سوسمان عومەر ئەحمەد

دلۆپ دلۆپ چپکێن بارانێ ژ ئەسمانێ شین ب سەر ناخێ من دا دباری، گول بەیبین دباخچێ ناخێ من دا هاتنە ئاڤدان، دیمەن و سروشتێ ئەوێ ڕۆژێ سەڕنجا من بۆ خوە ڕاکێشابوو، من دەفتەرەکا خوە یا بیرەوەرییان دناڤ دەستێن خوەدا هەمبێز کربوو و بەرەڤ ژۆرا خوە یا تاری چووم، دیمەنێ جوانێ ئەوێ ڕۆژا ساهی پێنڤیس هاڤێتە دناڤ دەستێن لەرزی دا، پێنڤیسی هەست و هزرا هەڤپەیڤینەکا بێ ژڤان کر دگەل دەفتەرەکا بیرەوەرییان.
دەمێ پێنڤیسێ شین دەستێ من گرتی چیڕۆکا ژیانا من دلۆپ دلۆپ وەکی بارانێ ژ پێنڤیسێ من هێدی هێدی بارین ل سەر ڕووپەلی، پێنڤیسێ شین ل سەر ڕووپەلەکێ سپی نڤیسی، چیڕۆکا ڕۆژەکا تژی هزر قەستا هزرێن من کر، هەر ئێکێ ژ ئەوانا هزرا چیڕۆکەک هەلگرتبوو، من دڤییا ئەوان هزران بکەم چیڕۆکەک داکو وەکی هەڤالا رێكا هزران دگەل من دا بمینن. شەڕەنیخا هزران دەستپێکر و گۆت: چ بوو ئەگەرێ هاتنا ئەوان هزران چیڕۆک یان ئەز؟ هزر وەکی ڕووبارێ ئاڤێیە ناڕاوەستیت بەردەوامە ل سەر ڕێکا خوە ئەگەر ڕاوەستییا دێ کەڤزێ گرت و بێهنەکا نەخوەش دێ ژێ هێت، بەلێ هەمی ئاڤ نە زەلالین! هزرا زەلال ژێدەرێ ئەوێ دلێن پاکن یێ کو ئاڤا هزران ب زەلالی دهێلن! دلێن پاک ژ ئاخێنە، هەردەما بارانەکا زەلال باری دێ گول د دلێ
ئەوان دا بشکڤن، ب دلەکێ پاک سروشتی هەمبێز دکەن، ئەو دل یێ بۆ دلۆڤانییێ و پاکییێ هاتینە هەبوونێ،پەرتووکا دلێن پاک ڕووپەلێن سپینە و ب پێنڤیسێ شین دهێتە نڤیسین، ژیان بۆ ئەوان کەسان یا ب زەحمەتە چونکی هەردەم هەولددەن بارانا دلۆڤانییێ ب باخ و باخچەیێن هەمی کەسان دا ب بارینن و ب هاتنا ئەوێ بارانێ دێم گەش و ڕوون دبین، ئەز د زانم هوین گەلەک حەز ژ دلێ خوە یێ پاک و بریندار دکەن، زێدەڕووییێ د حەزژێکرنا خوەدا نەکەن داکو زێدە باشییا هەوە نەبیتە ترسترین خەونا هەوە یا شەڤێ، د ئەوێ خەونێ دا گژلۆک دێ ب چاڤێن هەوە دا هێتە خوارێ و دەنگێ بریسییان دێ هەوە ژ خەونا هەوە هشیار کەت. دگەل بارینا هەست و هزرێن من، ڕۆندکێن عەوران دگەل ڕۆندکێن پێنڤیسی تێکەلبوون! ددەمەکێ دا دەنگێ بریسییان پێنڤیسێ شین ڕاوەستاند، ناخێ من وەکی سروشتی پشتی بارانێ هەناسەیەکا کویر هەلکێشا و ل هیڤییا بارانەکا دی ما.
دەمێژمێرا هزرێن من ب دویماهیک هات، شەڤێ ئێڤارا هزران ڕەش و تاری کر و ب گڕنژینەکا ب خەم گڕنژی، د ئەوێ دەلیڤێ دا دەمێژمێرا هزرێن هەڤالا رێكا من دەستپێکر، ب دەنگەکێ نزم گۆت: ئەسمان چەندێ مەزنە ئەگەر هەیڤ تێدا نەبیت هەر یا تارییە! ڕۆناهییا هەیڤێ و بێدەنگییا شەڤێ چیڕۆکەکا بێ دویماهیکە. ئەز نەچاربووم هەمی تشتان بتنێ بکەم، ئەز نزانم کا ئەز مەزن کریمە، بەلێ پا ئەز فێری تشتەکێ کرم، مرۆڤ دەمێ دمینت بتنێ خوە دنیاسیت و کەسێن وێرەک ل دویڤ ڕوحا خوە دچین هەتا دبینن. دیساڤە من خوە ژ نیشکەکێڤە دیت و ڕۆندکەکا نەباری دچاڤێن من دا تەیسی! ڕۆحا من ژی وەکی زارۆکەکێ ساڤا گری، ئەی بارانا خەریبییان ژ بارینا ڕۆحێ، ڕەهێن دلی شەهداردبن و ژ مرنێ جاندار دبن، ژ بۆ بهارەکا نوو جارەکا دی ئەڤیندار دبن، خەم دێمی دگوهۆریت، سیمایێن بەرێ هشک دبن و شێوازێن نووی ژ دایک دبن، ڕووپەلێن ژیانێ نووی دبنڤە لێ چیڕۆکێن ئەوێ هەر دوبارە دبن، ڕویدان دبنە ماک و بیرهاتن تێدا ژ دایک دبن.

ژینێ رێکانی

هەمی پەیڤێن
هنگڤینی
هەمی سۆزێن دلینی
هەمی خەونێن پیڤازی
لپێك گەهەشتنێ‌
ل شەهیانەكا نەورۆزی
ببن وردێن
سپێدەهیان
من ژ خەوێ‌ هشیار بكەن
لجەم من دبن
عەورێن بهاری
شڕكێن بارانا وی
تەڕ ناكەن
ئەڤی دلێ‌
ب عەشقێ‌ كەفتی
تنێ‌ بێژە من
چاڤێن تە
د نابەینا من و دیتنێ‌ دا
هەر تنێ‌ من دبینن.

دلۆڤان هالۆ

خەریبم
ژ وێ گڕنژینا
ل سەر لێڤێن تە
سەمایێ دکەت
ژ بێهنا پرچا تە
یا کو هیڤییا
من خۆ د ناڤ دا
بەرزە دکەت
ژ شەڕێن تە
یێن کو
جەنگێ جیهانی یێ سییێ‌
د ناڤ دلێ من دا
بەرپا دکەت
ژ نێرینێن تە
یێن کو بێ مەی
من سەرخوەش دکەت
ژ نامەیێن تە
یێن کو مۆبایلا من
ب ڕەوش دکەت
ژ وێ بەژنا تە یا جوان
یا کو بتنێ شیایی
من مەندەهۆش بکەت
ژ وان چاڤێن تە یێن
وەکی دەریایێ
کو من بن ئاڤ دکەت
ژ وان سوحبەتێن تە
یێن هەر شەڤ
من ژ ڤێ دونیایێ
ڤەدەر دکەت
ژ وێ سەمفۆنییا
دەنگێ تە یا کو
هەردەم د گوهێ من دا
دەنگڤەددەت
و ب ئێك پەیڤ
خەمێن من هەمییان
بژالە دکەت.

زنار تۆڤی

ل شەڤەكا رەش و تاری دا، چاڤێن من د خەوەكا كویر دابوون، ئەز ل سەربانێ‌ خانیێ‌ مە یێ‌ گوندی یێ‌ نڤستی بووم، من ئاگەه ژ بایێ‌ فەلەكێ‌ نەبوو، ئەز زارۆیەكێ‌ د ژییێ‌ حەفت سالیێ‌ دابووم، ناڤبەینەكێ‌ ئێكێ‌ ب دەنگەكێ‌ بلند گازی من كر و گۆت، هلۆ ژ خەوێ‌ رابە، هندە دۆژمنی ب سەر گوندێ‌ مە دا بگرت و دێ‌ مە گرن و دێ‌ مە بەرەف چارەنڤیسەكێ‌ نەدیارڤە بەن، ئەز ئیكسەر ژ خەو رابووم، ل وێ‌ شەڤا رەش، من پرسیار كر، دێ‌ كیڤە چین ڤێ‌ نیڤا شەڤێ‌؟ برایێ‌ من گۆت، هلۆ رابە.. برا، رژێما بەعسی ئەنفالا رەش یا ل مە راكری، دێ‌ باركەین و دێ‌ ژ گوندی چین، دەنگێ‌ زێمار و گریێ‌ گوند یێ‌ دۆرپێچكری.
ل وی دەمی، دەنگێ‌ گریێ‌ و ترسێ‌ و تاریاتیا شەڤێ‌ ل گەل ئیك تێكهەلببوون، من پرسی: دێ‌ كیڤە چین، خەوا من یا دهێت؟ جارەك دی برایێ‌ من گۆت، هلۆ برایێ‌ من، لەزێ‌ بكە، دڤێت ئەڤ شەڤە ئەم ژ گوندی بچین و خۆ رزگار بكەین. وێ‌ تاریاتیێ‌ ئەم ژ گوندی دەركەفتین، ئەم نەشێن فانۆسان ژی هەلبكەین ژ ترسا دۆژمنی، ئەم كەفتینە وان رێكێن نەخۆش و وان گەلی و ژێهەلیان، هەر بێهن بێهن، من پرسیار دكر: دێ‌ كیڤە چین؟ مالا مە بەرسڤ ددا و دگۆت، دێ‌ ل ڤێ‌ ملێ‌ و نهالێ‌ دەرباز بین و دێ‌ گەهینە جهەكێ‌ ئارام و پاشی بنڤە و ئەم ژی دێ‌ بێهنا خۆ ڤەدەین. ئەم چەندین دەمژمێران ب پییان چووین، هێشتا خەوێ‌ دلێ‌ من بەرنەدایە و جاران ئەز یێ‌ خۆ بەر ددەمە سەر ئەردی؛ داكو پیچەكێ‌ بێهنا خۆ ڤەدەم، وەستیان و خەو و ترس یێن تێكەلی ئێكبووین، هەردو رەخێن رێكێ‌ د پرن ژ مرۆڤان و هەموو یێ‌ قەستا سەر سنووران دكەن و ئەم یێن مەلویل و ژار بووین.
من دڤێت تێر بنڤم و خۆ لسەر وان كەڤرێن د رێكێ‌ دا درێژ بكەم، ئێدی ئەز ژ پییان كەفتم. پشتی چەند دەمژمێران و چەندین كیلۆمەترێن رێكێ‌ مە ب پییان بڕین، بەلێ‌ مالا مە هەر یێ‌ دبێژن: پێن خۆ سڤك بكە و وەرە دا بچین، نوكە نە دەمێ‌ بێهنڤەدان و خەوێ‌ یە، دوژمن یێ‌ لدووڤ مە را دهێت و ئەم دێ‌ كەڤینە دەستێن درندەیان. من ژی ب هەر حالێ‌ هەیی و هێدی هێدی، ئەو رێیا پری ژێهەلی بری و مە خۆ گەهاند، دویف ئاڤێ‌، مە هندەك ئاڤ ڤەخوار و ئەم ل سەر ئەردێ‌ هشك بێ‌ نڤین نڤستین، هێشتا چاڤێن مە تێر خەو نەبووین، بوو سپێدە و دنیا زەلال بوو، تاڤێ‌ دا سەرێ‌ زنارا و مال گۆت، هلۆن رابن دابچین. دونیا قولیزێنە و كەس د كەسێ‌ ناگەهیت و د رەوشەكا پەریشان داینە و ئەو خەلكە هەموو یێ‌ لەزێ‌ دكەن، داكو خۆ بگەهیننە سەر سنووری، چونكی هەكە دوژمن بگەهیتە مە دێ‌ مە هەموویان گرن و كوژن، وی دەمی مرن هاتە پێش چاڤێن مە هەموویان، كەسێ‌ ژ مە نەدزانی دێ‌ چارەنڤیسی مە چ بیت، زارۆك و پیر و كال برێڤە د مرن، سەرێ‌ رێیا لبەر مە بەرزەببوو، جارەكا دی مە دا رێ‌، ئەم چووینە سەر سنووری، وێ‌ رۆژێ‌ من ترس و برس دیتن و هەتا نوكە ژی، من خەوا خۆش نەكریە و چاڤێن من تێر خەو نەبووینە و د چاڤێن من دا، ئەنفال بوویە درندەترین و نەخۆشترین چیڕۆكا ژیانێ‌.