سەرۆك مەسعود بارزانی پێشوازی ل نوح یەلماز و هەردو ئالییان رەوشا دەڤەرێ گەنگەشەكر.
بارەگەهێ بارزانی د بەیاننامەیەكێدا بەلاڤكر» سەرۆك مەسعود بارزانی ل پیرمام پێشوازی جێگرێ وەزیرێ دەرڤەیێ توركیا و شاندێ د گەلدا كر كو پێكهاتبوو ژ نائیل بۆرا ئینان، بالیۆزێ توركیا ل ئیراقێ و ئیرمان توپچوو، قۆنسلێ توركیا ل هەولێرێ و هەژمارەكا دیپلۆماتكارێن توركیا».
ب گۆڕەی بەیاننامەیا بارەگەهێ بارزانی» د دیدارەكێدا گەنگەشە ل دۆر رەوشا ناڤخوەییا هەرێمێ و پێنگاڤێن پێكئینانا كابینەیا نوو یا حوكمەتا هەرێما كوردستانێ هاتە كرن هەروەسا باس ل پەیوەندیێن د ناڤبەرا هەرێما كوردستانێ و بەغدایێ هاتە كرن».
بارەگەهێ بارزانی دیاركر ژی» هەر د وێ دیدارێدا بیر و بۆچوون ل دۆر رەوشا سیاسییا دەڤەرێ و ئەگەر و پێشهاتێن پاشەڕۆژا دەڤەرێ ب گشتی هاتنە لێكگۆهارتن» .
پەیوەندیێن د ناڤبەرا هەرێما كوردستانێ و توركیا و پێشڤەبرنا دۆستایەتییا د ناڤبەرا هەردو ئالییاندا و پرۆسەیا چارەسەریێ و ئاشتیێ ل توركیا تەوەرەكێ دی یێ وێ دیدارێ بوون.

سەرۆك مەسعود بارزانی ل سەلاحەدین پێشوازی ل هەژمارەكا نڤیسەر و ئەدیب و رەوشەنبیرێن عەرەب كر كو ب هەلكەفتا ڤەكرنا پێشانگەها نێڤدەولەتییا 17 یا پرتووكێ ل هەولێرێ سەرەدانا هەرێما كوردستانێ دكەن.
د وێ دیدارێدا شاندێ مێهڤان رێز و پێزانین بۆ رۆلێ دیرۆكی یێ سەرۆك بارزانی د خەباتا گەلێ كوردستانێ دا و پشتەڤانیێ ل فەرهەنگا پێكڤەژیانێ و ئارامیێ هەبوو هەروەسا كەلتوورێ مێهڤاندۆستیێ و گیانێ هەڤدوقەبوولكرنێ و رێزگرتنێ ل دەف گەلێ كوردستانێ بلند هەلسەنگاند و وەكو نموونەیەكا بلند و جودا ژ دەڤەرێ هەژمارت.
هەر د وێ دیدارێدا سەرۆك بارزانی ب گەرمی ب خێرهاتنا شاندێ مێهڤان كر و كورتییەك ل دۆر دیرۆكا خەباتا گەلێ كوردستانێ و قۆناغا سەرهلدانێ و پشتی سەرهلدانێ بۆ شاندێ مێهڤان بەرچاڤكر و دوپاتی ل وێ چەندێ كر كو سەركەفتنا ئەزموونا هەرێما كوردستانێ بۆ وێ چەندێ دزڤریت كو گەلێ كوردستانێ پشتی سەرهلدانێ، لێبۆرین ل دەف هەبوو و دەست بۆ تۆلڤەكرنێ ژ نەیارێن خوە نەبر و بەرپەرەكێ نوو ژ ژیانا سیاسییا خوە ڤەكر.
سەرۆك بارزانی د ئاخڤتنێن خوەدا گرێدای رەوشا سیاسییا ئیراقێ دوپاتی ل وێ چەندێ كر كو بۆ چارەسەركرنا كێشەیان پێدڤییە د چارچۆڤەیێ دستووریدا هەموو ئالی پێگیری بنەمایێن هەڤپشكیێ و هەڤسەنگیێ و لهەڤهاتنێ ببن.
د پشكەكا دی یا وێ دیدارێدا ل دۆر كێشەیێن بنەڕەتی یێن دەڤەرێ و رەوشا سووریێ بەرهەڤبوویان كۆمەكا پرسیار و تێبینی ئاراستەی سەرۆك بارزانی كرن و سەرۆك بارزانی ژی بەرسڤا تێبینی و پرسیاراێن بەرهەڤبوویان دا.

سەرۆك مەسعود بارزانی ل سەلاحەدین پێشوازی ل موسەننا ئەلسامەرایی، سەرۆكێ هەڤپەیمانییا عەزم كر.
بارەگەهێ بارزانی بەلاڤكر» د دیدارەكێدا گەنگەشە ل دۆر رەوشا سیاسییا ئیراقێ و دەڤەرێ هاتە كرن و دوپاتی ل سەر هەماهەنگیێ د ناڤبەرا ئالیێن سیاسی یێن ئیراقی بۆ دەربازكرنا كێشە و ئاستەنگان هاتە كرن».

نێچیرڤان بارزانی، سەرۆكێ هەرێما كوردستانێ پێشوازی ل نوح یەلماز، جێگرێ وەزیرێ دەرڤەیێ توركیا كر.
سەرۆكایەتییا هەرێما كوردستانێ بەلاڤكر» د كۆمبوونەكێدا، پێشڤەبرنا پەیوەندیێن توركیا ل گەل ئیراقێ و هەرێما كوردستانێ و پڕۆژەیێ رێكا گەشەپێدانێ هاتە گەنگەشەكرن، هەروەسا ل دۆر هاریكاریێ د ناڤبەرا واندا د وارێن جودا دا، ب جۆرەكی كو ببیتە ئەگەرێ ب هێزكرنا ئاسایشێ و ئارامیێ و گەشەكرنێ ل دەڤەرێ، بیر و بۆچوون لێكگۆهارتن».
ب گۆڕەی سەرۆكایەتییا هەرێمێ» پرۆسەیا ئاشتیێ ل توركیا تەوەرەكێ دی یێ كۆمبوونێ بوو كو تێدا نێچیرڤان بارزانی پشتەڤانییا هەرێما كوردستانێ بۆ سەرئێخستنا پرۆسەیێ دوپاتكر. هەر سەبارەت ڤێ چەندێ هەردو ئالی د هەڤڕابوون كو ئاشتی دێ كاریگەرییا ئەرێنی ل سەر هەموو دەڤەرێ هەبیت و ئاسوویێن بەرفرەهتر بۆ گەشەپێدانێ و هاریكارییا هەڤپشك ڤەكەت».
هەروەسا د كۆمبوونێدا رەوشا سووریێ، دوماهی پێشهاتێن دەڤەرێ وچەندین پرسێن دی یێن جهێ گرنگییا هەڤپشك، هاتنە باسكرن.

مەسرور بارزانی، سەرۆكێ حوكمەتا هەرێما كوردستانێ، پێشوازی ل كریستیانە هۆمان، بالیۆزێ ئەلمانیا ل ئیراقێ كر.
د كۆمبوونێدا، بزاڤێن پێكئینانا كابینەیا دەهێ یا حوكمەتا هەرێما كوردستانێ هاتە گەنگەشەكرن و هەردو ئالی د هەڤڕابوون ل سەر وێ چەندێ پێدڤییە كابینەیەكا ب هێز و ئێكگرتی ل نێزیكترین دەم و بەری هەلبژارتنێن جڤاتا نوونەرێن ئیراقێ بهێتە پێكئینان.
هەروەسا دوپاتی ل گرنگییا نەهێلانا هەموو كێشە و ئاستەنگ و بهانەیێن ل پێشبەری دەستپێكرنا هنارتنا پەترۆلا هەرێما كوردستانێ هاتە كرن.
بالیۆزێ ئەلمانیا پشتەڤانییا وەلاتێ خوە بۆ هێزا پێشمەرگەی و هەرێما كوردستانێ و خواستا زێدەتر پێشڤەبرنا پەیوەندیێن دو ئالییانە دوپاتكر.
د پشكەكا دی یا كۆمبوونێدا، بیر و بۆچوون ل دۆر رەوشا گشتییا ئیراقێ و دوماهی گوهۆڕین و پێشهاتێن دەڤەرێ هاتنە لێكگۆهارتن.

سەرۆكێ شاندێ پارتی بۆ پێكئینانا كابینەیا نوو یا حوكمەتا هەرێما كوردستانێ راگەهاند: ب ئومێدین كابینەیا نوو د دەمەكێ زوو دا بهێتە پێكئینان و كۆمبوون ژی ب باشی ب رێڤەدچن.
هشیار زێباری، سەرۆكێ شاندێ پارتی دیموكراتی كوردستان بۆ پێكئینانا كابینەیا نوو یا حوكمەتا هەرێما كوردستانێ، د كۆنفــــــــــــــرانسەكێ رۆژنامـــــــەڤانیدا گۆت» كۆمبوونێن ل گەل ئێكەتی نیشتمانی كوردستان بۆ پێكئینانا حوكمەتا نوو یا هەرێما كوردستانێ ب باشی ب رێڤەدچن».
هشیار زێباری گۆت ژی» كاغەزا سیاسی و بەرنامەیێ حوكمەتا نوو یێن ب دوماهی هاتین، نوكە د قۆناغا بەلاڤكرنا پۆستانداینە».
باس ل وێ چەندێ ژی كر» ب ئومێدین كابینەیا نوو یا حوكمەتا هەرێمێ زوو بهێتە پێكئینان».
پێشتر ژی مەسرور بارزانی، سەرۆكێ حوكمەتا هەرێما كوردستانێ راگەهاندبوو» پەیوەندیێن پارتی و ئێكەتیێ د ئاستەكێ باش دانە و كۆمبوون ژی ب باشی ب رێڤەدچن و هیڤیدارین بشێین د دەمەكێ كورتدا حوكمەتێ پێكبینین».