رەمەزان زەكەریا
ل گوندێ دارەتوو خازر ل دەڤەرا كەلەكچی، پێنج برا بۆ ئێك ئارمانج كاردكەن دەمێ 12 سالانە كو ئاخا خۆ كریە جهێ كار و بەرهەمئێنانێ و ب رێیا خانیێن پلاستیكی شۆرشەكا بچووك د چاندنا كەسكاتیێ دا دەستپێكریە.
حەسەن جەلال، ئێك ژ برایێن خودان كار بۆ ئەڤرۆ گۆت: بەری ١٢ سالان مە ب تنێ د زەڤیێن ڤەكری دا كار دكر، مە وەكو تێست خانیەكێ پلاستیكی دانا دا بزانین كا دێ سەركەڤیت یان نە، سوپاس بوو خودێ ئەو خانی بوو كلیلا سەركەفتنا مە و ئەڤرۆ ئەم وەك ئێكەم كەس ل دەڤەرێ دهێینە ناسین كو ب ڤێ رێیێ كەسكاتیێ بچینین.
عیسا جەلال ئاماژێ ب وێ چەندێ دكەت، كاركرنا پێكڤەیی تامەكا دی یا هەی بۆ ئەڤرۆ گۆت: هەر برایەك ئەركێ وی یێ دیاركریە، هندەك دچنین هندەك كۆم دكەن و هندەك ژی ئامادە دكەن بۆ بازاركرنێ ئەڤ رێكوپێكییە وەكریە كو كارێ مە چ جاران رانەوەستیت و سال بۆ سالێ گەشە بكەت، بەرهەمێ مە برایان ب كوالێتی و پاقژیا خۆ ناڤدارە، ژبەركو ب ئاڤا پاقژ دهێتە ئاڤدان، ئەڤێ چەندێ وەكریە كو كڕیار ب باوەریەكا مەزن بەرەڤ مە بهێن كەسكاتیا مە نە تنێ ل بازاریێن ناڤخۆ دگەهیتە باژێرێن دهۆك، زاخۆ، ئامێدی، شێلادزێ، هەولێر، سلێمانی، باژێرێ وانێ ژی.
حسێن جەلال، كو رۆژانە سەرەدەریێ دگەل كڕیاران دكەت بۆ ئەڤرۆ گۆت: ئەو هەموو جۆرێن كەسكاتیێ وەك كەرەفس، رەشادۆك، تڤر، تولك، سپیناخ و قورات بەرهەم دئینن، بهایێن وان ژی د گونجای نە و د ناڤبەرا ٢٥٠ بۆ ٥٠٠ دیناران دانە ئەڤە ژی وەكریە كو ناڤ و دەنگێ كەسكاتیا برایان ل هەموو دەڤەرێ بەلاڤ ببیت.
نيشاندان