دهۆك، دلۆڤان ئاكرەیی:

پەیڤدارێ دەستەیا وەبەرهێنانا هەرێما كوردستانێ دیاركر، شاندەكێ دەستەیا وەبەرهێنانا هەرێما كوردستانێ پشكداری د كۆنفرانسەكێ وەبەرهێنانێ ل وەلاتێ ئیماراتێ دا كر كو یێ‌ تایبەت بوو ب وەبەرهێنانێ ل كوردستانێ، دەستەیا وەبەرهێنانێ ل گەل كۆمپانیێن وەبەرهێنانێ ل جیهانێ و وەلاتێن دەڤەرێ كۆم بوویە.
بەرگەشت ئاكرەیی، پەیڤدارێ دەستەیا وەبەرهێنانا هەرێما كوردستانێ بۆ رۆژنامەیا ئەڤرۆ گۆت: «د ڤێ كونفرانسێ‌ وەبەرهێنانێ دا، سمینارێن تایبەت ب وەبەرهێنانێ ل هەرێما كوردستانێ هاتنە پێشكێشكرن و دیدار و كۆمبوون ژی ل گەل كۆمپانیێن ئیماراتی هاتنە ئەنجامدان، ئارمانج ژ ڤی كۆنفرانسی ئەوە: وەبەرهێنەرێن وەلاتێ ئیماراتێ و یێن پشكداربووی پتر ئاگەهداری دەرفەتێن وەبەرهێنانێ ل كوردستانێ بن و بهێن پڕۆژەیێن پیشەسازی و چاندنێ‌ و گەشتیاری و د بیاڤێن دی دا ل هەرێما كوردستانێ ئەنجام بدەن».
گۆتژی: «ئەڤ جۆرە كۆنفرانسە دێ دبەردەوام بن ل وەلاتێن كەنداڤی و نوكە ب بەردەوامی شاندێن وەلاتێن بیانی ب ئارمانجا ئەنجامدانا وەبەرهێنانێ ل هەرێمێ قەستا هەرێما كوردستانێ دكەن».

دهۆك، دلۆڤان ئاكرەیی:

بەرپرسەكێ كۆمسیۆنا بلندا سەربخۆ یا هەلبژارتنێن ئیراقێ دیاركر، ل گەل نێزیكبوونا ژڤانێ هەلبژارتنێن پەرلەمانێ ئیراقێ، كو بڕیارە ل 11/11/2025 بهێنە كرن، ئامادەكاری بەردەوام دهێنە كرن.
مەروان مەحەمەد، بەرپرسەكێ كۆمسیۆنا بلندا سەربخۆ یا هەلبژارتنێن ئیراقێ بۆ رۆژنامەیا ئەڤرۆ گۆت: «ئامیرێن دەنگدانێ ل رۆژا 14ی ئیلونێ دێ گەهنە بەندەرێ‌ فاو و رۆژا د دووڤ دا دێ گەهنە بەسرا و پشتی تمامبوونا رێكارێن ئەمنی، ئامیر دێ ل سەر تەڤایا پارێزگەهێن ئیراقێ و هەرێمێ دێ هێنە بەلاڤكرن».
ل گۆرەی گۆتنا مەحەمەدی، ئامیر هاتینە نووكرن و كێشەیێن تەكنیكی یێن بەرێ هاتینە چارەسەركرن، ئێك ژ گوهۆڕینێن سەرەكی، دانانا كامیرێ‌ یە بۆ نیاسینا روخسارێ دەنگدەری ل جهێ پەنجە مورا وی، دیسا بڕیارە ل رۆژا ئێكشەمبییا بهێت 14/9/2025 پشككێشان بۆ وەرگرتنا كارمەندێن سەر سندۆقێن دەنگدانێ ل هەرێمێ بهێتە كرن.

لەزگین جۆقی:

دەڤەردارێ‌ شێخان راگەهاند، د كابینەیا نەهێ یا حكومەتا هەرێما كوردستانێ‌ دا باشترین خزمەت بۆ خەلكێ شێخان هاتینە پێشكێشكرن و دبێژیت: ب گوژمێ 260 ملیار دیناران پتر ژ 163 پڕۆژەیێن خزمەتگوزاری هاتینە چێكرن.
سەردار یەحیا، دەڤەردارێ‌ شێخان بۆ رۆژناما ئەڤرۆ گۆت: «دەڤەرداریا شێخان د بەرفرەهبوونێ دایە و حكومەتا هەرێما كوردستانێ باشترین خزمەت بۆ دەڤەرداریا شێخان كرینە، بۆ نموونە: پڕۆژەیێ‌ چێكرنا جۆتسایدێ‌ شێخان بۆ لالشێ‌، كو جهەكێ ئایینی و شوونواری و دیرۆكیێ گرنگە، دیسا كابینەیا نەهی چەندین پڕۆژەیێن دی ل شێخان ئەنجامداینە».

شاكر ئەتروشی:

بەشێ‌ رەوشەنبیری و راگەهاندنا پارتی دیمۆكراتی كوردستان، ب هەلكەفتا (31) سالیا وەغەرا دووماهیێ‌ یا هونەرمەندێ‌ شێوەكار و شانۆكارێ‌ دیارێ‌ كوردستانێ‌ و كادرێ‌ پێشەنگێ‌ پارتی، رەوانشاد (ئەنوەر تۆڤی 1925ـ 1994) و ب بەرهەڤبوونا (د. سالار ئوسمان) بەرپرسێ‌ بەشێ‌ رەوشەنبیری و راگەهاندنا پارتی دیمۆكراتی كوردستان و چەند ئەندامێن وی بەشی، دوهی 10/9/2025 ل دەمژمێر پێنجی ئیڤاری د رێ‌ و رسمەكێ‌ ژهەژی دا كو ل هولا ئێكەتیا نڤیسەرێن كورد/تایێ‌ دهۆكێ‌ هاتبوو گێڕان، خەبات و بەرهەمێن وی بلند هاتنە راگرتن، هەروەسا رێز ل مالباتا وی هاتە گرتن.

پشتی راوەستیان دەقیقەكێ‌ رێزگرتن بۆ گیانێ‌ پاقژێ‌ شەهیدان و سەروەرێ‌ وان بارزانیێ‌ نەمر و ئدریسێ‌ هەردەم ساخ (31) شەمالك وەك ئاماژەیەك بۆ وەغەرا دووماهیێ‌ یا رەوانشاد (ئەنوەر توڤی) ژلایێ‌ بەرهەڤبوویان ڤە ل بەر وێنەیێ‌ هاتنە هەلكرن، دووڤدا تابلۆیەكێ‌ مۆزیكێ‌ ژلایێ‌ هونەرمەند (بەنگین محەمەد سالح) لێدەرێ‌ ئامیرێ‌ (بالەبانێ‌) هاتە پێشكێشكرن،
پاشی گۆتارا بەشێ‌ رەوشەنبیری و راگەهاندنا پارتی دیمۆكراتی كوردستان، ژلایێ‌ بەرێز (د. سالار ئوسمان) بەرپرسێ‌ بەشێ‌ رەوشەنبیری و راگەهاندنا پارتی دیمۆكراتی كوردستان هاتە خواندن و تێدا ب درێژی ل سەر بەرهەم و خەباتا شێوەكار و شانۆكار (ئەنوەر توڤی) ئاخفت و ب هونەرمەندەكێ‌ كاریگەر د بۆارێ‌ شانۆ و شێوەكاریێ‌ دا، هەروەسا ب كادر و خەباتكارەكێ‌ دێرینێ‌ پارتی دیمۆكراتی كوردستان، هەروەسا ب كەسایەتیەكێ‌ فرە رەهەند ل قەلەم دا (دەقێ‌ پەیڤا وی ل لاپەرێ‌ حەفت هاتیە بەلاڤكرن) د دووڤدا فلمەكێ‌ دكیومەنتاری ل دۆر بەرهەم و خەباتا (توڤی) هاتە نیشادان كو ژلایێ‌ كەنالێ‌ دهۆك تیڤی و سلێمانیە تیڤی ڤە هاتبوو بەرهەڤكرن.
د دووڤدا نڤیسەر و رۆژنامەڤانێ‌ دێرین (فەرهاد عەونی) سمینارەك ل ژێر ناڤێ‌ (شرۆڤەیا لایەنێ‌ هونەری و كومەلایەتی یێ‌ هونەرمەندێ‌ رەوانشاد ئەنوەر توڤی) هاتە پێشكێشكرن و چەند بیرهاتنێن خوە ل گەل (ئەنور تۆڤی) ڤەگێڕان و ب هونەرمەندەكێ‌ پێشەنگ و پر بەرهەم ل قەلەمدا، هەروەسا وێنەیەكێ‌ رەحمەتی ئەنوەر تۆڤی ل گەل وی و چەند هەڤالێن وی كو ل سالا 1974 بوو هاتبوو گرتن پێشكێشی بنەمالا وان هاتە كرن.
ل دووماهیێ‌ خەلاتێ‌ رێزلێنانێ‌ ژلایێ‌ (د. سالار ئوسمان) بەرپرسێ‌ بەشێ‌ رەوشەنبیری و راگەهاندنا پارتی دیمۆكراتی كوردستان پێشكێشی بنەمالا (ئەنوەر توڤی) هاتەكرن و ژلایێ‌ كوڕێ‌ وی (غاندی ئەنوەر) ڤە هاتە وەرگرتن، هەروەسا قەفتێن گولان وەك دیاری بۆ بنەمالا رەحمەتی ژلایێ‌ ناڤەندا خانی یا رەوشەنبیری و راگەهاندنێ‌ و ئێكەتیا نڤیسەرێن كورد/تایێ‌ دهۆكێ‌ و سەندیكا هونەرمەندێن كوردستانێ‌/لقێ‌ دهۆك هاتنە پێشكێشكرن و پەیڤا مالباتا وی ژی ژلایێ‌ نڤیسەر و رۆژنامەڤانێ‌ دێرین (موسەدەق توڤی) كو دبیتە برایێ‌ رەوانشاد (ئەنور توڤی) هاتە خواندن و تێدا گۆت: ژیانا ئەنوەر تۆڤی داستانەك بوو ژ سلێمانیێ‌ دەستپێكر هەتا گەهشتیە ناڤ شۆڕەشێ‌ و تشتێ‌ گرنگ ئەوە بوو هەردەم پێشانگ بوو د كارێ‌ خوە دا ، یا نژی ژ پێشەنگان بوو، هەروەسا ب ناڤێ‌ مالباتێ‌ سوپاسیا بەشێ‌ رەوشەنبیری و راگەهاندنا پارتی دیمۆكراتی كوردستان و ناڤەندا خانی یا رەوشەنبیری و راگەهاندنێ‌ و هەموو سازیێن ب سەرڤە و هەر كەس و لایەنەكی كر بۆ رێكخستنا ڤێ‌ چالاكیێ‌.
هەژی گۆتنێ‌ یە كو بەرێز (سەباح بەیتوللا) هاریكارێ‌ بەرپرسێ‌ مەكتەبا رێكخستنا پارتی دیمۆكراتی كوردستان ل دهۆكێ‌ و خانم (د.ڤیان سلێمان) هاریكارا بەرپرسێ‌ مەكتەبا رێكخستا پارتی دیمۆكراتی كوردستان ل دهۆكێ‌ و چەند ئەندامێن مەكتەبا رێكخستنێ‌ و هژمارەكا زۆرا ئەدیب و نڤیسەر و رۆژنامەڤان و رەوشەنبیر و هەڤال و چەند كەسەك ژ مالباتا رەحمەتی (ئەنوەر توڤی) دڤێ‌ چالاكیێ‌ دا د بەرهەڤ بوون.

«شانازیێ‌ دكەین ل باژێرەكێ‌ دیرۆكی و ل سەر كەساتیەكا دیرۆكی باخڤین، ب ڤەگەرینە مێژوویەكێ‌ كو پڕی مانا و مەخزا و دەلالەت، مێژوویەك كو شانۆ و شێوەكاری و بوارێن كەلتووری، جۆرەك بوون ژ پەیاما نشتیمانی بۆ خزمەتا نشتیمانی و دوزا رەوا یا كوردستانێ‌. ئێك ژ وان سومبولێن كوردستانێ‌ و مێژوویا وێ‌ ژی، مامۆستا و رەوانشاد ئەنوەر تۆڤی بوو، كو ئەڤرۆ ئەم هەم د خزمەتا رحا وی یا پاقژ دا راوەستیاینە.
ئەم سەرێ‌ رێز و نەواشێ‌ بۆ گیانێ‌ وی یێ‌ پاك د دانین و هەروەسا سەرێ‌ رێز و نەواشێ‌ بۆ مالباتا وی د دانین، كو بەشەك ژ وان ئەڤرۆ ل ڤێرێ‌ نە و بەشەك ژی ب رێیا میدیایێ‌ گوهداریا مە دكەن، ئەم دبێژینە وان ماموستا ئەنوەر هەردەم دناڤ مەدا و دناڤ كەلتور و هونەرێ‌ مە دای ێ‌ زیندیە و تابلۆیێن ژیانێ‌ هەمی د بەرهەمێن خۆدا كۆمكرینە.
ئەم ئەڤرۆ بەحسێ‌ كەساتیەكێ‌ كەین كو چەندین ساخلەت د خۆدا كۆمكرینە، ئێك ژ وان ساخلەتان ژی، كەساتیەكا فرە ڕەهەند هەبوویە، ئەڤ جۆرە كەساتیە ژی بۆ كوردستانێ‌ زۆر د گرنگن، ئەگەر بەرێ‌ خۆ بدەینە كەساتیا فرە ڕەهەندیا ئەنوەر تۆڤی بكەین، كە واتە كار د وارێ‌ رەنگ و سحرا شێوەكاری دا كریە، شانۆكارە كە واتە كار د بوارێ‌ كۆمكرنا هەموو جۆرێن هونەری دا كریە. ساخلەتەكێ‌ دی یێ‌ مامۆستا ئەنوەر تۆڤی كاریكاتۆریزم بوویە و د ڤێ‌ دەلیڤێ‌ دا ئەم نەشیێن هەمی سەخلەتێن وی شرۆڤە بكەین.
ئەنوەر تۆڤی مامۆستا بوو و قوتابیێن كورد فێری خواندن و نڤێسین و پەروەردە و دۆزا رەوایا كوردی كریە و سەرپەرشتیارێ‌ پەروەردەیی بوو، مامۆستا ئەنوەر زێدەیی ڤان ساخلەتان مرۆڤەكێ‌ دیكۆمێنتار بوو، ل بەغدا دیكۆمێنتاری ل سەر بەغدا و دوزا رەوایا كوردی كۆمڤەكرینە و كەساتیەكێ‌ زۆر گرنگ بوویە بۆ كوردستانێ‌، چونكو د ڤان هەمی بواران دا كار و خەبات بۆ دوزا رەوایا كوردستانێ‌ كریە، لێ‌ هەتا نوكە بەرەبایێ‌ نوو و هەتا رۆژنامەڤانێن مە ژی ب شێوەیەكێ‌ دروست نانیاسن و زانیاری دەربارەی خەبات و خزمەتا وی نینن.
زێدەباری ڤان هەموو ساخلەتان ژی، مامۆستا ئەنوەر تۆڤی كوردپەروەرەكێ‌ مەزن بوویە و پارتیەكێ‌ سەرسەخت بوویە و ل سەر رێبازا بارزانی چوویە، ئەو سەخلەتە ژی هۆسا بۆ مە دیار دكەن كو كەساتیێن مەزن و خودان هێز و شیان رێیێن دروست د هەلبژێرن. ئێك ژ سەخلەتیچن دی یێن مامۆستا ئەنوەر تۆڤی زەلامەكێ‌ نویخوار بوو، ئەگەر بەرێ‌ خۆ بدەینە گەنجاتیا مامۆستا ئەنوەر تۆڤی و جلوبەرگێن وی، ێ‌ بینین كو ئەو دیزاین و تیشێرت و جلك و رۆخسارێ‌ وی ل و سەردەمی جۆرئەتەكا مەزن تێدایە و نیشانا هندێ‌ یە كو مامۆستا ئەنوەر تۆڤی مرۆڤەكێ‌ نویخوار بوو و ئەو جلكێن وی ل وی سەردەمی دكرن، نوكە پترای گەنجێن مە ئەو جۆرئەتە نینە وان جلكان ل بەر خۆ بكەن.
ئێك ژ سەخلەتێن دی یێن مامۆستا ئەنوەر تۆڤی كوردەكێ‌ باش و پارتیەكێ‌ چالاك بوویە، ل وی دەمی رژێمێ‌ گەلەك بەر پێن وی تەنگ دكرن و گەلەك ئازار ددانە بەر وی و هەڤالێن وی، لێ‌ ئەو هەر یێ‌ بەردەوام بوو ل سەر كارێن دوزا كوردی و پارتایەتی و نشتیمانی و خاكێ‌ خوە كریە. زەلامەكی ل ئامێدیێ‌ و بامەرنێ‌ ژ دایك ببیت و ل هەولێر و سلێمانیێ‌ كاربكەت و ل هەلەبچە ببیتە مامۆستا و ل بەغدا د ئێكەتیا سەندكا مامۆستایان كار بكەت و بەرهەمێن وی ییچن شانۆ و شێوەكاری ل بەغدا دەنگ ڤەدەن و پشتی 31 سالان ئەم ل دهۆكا داسنیا یادا وان ل بیر دئینن، بۆ مە دیار دكەت كو ئەم نها پێدڤی ب ڤان جۆرە كەساتیایینە و ئەڤە ژی ب پارتی دهێتە كرن كو تاكە حزبە هەموو پارچێن جوگرافی لێك كۆم بكەت و سنووران بۆ باژێران نەهێلیت و هەموویان د ئێك تابلۆ دا كۆم بكەت، تەنیا پارتی دیموكراتی كوردستانە، چونكو هەموو پارتێن د د ئێك باژێ ردا كار دكەن، ب تنێ‌ پارتی نەبیت بۆ دۆزا مەزنا كوری كاردكەت و ئەم هەردەم شانازیێ‌ ب ڤێ‌ پارتێ‌ دكەین.