زنار تۆڤی:

خانما شێوه‌كار ئاشنا ده‌وله‌ت، پشكداری د پێشانگه‌ها هه‌ڤپشكا شێوه‌كاریا «هونه‌رێ بێ سنۆر» ل مالا كولتووری وێنتشیتسا ل وه‌لاتێ پۆله‌ندا ڤه‌كر.
ئاشنا ده‌وله‌ت دبێژیت: كۆمه‌كا هونه‌رمه‌ندێن كورد ل ستۆكهۆلم ل پایته‌ختێ سوید به‌رده‌وام د چالاكییان دا كۆمڤه‌ دبن و بزاڤان دكه‌ن ناسنامه‌ و كولتوورێ كوردی ب رێكا به‌رهه‌مێن خۆ نیشا خه‌لكێ بده‌ن، ڤێ جارێ مه‌ نێزیكی 13 شێوه‌كاران پشكداری د وێ پێشانگه‌هێ دا كر، ژ به‌ر دووریا وی وه‌لاتی، پشكه‌ك ژ وان شێوه‌كاران و ئه‌ز ب خۆ ژی د وێ پێشانگه‌هێ ئاماده‌ نه‌بووم، به‌لێ به‌رهه‌مێن مه‌ بۆ هاتینه‌ هنارتن.
ناڤهاتیێ گۆت ژی: ب رێكا كه‌ڤالێن خۆ من بزاڤكرینه‌ پشكه‌ك ژ هه‌ست و هزر و بیروه‌ریێن خۆ یێن ناڤخۆیی و تایبه‌ت ب نیشتمانی، مال و ناسنامه‌ و ژیانا كۆچبه‌ریێ ڤه‌ ده‌رببرم، هه‌روه‌سا دووركه‌فتن ژ نیشتمانی، خێزانێ و ئه‌و باژێرێ مرۆڤ تێدا مه‌زن بوویی، هه‌سته‌كێ كوور یێ ژ ده‌ستدانێ د ناخێ مرۆڤی دا دروست دكه‌ت، ئه‌و جوداهیا د ناڤبه‌را بیره‌وه‌ریێن زارۆكاتیێ دا كو هنده‌ك مال و تاخ د هزرا من دا هه‌نه‌، به‌لێ نوكه‌ وه‌كو خۆ نه‌ماینه‌ و گه‌له‌ك ژ وان جهان هاتینه‌ گوهۆرین، ئه‌و چه‌نده‌ بووینه‌ ژێده‌رێ سه‌ره‌كی یێن كارێن من یێن هونه‌ری.
ئاشنا ده‌وله‌ت ئاشكه‌را دكه‌ت ژی: د كه‌ڤالێن من دا مال، ئاڤاهی، ده‌رگه‌ه، په‌رده‌ و نه‌خش و شوونوارێن كه‌ڤن یێن كوردی ب ره‌نگه‌كێ ره‌مزی هاتینه‌ بكارئینان، بۆ من مال ب تنێ چار دیوار و ئاڤاهییه‌ك نینه‌، به‌لكو نیشانا ئارامی و ئاسایش و سه‌ربه‌خۆیێ یه‌، ژ به‌ر ڤێ چه‌ندێ، دووركه‌فتن ژ مال و نیشتمانی ب تنێ دووریه‌كا جه‌سته‌یی نینه‌، به‌لكو دووریه‌كا ده‌روونی ژی یه‌.
ناڤهاتیێ دیار كر ژی: مرۆڤێ ئاواره‌ زۆرجار د ناڤبه‌را دو جیهانان دا دژیت، ل وه‌لاتێ خۆ هه‌ست ب غه‌ریبیێ دكه‌ت ژ به‌ر كو ده‌م و جه هاتینه‌ گوهۆرین، ل وه‌لاتێ غه‌ریبیا مرۆڤ هه‌ست ب بیانیێ دكه‌ت، ئه‌ڤ ره‌وشه‌ به‌رده‌وام پرسیاره‌كێ د ناخێ مرۆڤی دا دروست دكه‌ت، كا ئه‌ز ل كیڤه‌ مه‌ و جهێ من یێ راسته‌قینه‌ ل كیڤه‌یه‌؟.
ئاشنایێ هه‌روه‌سا ئاشكه‌را كر ژی: ئه‌ڤ هه‌سته‌ ب بۆچوونا من ب تنێ هه‌سته‌كێ تاكه‌كه‌سی نینه‌، به‌لكو پشكه‌كه‌ ژ ئه‌زموونا هه‌ڤپشكا گه‌له‌ك كۆچبه‌رێن كورد، هه‌روه‌سا گه‌له‌ك كورد ژ به‌ر ره‌وشێن جودا، چ ب حه‌زا خۆ و یان ب نه‌چاری، ل ده‌رڤه‌یی وه‌لاتی دژین و دناڤبه‌را دو كولتوور و دو ژینگه‌هێن مه‌زن دا، ب تایبه‌تی نڤشێ دووێ یێ كۆچبه‌ران، ژ لایه‌كی ڤه‌ په‌یوه‌ندی ب كولتوورێ نیشتمانی یێ دایك و بابێن خۆ ڤه‌ هه‌یه‌ و ژ لایه‌كێ دیڤه‌ ل ناڤ كولتوورێ وه‌لاتێن بیانی دا مه‌زن بووینه‌، هه‌روه‌سا د كه‌ڤالێن من دا، سار و چۆلیا سروشتی ژی هه‌لگرێن واتایه‌كا ناڤخۆیی نه‌، ئه‌و سروشتێ سار و بێده‌نگ بۆ من وێنه‌كێ ئه‌وی هه‌ستییه‌ یێ كو سالانه‌ من د ناخێ خۆ دا هه‌لگرتی، هه‌ستێ مرۆڤه‌كی كو ل دووڤ راستییا ناخێ خۆ دگه‌ریت و هێشتا نه‌شێت ب دروستی جهێ خۆ د جیهانێ دا دیار بكه‌ت.
ئاشنایی گۆت ژی: ئه‌و كه‌ڤالێن من د وێ پێشانگه‌هێ دا نیشان داین، ب بۆیاغا ئه‌كریلیك و ب شێوازێ ئه‌بسرتاكتی یێ راست هاتینه‌ دروستكرن، د دروستكرنا ڤی به‌رهه‌می دا، من بزاڤكریه‌ سروشتێ وه‌لاتێ غه‌ریب و سروشتێ نیشتمانێ دایك دگه‌ل هه‌ست و فانتازییا كه‌سییا خۆ تێكه‌ل بكه‌م، دا كو وێ ململانا ناڤخۆیی ب زمانێ وێنه‌یی و ره‌نگان ڤه‌گۆهێزم.
هه‌روه‌سا گۆت: پشكداریا من د ڤێ پێشانگه‌هێ ل وه‌لاتێ پۆلۆنیا بۆ من گه‌له‌ك یا گرنگه‌، ژ به‌ركو هونه‌ر سنورێن جوگرافی نانیاسیت، ئه‌گه‌ر هونه‌رمه‌ند بشێت هه‌سته‌كێ ژ دلێ مرۆڤه‌كی بۆ دلێ مرۆڤه‌كێ دی ڤه‌گوهێزیت، ئانكو په‌یاما وی یا گه‌هشتی، ب تنێ ئه‌گه‌ر زمان، نیشتمان و كولتوور ژی د جودا بن.
خانما شێوه‌كار ئاشنا ده‌وله‌ت، ل سالا 1969 ژ دایكبوویه‌ و خواندنا خۆ یا هونه‌ری ل په‌یمانگه‌ها هونه‌رێن جوان ل سلیمانیێ ته‌مام كریه‌، ئه‌ڤه‌ چه‌ندین ساله‌ ل وه‌لاتێ سوید دژیت، ژ بلێ كارێ خۆ یێ ئه‌ندازیارییا ئاڤ و ئاڤرێژان، به‌رده‌وام د وارێ هونه‌ر و شێوه‌كاری دا كار دكه‌ت، ل سالا 1995 ێ، پێشانگه‌ها خۆ یا تایبه‌ت ل سوید ڤه‌كریه‌، هه‌تا نوكه‌ ل كوردستان و سوێد و چه‌ندین وه‌لاتێن جیهانی پێشانگه‌ه ڤه‌كرینه‌.

هەرهین محەمەد:

جەنان ساوا، سترانبێژێ کریستیان کو نوکە ل وەلاتێ ئەمریکا دژیت دیدارەکێ دا بۆ بەرپەرێ هونەری یێ ڕۆژنامەیا ئەڤرۆ دبێژیت:نێزیکی دەهـ کلیپان من هەنە و ل دەمەکی من دابوونە کەنالێ (ڤین تیڤی) و بەردەوام دهاتنە پەخشکرن. دیسان ئەز خۆدانێ بیست و حەفت ئەلبۆمێن هونەری مە ب زاراڤێ ئاشوری، هەروەسا ئەلبۆمەکا تایبەت ژی ب زمانێ کوردی من گۆتییە. د کارنامەیا من یا هونەری دا نێزیکی سێ سەد سترانان هەنە، کو ئاوازێن سەد ژ وان سترانان ژ ئاوازێن کوردی و تورکی هاتینە وەرگرتن، چونکی ئەز بخۆ گەلەک گوهداریا سترانێن وان دکەم.
ڕەوشا کلتۆری و دەواتان ل ئەمریکا
دەربارەی پشکداریکرنێ د ئاهەنگان دا ل وەلاتێ ئەمریکا، ساوا دیار کر: «ل ئەمریکا دەواتێن کوردان و یێن ئاشوریان ژی هەنە و ئەز بەردەوام پشکداریێ تێدا دکەم، بەلێ جوداهییەکا بەرچاڤ دناڤبەرا دەواتێن مە دگەل یێن برایێن موسلمان دا هەیە؛ تایبەت ژ رویێ دەمی ڤە. دەواتێن مەسیحیان گەلەک دکورتن، ژ دەمژمێر نەهی شەڤێ دەستپێدکەن هەتا ئێکی شەڤێ، بەلێ یێن برایێن موسلمان، ب تایبەت ل کوردستانێ، ژ هەر ئێڤاری ڤە دەستپێدکەن.
ساوا ئاماژە ب وێ یەکێ ژی کر کو ئەو ژ سالا ١٩٨٠ وەرە چوویە ئەمریکا و گۆت: سالانە وەرزێ بهارێ سەرەدانا کوردستانێ دکەم بتنێ وەکو گەریان و سەرەدانا کەس و کارێن خۆ. ئەگەر ئاهەنگ و دەوات ژی هەبن بەشداریێ تێدا دکەم. دبیت کوردییا من نە ئەوا باش بیت، چونکی ژ ئەگەرا دووریا وەلات کێم کورد ل وێرێ هەنە ب ئاخڤم و ل مال ژی دگەل خێزان و هەڤالان ب ئاشوری دئاخڤین. بەلێ برایێ من (عیسام) کو مۆزیکژەنە، بەردەوام چیتە دەواتێن کوردان و تەڤلی ئاهەنگێن وان دبیت.»

زاخۆ، دلۆڤان هالۆ:

هونەرمەندا گەنج و دەنگ خوەش سیماڤ حسێن نووترین بەرهەمێ خوە یێ هونەری یێ سترانێ بناڤێ (ئەڤینا تە) ب شێوێ ڤیدیۆ کلیپ بەلاڤکر.

پەیڤ و ئاوازێن ڤێ سترانێ یێن ئاکام محەمەدی نە و میکس و ماستەر ژ لایێ سەمیر حسێن ڤە هاتیە بەرهەڤکرن، و دەرهێنانا ڤیدیۆ کلیپێ ژی ژ لایێ سیپانێ فازل ڤە هاتیە ئەنجامدان.

هونەرمەندا ناڤهاتی خەلکا ڕۆژئاڤایێ کوردستانێ یە و د نوکە دا ئاکنجیا وەلاتێ ئەلمانیایە، و خودان چەندین بەرهەمێن هونەری یە وەکو سترانێن دەلالێ و کا ڕۆژێن خوەش و سیا خەیالا من و تو هەڕە و یاریە و ژن و ژیان و چەندین سترانێن دی.