د سالڤەگەڕا 65 یا دەستپێكرنا شۆڕشا مەزنا ئیلۆنێ دا، سەرۆك بارزانی پەیامەك بەلاڤكر و ڕاگەهاند، شۆڕشا ئیلۆنێ ب ڕێبەرییا بارزانیێ نەمر ، بوویە ژێدەرێ هێز و ئیلهامبەخش بۆ قووناغێن خەباتێ ل هەموو پارچەیێن كوردستانێ.
سەرۆك بارزانی ڕاگەهاند: 65 سال ب سەر دەستپێكرنا شۆڕشا مەزنا ئیلۆنێ دا دەرباز دبن، شۆڕشەكا سەرتاسەری بوو كو تێدا هەموو تە و چینێن جڤاكی پشكداری د خەباتا نەتەوەیی و دیموكراتیخوازییا گەلێ خوە دا كر، ژ وان: پێشمەرگە، سیاسی، ڕێكخستن، زانایێن ئایینی، مامۆستا، ئەدیب، ڕەوشەنبیر، گەنج و ئافرەت.
د پشكەكا دی یا پەیاما خوە دا، سەرۆك بارزانی دوپاتی ل وێ چەندێ كر كو شۆڕشا ئیلۆنێ ژ ئیرادە، باوەری بخوەبوون و شكۆیا مرۆڤێ كوردستانی هەلكەفتی بوو، هەڤدەم بناغەیەكا ب هێز و ڕێكخستی بوو بۆ بەردەوامییا خەبات و ڕاوەستیانا گەلێ كوردستانێ ل بەرامبەر زۆرداریێ.
سەرۆك بارزانی گۆت ژی «ئەڤ شۆڕشا مەزن، ب بهایێن بلند یێن خوە و ب پێداگری و خۆڕاگرییا بێوێنە یا سەركردایەتی، پێشمەرگە و جەماوەر، دۆزا ڕەوا یا گەلێ مە ب پێنگاڤێن مەزن بەر ب پێشڤە بر و بوویە ژێدەرێ هێزێ بۆ قۆناغێن پشتی و خەباتكەرێن كورد ل تەڤایا پارچەیێن دی یێن كوردستانێ».
هەر د پەیامێ خوە دا، سەرۆك بارزانی پێزانینێن خوە بۆ ڕۆلێ دیرۆكی یێ تەڤایا وان پێشمەرگە و خەباتكەرێن قەهرەمان دوپات كرن كو پشكداری د تۆماركرنا ڤێ سەروەرییا نیشتمانی دا كری، چ ئەو شەهیدێن نەمر یێن د شۆرەشێ دا گیانێ خوە ب ئاخا نیشتمانی بەخشی یان ئەوێن د ژیانێ دا نەماین، و چ ئەو ڕۆلێن سەربلند یێن هەتا نوكە وەك شاهدحالێن زیندی یێن دیرۆكێ د ژیانێ دا ماین و دوپاتكر كو «ئەڤ قەهرەمانە هێڤێنێ دروستكرنا سەروەریێ بوون بۆ گەلێ خوە و جهێ شانازیێ نە».

بارەگەهێ بارزانی بەلاڤكر، ل پیرمامێ سەرۆك بارزانی پێشوازی ل هەیبەت حەلبوسی، سەرۆكێ جڤاتا نوونەرێن ئیراقێ و شاندەكێ دگەل دا كر كو پێكهاتبوون ژ سەرۆكێن فراكسیۆنێن دناڤ جڤاتا نوونەران دا.
بارەگەهێ بارزانی ئاماژە ب وێ چەندێ كریە، د دەستپێكا دیدارێ دا، شاندێ مێهڤان ب مەبەستا بەهیداریێ سەردانا سەرۆك بارزانی كربوو، پرسە و هەڤخەمییا خۆ ئاڕاستەی سەرۆك بارزانی كر بۆ مالئاڤاییا خودێ ژێ ڕازی عەبدولواحد ئیبراهیم شێخ عەبدولسەلام بارزانی.
هەروەسا بلس ل ڕەوشا گشتییا ئیراقێ وگەف و ئاستەنگێن ل پێشبەری ئیراقێ د قووناغا بهێت دا هاتە كرن، هەڤدەم ڕۆناهی ئێخستە سەر كار و ئەركێ جڤاتا نوونەران و كوتلەیێن سیاسی ژ پێخەمەت پێشڤەچوونا پرۆسەیا سیاسی.
هەڤدەم دپشكەكا دی یا دیدارێ دا، هەردوو ئالییان تەكەز كر ل سەر گرنگییا پێگیریبوونێ ب دەستووری و پشتەڤانیكرنا حوكمەتا ئیراقا فیدرال و دەزگەهێن دی یێن دەولەتێ بۆ پاراستنا ئارامیێ ل سەرانسەری وەلاتی.
بارەگەهێ بارزانی ڕاگەهاند، دوپاتی ل بەرقەراركرنا پەیوەندیێن دۆستانە و هەڤسەنگ ل گەل دەولەتێن جیران، ل گەل ب هێزكرنا بزاڤان بۆ دژایەتیكرن و بنبڕكرنا گەندەلیێ و بازرگانییا مادەیێن هۆشبەر ل هەموو ئیراقێ دا هاتە كرن.
هەر د چارچۆڤەیێ هەمان سەرەدانێ دا، شاندێ ناڤبری سەرەدانا نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ ژی كر. ل گەل نێچیرڤان بارزانی تەكەز ل سەر وێ چەندێ هاتە كرن كو پێدڤییە چەك بتنێ د دەستێ دەولەتێ دا بیت و ئاریشەیێن هەولێرێ و بەغدایێ ل دووڤ دەستووری بهێنە چارەسەركرن. ل گەل مەسرور بارزانی ژی حەلبوسی پشتڕاستی دا كو بودجەیا 2027ێ یا فیدرال ب شێوەیەكێ دادپەروەرانە دهێتە بەرهەڤكرن و مافێن دەستووری یێن هەرێما كوردستانێ دێ پاراستی بن.

ب هەلكەفتا سالڤەگەڕا 65 یا دەستپێكرنا شۆڕشا مەزنا ئیلۆنێ، نێچیرڤان بارزانی، سەرۆكێ هەرێما كوردستانێ، پەیامەك بەلاڤكر.
د پەیاما خوە دا سەرۆكێ هەرێمێ، ب ڕێز و شكۆیەكا مەزن ڤە یادا بارزانیێ نەمر وەكی ڕێبەرێ شۆڕشێ و بزاڤا ڕزگاریخوازییا گەلێ كوردستانێ، و هەموو پێشمەرگە و خەباتكەرێن قەهرەمان كر، كو ناڤبری وەك هێزا سەرەكی یا شۆڕشێ ب ناڤ كرن، و سلاڤ بۆ گیانێ شەهیدێن شۆڕشێ و مالباتێن وان هنارت.
نێچیرڤان بارزانی ئاماژە ب وێ چەندێ كر، شۆڕشا ئیلۆنێ د قووناغەكا دژوار كو ئینكار ژ هەبوون و مافێن گەلێ كوردستانێ دهاتە كرن، بووە هێڤێنێ هشیاری و بیر و ناسنامەیا نەتەوەیی و نیشتمانی.
دیار كر ژی كو شۆڕشا ئیلۆنێ ب كۆمكرنا هەموو تەخ و چین و پێكهاتەیێن ئایینی و نەتەوەیی یێن كوردستانێ دبن ئێك چەتر دا، بوو ئیرادەیەكا پیلایی و دەنگێ ڕەوا یێ گەلێ كوردستانێ گەهاندە جیهانێ و بناغەیا ئێكەم دانپێدانانا فەرمی و دەستكەفتێن دەستووری دانا.
د پشكەكا دی یا پەیاما خوە دا، سەرۆكێ هەرێما كوردستانێ دوپات كر كو وەك چەوا سەركەفتن و مانا شۆڕشا ئیلۆنێ بەرهەمێ ئێكگرتنێ بوو، ئەڤرۆ ژی تاكە ڕێكا پاراستنا سیستەمێ فیدرالی و قەوارەیێ هەرێما كوردستانێ و مافێن دەستووری و دەربازبوونا ئاستەنگان، پێكڤەبوون و ب هێزكرنا گیانێ تەبایی و هەڤكاریێ یە د ناڤبەرا هەموو هێز و ئالییێن سیاسی دا، بۆ مسۆگەركرنا پاشەڕۆژەكا ئارام و گەشتر بۆ نەڤیێن داهاتی.

سەرۆكێ حوكمەتا هەرێما كوردستانێ، د سالڤەگەڕا شۆڕشا مەزنا ئیلۆنێ دا دوپاتی ل سەر ئێكدەنگی و هەڤهەلوەستییا هێز و ئالییێن كوردستانی كر ژ پێخەمەت پاراستن و زێدەتر پێشڤەبرنا قەوارەیێ دەستووری یێ هەرێما كوردستانێ و دەستكەفتێن نیشتمانی.
مەسرور بارزانی سەرۆكێ حوكمەتا هەرێما كوردستانێ ب هەلكەفتا سالڤەگەڕا 65 یا دەستپێكرنا شۆڕشا ئیلۆنێ پەیامەك بەلاڤكر و ڕاگەهاند «د سالڤەگەڕا 65 یا دەستپێكرنا شۆڕشا مەزنا ئیلۆنێ، ب ڕێبەرییا ڕێبەرێ نیشتمانێ مە جەنابێ بارزانیێ نەمر، ب پێزانینەكا زۆر ڤە، بیرئینانا هەموو پێشمەرگە و خەباتكەر و تێكۆشەر و هەموو پشكدارێن وێ شۆڕشا جەماوەری و سەرتاسەرییا كوردستانێ دكەینەڤە كو هەموو پێكهاتەیێن ئایینی و نەتەوەیی یێن كوردستانێ پشكداری تێدا كر».
مەسرور بارزانی ئاماژە ب وێ چەندێ كر، شۆڕشا مەزنا ئیلۆنێ چەندین دەستكەفت بدەستڤەئیناینە و دبێژیت «شۆڕشا ئیلۆنێ چەندین دەستكەفتێن دیرۆكی بدەستڤەئینان، گرنگترین وان دەستكەفتان نەچاركرنا ڕژێما ئیراقێ بوو كو د چارچۆڤەیێ ڕێككەفتنا 11 ئادارا 1970ێ دا، دانپێدانێ ب مافێن گەلێ كوردستانێ بكەت».
سەرۆكێ حوكمەتا هەرێما كوردستانێ دوپاتی ل سەر ئێكدەنگی و هەڤهەلوەستییا هێز و ئالییێن كوردستانی كر ژ پێخەمەت پاراستن و زێدەتر پێشڤەبرنا قەوارەیێ دەستووری یێ هەرێما كوردستانێ و دەستكەفتێن نیشتمانی.
د دووماهیێ دا مەسرور بارزانی هەلكەفتا شۆڕشا مەزنا ئیلۆنێ پیرۆز كر و گۆت»سلاڤ ل گیانێ پاقژێ شەهیدێن شۆڕشا ئیلۆنێ و سەرجەم شەهیدێن كوردستانێ».