فراكسیۆنا پارتی دیموكراتی كوردستان ل جڤاتا نوونەرێن ئیراقێ بەیاننامەیەك بەلاڤكر و تێدا بەرسڤا ئەوا ب ناڤێ (كۆمكرنا ئیمزایێن پەرلەمانتارێن ناڤەڕاست و باشوورێ ئیراقێ) ل سەر مافێن گەلێ كوردستانێ دا، تێدا دیاركر، ئەوێن ئیمزا كۆمكرین، ب ئاشكرا هەرێما كوردستانێ دكەنە ئارمانج و مەبەستا وێ ژ وێ چەندێ ئەوە مووچە و قوتێ هەڤوەلاتیێن هەرێما كوردستانێ بهێتە بڕین، كو ئەڤە ژی ب تمامی بەرۆڤاژی وێ رەوشا خرابە كو پارێزگەهێن ناڤەڕاست و باشوورێ ئیراقێ تێدا دنالن.
فراكسیۆنا پارتی دیموكراتی كوردستان ل جڤاتا نوونەرێن ئیراقێ رۆهنكر ژی» رەوشا خراب یا پارێزگەهێن ناڤەڕاست و باشوورێ ئیراقێ ب تمامی بەرۆژاڤی وێ بزاڤێیە كو هەرێما كوردستانێ دكەتە ئارمانج، د وی دەمێ هەڤوەلاتیێن پارێزگەهێن ناڤەڕاست و باشوورێ ئیراقێ ژ سادەترین و ژ سەرەتاییترین بنەما و پێكهاتەیێن ژیانەكا رێزلێگرتی و خزمەتگوزاریێن گشتی وەكو رێك و پر و نەخوەشخانە و ئەوێن دی د بێبەهرن. د دەمەكیدا تنێ رێژەیا نێزیكی 6،5% بۆدجا گشتییا فیدرالی بۆ هەرێما كوردستانێ دهێتە هنارتن و رێژەیا 93،5% ژ وێ بۆدجێ بۆ پارێزگەهێن ناڤەڕاست و باشوورێ ئیراقێ دهێتە مەزاختن، د جهێ خوەدایە پرسیار بهێتە كرن، ئەو بۆدجە د چ دا دهێتە بكارئینان و مەزاختن؟».
فراكسیۆنا پارتی ل جڤاتا نوونەرێن ئیراقێ دیاركر ژی، واقعێ پارێزگەهێن ناڤەڕاست و باشوورێ ئیراقێ و ئەو بۆدجا بۆ وان پارێزگەهان دچیت، ب خوە بەلگەیێن وی گرۆپی رەت دكەت و ژناڤ دەبت، كو ب ناڤێ هەڤوەلاتیێن وان دەڤەرا بانگەشەیێ بۆ دكەن، د دەمەكیدا ل دوماهی هەلبژارتنێن جڤاتێن پارێزگەهان دیاربوو كو تنێ رێژەیا 20% ژ هەڤوەلاتیێن وان دەڤەران پشكداری د وێ پڕۆسەیێدا كر و ڤێ گرۆپێ تنێ رێژەیا 4% ژ دەنگان بدەستڤەئینان.
فراكسیۆنا پارتی د بەیاننامەیا خوە داگۆت ژی» هوون هەرێما كوردستانێ ب پشكەكێ ژ ئیراقێ نزانن، لێ دەستا ژێ بەرنادەن، بەلێ دڤێت بزانن چو جاران ناگەهنە ئاستێ پێشكەفتن و گەشەكرنا هەرێما كوردستانێ».
د بەیاننامەیا فراكسیۆنا پارتی دا هاتیە ژی»هەرێما كوردستانێ ب گۆڕەی دستووری، هەرێمەكا فیدرالییە و هەوە مافێ وێ چەندێ نینە دەستێوەردانێ د كاروبارێن وێ دا بكەن و رێكێ ژی نادەینە هەوە وی كاری بكەن، چونكە هوون سەر ب جڤاكەكێ كەرب د دلی دا و شۆڤینینە و هەوە مافێ نوونەرایەتیكرنا گەلێ ئیراقێ نینە. هەكە ب راستی هوون د خەما كوردستانێ دانە بۆچی هوون دژی قەرەبووكرنا قوربانیێن ئەنفالێ نە؟ ئەو ب مەژیێ هەڤشێوەیێ هەوە، شەهید بوون».

رۆژنامەیا (العرب) یا لەندەنی راپۆرتەكا شرۆڤەكاری ل دۆر سەرەدانێن دیپلۆماسی یێن ڤێ دوماهیێ یێن مەسرور بارزانی، سەرۆكێ حوكمەتا هەرێما كوردستانێ بۆ توركیا، ئیمارات و ئوردن و پشكداری د كۆڕبەندێ ئابووریێ جیهانی ل داڤۆس ل سویسرا، بەلاڤكر و سەرنج بۆ وێ چەندێ راكێشا، ئەڤ لڤینێن مەسرور بارزانی، رەنگڤەدانا بەرفرەهییا تۆرێن پەیوەندیێن هەرێما كوردستانێیە ل گەل دەڤەرێ و جیهانێ ب گشتی و سەلمێنەرا زیندییا دیپلۆماسی و شیانێن سەركردایەتیكرنێ یێن سەرۆكێ حوكمەتا هەرێمێ دیاردكەت بۆ گەهاندنا دەنگێ هەرێما كوردستانێ بۆ دەرڤە و بەرگریكرنێ بەرژەوەندیێن وێ و بەرچاڤكرنا پرسێن هەرێما كوردستانێ ل گەل كاراكتەرێن هەرێمایەتی و نێڤدەولەتی بۆ دەربازكرنا فشارێن سەپاندیێن دەولەتا ئیراقا فیدرال ل سەر هەرێما كوردستانێ.
رۆژنامەیا (العرب) بەلاڤكر كو پشكدارییا مەسرور بارزانی، سەرۆكێ حوكمەتا هەرێمێ ل كۆڕبەندێ ئابووریێ جیهانی ل داڤۆس، دەلیڤەیا وێ چەندێ پێ دا بۆچوونا سەركردایەتییا هەرێما كوردستانێ و ب شێوەیەكێ بەرفرهە ل گەل بەرپرسێن بلند یێن وەلاتێن هەرێمایەتی و نێڤدەلوەتی بەرچاڤ بكەت، ب ڤێ چەندێ ژی پێگەهێ هەرێما كوردستانێ وەكو هەڤپشكەكا سەرەكییا وەلاتان و پشكداربوویێن كۆڕبەندی سەلماند.
وێ رۆژنامەیێ بەلاڤكر ژی، پشكدارییا سەرۆكێ حوكمەتا هەرێما كوردستانێ ل كۆڕبەندێ داڤۆسدا، درێژییا لڤینێن بەرفرهەیێن وی بوو كو ل ئەنقەرە دەستپێكرو كۆمبوون ل گەل سەرۆكێ توركیا رەجەب تەیب ئەردۆگان و پاشی سەرەدانا ئیماراتێ كر و ل گەل محەمەد بن زاید ئال نهیان، سەرۆكێ دەولەتا ئیماراێ كۆمبوو و چەند پرس و بابەتێن گرنگ و هەڤپشك د گەلدا گەنگەشەكرن. ویستگەها سیێ ژی یا لڤین و سەرەدانێن مەسرور بارزانی بۆ وەلاتێن هەرێمایەتی وەلاتێ ئوردنێ بوو كو ل گەل شاه عەبدوللایێ دویێ چەندین پرسێن دو قۆلی و پەیوەندیدار گەنگەشەكرن.
رۆژنامەیا (العرب) ئاماژە ب دوماهی پۆستێ سەرۆكێ حوكمەتا هەرێمێ د تۆرا جڤاكییا (ئێكس) دا كرپشتی پشكداریێ د چالاكیێن كۆڕبەندێ ئابووریێ جیهانی ل داڤۆسێ كو تێدا ل گەل سكرتێرێ گشتی نەتەوەیێن ئێكگرتی و سەرۆك و سەرۆك وەزیرو وەزیرێن دەرڤە و بەرپرسێن هەژمارەكا وەلاتێن جیهانێ كۆمبووی.
وێ رۆژنامەیێ دیاركر، چالاكیێن بەرفرهە یێن سەرۆكێ حوكمەتا هەرێمێ ل داڤۆسێ گرنگییەكا تایبەت و جودا هەبوو ب تایبەتی كو هەرێما كوردستانێ د ڤێ قۆناغێدا ب رەوشەكێ دەرباز دبیت كو هێزێن بالادەستێن ئیراقێ یێن حوكمڕانیێ ل وی وەلاتی دكەن، فشارێن توند كرینە سەر و دخوازن ب رێكا وان فشارێن ئابووری و دارایی یێن دروستكرین، ململانێ ل گەل سەركردایەتییا هەرێما كوردستانێ ئێكلا بكەن، بۆ ڤێ مەبەستێ ژی كێشەیێن تایبەت ب پشكا هەرێما كوردستانێ ژ بۆدجا گشتییا فیدرالی و مووچەیێ فەرمانبەرێن هەرێما كوردستانێ د ئازرینن.
رۆژنامەیا (العرب) بەلاڤكر ژی، هەژمارەك ژ هێز و گرۆپێن شیعی كو دەستهەلات ل ئیراقێ د دەستێ واندایە، هەلوەستەكێ نەرینی بەرانبەر هەرێما كوردستانێ یێ هەی، ب تایبەت كو ب دیتنا وان هەرێما كوردستانێ ب پلە ئێك ژ ئالیێ پارتی دیموكراتی كوردستان دهێتە سەركردایەتیكرن،ژ دەرڤەی بەرەیێ ئیرانێیە، كو هەڤدەم ئەو هێز و گرۆپە سەر ب ئیرانێ ڤەنە و وەكو بالێ دەرڤەیێ ئیرانێ كاری بۆ بجهئینانا ئەجیندا و سیاسەتێن ئیرانێ د ناڤ ئیراقێدا دكەن.
هەرێما كوردستانێ وەكو وێ رۆژنامێ ئاماژە بۆ كری، ب رەوش و قۆناغەكا هەستیاردا دەرباز دبیت ب تایبەتی پشتی هەلبژارتنێن جڤاتا نوونەرێن كوردستانێ ل ئۆكتۆبەرا 2024 و نوكە د پڕۆسەیەكێدا بزاڤێن پێكئینانا كابینەیا نوو یا حوكمەتێ دهێنە كرن. رۆژنامەیا ناڤبری رۆهنكر ژی، رووخسارەكێ ڤێ رەوشا هەستیار، گرانییا بارێ دارایی و ئابووری و ئاستەنگێن وێ چەندێ نە كو دەرئەنجامێن جڤاكێ ژێ پەیدابووینە، و ئەگەری ژی ئالۆزییا پرسا بۆدجا گشتییا فیدرال و مۆچەیێ مووچەخۆرێن هەرێما كوردستانێیە، نەخاسمە پشتی نێزیكی دەمێ دو سالایە هنارتنا پەترۆلا هەرێما كوردستانێ بۆ دەرڤە ب رێكا بەندەرێ جەیهان یێ توركی راوەستیای و هنارتنا وێ ژی ئاستەنگ بۆ دروست دبن ژ ئەگەرێ وێ چەندێ هێزێن كاریگەری ل سەر حوكمەتا ئیراقێ هەی فشاران دكەن و ئاستەنگان ل پێشبەری راستڤەكرنا قانوونا بۆدجا فیدرالی د دانن كو دبیتە ئەگەرێ دوبارە هنارتنا پەترۆلا هەرێما كوردستانێ ب رێكا بەندەرێ جەیهان یێ توركی.
هەروەسا ئەوژی بەرچاڤكر، مەسرور بارزانی د چارچۆڤەیێ دیدارێن و كۆمبوونێن خوەدا ل داڤۆسێ ل گەل بەرپرسێن بلند یێن وەلاتان و هەڤدەم د چارچۆڤەیێ داخۆیانیێن خوە دا د پەراوێزا پشكداریێ د كۆڕبەندیدا، ب هووری رۆناهی ئێخستە سەر وان پرسان و بەرگری ژ هەلوەستێ هەرێما كوردستانێ كر. د ڤی چارچۆڤەیدا ئەڤ پرسە ب هووری بۆ ئەنتۆنیۆ گۆتێرێز، سكرتێرێ گشتی نەتەوەیێن ئێكگرتی باسكر، و هەردو ئالییان دوپاتی ل چارەسەركرنا پرسا شایستەیێن دارایی یێن هەرێما كوردستانێ و رێزگرتن ل مافێن وێیێن دستووری كر.

دوهی ئێكشەمبی 26/1/2025، ب بەرهەڤبوونا د. سالار عوسمان، ئەندامێ كۆمیتەیا ناڤین و بەرپرسێ پشكا رەوشەنبیری و راگەهاندنا پارتی ( دیدارا كاریگەرییا ئەدەبێ زارەكی، ئەدەب وهونەر، چرایێن رێكا ژیانێ یە) ل سەر مۆزیكا كوردی ژ ئالیێ پشكا رەوشەنبیری و راگەهاندنا پارتی ڤە هاتە سازكرن.
د رێوڕەسمێ دیدارێدا، د. سالار عوسمان بەرچاڤكر مللەتێ كورد هەم د وارێ ئەدەبێ زارەكی كو بناغێ ئەدەبێ نڤیسكییە، هەم د وارێ مۆزیكێ گەلەك یێ زەنگینە و خودان گەنجینەیەكا گشتگیرە و پشكا رەوشەنبیری و راگەهاندنا پارتی هەردەم چالاكیێن خوە ب شێوەیەكێ فرەڕەهندی و كۆمڤەكەر رێكخستینە بۆ وێ چەندێ ئاگەهـ ژ هەموو گۆشەیێن جودا یێن ژیانێ بیت، هەر ژ سیاسەتێ و هزرێ، هەتا دگەهیتە هونەری و لڤینێن هونەری و ئەدەب و ژانرێن ئەدەبی، میدیا و هەتا دگەهیتە ژیان و ژیار و هەموو وان وارێن كو جڤاكێ كوردەواری و جیهان پێڤە د مژوولن، ئانكو دیتنا پارتی دیموكراتی كوردستان بۆ ژیانێ دیتنەكا گشتگیر و كۆمڤەكەرە.
د پشكەكا دی یا رێوڕەسمێدا فیچەرەك هاتە پێشكێشكرن و تێدا هەژمارەكا ئەدیب و رەوشەنبیرێن دیار یێن كوردستانێ، بۆچوونێن خوە ل دۆر ڤێ پرسێ بەرچاڤكرن.
پاشی پانێلەك ل دۆر دیدارا كاریگەرییا ئەدەبێ زارەكی ل سەر میوزیكا كوردی ب رێڤەچوو، تێدا ب هووری شرۆڤەكرن بۆ كاریگەریێن ئەدەبێ زارەكی ل سەر مۆزیكا كوردی هاتە كرن ب پشكدارییا هەر ئێك ژ د. عەبدولخالق یەعقوبی و د. ئامانج غازی و د. هەنگاو ئەنوەر شێخانی. سەرەرای پێشكێشكرنا پەیڤەكێ ژ ئالیێ نڤیسەر رابەر كوردستانی و رێزلێنانا پشكا رەوشەبنیری و راگەهاندنا پارتی ب وی نڤیسەری هاتە بەخشین.
دوماهی بڕگەیا رێوڕەسمێ بەلاڤكرنا ئێكەمێن بەرهەمێ ئۆركێسترا بوو بۆ فۆرمێن ئەدەبێ زارەكی د ناڤ ئەلبووما (خاكڤین)ی دا و پێشكێشكرنا چەند تراكەكان ژ بەرهەمی.

لەزگین جوقی:

خەلكێ شنگالێ ژ قانوونا لێبۆرینا گشتی ئەوا بەری چەند رۆژان جڤاتا نوونەرێن ئیراقێ دەنگ ل سەردای، د رازی نینن و خرڤەبوونەك ئەنجامدا وداخواز دكەن تێرۆرستێن داعشێ نەهێنە ئازادكرن.
ملوكە خدر، ئێكە ژ كچێن ئێزدی ل سالا 2014ێ بوویە قوربانییا دەستێن تێرۆرستێن داعشێ ل شنگالێ گۆت»ب چ شێوەیەكێ بیت ئەم رازی نابین تێرۆرستێن داعشێ بهێنە ئازادكرن، ل شوونا حوكمەت وجڤاتا نوونەرێن ئیراقێ تێرۆرستێن داعشێ سزا بدەن نوكە كار دكەن بۆ ئازادكرنا وان كو تێرۆرستێن داعشێ هەموو كارێن خراب ب سەرێ كچ وژن وزارۆكێن ئێزدیان ئیناینە دێ چەوا هێنە ئازادكرن؟! ئەم داخوازێ ژ حوكمەت وجڤاتا نوونەرێن ئیراقێ دكەین پێداچوونێ د قانوونا لێبۆرینا گشتی دا بكەن و ب چ شێوەیەكێ دڤێت تێرورست نەهێنە ئازادكرن».
ژ ئالیێ خوەڤە، ڤیان دەخیل، ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستانێ دیاركر» قانوونا لێبۆرینا گشتی، وان داعشان ڤەدگریت یێن خەلك رەڤاندین و نەكوشتین، ب تایبەت ژی ئەو داعشێن گەلەك ژنێن ئێزدی رەڤاندین و ل بازاڕان فرۆتین، قانوونا لێبۆرینا گشتی وان د بۆریت ژبەركو ژن نەكوشتینە».
محەمەد عەنوز، ئەندامێ لژنا قانوونی ل جڤاتا نوونەرێن ئیراقێ ڕاگەهاند» قانوونا لێبۆرینا گشتی ژ هەموو تاوانباران ناگریت و هەر كەسەك ب تاوانا گەندەلیێ هاتبیتە زیندانكرن یان پارێ گشتی ب هەدەر دابیت، پشتی زیندانكرنێ و ڤەگەراندنا پارەی دێ هێتە ئازادكرن وئەو كەسێن ب تاوانا تۆشبوونێ ب مادەیێن هۆشبەر هاتبنە زیندانكرن، ئێكسەر ناهێنە ئازادكرن، بەلكو پشتی ل ناڤەندێن تایبەت دهێنە چارەسەركرن دێ هێنە ئازادكرن».
خۆیاكر ژی» ئەو كەسێن ب تاوانا تیرۆرێ هاتبنە زیندانكرن، ب هیچ شێوەیەكی ئێكسەر ناهێنە ئازادكرن، بەلكو لژنەیەكا دادوەرییا تایبەت بۆ دووڤچوونا دوسییێن وان دێ هێتە پێكئینان».
گۆت ژی» جارەكا دی دێ ڤەكۆلین ل گەل وان هێتەكرن و دێ بڕیارا ئازادكرنێ یان ئازادنەكرنێ كو ب تنێ د دەستهەلاتا وێ لژنێ دایە، هێتە دان».