بێوار حەمدی:
پشتی سەرهەلدانا سوشیال میدیایێ د جڤاکی دا، خواندن و گرنگیدان ب پەرتوکان کێم بۆیە و خواندەڤانێن پەرتوکا کاغەزی ل هەمبەر خواندەڤانێن بابەتێن کورت یێن سوشیالێ کێمترن.
مەسعود خالد گولی رێڤەبەرێ پەرتوکخانێن گشتی ل پارێزگەها دهوکێ بۆ ڕۆژناما ئەڤرۆ دیار کر کو ب بەراورد دگەل سالێن بوری هژمارا خواندەڤانێن پەرتوکان زێدەتر لێهاتیە، چونکی هەکە بازارێ وان نەبا دا دەرگەهێ پەرتوکخانان هێنە گرتن و گۆت؛ پتر ژ سێ چارێکێن وان کەسێن سەرەدانا پەرتوکخانێن مە دکەن گەنجن ژبۆ خواندنێ یان داخوازکرنا پەرتوکان دهێن و سالانە ب هزاران قوتابی ژی ژبۆ مەرەما نیاسینا پەرتووکخانەیێن مە سەرەدانێ دکەن.
مەسعود گولی، د بەردەوامیا ئاخفتنێن خۆدا دیار کر، مخابن سوشیال میدیایێ کارتێکرنەکا مەزن یا نەرێنی لسەر خواندنا پەرتوکان کریە و گۆت؛ بو نموونە خواندەڤانێن پەرتوکا کاغەزی ل هەمبەر خواندەڤانێن بابەتێن کورت یێن سوشیالێ کێمترن، ئەڤە ژی دبیتە ئەگەر کو خواندەڤان ژبۆ نڤێسینێن درێژ تەمبەل ببن، هەردیسان کارتێکرن ل چاپخانەیان ژی بویە، ژبەرکو ڕێژەیا چاپکرنێ گەلەک کێمبویە .
شیان مەهدی کانیسارکی، بەرپرسێ ئەکادیمیا جیهان ل دهۆکێ و خواندەڤانێ پەرتوکان سەبارەت بابەتی گۆت؛ ئەز پتریا دەمێ خۆ ب خواندنا پەرتوکانڤە دبورینم و ل مالا من و ل جهێ کاری پەرتوک لێ هەنە، چونکو پەرتوکان گەلەک قەنجی ل گەل من کرینە و وەکو هەڤالێن بێ بەرژەوەندی نە دگەل من.
شیان گۆتژی؛ پتریا گەنجێن مە نوکە بەرێ خو دایە پەرتوکێن وەرگێرایی، ئەڤ چەندە ژلایەکیڤە باشە لێ ژ لایەکێ دیڤە مە گەلەک نڤیسەرێن باش هەنە دڤێت پتر گرنگی ب بەرهەمێن وان بهێتە دان.
شیان ئەو چەندە ژی دازانین، خواندنا رومانان وەلاتان پێشڤە دبەت، لێ ئەم خەلەت یێن تێگەهشتین، چونکو ئەوێ رومانێ وەردگێریت یان دەزگەهێن چاپێ هزر ناکەن کا کیژ رومان دێ مللەتی پێشڤە بەت، بەلکو بتنێ هزر دکەن کا کیژ رومان ژهەموویان پتر دهێتە فروتن، لەوما بڤی شێوەی زمانی و ڕێنڤیسێ ژی تێک ددەت .
سەورەت عەبدوللا، رێڤەبەرێ چاپخانەکا پەرتوکایە، دیار کر کو ڕێژەیا چاپکرنا پەرتوکان بەرامبەر سالێن بوری گەلەک کێم بویە، چونکی د بەرێدا گەلەک دانە دهاتنە چاپکرن و د نوکەدا کێمترە.
رێڤەبەرێ چاپخانێ گۆتژی؛ ژبۆ چاپخانان ژی گەلەک یا بزەحمەتە کو کێم پەرتوکان چاپ بکەت، لێ ئەم هەتا ڕاددەیەکێ مەزن پشتەڤانیا نڤیسەران دکەین ژبۆ چاپکرنێ، ب تایبەت گەنجان، لێ د بەرامبەردا قازانجێ مە گەلەک یێ کێمە.
نيشاندان