نێچیرڤان بارزانی، سەرۆكێ هەرێما كوردستانێ راگەهاند: ئەو رێزلێنانا ڤاتیكانێ ل سەرۆك بارزانی جهێ شانازییا هەرێما كوردستانێ یە و پێزانینە بۆ كەلتوورێ پێكڤەژیانێ، هەڤدوو قەبوولكرنێ و لێبۆرینێ كو وەك تایبەتمەندیێن جڤاكێ كوردستانێ نە، هەروەسا بۆ وان بهایێن مرۆڤایەتی یێن گەلێ مە كو بەردەوام پێگیرن پێ و د پەرۆشن بۆ پاراستنا وان.
نێچیرڤان بارزانی دوپات كر كو هەرێما كوردستانێ دێ هەردەم وەك نیشتمانەكێ ئارام بۆ هەموو پێكهاتەیان مینیت.
سەرۆكێ هەرێما كوردستانێ دوپاتی ژی ل سەر وێ چەندێ كر و گۆت»هەرێما كوردستانێ یا پەرۆشە بۆ پاراستنا فرەهیێ و ماف و ئازادییێن هەموویان و بۆ چەسپاندنا بهایێن ئاشتیێ، پێكڤەژیانێ و رێزگرتنا ل هەڤدووو».

مەسرور بارزانی، سەرۆكێ حوكمەتا هەرێما كوردستانێ، پەیامەكا پیرۆزباهیێ ئاراستەی سەرۆك مەسعود بارزانی كر، ب هەلكەفتا وەرگرتنا نیشانا ئاستبلندا رێزلێنانێ یا قەداسەتا پاپایێ ڤاتیكانێ.
مەسرور بارزانی، د پەیاما خوە دا گۆت «سەرۆك بارزانی وەك سیمبۆلێ ئاشتیێ، پێكڤەژیانێ و پارێزەرێ مافێن ئایینی و نەتەوەیی یێن هەموو پێكهاتەیێن جودایێن كوردستان و ئیراقێ یە».
دیاركر ژی» سەرۆك بارزانی، بەردەوامیدەرێ ڕێبازا پیرۆزا بارزان و باوەرییا ڕاستەقینەیا پاقژی و مرۆڤدۆستیێ یە و هەژی هەموو خەلات و پێزانینانە.
ل دووماهیێ گۆت «هەرێما كوردستانێ د بن سیبەرا رێبەرایەتییا سەرۆك بارزانی دا، وەك بەردەوام دێ مەلبەندەكێ گرنگ و گەشێ پێكڤەژیانا ئاشتییانە بیت د دەڤەرێ و جیهانێ دا».

سەرۆكێ حوكمەتا هەرێما كوردستانێ، مەسرور بارزانی، د هەڤپەیڤینەكا تایبەت دا ل گەل «ئەلمۆنیتۆر»، رۆناهی ئێخستە سەر پاشەڕۆژا پەیوەندیێن هەرێما كوردستانێ و ئەمریكا، ڤەكێشانا هێزێن ئەمریكا و سیستەمێ بەرگرییا پاتریۆت، هێرشێن درۆنی، پەیوەندیێن ل گەل بەغدایێ، ڕەوشا دەڤەرێ و ئاستەنگێن ل هەمبەر پێكئینانا حوكمەتا هەرێما كوردستانێ.
مەسرور بارزانی دوپات كر كو هەرێما كوردستانێ چو گەف بۆ سەر ئاسایشا وەلاتێن جیران دروست نەكریە و ڕاگەهاند «ئەڤ بزاڤە بتنێ بۆ ترساندنا هەرێما كوردستانێ نە و دخوازن كوردستانێ بكێشنە ناڤ هەڤركییان كو ئالیێ كوردی ب توندی دژی وێ یە. كا بۆچی هێرشی مە دكەن؟، ئەڤە پرسیارەكە دڤێت ژ دەسهەلاتدارێن ئیرانێ بهێتە كرن».
هێرشێن 17ی ئابێ و جۆرێن درۆنێن ئیرانی
مەسرور بارزانی، سەرۆكێ حوكمەتا هەرێما كوردستانێ دیار كر كو ئەو هەموو وان هێرشێن بێ بەهانە پرۆتەستۆ دكەن یێن كو ژ دەسپێكا شەڕێ ئەمریكا و ئیسرائیلێ ل گەل ئیرانێ ژ 28ی شواتێ ڤە هاتینە سەر هەرێما كوردستانێ، كو هەژمارا وان گەهشتییە هزار هێرشێن درۆنی. هەروەسا ئاشكرا كر كو هێرشێن 17ی ئابێ یێن كو نڤیسینگەها وی یا تایبەت و مالا رێڤەبەرێ ئاژانسا پاراستنێ كربوونە ئارمانج، «گەفێن راستەوخوە نە بۆ سەر ئاسایشا هەرێمێ».
دەربارەی ڕەتكرنا بەرپرسیاریێ ژ ئالیێ وەزیرێ دەرڤە و جێگرێ سەرۆككۆمارێ ئیرانێ ڤە، مەسرور بارزانی گۆت «ئەو درۆنێن هاتینە بكارئینان ژ جۆرێ (حەدید-110 توربۆ) یێن دروستكریێن ئیرانێ نە و ژ ناڤ ئاخا ئیرانێ هاتبوون. ئەز ل گەل وێ چەندێ مە كو دڤێت بەرپرسێن ئیرانێ بخوە بەرسڤێ بدەن و ڤەكۆلینێ بكەن كا چەوا ئەو جۆرە فڕۆكەیێن بێ فڕۆكەڤان یێن كو بتنێ ل دەڤ وان هەین، ژ ئالیێ كەسێن دی ڤە بۆ هێرشكرنێ سەر دەرڤەی وەلاتێ وان دهێنە بكارهینان».
هەمان دەم ئاماژە ب سەرەدانا محەمەد باقر قالیباف، سەرۆكێ پەرلەمانێ ئیرانێ بۆ ئیراقێ كر و ڕاگەهاند، چاڤەڕێ دكەت سەرۆكوەزیرێن ئیراقێ ڤی بابەتی ل گەل بەرپرسێن ئیرانێ باس بكەت، چونكی بەغدا ب فەرمی هێرش پرۆتەستۆ كریە و داخوازا ڤەكۆلینێ كریە.
ڤەكێشانا پاتریۆت و داخوازا سیستەمێ بەرگرییا ئەسمانی
مەسرور بارزانی دلگرانییا خۆ ژ ڤەكێشانا هێزێن مەشق و راهێنانێن ئەمریكایێ و ڤەگوهاستنا سیستەمێن بەرگرییا ئەسمانی «پاتریۆت» بەری ژڤانێ 30ی ئیلۆنێ دەربڕی و گۆت «مە نەشیایە وان سیستەمێن كارا ب دەست بێخین یێن كو دشێن مە ژ وان گەفان بپارێزن، لێ بزاڤ بەردەوامن. ڤەكێشانا ڤان سیستەمان مە دئێخیتە د مەترسیێ دا و ئەم ناخوازین چ بۆشاییێن ئەمنی بمینن».
سەرۆكێ حوكمەتا هەرێما كوردستانێ ئاماژە ب وێ چەندێ ژی دا، كو هەرچەندە هەڤالێن ئەمریكی سەركەفتی بوون د ژناڤبرنا پترییا مووشەك و درۆنان دا، لێ كوردستان یا د مەترسیێ دایە و بەردەوامییا هێرشان ژی ناهێتە قەبوولكرن، لەورا داخواز ژ هەموو دۆستێن هەرێما كوردستانێ كر هاریكارییا وان بكەن دا كو ببنە خودان سیستەمێ ئاگەهداركرنا پێشوەخت،
سیستەمێ دژە-درۆن و بەرگرییا ئەسمانی بۆ پاراستنا وەلاتییان، ژێرخانەیا ئابۆری و كەرتێ وزەیێ.
دەربارەی ئاخڤتنێن تۆم بەڕاكی، بالیۆزێ ئەمریكا ل توركیایێ و هنارتیێ تایبەتێ ئەمریكا بۆ ئیراقێ و سووریێ، كو د دەمێ پرۆتەستۆكرنا هێرشێن 17ی ئابێ دا، مەسرور بارزانی ب «هەڤال و هەڤپشكەكێ ب بها» بناڤ كربوو و هەرێما كوردستانێ ژی ب «هەڤپەیمانەكا جهێ باوەرییا ئەمریكایێ» ل قەلەم دابوو.
مەسرور بارزانی ڕاگەهاند ژی ، پەیوەندییا هەرێما كوردستانێ و ئەمریكایێ گەلەك یا ب بهایە و شانازیێ پێ دكەن، هیڤی ژی خواست هەڤپشكییا ناڤبەرا وان پشتی كێمكرنا هێزێن ئەمریكا ژی ب شێوازێن جودا بەردەوام بیت.
پشتەڤانی بۆ سەرۆكوەزیرێن ئیراقێ و چەكدانانا گرۆپێن چەكدار
دەربارەی ڕەوشا سیاسی یا ئیراقێ، مەسرور بارزانی، عەلی زەیدی سەرۆكوەزیرێن ئیراقێ ب دۆستەكێ ڕاستی و جهێ باوەریێ هەژمارت كو كار بۆ بەرژەوەرندییا وەلاتی دكەت، و پشتەڤانییا خۆ بۆ پێنگاڤێن وی د ڕوو ب رووبوونا گەندەلیێ، سەپاندنا سەروەرییا یاسایێ و چەكدانانا گرۆپێن چەكدار دوپات كر.
سەبارەت وی ژڤانێ كو زەیدی بۆ چەكدانانا گرۆپێن چەكدار ل 30ی ئیلۆنێ دیاركری، مەسرور بارزانی هیڤی خواست ئەو گرۆپێن چەكدار بەری وی ژڤانی چەكێن خۆ ڕادەستی حوكمەتێ بكەن و بچنە د ناڤ هێزێن ئەمنی دا، و گۆت ژی «ئەز باوەر ناكەم كەس بخوازیت هەڤڕكییا سەربازی یان ئالۆزیێ د وەلاتی دا ببینیت، لێ پێدڤییە حوكمەت یا پێدڤی بیت بۆ پاراستنا وەلاتییان و سەروەرییا وەلاتی ئەنجام بدەت. هەكە هاریكارییا سەرۆكوەزیرانی نەهێتە كرن، دێ ڕوو ب ڕوو لێكەفتەیان بن».
سەرۆكێ حوكمەتا هەرێمێ ڕۆهن ژی كرەڤە كو بەردەوام كێشەیێن ئیراقێ ب ڕەوشا ئیرانێ ڤە دهێنە گرێدان، لێ پێدڤییە ئیراقی بەرژەوەندییا نیشتمانی و ئاسایشا وەلاتێ خوە بخەنە پێش هەموو تشتەكی، بێی كو سەحكەنە وێ چەندێ كا هەڤڕكییێن ئیرانێ بەرەڤ كیڤە دچن.
ڕەوشا ئابۆری، ڕۆلێ هەرێمێ د دەڤەرێ دا و كەرتێ پەترۆلێ
ژ ئالیێ ئابۆری ڤە، سەرۆكێ حوكمەتا هەرێما كوردستانێ پشتەڤانییا خوە بۆ سیاسەتا ئیدارەیا دۆنالد ترەمپی ل بن درووشمێ «بازرگانی نەك هەڤڕكی» دیار كر. ئاماژە ب كۆنفرانسێ وزەیێ یێ (ئەلمۆنیتۆر) كر كو ب پشكدارییا كریس ڕایت، وەزیرێ وزەیێ یێ ئەمریكا هاتبوو ئەنجامدان و ڕاگەهاند «حوكمەتا هەرێمێ پێنگاڤێن مەزن هاڤێتینە ب جهئینانا میكانیزمەكێ ب پشتەڤانییا واشنتۆنێ بۆ فرۆتنا پەترۆلێ ب ڕێیا كۆمپانییا (سۆمۆ) ل گەل كۆمپانیێن ئەمریكی و نێڤدەولەتی».
مەسرور بارزانی دوپات كر كو دەرگەهێ كوردستانێ یێ ڤەكرییە بۆ كۆمپانیێن ئەمریكی، نە بتنێ د كەرتێ وزەیێ دا، بەلكو د كەرتێ چاندنێ، ژێرخان و تەكنەلۆژیایێ دا ژی، و ب پێدڤی ژی زانی سەقایەك بهێتە دابینكرن كو وەبەرهێنان و كارمەندێن وان ب پاراستی بمینن.
هەروەسا ئاماژە ب پەیوەندییێن باش یێن هەرێما كوردستانێ ل گەل توركیایێ و حوكمەتا نوو یا سووریێ كر و ڕاگەهاند، هەرێما كوردستانێ بەردەوام فاكتەرەكێ ئەرێنی بوویە بۆ هاریكاریكرنا دەسپێشخەرییێن ئاشتیێ ل توركیایێ و تێكەلبوونەڤەیا سیاسی ل سووریێ.
پاشكەفتنا پێكئینانا حوكمەتێ و چالاككرنا پەرلەمانی
دەربارەی ڕەوشا ناڤخوەیییا هەرێما كوردستانێ، مەسرور بارزانی دلگرانییا خۆ دیار كر كو پشتی پتر ژ 20 مەهان ژ هەلبژارتنێن چریا ئێكێ یا 2024ێ هێشتا حوكمەت نەهاتییە پێكئینان.
مەسرور بارزانی ئاشكرا ژی كر «مەرەما مە ئەو بوو ئێكسەر حوكمەتەكا بەرفرهە پێكبینین و ئێكەتی نیشتمانی كوردستان هەڤپشكا مە یا سەرەكی بیت، لێ وان دخواست چاڤەڕێی هەلبژارتنێن ئیراقێ بكەن. سەرەڕای وێ چەندێ كو پارتی دیموكراتی كوردستان زۆرترین دەنگ ل سەرانسەری ئیراقێ و كوردستانێ ب دەست ڤە ئینان، لێ دیسان حوكمەت نەهاتە پێكهینان».
سەرۆكێ حوكمەتا هەرێمێ داخوازا چالاككرنا ئێكسەر یا پەرلەمانێ كوردستانێ كر و ڕاگەهاند «ئەم دەستێ دۆستینیێ بۆ هەموو ئالییان درێژ دكەین دا كو بهێن و پشكدار بن د پێكئینانا حوكمەتێ دا، كو ئەڤە د بەرژەوەندییا بلندا خەلكێ كوردستانێ دایە».
ڤەكێشانا هێزێن ئەمریكا و ئاسۆیێ پەیوەندییان
مەسرور بارزانی دوپات كر كو هەرێما كوردستانێ پشتەڤانییا بڕیارا ڤەكێشانا هێزێن ئەمریكا ل ئیراقێ دكەت، لێ هیڤیدارە ئەڤ پێنگاڤە ڤالاهییەكا ئەمنی دروست نەكەت.
گۆت ژی «ئەم دخوازین پەیوەندییێن خوە یێن ب هێز ل گەل ئەمریكا ل دەرڤەی هاریكارییێن سەربازی، د بوارێن ئابۆری و سیاسی دا پتر بەرفرهە بكەین، و هەرێما كوردستانێ وەك جهێ باوەریێ و دلسۆزترین هەڤپشكێ ئەمریكایێ د دەڤەرێ دا دێ مینیت».

مەسرور بارزانی، سەرۆكێ حوكمەتا هەرێما كوردستانێ، پەیوەندییەكا تەلەفۆنی ژ ئالیێ هەیبەت حەلبووسی، سەرۆكێ جڤاتا نوونەرێن ئیراقێ ڤە پێگەهشت.
د وێ پەیوەدییا تەلەفۆنیدا، حەلبووسی هێرشا درۆنی یا سەر نڤیسینگەها تایبەت یا مەسرور بارزانی و جهێ ئاكنجیبوونا ڕێڤەبەرێ ئاژانسا پاراستنێ پرۆتەستۆ كر.
هەیبەت حەلبووسی هەڤسۆزی و پشتەڤانییا خوە بۆ پاراستنا ئاسایش و ئارامییا هەرێما كوردستانێ و ئیراقێ دیار كر و دوپاتی ل سەر گرنگییا رێگریكرنێ ژ ڤان جۆرە بنپێكرنێن ئەمنی كر.
سەرۆكێ حوكمەتا هەرێما كوردستانێ، پێزانین و سوپاسییا خوە ئاراستەی سەرۆكێ جڤاتا نوونەرێن ئیراقێ كر بۆ دەربڕینا وێ پشتەڤانی و هەڤسۆزییێ.