هەکە تو زارۆکێ ناڤین یێ خێزانا خۆ بی، ئەو ل دویڤ ڤەکۆلینەکا کەنەدی، ئەگەرەکێ مەزن هەیە تو کەسەکێ راستگۆتر و هاریکار تربی ژ خووشک و برایێن خۆ.
ڤەکۆلینەکا زانکۆیا برۆکی یا کەنەدی ل سەر زێدەتر ژ 700 هزار کەسان ئەنجامدایە و دەرکەفتیە، زارۆکێن ناڤین (ئەوێن خووشک یان برایەکێ مەزنتر و ئێکێ بچووکتر ژ خۆ هەی) خودانێن کەسایەتییەکا ئەرێنی، راستگۆ و خۆگونجێنترن، و کێمتر مەیلا وان بۆ حیلەکرنێ و بێزارکرنا کەسانێن دی هەیە و هەستا لێبوردەیێ و هاریکاریێ ل دەف وان گەلەکە.
چاڤەڕێ دهێتە كرن ئەڤرۆ دەست ب هەڤڕكیێن قۆناغا چارێك دووماهییا كۆپا ئیراقێ یا فوتبۆلێ ب ئەنجامدانا چار یارییان بهێنە كرن، هەردو یانەیێن دهۆك و زاخۆ چاڤ ل سەركەڤتنێ نە و دێ ل یاریگەهێن خوە د ناڤ جەماوەرێ خوە دا بزاڤێن دەربازبوونێ بۆ پێش دووماهیێ كەن.
دهۆكێ هیڤیێن مەزن هەنە
پشتی ب دووماه هاتنا خولا ستێرێن ئیراقێ و ب دەستڤەئینانا ڕێزا حەفتێ بڕیارە ئەڤرۆ ل دەمژمێر حەفتی مەغرەب تیما فوتبۆلا یانەیا دهۆك ل یاریگەها خوە مێڤاندارییا یانەیا مینا یا بەسرایی بكەت وئارمانج و هیڤیێن وێ قەرەبوویا خولا ستێرێن ئیراقێ بكەت و دەستكەڤتەكێ د كۆپایێ دا بینت، تیما دهۆكێ ئەوا د وەرزێ ئەڤ سالە دا شیایی دەستكەڤتێ كۆپا كەنداڤی بۆ جارا ئێكێ د دیرۆكا خوە و ئیراقێ دا ب دەستڤە بینیت گەشبینە دكۆپا ئیراقێ دا دوبارەبكەت و هیڤیێن مەزن هەنە دڤێ یاریێ دا ب سەركەڤیت.
ئەرێ سلێمان رەمەزان دێ شێت ڤێ یاریێ سەركەڤیت؟
پشتی دەست نیشانكرنا ڕاهێنەرێ خودان سەربۆری و كوڕێ باژێرێ دهۆكێ سلێمان رەمەزانی بۆ پۆستێ ڕاهێنەراتییا تیما دهۆكێ ل جهێ ئەمیر ئەزرەڤشانی بەری ب دووماهی هاتنا خولا ستێرێن ئیراقێ ب ئێك یاری، شیا د وێ یاریێ دا سەركەڤتنەكا مەزن ل سەر خودانێن ئەردی یانەیا كەرخ یا بەغدایی بینت ب4-2 و كاروانێ دهۆكێ ب سەركەڤتن ب دووماهی بینت پشتی نەهـ وەكهەڤی و خوسارەتییان، سلێمان ڕەمەزان ب هزر و تەكتیكێن خوە دێ بەرانبەر تاقیكرنەكا بهێز بیت د ئێكەم یارییا خوە ژ كۆپا ئیراقێ بیت، ئەرێ دێ شێت دیرۆكەكێ تۆماركەت؟ئەرێ دێ شێت سەركەڤتنەكا دیرۆكی ئینیت؟ بەرسڤ بلا بۆ یارییا ئەڤرۆ بیت.
دهۆك دێ پشت گەرمیێ ب گۆلكەرێن خوە كەت
هەرچەندە دخولا ستێرێن ئیراقێ دا تیما دهۆكێ ڕێزبەندیەكا نە چاڤەڕێ كری ب دەستڤەئینابوو، لێ جەماوەرێ دهۆكێ گەشبینە بۆ كۆپا بشێن دەستكەڤتەكێ بینن، تیما ئەلهۆیێن چیا خودانا كۆمەكا یاریزانێن باشن ئەوێن گۆل ئینایین و دێ پشت گەرمی ب وان هێتە كرن بۆ نموونە، پاشەنگ عەبدوللا خودانێ حەفت گۆلێن خولێ، كەریم دەرویش خودانێ شەش گۆلان و ئیبراهیم غازی، مارلۆن دۆ سانتۆس، یانیك زاكێری، لۆكاس هێنریك، سیابەند عەگید، بەیار ئەبۆ بەكر، كێلبرت كۆمسۆن، مۆسێس لۆكاس.
زاخۆ ب مۆرالەكا بلند گەشبینە دەرباز بیت
ژلایێ خوەڤە تیما یانەیا زاخۆ هەلگرا ڕێزبەندییا سێیێ یا خولا ستێرێن ئیراقێ گەشبینە ب سەرپەرشتییا ڕاهێنەرێ خوە عەبدولغەنی شەهد دناڤ ئەرد و جەماوەرێ خوە دا سەركەڤتنێ ل سەر یانەیا نەورۆز بینیت كو د بیتە ئێك ژ یاریێن كلاسیكۆییا كوردستانی ئەوا دێ ل یاریگەهیا زاخۆ ل دەمژمێر 10:30 شەڤ هێتە كرن، كوڕێن خابۆری ب مۆرالەكا بلند و پشتەڤانییا جەماوەرێ خوە یێ مەزن گەشبینن ل سەر كیستێ یانەیا باژێرێ سلێمانیێ بگەهنە قۆناغا پێش دووماهیێ سەرباری ئەركێ وان ب سانەهی نابیت.
پشت گەرمییا زاخۆییان دێ ب كیش یاریزانان بیت؟
تیما یانەیا زاخۆ خودانا كۆمەكا یاریزانێن باشن ب سەركێشییا ستێرێ هەلبژارتیێ ئیراقێ ئەمجەد عتوان، دێ ب شێوەیەكێ گشتی پشت گەرمی ب چەند یاریزانێن گۆلكەر و خودان شارەزاهی هەبن ژ وانان، پیشەكارێ خوە یێ بەرازیلی گۆستاڤۆ هێنریك ئەوێ 17 گۆل تۆماركرین، دیسان هەڤالێن وی ناسر ئەحمەد محەمەدو خودانێ نەهـ گۆلان و دیبیۆتی ئۆگۆنا، ئەحمەد یاسین، مەحمود فائیز ئەلئەسوەد، پاتریك مارسێلۆ، محەمەد عەلی عەبۆد، موسێس گۆلەك و یوسف رائید ئەلئالۆسی.
شرۆڤەكارەكێ وەرزشی بۆچوونا خوە هەبوو
لدۆر یاریێن هەردو یانەیێن پارێزگەهێ سلێمان كانیكی شرۆڤەكارێ وەرزشی ل پارێزگەها دهۆكێ بۆ رۆژنامەیا ئەڤرۆ گۆت: یاریێن هەردو یانەیێن دهۆك و زاخۆ بەرانبەر مینا و نەورۆز گەلەگ یا گرنگە و دیرۆكی یە، سەركەڤتنا وان دێ بیتە كلیلیكا یارییا دووماهیێ، ب دیتن دبیت یاریێن ڤێ قۆناغێ هند ب سانەهی نابیت بۆ دهۆك و زاخۆ لێ دڤێت هەردو یانە د هوشداری دابن و چو سۆپرایز نە هێنە پێش، هیچ هەلسەنگاندنێ ب یاریێن خولا ستێرێن ئیراقێ نەكەن، زاخۆ ل رێزا سێیێ هاتبوو و نەورۆز ڕێزا نەهێ و دهۆك ڕێزا حەفتێ و مینا ڕێزا 16ێ ڕامانا وێ نینە سەركەڤتن یا مسۆگەرە، هەموو یانە حەز دكەن دەربازبنە قۆناغا پێش دووماهیێ، لەوما ژی ئەوێ شەڕێ مەزن كەن بۆ سەركەڤتنی.
ژ یاریێن دی یێن كۆپایێ
هەر ژ یاریێن مایی د قۆناغا چارێك دووماهیێ دێ بڤی شێوەیی هێنە كرن، ئەڤرۆ ل دەمژمێر حەفتی مەغرەب، یانەیا جەوییە دێ ل یاریگەها شەعب ل پایتەختێ ئیراقێ بەغدا مێڤاندارییا یانەیا نەجەف كەت، ژ لایێ خوە ڤە یانەیا شورتە قارەمانا وەرزێ ئەڤ سالە یا خولا ستێرێن ئیراقێ دێ دەمژمێر 10:30 دێ مێڤاندارییا یانەیا تەلەبە ل یاریگەها شەعب ل بەغدا كەت.
عەلی حاجی:
بریارە ئەڤرۆ ل دانێ شەڤ تیما فوتبۆلا یانەیا زاخۆ مێهڤانداریا یانەیا نەورۆز بکەت ئەوا دێ ژ چارچووڤەیێ قوناغێ هەشتێ ژ کوپا ئیراقێ یا فوتبۆلێ هێتە کرن.
لدورڤێ یاریێ ساید سوەیدان هاریکارێ ڕاهێنەرێ تیما زاخۆ دیار کر پشتی ب دوماهی هاتنا خولا ستێرێن ئیراقێ هەر ئێکسەر وان دەست ب بەرهەڤیان کر بۆ دیدارا نەورۆز د کوپا ئیراقێ دا،د نوکە دا تیم ب هەمی ڕەنگان هاتیە بەرهەڤکرن و یاریێن کوپا ئیراقێ وەکی یاریێن خولێ نینن ژبەرکو نابیت چو دەلیڤەیان ژ دەست بدەیی ڕەنگە تیمەک بشێت مفایی ژ ئێک دەلیڤەیێ ببینیت و گولێ تومار بکەت و سەرکەڤتنێ ب دەستڤە بینیت ژبەر هندێ پێدڤیە ئەم ب هویری تەماشەی یاریێ بکەین و ڤێ دەلیڤەیا گرنگ ژ دەست نەدەین،تیما مە ئامادەیە و مە باوەری ب یاریزانان هەیە کو دێ شێن وان پلانان جێبەجێکەن و سەرکەڤتنێ توماربکەن و بگەهیننە قووناغا پێش دووماهیێ.
رەمەزان سەدیق ستێرێ تیما زاخۆ گۆت: دەلیڤەیەکا دیرۆکی ل بەر دەستێ مە دایە کو بشێن بۆ ئێکەم جار خوە بگەهیننە یارییا دووماهیێ، بێگومان یاری ب ساناهی نابیت بۆ هەردو تیما لێ دڤێت ب باشترین شێوە خوە ئامادە بکەین و پلانێن ڕاهێنەرێ خوە جێبەجێبکەین، ئەم هەموو د ئارامین و گڤاشتن ل سەر چو یاریزانان نینە و پشت ڕاستین دێ ئاستەکێ باش پێشکێشکەین، یا گرنگ بۆ مە سەرکەڤتنە، مە پێدڤیەکا مەزن ب جەماوەرێ خوە هەیە کو ب شێوەیەکێ وەرزشیانە پشتەڤانیێ ل تیما خوە بکەن.
شاهۆ فەرید:
یاریزانێ ڕەڤەندا كورد ل ئۆرۆپا و یانەیا دی گراڤشان یا هۆلەندی ب فەرمی گرێبەستا خوە دگەل یانەیا دهۆك یا وەرزشی ڕاگەهاند بۆ وەرزێ نوو 2025-2026ێ یێ خولا ستێرێن ئیراقێ یا فوتبۆلێ.
ل دووڤ ژێدەرێن رۆژنامەڤانی بلند حەسەن یاریزانێ هەلبژارتیێ ئۆلمپیێ ئیراقێ پشتی ب دووماهی هاتنا گرێبەستا وی دگەل یانەیا گراڤشان یا هۆلەندی یانەیا دهۆكێ پەیوەندی پێكرییە و ڕازیبوویە ل سەر گرێبەستا یانەیا دهۆكێ و دهێتە گۆتن ئەڤ گرێبەستە بۆ ماوەیێ دو وەرزان بهێتە ئیمزاكرن و بڕیارە د ماوەیەكێ نێزیك دا ب فەرمی بهێتە ڕاگەهاندن.
یاریزانێ ناڤهاتی یێ 21 سالی چەندین جاران بۆ ناڤ ڕێزێن هەلبژارتیێ ئیراقێ هاتییە داخوازكرن، ل سەر ئاستێ لاوان چار یاری كرینە و دو گۆل هەنە و ل سەر ئاستێ ئۆلمپی ژی 14 یاری ئەنجامداینە و پێنچ گۆل هەنە.
بۆ زانین بەری ماوەیەكی هاتبوو ڕاگەهاندن یاریزانێ ڕەڤەندا كورد و یانەیا رین یا فرەنسی ئەحمەد عەلی برایێ زانا عەلی یاریزانێ دهۆكێ گرێبەستا یانەیا دهۆكێ ئیمزاكربوو، لێ ب فەرمی هێشتا نە هاتییە ڕاگەهاندن.
قەیس وەیس:
ب شێوەیەكێ فەرمی هەردو باژێرێن دهۆك و هەولێر هاتنە ئێكلا كرن بۆ مێڤانداریكرنا قۆناغا سێیێ و چارێ یێن قارەمانییا كۆپا ئیراقێ یا یارییا پایسكلان ل سەر چار ئاستێن جودا، ئەوا بڕیارە هەڤڕكیێن وان ل دووماهییا ڤێ مەهێ و دەستپێكا تەباخا بهێت ل هەردو باژێران بهێنە كرن.
ل دور ڤێ یەكێ فوئاد حەمە سالح سكرتێرێ فدراسیۆنا یارییا پایسكلان ل ئیراقێ گۆت: پشتی چەندین كۆمبوون هاتینە كرن بڕیار هاتە دان هەردو قۆناغێن سێیێ و چارێ كو دبیتە یا دووماهیێ ل هەرێما كوردستانێ بهێنە كرن ئەوا دێ ل سەر ئاستێ یانەییان بۆ پێشكەڤتیان، لاوان، تازەپێگەهشتییان و پشكۆژان هێنە كر، بڕیار هاتە دان قۆناغا سێیێ ل باژێرێ هەولێرێ بهێتە كرن و ژڤانێ وێ دێ ل 31ێ ڤێ مەهێ هەتا دویێ مەها تەباخا بهێت بەردەوام بیت، بۆ قۆناغا چارێ و دووماهیێ دێ ئێكسەر ل باژێرێ دهۆكێ هێتە ئەنجامدان هەر ژ سێ هەتا شەشێ تەباخا بهێت بەردەوامبیت، ژڤانێن هەردو قۆناغێن سێیێ و چارێ لێكنێزك كرینە كو دبیتە جارا ئێكێ ییە بڤی شێوەیی ئەو ژی ژبەر بەرهەڤی بۆ قارەمانییا عەرەبی ئەوا دێ ل پارێزگەها هەلەبچەیا شەهید هێتە كرن.
ژلایێ خوەڤە تارق سەعید ڕاهێنەرێ تیما یانەیا دهۆكێ گۆت: زوور پێخوەش بووین كو قۆناغا چارێ هاتییە پارێزگەها دهۆكێ و ئەڤە ژی باشترین دەلیڤەیە كو ئەڤ قارەمانییە ژ دەستێ مە نە دەرگەڤیت و تیما مە یا لاوان ناسناڤی ببەن سەرباری ئەركێ مە ب سانەهی نابیت، د قۆناغا ئێكێ دا رێزا دویێ هاتبووین، قۆناغا دویێ بووینە قارەمان، دێ هەموو بزاڤان كەین ل قۆناغا سێیێ ناسناڤی پارێزین پێخەمەت قۆناغا چارێ كۆپایا ئیراقێ بلند بكەین.
رۆژنامەیا مۆندۆ دیپۆرتیڤۆ یا ئسپانی دیار كر یانەیا بەرشەلۆنا پێنگاڤێن باش هاڤێتینە ژبۆ دەستڤە ئینانا ستێرێ یانەیا لیڤەرپۆلی یێ كۆلۆمپی لویس دیاز پشتی دەستدانا نیكۆ وێلیامزی یاریزانێ ئەتلەتیكۆ بلباۆ.
هەروەسان دیار كر دبیت گرێبەست بهێتە ئێمزكرن و ئێك ژ ئەگەرێن سەرەكی ئەوە بەرئەلۆنا مفایی ژ توورەبوونا یانە و پشتەڤانێن یانەیا لیڤەرپۆل وەربگریت كو ددەمەكی دا ڕێورەسمێن ڤەشارتنا جەنازێ یاریزانَێ وان یێ پۆرتۆگالی دیێگۆ گۆتا ئەوێ تووشی روودانەكێ بووی و لویس دیاز ئاهنگ ل كۆلۆمپیا د گێڕا، ئەڤچەندە بوویە جهێ نەڕازیبوونێ.
ژلایەكێ دووڤە دەنگۆباسێن رۆژنامەڤانی ئەوچەندە ژی خۆیاكرییە دبیت د ڤێ حەفتیێ دا بفەرمی گرێبەست بهێتە ئیمزاكرن و لیڤەرپۆل یا ڕازییە ب هەر شێوەیەكی دەستان ژێ بەردەت و دیاركر ژبەركو وەفادار نەبوویە بۆ هەڤالێ خوە د تیمێ دا.
پشتی بۆ ماوەیێ دو سالان ل سەر بزاڤێن بەردەوام ل دووماهیێ یانەیا ئارسنال یا ئنگلتەرایێ شیا نێچیرا خوە ل مارتن زۆبیمێندی ستیرێ یانەیا ریال سوسیداد یا ئسپانی بگریت و ڤەگۆهێزیتە دناڤ ڕێزێن تیما خوە یا فوتبۆلێ دا.
رۆژنامەیا زە سەن یا بریتانی دیار كر بۆ ماوەیێ دو وەرز بوو یانەیا ئارسنال بزاڤ دكرن یاریزانێ هێلا ناڤین یێ یانەیا ریال سوسیداد مارتن زۆبیمێندی ببەتە دناڤ ڕێزێن تیما خوە دا لێ یانەیا وی ڕێك نە دا، هەرچەندە گرێبەستا وی هێشتا مابوو، لێ یانەیا ئنگلتەرایێ نەچاربوو كۆژمەیەكێ مەزن بەرهەڤبكەت كو گەهشتییە 65 ملیۆن یۆرۆیان تا یانەیا وی ڕازیبكەن و شیان ل دووماهیێ نێچیرا خوە و پشتی چاڤەڕێ بوونا دو سالان ڤەگۆهێزنە دناڤ تیما خوە دا، ئەڤچەندە هات ل سەر ڕژدییا ڕاهێنەرێ تیمێ یێ ئسپانی میشێل ئارتینا بۆ دەستڤەئینانا وی ژبەركو شیانێن باش هەنە ل دووڤ پلانێن وی نە.
سالار محەمەد دۆسكی:
2 – 2
بەلێ دەمێ ناڤێ من خاندی گەلەك قوتام و من پرسیاركر بۆچی قوتام گۆتن چونكو تو كوردی و من گۆتێ ما چەوا زانی كوردم؟ گۆتن سەروچاڤ و دێمێ تە یێ دیارە، هەتا 11/12/1983 مایم و رۆژا دادگەها من هاتیە دیاركرن و (عەواد بەندەر) سەرۆكێ دادگەهێ بوو و مەحكەما سەوەر و گۆتە من تو كورێ من تو موتەهمی یا بەریی و گۆت بەرائەتا خوە دیاربكە كو تە چنە كریە و من ژی ل دوڤ عەرەبیا خوە بەرەڤانی ژ خوە كر، و دیسا ئەوان ژی پارێزەرەك ئینا بوو و ئەو ژی هندەك جاران داخازا سزایێ لێبورینێ بوومن دكر، و ل دووماهیێ دادگەهێ بریار دا كو هەتا هەتایێ بهێمە زیندانكرن و بۆ ئێڤار ناڤێن گەلەكا خواند بۆ سێدارەدانێ، و دوڤدا هاتمە زیندانا ئەبو غورێب
هێشتا گۆت: ل زیندانێ داخواز ژ من هاتەكرن كو سەر ب چ لایەنێ سیاسی ؟؟ من گۆتێ( مەسعود بارزانی) گۆت تە بەینە گەل هندەكا سەر ب (جلال تەلەبانی) نە من گۆتێ نورمالە و ئەم هەمی كوردین و برمە زیندانەكێ دا دبێژنێ (محجر) ئانكو زیندانا د زیندانێ دا و رۆژەكێ ئەفسەرەك هات یێ كورد بوو و گازیكر و گۆت دێ تە بەم دەف هندەك مرۆڤێن تە و برمە دەف هندەكێن دەڤەرا مە وەكی كاك (ئازاد بوتی و سەباح گەرماڤی) گەلەك هەڤالێن دی رەنگە ناڤێن وا نەهێنە بیرا من لێبورینێ ژێ دخوازم و پشتی گەهشتیمە دەف ئەڤان مرۆڤێن خوە ئێدی من نامەك بۆ خێزانا خوە نڤێسی و ئێدی مرۆڤێن من هاتن سەرا من بدەن و هەتا لێبورینا تایبەت و ئەوێ لێبورینێ ژ هەمیان نەدگرت و ئەڤ لێوبرینە بەری هەوا ئەنفالان هات و ئێك ژ خالێن وێ لێبورینێ دڤێت تە پەیوەندی ل گەل موخەربا ئانكو هێزێن پێشمەرگەی نەكربیت و ئەز پێشتر كەسەكێ رێكخستی بووم دناڤ رێزێن پارتی دا بەلێ گەلەك گڤاشتن من نەهاتنەكرن خوە ئاشكرا بكەم و ئەگەر دا سزایێ من گەلەك مەزنتر بیت و ئەو لێبورین ژی شمن نەگرت و رەنگە ببامە ئەگەر گەلەك هەڤالێن خوە ئاشكرا بكەم و رەنگە هەتابامە سێدارەدان چونكە تو كارێ رێكخستنێ بكەی و دناڤ لەشكرێ ئیراقێ دا ئەڤە جەریمە بوو و هەتا سالا 1986 ئانكو سێ سالان مامە ل زیندانێ ڤە.
هەمان زیندانیێ سیاسی بەحسێ چەند رۆژێن خوەیێن نەخوشكر و گۆت: ( شوعبا خامیسە) گەلەك یا نەخوش بوو و ئەو نەخوشترین رۆژێن ژیانا من یا زیندانێ بووینە و 11 رۆژا نە چوومە دەست ئاڤێ و ئەز قەفز بووم.
هەمان زیندانیێ سیاسی ئەو ژی گۆت: ل دەمێ ئەم هاتینە رێكخستن دناڤ رێزێن پارتی دیموكراتی كوردستان دا ئەم وی دەمی گەنج بووین و خوین گەرم بووین وی دەمی رێژێما بەعس وەكی ئاگری بوو و ئاسن ب ساری چەماند و رەنگە ئەو ئاقلێ نوكە من هەبا وی دەمی ئەز نەشیابام بهێمە دناڤ رێكخستنێ دا و راستی ل گەنجاتیێ مرۆڤی جسارەتەكا زێدە زێدە هەیە و هەر نا ترسیت.
هەمان زیندانی ئەو ژی گۆت: ل رێكەفتی 18/5/1986 پشتی هاتینە ئازادكرن، ژ زیندانێ وەك پێشتر مە ئاماژە پێكری ئینامە ئینامە فەیدیێ وی دەمی هەڤالێن منیچن لەشكریێ بارەگایێ وان ل فەیدیێ بوو و پشتی چوویمە ژوورا پێنوسی و من دەست بكاربوونا خوە كر، حەفتیەكێ دەستیردان دا من و زڤریمە مال و دەمێ من دەستیردان وەرگرتی من مامۆستایەكێ مەیێ ڕاهێنان ل بازاری دیت، و گۆت دێ هوون هێنە ڤەگوهاستن بۆ (حەبانیێ) پشتی ڤەگەریامە لەشكریێ ڤە رۆژێن پێنچشەمبی و ئەینی بێ دەستیردان لەشكر دهاتنە دەستیردانێ و دەمێ ڤەگەریایمە دەستیردانێ چوومە لژنا دهۆك و من پەیوەندی ب (فەتح گولی) كر، و گۆت تە كیرێ دڤێت تە دانینێ و من خواست بچمە لقێ ئێك و من گۆتێ زێدەتر مرۆڤێن من وێرێ نە ل گەلیێ زێوە، و پشتی چوویمە لقێ ئێك ل سەر رویباری (محو گەودا) وێرێ بوو من خواست بچمە دەف و بینم و چووم من سلاڤكرێ، و من خو پێدا نیاسین و چیرۆكا خوە یا گرتنێ من بۆ ڤەگێرا و (محو گەودا) گۆت ئەو كاغەزا گەهشتیە من یا ڤەكەری بوو و فلان كەسی دایە دەستێ من و هاتمە رەبیێ من تو ل وێرێ نەدیتی، ئەوێ من كاغەز دایێ بۆ پێشمەرگەی و دەمێ زیندانێ هاتە دەف من ل ئەبو غورێب و هەتا نوكە ئەو مرۆڤێ دژیت ل باژێرێ دهۆكێ، و گۆت من نەگۆتیە لەشكرێ ئیراقێ و من تو ئاشكرا نەكری و هەتا نوكە نوزانم چەوا هاتیمە ئاشكراكرن، پشتی چەند سالەكا مام ل وێرێ، و دوڤدا زڤریمە لژنا دهۆك و (محەمەد حەمدی) بەرپرسێ رێكخراوێ بوو و (قادر قاچاخ) بۆ بەرپرسێ لژنا دهۆك، و پشتی بوویە بەرپرسێ لژنا دهۆك(قاچاخ) من نامەك نڤێسی و پشتی پیرۆزباهیكرنێ من خواست دئەركێ خوەیێ نوو دا دادپەروەریێ بكاربینت و (قاچاخ) داخوازا دیتنا من كر، و ماوەكی مام ل وێرێ هەتا (قاچاخ) چوویە ئیرانێ و ئەز هاتمە دەستیردانێ و ئەز گەهشتمە سالا 1988ێ، و سوپاس بۆ خودێ هەتا ڤێرە حوكمەتا بەعس یزعاجا مالا مە نەكریە، د هەمان سال دا هەوا ئەنفالێن رەش دەست پێكر وی دەمی ئەز زگورد بووم ل گەل پێشمەرگەی و مرۆڤپێن خوە من قەستا وەلاتێ توركیا كر، و ل كەمپا (مێردینێ) ئاكنجی بووم و تشتێ باش یێ بێ ژن بووم و مام هەتا 1991 زڤرینە كورستانا ئازاد و پشتی دامەزرانندنا حوكمەت و پەرلەمانێ كوردستانێ هاتمە وەرگرتن، ل دەزگەهێ ئاسایشێ و من ژی هزر نەكر كا پلا من چیە ل ئاسایشێ و پشتی چەند سالان من شنی زانی مرۆڤەكێ گەلەك نورمالم ل ئاسایشێ و مووچێ من 300 دینار بوون، و چوومە دەف (قاچاخ) من گۆتێ من بكە ئەفسەر و گۆت نە كەم (مفوز) و من گۆتێ یان (مولازم) یا مو لازم، و دوڤدا نڤیسارێن من هاتینە بلندكرن پشتی چەندین نڤیسارا بۆ وەزارەتێ پلا من هاتە گوهورین بۆ (ئەفسەریێ) ل پلا (عەقید) هاتمە خانەنشینكرن.
ل دووماهیێ زیندانیێ سیاسی و پێشمەرگێ گولانێ گۆت: هیڤی دكەم خزمەتا من یا ل رێكخستنێن نهێنی و پێشمەرگاتیا شۆڕەشا ئیلۆنێ زیندانیدانێن رژێما بەعس ب هەر وە نەچیت و پێشمەرگێ گولانێ و ئاوارەیێ و چاڤدانەك ل زیندانیێن ئەبو غورێب بهێتەكرن، و پرسیار دكەم ما نە ژ هەژی مە مەدالیا بارزانی وەربگرم؟ .
سالح حەکیم
هەمی ڕەنگێن گولان
ب گڕنژینا ڕووکێن
تە ئافرینە
ئاوریێن تە
بوونە پەیام و نامە
دگەل بەلاتینکا پڕ ڕەنگین
بەرەف جانێ من دهات
نەکو بچی وەغەرێ
هێش تێر نەبوومە
ژ ماچیکرنا
ئەسمانێ چاڤێن تە
تە گۆت
چارەنڤێسێ مە
هەر چوونە
چەند دەردێن
من ب مانا
تە دەرمانبووینە
ناخ و گیانێ من
خۆدیکا کەڤالێن پەیڤا
ژ تە نەخشاندن
هەر ژ وێ وەفایێ
بوومە خوازیارێ ئەڤینا تە.
ئەلند مزووری
دهۆکامن عەشقا دلا
دێ گەش مینی وەک سۆرگولا
دناڤ جان و دلێ مە دایی
چ ژمە بخوازی، بێژین بلا
دهۆک هەردەم تو ئێکەمی
بۆ گەشتامە هەر توی گەمی
دێ ناڤێ تە بلند راکەین
تو هیڤی خۆزییا هەر دەمی
دهۆکا من شرین شارە
ب دیرۆکا خۆ کەڤنە وارە
ب شکەفتا هەلامەتا و چارستین
ب شەدا و فریعینی ناڤدارە
باژارەک فرە ئایینە
ب نەتەوێن خۆڤە ڕەنگینە
پێکڤە ژیان تە ئاڤاکر
پاشەرۆژا تە گەشبینە
دهۆکا مە باب و دایە
دۆرماندۆری تە چیایە
خەملاتە تەڤ باخ و ڕەزن
بەر دلێ مە پڕ هێژایە
نيشاندان