هه‌ولێر، قائید میرۆ:
چه‌ندین ساله ب ناڤێ هه‌ڤالینیێ كچێن عه‌ره‌ب و هندەک وه‌لاتێن جیهانێ ڤیدیۆیێن رویس یێن هندەک زه‌لامێن هه‌رێما كوردستانێ تۆمار دكه‌ن و ددووڤدا گەفان لێدکەن و داخوازا پاران ژێدكه‌ن.
محه‌مه‌د برادۆستی، شاره‌زایێ ئایتی، د دیدارەکێ دا بۆ رۆژنامەیا ئه‌ڤرۆ دیار کر، ئافره‌تێن عه‌ره‌ب ب رێیا فه‌یسبۆك و تۆڕێن جڤاكی داخوازا هه‌ڤالینیێ ژ هندەک زه‌لامێن كورد دكه‌ن و گۆت؛ ددووڤدا دێ ناڤبه‌را خۆ دگه‌ل زه‌لامی خۆش كه‌ت، هه‌تا دگه‌هیته ڤه‌كرنا کامیرێ و ڤیدیۆیێن رویس و پاشی ئه‌و ئافره‌ت دێ گەفان ل زەلامی کەت، ل هه‌مبه‌ر به‌لاڤ نه‌كرنا ڤیدیۆیێن وی داخوازا کوژمه‌كێ پاره‌ی ژێ كه‌ت، هەکە زەلام پارا بۆ نە فڕێکەت، دێ گه‌فان لێكه‌ت و ڤیدیۆیێ بۆ هه‌ڤالێن وی یێن تۆڕێن جڤاکی هنێریت.
محەمەد گۆتژی؛ ئه‌ڤه بتنێ بۆ زه‌لامان نینه به‌رۆڤاژی ئافره‌ت ژی تووشی ئه‌ڤان ئاریشه‌یان بووینه، زه‌لامێن بیانی ژی هه‌نه بۆ ئافره‌تان داخوازا هەڤالینیێ فڕێدکەن و پشتی دكه‌نه هه‌ڤالا خۆ دگه‌هیته راددێ ڤه‌كرنا کامیرێ و گرتنا ڤیدیۆیێن نەجوان و ددووڤدا گه‌فان دكه‌ن و داخوازا پاره‌یه‌كێ زۆر ژێ دكه‌ن.
ره‌مه‌زان ئه‌حمه‌د، گه‌نجه‌كێ كورده و چه‌ندین سالان ل ده‌رڤه ژیایه دیار کر کو ئه‌و باندێن ده‌رڤه زۆرن و كارێ وان كۆمكرنا پارایه ب رێكا سه‌ردابرنا زه‌لامان، چه‌ندین كه‌س هه‌بووینه ڤیدۆیێن خۆ هنارتینه بۆ ئافره‌تێن بیانی تایبه‌تی یێن عه‌ره‌ب و خه‌لیجی، به‌لێ تووشی ئاریشەیان بووینه و ڤیدیۆیێن وان هاتینه به‌لاڤكرن و بۆ كه‌س و كارێن كوڕكی یان زه‌لامی هنارتینه، ئه‌و ئافره‌ت فێلبازن و دناڤا فه‌یسبۆك و ئینیستگرامێ مرۆڤی دگه‌ڕن كیژ هه‌ڤالێ مرۆڤێ یێ نێزیكه دێ ڤیدیۆیێ بۆ هنێرن هه‌تا كابرا نه‌چار دبیت پاره‌ی بۆ فڕێکەت.
ڕەمەزان دیار کر ژی کو چه‌ندین حاله‌ت هه‌بووینه و پاره ژ خه‌لكی وه‌رگرتینه، ئەڤجا دڤێت خه‌لك یێ هشیار بیت ب رێیا تۆڕێن جڤاکی هه‌ڤالینیا وان كچ و ژنێن بیانی نه‌كه‌ت، چونكه ب شێوه‌یێ باند كار دكه‌ن و یێ بوو نێچیرا وان زۆر زه‌حمه‌ت ب سلامەتی ڕزگار ببیت.
نيشاندان