێ‌ دەنگێ‌ خۆ ژ دەستدایی، بۆ وی خۆیا بوو كو ئەڤە دەمەكێ‌ درێژە بێدەنگی چاڤەڕێیە ل جهێ‌ وی ب پەیڤیت.

11
خۆ فێری گڕنژینێ‌ كر، نەژبەر هندێ‌ كو یێ‌ دلخۆش بوو! ژبەر كو دا دەردۆرا خۆ ڕازی بكەت.

12
گەلەك چاڤەڕێ‌ بوو، هەتا كو ئەو تشتێ‌ وی ڤیایی هاتی؛ ئەو نەما ئەو كەسێ‌ چاڤەڕێ‌ دكری.!
13
زوی هشیار بوو، لێ‌ د خۆدێ‌ خۆدا یێ‌ گیرو بوو.. بۆ ژیانێ‌.

14
جگارەك بەردایێ‌ و ئاخینەك هەلكێشا و گۆت: چەند پتر ژ ژیانێ‌ بگەهین حەزا مرۆڤی بۆ ژیانكرنێ‌ كێمتر دبیت.

15
بۆ جارەكا ب تنێ‌ هەولدا یێ‌ راستگۆبیت و راستییەك گۆت: لێ‌ ژییێ‌ خۆ هەمی ب لێبۆرینێ‌ ڤە دەربازكر!

16
ئەو ژ ئێشانێ‌ نە د ترسییا دەما ڤییای خۆ ژ لۆتكێ‌ ب هاڤێتە خوار، لێ‌ د ترسییا هەست ب چ تشتان نەكەت، دەمێ‌ دكەڤیت.

17
د ناڤ قەرەبالغا مرۆڤاندا، بۆ وی خۆیا بوو كو تنێبوون بەهرەیەكا دەگمەنە.

18
د هەڤڕكییێ‌ دا، بزاڤكرن كو یێ‌ ب هێز بیت، لێ‌ ژبیركر كا دێ‌ چەوا بیتە مرۆڤ.

19
پشتی ئەو هێلای و چووی، گۆتنە وی ژبیر بكە، ژ هنگی وەرە بیرهاتن بوونە تاكە پیشەیێ‌ وی.

20
پشتی هەر تشت ژ دەستدایی، تنێ‌ دكرە كەنی؛ چونكی خەمگینی حەز ژ هەڤڕكان ناكەت.

ڕێزان جەعفەر

کا هیڤی دکەم دەستێن خو بدەف من، نێزیک بە، تو بۆچی دترسی؟ چەند نێزیک دبوو، دویرتر لێ دهات، هەتا ب تەمامی بەرزە بووی. ب تنێ ل بەر کەناری روینشتم، لێ نە یێ دەریایێ، ل ڤێرە، مە چو دەریا نینن، مە کەنارێ تەختی یێ هەی، یان یێ مێزەکێ، یان کەنارێن خەمەکێ، یان عەدەمەکێ.
خەیالان ئەز دویر نە برم، ئاخ، نێ خەیالێن مە ژی د سنووردارکرینە، بیرهاتن، تو، ئەو، هوین، ئەز، هەر تشت و هەمی جهناڤێن کەسی ل پێش چاڤێن من هاتنە هلاویستن، چەند دیمەنەک کرێتە، خۆ ب هلاویستنێ ژی، یێن ب سەر و چاڤێن ئێکڤە، خۆزی نە هاتبانە هلاویستن، هەتبانە بن ئاخکرن، دا ژێکڤە ببان، دێ کا بەسە هزرێن لەوچە، من دڤێت هەر چەوا بیت دەستێن وێ بگرم.
پشتی چەندین هەیڤێن هیڤیکرنێ و خۆ زەلیلکرنێ، رازی بوو بهێت، جهەک تژی گولێن کیڤی، بالندەیێن گێژ، هەوایەکێ بێهن تەنگ، رۆژەکا پێتی، مرۆڤی هزردکر هندە دێ مریت، تبلێن وێ گەهشتنە تبلێن من، دا دەستێن من بگریت، گۆت: تو چەند یێ ترسنۆکی. پەیڤا وێ کەتە سەر برینەکێ و خوین ژێ پەشی. ب لەز دەستێن خۆ کێشان و ئێلنجی هاتنێ. گۆت: «ببۆرە، ئەز حەز ژ بێهنا ئازارا ناکەم و بازدا و چوو». من زانی ژبەر بێهنا ئازارێن من، چو جاران خۆشییێ نەشیا دەستێن من بگریت.

سەدیق حامد

خەلكۆ وەرن
دێ‌ هوین وەرن
گەلی دۆستا..
دێ‌ هوین وەرن
ڤەكەن دەرگەهێ‌ جزیرێ‌
سەلوا و مەلێ‌
هلكەن خەتیرێ‌
بێژنە پیرێ‌ چل و چار سال
بورجا بەلەك بهێلە بەتال
جابێ‌ بدەن هەر چار چرا
بلا بهێن مام و برا
هەژارێ‌ موكری تێتن حەیران
خەف پەیام دا
فەقی یێ‌ تەیران
جەگەرخوین و شارا شامێ‌
بۆ هەوارا ئەڤێ‌ نامێ‌
ل وەلاتێ‌ ئۆرەمارێ‌
سەد سلاڤ و مالیئاڤا
شاهین و نومی خانێ‌
بینن.. بكەن بویك و زاڤا
بێژنە عیسێ‌ بزڤڕیت
خەنجەر كەڤلانی نابڕیت
هەمی وەرن..
دی هوین وەرن
بەرێزكرنا جهێن كەڤن
گەلەك فەرن
بچین فێرگەها قوبەهان
بزڤڕینین لێ‌ روح و جان
جهێ‌ ئاقلمەند و پیرا
پەسار و میرگەها میرا
یێ‌ سینەمێ‌ و
عشق و ئەڤینان
وارێ‌ حەمكێ‌ و خاتینان
حوجرە و منارا رۆحانی
فڕینگەها..
ملیاكەتێن نۆرانی
قەلەم تانۆتییێ‌ تەیە
(جەزبە) د حالچوون.
سۆفییێ‌ تەیە
خواندنگەها ئامێدێ‌
پەرتووك حوبر…
ئاڤا (توی) یێ‌
جارەكادی نویژەن بكەین
وەللاهی شەرمێ‌ ژێ‌ دكەین
هندی ب ناڤێ‌ تە ناڤدار
ل دین و دەولەتا قەردار
شیانێن تە بێنە دەرێ‌
جارەك دی..
هەڤبەر ئەزهەرێ‌
هەر دو دەرگا..
تیر و كڤان
بەكربەگ و نالبەند مێڤان
چاڤێ‌ گارەی و مەتینا
چرا و ناسناما بادینان.

شەمال ئاکرەیی

ل ئەسمانەکێ جودا ژ یێ دوهی
خەونان خۆ ب دەستێن منڤە بەر دان،
سترانێن تەڤ ئەزمانان،
سەرا گوهێن من دان.
چاڤێن سانسۆر..
زێرەڤانی..
ل گاڤێن ژ نۆستالژیایێ تژی، دکرن.
مرۆڤێن ژ سەراد و بێژینگێن دادگەهان..
قورتال بووین،
د بازنەیێ نهینییان دا
د دیرۆکا باپیران رستی دا
د شەهنازیێن من چ ژێ نە دا
هەر دزڤڕین
ل گەل هەر زڤڕینەکێ
سەرێن وان
جهێن وان
بەرویکێن وان
مەزن دبوون
ئەڤێن ب ناڤ مرۆڤ..
گوهـ نادەنە چ پستەپستان
هەمی گۆتن بەحسی وانن
لێ د بێ گوهن
خەیالا وان..
تەنێ ل پشت دەرگەهێن گرتی د لەییزیت.
بلەییزە و بلا بۆ تە بلەییزن!
دەما هزر دبنە بەلاتینک و..
خۆ گۆری ئاگری دکەن،
پەیڤێن چیای ڤەژەنا مانێ د شاراند
ئەڤرۆ مینا بەلگێن پاییزەکا ژ خۆ سل..
ب سەر سەرێ مە دا د وەریێن.
دەما ئاشۆپ تێکهەلی راستییێ دبن
لێڤ گەزاندن..
ب هەدەردانا دەمی یە.
ئەڤ سەربۆرە،
بیرا من ژ داپیرا من دئینیت
دەما ب دەستێن خۆ یێن تژی رەهێن شین
ب سەمتینی..
گۆرەیێن هرییەکا پاڤزەر بۆ مە دنەخشاندن
ل بەر ڕا ژی چیڕۆکا «حەمبەلویلکێ» * بۆ جارا سەدێ
بۆ مە ڤەدگێڕا.
هەر دەم ژی گوهێن مە دمیت بوون
بۆ ڤەگێڕانا داپیرێ
کا ڤێ جارێ دێ چ ژ بیر کەت
یان دێ چ ل سەر زێدە کەت.
بەلێ ڤێ جارێ داپیرێ
وەرچەرخانەک چێکر..
چێرۆکەکا دی بۆ مە ڤەگێڕا و دگۆت: «هەبوو نەبوو..
چ ژ خودێ مەزنتر نەبوو..
خەلکەک هەبوو، خەشیمی خلاس کربوو
باج و خویکا خۆ نە ددا
وی خەلکی دگۆت: ئەم نزانین چەوا خویکێ بشینین؟
پادشای و عەوانێن وی ژێ باوەر نەکر
رابوون کێزکێن رەش و مێویژێن رەش تێکهەلکرن
گۆتنێ فەرموو بخۆن.
خەلکێ خەشیم رابوو
هەمی کێزک خوارن و گۆتن،
هەڤالنۆ یێن ب پێ بخۆن، یێن بێ پێ هەر یێن مەنە»

جەلال زیناڤایی

ل شەڤەکا تاری، بارانێ هێدی هێدی ب پەنجەرەیا ژۆرێڤە کەڤالێن خەمگین چێدکرن، هەر وەکی ئەسمان ژی دگەل وی دکەتە دگری، چاڤێن ئۆمێدی ل وێ قولاچێ بوو کو بەری دو سالان دایکا وی ل سەر شەملکێ شەڤنڤێژێن خوە لێ دکرن، تارییا مالێ تژی ڕۆناهی دکر.
دایکا وی نە تنێ کەسەک بوو، ئەو بۆ وی وەلات بوو، ئۆمێدی هەستدکر پشتی وێ یێ بوویە کۆچبەرەکێ بێ ناسنامە و بێ پەناگەھ، دەما دەستێ وی د چوو سەر وێنەیێن کەڤن، شاشەیا مۆبایلا وی د بوو خۆدیکەک مینا هەیڤا چاردە شەڤی، ب وی کراسێ خوە یێ کوردی و ب وێ گڕنژینا کو بێهنا گولێن بوهارێ و نێرگزێن چیا ژێ دهات دیار دبوو.
ئۆمێدی گۆت: دایێ پشتی تە ژیانێ ڕەنگێن خوە یێن جوان بەرزەکرینە، سپێدەهی یێن من بێی دەنگێ تە یێ تژی ئارامی سار و بێ ئەلند ماینە.
ئۆمێدی دزانی کو مرن راستییەکا تەحلە، بەلێ خەریبییا دایکێ د دلێ ویدا ئاگرەکێ گەشە، ب چ ئاڤان ناهێتە ڤەمراندن، بەلێ دا کو هەست ب هندەک گەرماتییێ بکەت، وەک وێ گەرماتییا دەمێ دایکا وی سەرێ وی د دانا سەر چۆکێن خۆ و ب دەستێن خۆ یێن وەستییای پرچا وی ڤەدمالی و ئۆمێدێن ژیانێ پێ دبەخشی، د وێ بێدەنگییا کوژەکدا، ئۆمێدی چاڤێن خوە گرتن، وی هەستکر کو بێهنا وێ یا ل ناڤ قولاچکێن مالێدا دزڤڕیت، هەر چەندە یا ل وەغەرا بێ ڤەگەڕ، بەلێ گیانێ وێ وەکو ستێرەکا گەش د ئەسمانێ ژۆرێڤە دگەڕیا .
بۆ وی دیاربوو خەریبی نە دویراتییا رێکانە، بەلێ ئەو کەلا بورکانێیە یا چو کەس نەشێن ئارام بکەن، ب تنێ دایک نەبیت، نهێنییا وێ ژی ل دەف وی خودایە یێ بەهشت کرییە دبن پیرۆزییا پێ یێن وێڤە.
دگەل خوەدا گۆت: ئەو نە چوویە، بتنێ ئەو یا بوویە چرایەک د ناڤ تاریاتی یێن ژیانا مندا، د هەر سپێدەهییەکێ دا ئەز یێ ل هیڤییا دەنگێ وێ کو ل بن گوهێ من بێژیت (خودێ ل گەل تە بیت کوڕێ من، چونکی بتنێ دوعایا دایکێ کلیلا دەرگەهێن دائێخستییە).

مەتین وەرمێلی

یا حەق بوو کو وەسا هزر بکەت؛ قەی دەمەکێ درێژە مە ئێک نەدیتی. ڕاست بوو، بەلێ ئەو بێ ئاگەهـ بوو ژ چاڤ و دلێ من، ژ خەیال و روحا من. نەدزانی کو ئەو هەر ڕۆژ د ناڤ من دا هاتن و چوونێ دکەت. ڕۆژەکێ ژی پارچەیەکا لەشێ من ژ وێ غافل نەبوویە و چ گاڤان ژ بیرا من نەچوویە.
لەوما ژی دەما من دیتی، من هەست ب غەریبیا وان چەند سالێن «نەدیتنا ڕاستەوخۆ» نەکر، چونکی ئەو هەردەم یا ل دەف من بوو. بتنێ تشتێ ئەز گەلەک ژێ غەریب بوویم، دەنگێ وێ بوو؛ دەما پرسیارا حالێ من کری و گۆتی: «چەوانی؟ باشی؟»
د وێ چرکێ دا، من دڤیا چاڤ و دلێ من پێش زمانێ من بکەڤن و بەرسڤا وێ بدن. من دڤیا روحا من ل بەر خۆ کربا، دا زانیبا ژانێن عەشقا وێ چ ل من کریە. من دڤیا پەیاسەیەک د ناڤ بیردانک و خەیالێن من دا کربا، ئەو هەلبەست، ڕۆمان و سکالایێن من ل سەر عەشقا وێ نڤیسین، هەمی خواندبان، بەلکو پیچەکێ هەست ب حالێ من کربا و زانیبا ئەز یێ چەوانم!
بەلێ.. ل سەر ڤێ هەمییێ ڕا، ب درەوەکا کورت و بەرسڤەکا سادە، من بتنێ گۆتێ: «باشم، سوپاس».