نارین حەمید سەبیح

وارێ من دەریایا بەخشینێ
مێرگەها مەودا ئەڤینێ
کۆترا سپی، بوهارا نوی
سەمفۆنیا گڕنژینێ
دگەل هەر لیدانەک دلی
تو یا دگەڕی د گەل خوینێ
عشقا ئەزل، حەوش و مەزل
ناسنامە و کەلها ڤەژینێ
بلندە ئارمانج و راستە
چ نەمایە ب گەهینێ
دێ سەلمینن بۆ دەردۆرا
چیا ناکەن دەستهەلینێ

راستە جارا با نە ل بارە
هەر چار ئالی ژی نەیارە
مێژوو ڕویدانێ دگێرینن
سترییان لبەر پییان د وەرینن
پەیڤ هزرا دئازرینن
بیرهاتنان لبیر دهینن
لێ چیا هەر خۆراگرن
نە چەمیانە و نا چەمینن
چەند هەولا بدەن شیان نینن
لهەمبەر هێزا پیلایی هەر
نزمن و خوە نزم دبینن
نەشێن خۆ ل بەر بگرن
ئەو خەون و خوزیێن کەڤن
ڤیان و هیڤییێن تژی تەڤن
یا تژی تاک ژێ دپەشن
ب ئێک پەیڤ ئەو دێ ڤەژن
دێ بن کولیک دێ بن نێرگز
ل بەر (ئەی رەقیب) هەر هەژن.

مارال خه‌زال

نه‌هه‌قی یێ نه‌كه‌ ل خوه‌، بێ ده‌رفه‌ت
تو جه‌مالێ خوه‌دا یه، هه‌رتشت سه‌ربه‌ست

گه‌ر زانی بی، یێ كو ژ ته‌ دیاره‌
خوه‌دیێ مال و ملكان ژخوه‌ زانیاره‌

وه‌ر گوه بده‌ سه‌ر من بێ چ دبێژه‌
یێ كو ته‌سلم ژخوه‌ مراد دگهێژه‌

من گۆت قه‌ی ئەڤ به‌ده‌ن بخوه‌ زیره‌كه‌
رێ من دا گۆت یێ ژێدكه‌ بڕه‌كه‌

گوه بده‌ دل، چ دیار و هه‌ركی
باڤێژ ژ هش، ترس و خه‌ما، ب بێره‌كی

گه‌ر بخوازی ژ سراتێ وه‌ك ئەلیف
باوه‌ری یه‌ك په‌یدا بكه‌ وه‌ك ره‌دیف
شه‌ریه‌تێ كۆ تم ل پێی من وه‌ره‌
پشتی شیاربوونێ، من گۆ دوور هه ڕه‌

بهووشتا من ژی خوه‌ فكر و رامانه‌
یێ كۆ دخه‌ودا، هالێ وان پر یه‌مانه‌

وه‌رن ترسێ ئەم بهه‌ڤرا بكوژن
به‌سسه‌ ئێدی ئەشق و ئەڤین دكوژن

ئەڤ دنیا و نعمه‌ت ژ بۆ مه‌ ئینسان
هه‌ر كێلی یێ خوه‌ دیار كه‌ ب ئیهسان

نه‌ هه‌وجه‌ یه‌ رێبه‌ره‌ك بێ ته‌ رێكه‌
هش بده‌ دل، شه‌راب ب خوه‌ وێ تێكه‌

مه‌قسه‌دا من، وه‌رن هوون ژی شیار بن
نه‌ هه‌وجه‌ یه‌ شێخ و مه‌لا ب یار بن

گرین نازی عبدولباقی

هندەک پەل
ژ کوچکێ هزرێن من یێن د بنە خوەلی
هندەکان ژی
هێش ئاگر ماچ نەکرییە
و ئەز…!
دناڤبەرا ڤان دو پەلان دا
یا سەمایێ نیشانی بایی ددەم
خوەزیێن من

کولاڤێن بەرەڤانیێ نە
دڤی شەرێ چاڤبرسی دا
ترس ژ دوور دهێت!
جار سەرێ خوە ب ڤێ خوەلیێڤە دشۆت
جارژی دەستێن خوە تژی ئاگر دکەت
جار ژبۆ رەڤینێ دپەیڤیت
جاران ژی
هێزێ ژ قورکا خوەزیان دکێشیت
خوەشی ..!
دڤێ مەیدانێدا،
یا بەرمایکێن گریێ دکەتە ئاڤەک
و ناخێ خوە یێ تێهنیبوویی ژ کەنیێ
چپک چپک پێ تەر دکەت
خوەلی …!
مینا مژەکێ دناڤا بایی دا د لەیزیت
ژ لایەکێ وێ
ئاگرو پەل و گوڕی نە
ژ لایەکێ دن
دەنگێ هەسپێ جەنگاوەرەکێ
خوە ددەت دەست ئەڤێ مژێ
و دخوازیت ڕزگار بکەت
سەرەکێ چاڤ کۆرەیە
ئەشق ژێ دپەشیت..
دەستەکێ تژی ڕەژییە
خیانەت پێ دمەشیت
ئەڤە چەند هەستان،
خوە ل کاڤلدانکێ ئەڤی لەشێ مری
کرییە خوەدی..
پرت پرت یێ ژێ دکەڤن
و د بنە خوارنا دویپشکەکێ برسی
هێش ئەز بێی هەست خوە دبینم
هێش ئەز بێی کەس خوە دبینم
ئێدی هەست…!
دناڤا مالبچویکێ شعرێن من دا
هێدی هێدی یێ مەزن دبیت
لێ چو جار ژدایک نابیت..
ئێدی کەس
دناڤا ڤێ گۆرستانا ئەشقێ دا
تاک تاک دبنە کوژەک
و جۆت جۆت دبنە کوشتی..
لێ هێش نە مە هەستیەک دیتییە!
نەژی بێهنا خوینا برینەکێ
ئەم تژی هەست کرینە.

ئەمیر سەید حامد

شوڤا ئەردێ باپیرێ من یا روبسیای
گومتلێن وێ د پەلخینە..
بەرزیڤرکێن دکەتن هەڤجارێن جانەگای
هەمی ل پشت ئێک د چەرخینە..
هێژ شینوارێن دەستێ مامێ منێ خەمۆ
ژ بەر کەزاخێ د زڤر و دڕ و سەلخینە..
دارێ مەشکێ
ژبەر نیڤشکێ
پەلاڤا زبارا گوندی
ڕهێن ملێن داپیرا من یێن قوساندین،
د شەرخینە..
نزا بۆچی ل ئەڤی جهێ
فێنک و سار
پالە و جۆتیار
خەلک و موختار
هەمی د ماندی و پەرخینە!
ڤان تامیسکان ژ جلفینا ڤێ خەوا کویر
لێڤێن من یێن کرین تەمبیر
ئەڤ چ تۆڤن ب شەڤێ د هشیار
رۆژا رۆهن د بێ کەد و کار
نە پاشەرۆژ نە ژی زێمار
شانێن لەشێ من هشک بوون
ژ قەهر و خەما د کەرخینە.