هەولێر، قائید میرۆ:
پەیڤدارێ وەزارەتا ساخلەمیێ خویاكر، ئەڤ سالە هەتا نوكە چو حالەتێن تایا خوینبەربوونێ ل هەرێما كوردستانێ نەهاتینە تۆماركرن و دبێژیت: پێدڤیە وەلاتی د هشیاربن دەمێ كڕینا گوشتی و رینمایێن خۆپارێزیێ بەرچاڤ وەربگرن.
دكتۆر سەركار سورچی، پەیڤدارێ وەزارەتا ساخلەمیێ بۆ رۆژناما ئەڤرۆ دیاركر، تایا خوینبەربوونێ نەخۆشیەكا ڤایرۆسیە و بۆ مرۆڤان دهێتە ڤەگوهاستن و گۆت: «ئەڤ سالە هەتا نوكە چو حالەتێن نەخۆشیا تایا خوینبەربوونێ ل هەرێما كوردستانێ نەهاتینە تۆماركرن، هەتا حالەتێن گومان لێكری ژی نینن، پلانەكا نیشتیمانی یا سالانە هەیە، تایا خوینبەربوونێ وەكی ڤایرۆسێن دی زوو بەلاڤ نابیت، وەزارەتا ساخلەمیێ ب هەماهەنگی ل گەل وەزارەتا چاندنێ پێنگاڤێن خۆ پارێزیێ بجهئیناینە، ژ وان ژی ئەو ئاژەلێن ژ دەرڤە دهێنە د ناڤا كوردستانێ دا دهێنە كەرەنتینەكرن و هەتا پشكنین بۆ نەهێنەكرن نابیت بهێنە بازاڕی».
دكتۆر سەركار سورچی گۆتژی: «پێدڤیە جهێن فرۆتنا گۆشتی هەموو رێنمایێن ساخلەمیێ بەرچاڤ وەربگرن، داخوازێ ژ وەلاتیان دكەین گۆشتی نەكڕن، ئەگەر ژێدەرێ وی نەهێتە زانین».
نيشاندان