هەلبژراتن و وەرگێڕان ژ ئنگلیزی:
شەمال ئاکرەیی
(١) شەڤێ هزار چاڤ یێن هەین
فرانسیس ویلیەم بۆردیلیۆن *
شەڤێ هزار چاڤ یێن هەین
لێ ڕۆژێ ب تنێ ئێک
ل سەر هندێ ڕا ژی،
رۆناهییا گەش یا جیهانێ دڤەمریت
هەر دەما رۆژ ئاڤا بوو.
هزرێ هزار چاڤ یێن هەین
دلی ب تنێ ئێک
ل سەر هندێ ڕا ژی،
هەمی ڕۆناهییا ژیانێ دڤەمریت
ئەگەر ئەڤینی نەما!
(٢) بۆ کچەکا پرچ زێڕین ل لویزیانا
ڤاشیل لیندسێی **
تو هەلاتنا ڕۆژێی
ئەگەر ستێرەک بشێت ل شوینا ڕۆژێ بهەلێت.
تو دەرکەفتنا هەیڤێی
ئەگەر ستێرەک بشێت ل شوینا هەیڤێ دەربکەڤیت.
تو بوهاری
ئەگەر دێمەک بشێت ل شوینا چەقەکێ سێڤێ ببشکڤیت
تو ئەڤینا منی
ئەگەر دلێ تە..
هندی چاڤێن تە یێن جوان یێ نازک بیت.
(٣) ئاگر و قەشا
رۆبێرت فرۆست ***
هندەک دبێژن دنیا دێ ب ئاگری ب دوماهیک هێت،
هندەک ژی دبێژن ب قەشایێ.
ل گۆر حەزا من
ئەز ل گەل وانم یێن حەز ژ ئاگری دکەن.
بەلێ ئەگەر پێدڤی کر دو جاران دنیا ژ ناڤ بچیت،
ئەز د وێ باەرییێ دا مە
من هند کەرب یا هلگرتی
دا ببێژم کارێ قەشایێ ژی مەزنە و
تێرا ژ ناڤبرنێ دکەت.
*فرانسیس ویلیەم بۆردیلیۆن Francis William Bourdillon :
18521921-هەلبەستڤانەکێ ئنگلیزە. ل زانینگەها ئۆکسفۆر Oxford خواندییە. گەلەک یێ شارەزا و سەرهەلبوو ل ئەدەبێ کلاسیکێ ئەورۆپی. کێم هەلبەست نڤیسینە کو پترییا وان ب زمانەکێ سادەنە، بەلێ د تژی نە ژ ڕامان و ئاماژەیێن کویر.
** ڤاشیل لیندسێی Vachel Lindsay (١٨٧٩ – ١٩٣١):
هەلبەستڤانەکێ ئەمریکی یێ بەرچاڤە. ل باژارێ سپریگفیلد یێ ویلایەتا ئێلینۆی یا ئەمریکی هاتییە سەر دنیایێ. ئەدەب و هونەر خواندییە و گەلەک هەلبەست و کەڤال ل پشت خۆ هێلاینە. ل دویماهییا ژییێ خۆ، تویشی تنگژینەکا دەروونی و رەوشەکا خراب یا دارایی بوو. د ئەنجام دا ل سالا ١٩٣١ێ خۆ کوشت..
***: رۆبێرت فرۆست Robert Frost (1874 -1963):
ل باژاری سان فرانسیسکۆ هاتییە سەر دنیایێ. هەلبەستڤانەکێ ئەمریکی یێ ب ناڤودەنگە. ب هەلبەستێن خۆ یێن کو ب شێوازەکێ ساناهی و ئیکسەر کو رەنگڤەدانا ژیانا ڕۆژانە و دۆرهێلی دکەن، یێ ناڤدارە. فرۆست ئیکەمین هەلبەستڤانە، چار جاران خەلاتێ بۆلیتزەر یی هەلبەستی وەرگرتییە.
نيشاندان