زاخۆ، دلۆڤان هالۆ:
ڕاهێنەرەکا گەشەپێدانا مرۆڤی دیارکر کو هەڤژینێن نوکە ژلایێ لەشی ڤە نێزیکی ئێکن، لێ ژلایێ ڕوحێ ڤە ژ ئێك دویرن و گۆت؛ ئانکو د ئێك مال دا دژین وەکو لەش، لێ وەکو ڕح هەر ئێك یێ ل جهەکێ، هەڤژین پێدڤی ب پەیوەندیا ڕۆحێ نە.
ڕوژین ئامێدی ڕاهێنەرا گەشەپێدانا مرۆڤی دیار کر کو هەستکرن ب تنێبونێ د پڕۆسەیەکا هۆسا پیرۆز دا گۆپیتکا ژان و ئێشانێ یە، چونکی هەردو هەڤژین پەیوەندیا ڕۆحێ پشت گۆهـ دهاڤێژن و گۆت؛ “ئەڤ چەندە ژی دبیتە ئەگەرێ نەبونا دەربرینا هەست و هزران و گەنگەشەیێ و ئاخفتنا جوان و هەمبێز و حەزژێکرن و دلۆڤانی و چاڤدان و پالپشتی و هاریکاریێ دناڤبەرا وان دا.
ڕاهێنەرا گەشەپێدانا مرۆڤی دیار کر ژی، پێدڤیا مرۆڤان ژلایێ ڕۆحێ ڤە ب هندەك تشتان دیاردکەت، هەموو مرۆڤ وەکو ڕۆح د فیترەتا خۆدا پێدڤی ب ئەمانەتێ و دلۆڤانیی و ڕاستیێ و باوەریێ نە و گۆت؛ “ئەم پێدڤی ب ڕێزگرتن و ئاخفتنا خۆشین و یا ژ هەموویێ گرنگتر ژی ئەم پێدڤی ب هەڤالەکێ ڕۆحی نە”.
ڕۆژینێ د بەردەوامیا ئاخفتنێن خودا دیار کر کو نە هەر مالەکا ژ دەرڤە دیار بکەت یا ئاڤایە رامان ئەوە د ژوورڤە ژی یا ئاڤایە، هندەك جاران نێزیكترین کەس دوورترین کەسە د ناڤخۆیا مەدا و گوت؛ “چونکی بەهرا پتریا هەڤژینان بەردەوام مژویلی کارێن ژ دەرڤە و ژوورڤەنە و مژویلی خودانکرنا زاڕۆکان و چێکرنا خوارنێ و بەرپرسیارەتیا خێزانێ نە ب شێوەیەکێ گشتی”.
ڕاهێنەرا گەشەپێدانا مروڤی دیار کر کو ژیانا هەڤژینیێ پێدڤی ب چ موعجیزەیان نینە داکو یا سەرکەفتی بیت و گۆت؛” بەلکو پێدڤی ب دوو کەسایە کو ژ هەموو لایەنانڤە د هشیار بن و نابیت کەسەك ژ هەڤژینان هەوڵ بدەت ل سەر کیستێ لایەنێ دی خۆ بسەربێخیت یان زال بیت.”
نيشاندان