دهۆك، لەزگین جۆقی:

رێڤەبەرێ شوونوار و كەلەپوورێن پارێزگەها دهۆكێ راگەهاند، باژێڕەكێ دیرۆكی، كو دیرۆكا وی بۆ بەری 5000 هزار سالان ڤەدگەڕیت هاتە دیتن.
د. بێكەس بریفكانی، رێڤەبەرێ شوونوار و كەلەپوورێن پارێزگەها دهوكێ بۆ رۆژنامەیا ئەڤرۆ گۆت: «گۆڕستانەكا گرنگ ب رەخ ڤی باژێڕی ڤە هاتیە دیتن، هەژمارەكا مەزن یا گۆڕان د ناڤ دا هاتینە دیتن، هەتا 40 گۆڕانە و ب ئاخا قەلاندی هاتینە چێكرن، دیرۆكا وان بۆ سەردەمێ هلنستی – سلوقی ڤەدگەڕیتە سەدەیا سێیێ بەری زاینێ».
گۆتژی: «ئەڤ جهە سەر ب ناوچەداریا خانكێیە ل دەڤەرداریا سێمێلێ، ل نێزیك گوندێ خانكا كەڤنە بناڤێ (گرێ تەحسین لەگ لەگ)، هەمی گۆڕ بۆ مۆزەخانەیا دهۆكێ‌ یا نیشتمانی دێ‌ هێنە ڤەگوهاستن».

هەولێر، قائید میرۆ:

رێڤەبەرێ گشتیێ بازرگانی دیاركر، سوبەهی 1/9/2025 دوماهی رۆژە بۆ تۆماركرنا فۆرما ئەلكترۆنی و دێ قووناغا ئێكێ یا ئەلكترۆنیكرنا فۆرما خۆراكی ب دوماهی بهێت و دبێژیت: قووناغا دویێ یا ئەلكترۆنیكرنا فۆرما خوارنێ‌ بهێتە دەستپێكرن.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیاركر، پڕكرنا فۆرما ئەلكترۆنی یا ئاهێن خوارنێ دێ‌ كەڤیتە د قووناغا دویێ دا، رێكارێن وێ گوهۆڕین ب سەردا هێن و بیتە بپارە و گۆت: «هەتا نوكە ل سەرانسەری هەرێما كوردستانێ زێدەتری 86%ێ وەلاتیان خۆ تۆماركریە، هەر وەلاتیەكێ ناڤێ خۆ تۆمار نەكربیت هەتا نها دێ هێتە بێ بەهركرن ژ وەرگرتنا پشكا خوارنا هەیڤانە».
نەوزاد شێخ كامل گۆتژی: «قووناغا دویێ یا فۆرما ئەلكترۆنی دی بڕێڤەچیت، ئەو ژی ڤەگوهاستنا ناڤێ وەلاتیان و تۆماركرنا زارۆكێن هەتا نوكە نەهاتینە تۆماركرن، هەروەسا بەلاڤكرنا پشكا ئەرزاقی دێ بیتە ئەلكترۆنی و ئیدی شێوازێ بەرێ یێ كسلاسیك نامینیت، هەتا بریكار دێ ب رێیا ئەلكترۆنی لیستێن خۆ هنێرن و هەر كەسەكێ بۆ دەمێ دو هەیڤان ژی سەرەدانا بریكاری نەكەت دێ ئەرزاقێ‌ وی هێتە راگرتن».

ئامێدیێ، مەحمود نهێلی:

ل دەمێ سەرەدانا گەشتیاران بۆ نێزیك جهەكی ل كۆڕنیشێ رییێ شین، ل سنۆرێ ناوچەدارییا شێلادزێ، هەژمارەكا مینان هاتنە دیتن، ئەڤە ژی بوویە جهێ مەترسیێ بۆ وان كەسان یێن ب مەرەما گەشت و سەیرانان قەستا وێ دەڤەرێ دكەن.
رێگر بێسفكی، بەرپرسێ راگەهاندنا رێڤەبەریا گشتی یا كاروبارێن مینان ل دهوكێ بۆ رۆژناما ئەڤرۆ دیار كر، پشتی ئەو هاتینە ئاگەهدار كرن، ب هەبوونا مەترسیان ل گەلیێ بالندا، تیمێن وان ل جهێ دەستنیشانكری ئامادەبوون و دو مین ژ جۆرێن V69 و VS50، ل نێزیك كۆڕنیشێ‌ روویێ‌ شین بوون هاتنە راكرن و ژناڤبرن.
ناڤهاتی گۆت: «ژبۆ پشترابوونێ ژ سەلامەتیا وەلاتیان و ئەو خەلكێ قەستا وێ دەڤەرێ دكەت، هەروەسا كۆمپانیێن چێكرنا جادەیێ، نوكە تیمێن مە مژوولی لێگەڕیانێنە و ب هاریكاریا خودێ چو مەترسیێن مین و تەقەمەنیان ل وێ دەڤەرێ ناهێلین».

رەمەزان زەكەریا

ئەڤ سالە هشكەسالیێ كاریگەری ل سەر دارێن چیایی ژی دروستكریە، ل دەڤەرا دینارتێ كو هژمارەكا داران‌ ژبەر داكەفتنا ئاستێ ئاڤێ و نەهاتنا بارانێن پێدڤی هشكبووینە.

عەبدولحەكیم عەبدولجەبار، شڤانێ پەزیە بۆ ئەڤرۆ گۆت: ل چیایێن دەڤەرێ ب رەنگەكێ گشتی گەلەك دار هشك بووینە، رەنگە 100 دارا دارەك ب تنێ دروست مابیت، ئانكو دارەكا مازی دروست مابیت، ئەوێن دی ژی تووشی نەخۆشیا هشكە سالیێ بووینە، بەلگا وێ روژانە د وەریێت.
كەمال تەها وەلاتیەكێ دەڤەرێیە بۆ ئەڤرۆ گۆت: باب و باپیریێن مە ل گوندی دبێژن مە زۆر هشكە سالی دیتینە، بەلێ چ سالا وەك ئەڤ سالە نەبوویە، هندەك كانی ل گوندێ مە گیرەی هەنە چ سالان هشك نەبوینە، ئەڤ سالە دو كانی هشكبووینە و كاریگەریەكا زۆر هاتیە كرن بۆ نموونە ئەڤ سالە هیچ چلی نینە بۆ پەزی.
موقەدم بێدار لەزگین بەرپرسێ هێزا پێشمەرگەهێن ژینگەهی ل دەڤەرا دینارتە بۆ ئەڤرۆ گۆت: كارەساتەكا مەزنە ژبەر نەبوونا بارانان رێژەیەكا زۆرا دار و بارا هشك دبیت و بەردەوام د هشكبوونێ دانە و لاواز بووینە، ئەم ب باوەرین دەمێن بهێت دێ رێژا هشكبوونا دارا زێدەتر بن، ب تایبەت ئەو دارێن ب بەرهەم بەرهەمێ وان دێ زۆر كێمتر بیت ل هەمبەر سالا بۆری.

دهۆك، لەزگین جوقی

ئاوارێن شنگالێ ل كەمپان رەت دكەن دناڤ كەمپاندا ب زۆرەملێ ئاكنجی بن و دبێژن: نابیت بریارا وەزارەتا كۆچ و كۆچبەرێن ئیراقێ بهێتە بجهئینان و كەمپ ببنە كۆمەلگەهێن ئاكنجیبوونێ.

شەمۆ، ئێكە ژ ئاوارێن شنگالێ ل كۆمەلگەها شاریا سەر پارێزگەها دهۆكێ ئاكنجیە راگەهاند، حوكمەتا ئیراقێ چ هەڤكاریا ئاوارە ناكەت، هەتا رێ خۆش ناكەت ئاوارە ژ كەمپان بچنە شنگالێ نوكە ژێ حوكمەتا ئیراقێ كاردكەت ئاوارە دناڤ كەمپاندا بمینن و نەڤەگەرنە شنگالێ، ئەڤە بریارەكا سیاسی یە دێ گۆهورێنا دیموكراتی ل دەڤەرێن ئێزدیان دروست كەت و ئەم ناخوازین كەمپ ببنە كۆمەلگەهێن ئاكنجیبوونێ.
ئیبراهیم موراد، خەلكێ شنگالێ یە ل قەزا سێمێلێ پارێزگەها دهۆكێ ئاكنجیە راگەهاند، نابیت بریارا وەزارەتا كۆچ و كۆچبەرێن ئیراقێ بهێتە بجهئینان و پێدڤیە ئاوارە ب سەربلندی ڤەگەرن بۆ سەر دە‌ڤەر‌ێن خۆ و حكوومەتا عێراقێ د خەما ئاوارەیان دا نینە، ئەڤە 11 ساڵە خەلكێ شنگال ئاوارە بووین و هەتا نوكە حكوومەتا عێراقێ نەشیایە رەوشا شنگالێ خۆش بكەت، هێشتا خەلكێ زەرەمەند ل شنگالێ نەهاتیە قەرەبووكرن، هەتا نوكە خانیێن خەلكێ د خرابووینە، ئەم داخوازێ دكەین حكوومەتا عێراقێ رێككەفتنا شنگالێ بیختە وارێ بجهئینانێدا و ئەڤە تاكە چارەسەریا بۆ خۆشكرنا رەوشا شنگالێ و ڤەگەریانا ئاوارەیان.
گوتژی: ب هەر شێوەیەكێ هەبیت پێدڤیە حكوومەتا عێراقێ هەڤكاری و پشتەڤانیا ئاوارە بكەت بۆ ڤەگەریانا شنگالێ و خەلكی قەربوو بكەت و دەست ب ئاڤەدانیا شنگالێ بكەت ب سەرفەرازێ ئەم بچینە سەر مالێن خۆ.
د ئالیەكێ دی دا، میر حازم تەحسین بەگ میرێ ئێزدیان راگەهاندیە، تێكەڵكرنا زۆرەملێ ڕەت دكەین كۆ بڕیارا وەزارەتا كۆچ و كۆچبەرێن عێراقێ ئێزدی د دلگران، هەتا نوكە چ مەرجەكێ ڤەگەریانێ بۆ ئێزدیان نینە، ئەڤ بریارە دێ كێشەیێن ئێزدیان كوورتر كەت، هەڤدەم دێ بیتە ئەگەرێ لاوازكرنا دانپێدانێن نێڤدەوڵەتی بۆ ناساندنا كۆمەلكوژیا ئێزدیان وەكۆ جێنوساید.
پیر دەیان جەعفەر، ڕێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ راگەهاند، بڕیارا وەزارەتا كۆچ و كۆچبەرێن عێراقێ ل دژی ئاوارێن شنگالێیە، ژبەركۆ وەزارەتا كۆچ و كۆچبەرێن عێراقێ بزاڤێ دكەت كەمپ ببنە كۆمەلگەهێن ئاكنجیبوونێ.