ئەو باژێرێ دەمەكی ب چەكێ كیماوی تاری ب سەردا هاتی و هاوار دكر (من ب تنێ نەهێلن)، نوكە و ل سەر فەرمان و راسپاردەیا سەرۆك مەسعود بارزانی، ب رۆناهییەكا تمام شادبوو. مەسرور بارزانی، سەرۆكێ حوكمەتا هەرێما كوردستانێ، ئەو سۆز بجهئینا و هەلەبجە كرە ئێكەمین پارێزگەه ل سەر ئاستێ هەموو ئیراقێ و هەرێما كوردستانێ كو ببیتە خودانا كارەبا 24 ساتی.
ئەڤ پێنگاڤا دیرۆكی د دەمەكی دایە كو پڕۆژەیێ رۆناهی، وەك ئێك ژ پڕۆژەیێن ستراتیژی یێن كابینەیا نەهێ، كارەبا 24 ساتی بۆ نێزیكی چار ملیۆن وەلاتییان و زێدەتر ژ 115 هزار جهێن بازرگانی ل سەرانسەری هەرێما كوردستانێ دابین كریە، كو دبیتە زێدەتر ژ نیڤا ئاكنجیێن هەرێمێ.
مەسرور بارزانی، سەرۆكێ حوكمەتا هەرێما كوردستانێ، د پەیامەكێدا راگەهاند» ب خوەشحالیڤە رادگەهینم كو هەلبجەیا خوەشتڤی، ئێكەم پارێزگەهە ب تمامی كارەبا وێ بوویە 24 ساتی و پیرۆزە ل كوردستانێ».
سەرۆكێ حوكمەتا هەرێمێ دوپاتكر» ئەڤ پڕۆژەیە تنێ گەهاندنا كارەبێ نینە، بەلگو گوهۆڕینەكا مەزنە د ژیانا خەلكیدا».
هەروەسا گوت ژی» هەتا نوكە زێدەتر ژ سێ هزار و 200 موەلیدەیێن گازوایلێ یێن تاخان هاتینە ڤەمراندن، ڤێ چەندێ ژی وەكریە تاخێن وان پاقژتر و ساخلەمتر و سەلامەتتر بن، ژ بلی مفایێن ژینگەهی و ساخلەمی، پڕۆژەیێ رۆناهی بارگرانی ل سەر ملێ وەلاتییان ژی كێم كریە، ب جۆرەكی نێزیكی 80% ژ خەلكی پارەی كێمتر ددەن ب هەمبەركرن ب وی گۆژمەیێ كو پێشتر ددا موەلیدەیان».
ل مەها 11 یا سالا 2024، مەسرور بارزانی، سەرۆكێ حوكمەتا هەرێما كوردستانێ، پڕۆژەیێ رۆناهی راگەهاند، ب مەبەستا گەهاندنا كارەبا 24 ساتی بۆ هەموو مال و جهێن بازرگانی تاكو دووماهییا سالا 2026.

شاخەوان عەبدوللا، نوونەرێ پارێزگەها كەركووكێ ل جڤاتا نوونەرێن ئیراقێ كو هەڤدەم جێگرێ سەرۆكێ جڤاتا نوونەرێن ئیراقێیە د پۆستەكیدا ل تۆڕا جڤاكییا فەیسبووكی بەرسڤا رێبوار تاها، پارێزگەرێ كەركووكێ دا و دبێژیت» ل شوونا وێ چەندێ دووڤچوونێ بۆ وان رەخنان بكەن ئەوێن مە ئاراستەی وان كرین، دەمێ حەفتییەكێیە پارێزگەر و ئەندامەكێ جڤاتا پارێزگەهێ ئەركێن خوە بجه هێلاینە و مژوولی بەرسڤدانا منن».
شاخەوان عەبدوللای گوت ژی» باشتربوو ل شوونا وێ بەرسڤدانێ، نڤیسارەكا فەرمی ئاراستەی وەزارەتا كارەبێ كربا بۆ هەلوەشاندنا وێ بڕیارا دلگرانی بۆ وەلاتیێن وان دەڤەران دروستكری، بەلێ هەتا نوكە ئەو كارە نەكریە».
بەری دو رۆژان د بەرنامەیەكێ تەلەڤزیۆنیدا، رێبوار تاها، پارێزگەرێ كەركووكێ گوتبوو» مە بزاڤ كریە رێڤەبەرییا گشتییا كارەبا كەركووكێ دابەشی دو زۆنان بكەین، بەلێ شاخەوان عەبدولای ئەو بابەتە گرێدایە ب دۆسێیا ئاخێ و خوونا شەهیدانڤە». هەروەسا گوت ژی» ئێك پڕۆژەیێ وی برادەری بۆ من بێژن كو ل دەمێ ئەز پارێزگەر، بۆ كەركووكێ ئەنجام دابیت؟».
د بەرسڤا وان ئاخڤتنێن رێبوار تاها، پارێزگەرێ كەركووكێ، شاخەوان عەبدوللا، جێگرێ سەرۆكێ جڤاتا نوونەرێن ئیراقێ، هەژمارەكا خالان نڤیسینە و دبێژیت، ئەڤە پشكەكن ژ كار و پڕۆژەیێن من:
ئێك: راستڤەكرنا قانوونا هەلبژارتنێن جڤاتێن پارێزگەهان كو بوو ئەگەرێ ئەنجامدانا هەلبژارتنان ل كەركووكێ پشتی 20 سالان ژ راوەستیانێ.
دو: بلندكرنا ئالایێ كوردستانێ ل كەركووكێ ل ئیلۆنا 2021، ل دەستپێكێ ل سەر نڤیسینگەه و پاشی ل سەر بارەگەهێن پارتی دیموكراتی كوردستان.
سێ: هەلوەشاندنا بڕیارێن رژێما بەعس و كاركرن بۆ زڤراندنا زەڤیێن چاندنێ بۆ خودانێن وان یێن رەسەن ل كەركووكێ و مەندلی و خانەقینێ.
چار: گەهاندنا خزمەتگوزارییان بۆ تاخێن كوردنشینێن كەركووكێ كو پێشتر ب بەهانەیا (زێدەگاڤیێ) هاتبوونە بێ بەهركرن. ل نیسانا 2022 ب رێكا نڤیسارەكێ بۆ سەرۆك وەزیرێن ئیراقێ یێ وی دەمی، بڕیار هاتە دان پڕۆژەیێن خزمەتگوزاری وەك قیركرن و كۆنكریتكرن ل وان تاخان بهێنە بجهئینان.
پێنج: بجهئینانا پڕۆژەیێ ئاڤا تاخێ (پەنجا عەلی) كو كێشەیا كێمییا ئاڤێ ل وی تاخێ چارەسەركر، ل گەل كولانا چەندین بیرا ل تاخێ رزگاری و كۆنكریتكرنا سەدان كۆلانان و دابینكرنا دەهان بگوهۆڕێن كارەبێ و دروستكرنا جادەیا دوسایدییا پەنجا عەلی.
شەش: كاراكرنا مادەیا 140 یا دەستووری پشتی 12 سالان ژ راگرتنێ و دەستپێكرنا قەرەبووكرنا وەلاتییان، ل گەل دەركرنا بڕیارا تەرخانكرنا پارچە زەڤییان بۆ ئاوارەیان.
حەفت: دەربازكرنا قانوونا ب پارێزگەهبوونا هەلەبجە.
هەشت: راستڤەكرنا هەردو قانوونێن شەهیدان و زیندانیێن سیاسی د بەرژەوەندییا خەلكێ كوردستانێدا.
نەهـ: وەرگرتنا 375 ملیار دیناران ژ شایستەیێن دارایی یێن جوتیارێن هەرێما كوردستانێ بۆ سالێن 2014، 2015، 2016 و جهگیركرنا وان د چارچۆڤەیێ قانوونا ئاسایشا خۆراكی .
دەهـ: كاركرن بۆ نەهێلانا سەربازگەها (شۆراو) و راگرتنا ئۆپەراسیۆنێن سەربازی ل تاخێن كوردنشین.
یازدە: تەرخانكرنا بودجەی بۆ لیوایا 20 یا لەشكرێ ئیراقێ یا هەڤپشك و تمامكرنا پێرابوونێن وێ كو د ئەنجامدا بوو ئەگەرێ دامەزراندنا 3700 گەنجان.
شاخەوان عەبدوللای راگەهاند ژی» ئەڤە پشكەكا كێمن ژ پڕۆژەیێن من، بەلێ بلا هوونێن بەرێز ئاماژێ ب وێ چەندێ بكەن كو د دەمێ سالەكێدا ژبلی رادەستكرنا قەزایێن دووبز و داقووق و رێڤەبەریێن پۆلیس و چاندنا كەركووكێ ب ئالییەكێ دیاركری، هەوە چ پڕۆژەیەكێ دی بۆ كەركووكێ ئەنجامدایە؟».
گوت ژی» خوازی ل شوونا بەرسڤدانا مە، هەوە بەرسڤا داخویانیێن ڤێ دووماهیێ یێن محەمەد تەمیم و حەلبووسی دابایە كو دناڤ كەركووكێدا و ل باژێرەكێ پترییا ئاكنجیێن وی كورد، سڤكاتی ب حوكمڕانی و سەركردەیێن كورد كری».
ئەڤ داخۆیانی و بەرسڤدانا هەڤدو ژ ئالیێ شاخەوان عەبدوللای و رێبواری تاهای ڤە د وی دەمیدا دەستپێكر كو رۆژا 19 ئاب 2025 شاخەوان عەبدوللای د پۆستەكیدا ل تۆڕا جڤاكییا فەیسبووكیدا نڤیسارەك بەلاڤكری كو ب (پیلان) دانای و ب (كارەسات) ناڤكری و راگەهاندبوو» هەژمارەكا قەزا و ناحیێن كوردنشین و توركماننشین ژ روویێ كارگێریڤە دێ ئێخنە سەر قەزا حەویجەڤە».
وی دەمی هەر زوو نڤیسینگەها پارێزگەرێ كەركووكێ بەرسڤا دابوو و گوتبوو» رازیبوونا سەرۆك وەزیرێن ئیراقێ تنێ بۆ جوداكرنا فەرمانگەها حەویجەیە».

ئەندامەكێ پەرلەمانێ كوردستانێ راگەهاند: بەرهەڤیێن باش بۆ كۆمبوونا پەرلەمانێ كوردستانێ یێن هاتینە كرن و پشتی رێككەفتن ل سەر دەستەیا سەرۆكایەتییا پەرلەمانێ كوردستانێ دهێتە كرن، دێ كۆمبوونێن پەرلەمانی دەست پێ كەن.
رێناس عزەت، ئەندامێ پەرلەمانێ كوردستانێ ژ فراكسیۆنا پارتی دیموكراتی كوردستان گوت» رێككەفتنا پارتی دیموكراتی كوردستان و ئێكەتی نیشتمانی كوردستانێ بۆ پێكئینانا حوكمەتێ پێنگاڤێن باش یێن هاڤێتین و كۆمبوونێن هەردو ئالییان ل سەر پێكئینانا حوكمەتێ دێ د بەردەوام بن و خەلكێ كوردستانێ و رەوشا دەڤەرێ وەسا دخوازیت لەز بهێتە كرن د پێكئینانا حوكمەتێدا، هەرچەندە تێكگەهشتن ژ وێ چەندێ مەزنترن پۆست ببنە ئاستەنگ ل پێشبەری پێكئینانا كابینەیا حوكمەتێ، چونكە پارتی و ئێكەتی ل سەر بنەمایێ ئیدارەدانا حوكمەتێ و خزمەتكرنا خەلكێ كوردستانێ باشتر تێكگەهشتن هەیە».
دوپات كر ژی» سەبارەت پەرلەمانێ ژی بڕیارە ل مەها ئیلۆنێ پەرلەمان بهێتە كاراكرن و رێككەفتن بۆ دەستەیا سەرۆكایەتییا پەرلەمانی ژی هاتیە كرن، چونكە دەم نەمایە و دڤێت پەرلەمان دەست ب كارێن خوە بكەت، ئەڤجا دەم یێ دیار نینە بەلێ دێ ل دەستپێكا مەها ئیلۆنێ یان ل ناڤەڕاستا وێ مەهێ بیت، پاشی پەرلەمان دێ بەرهەڤییان كەت بۆ راسپاردنا حزبا سەركەفتی د هەلبژارتناندا بۆ پێكئینانا حوكمەتێ».