ب مەرما گرنگیدان ب پاراستنا دارستان و ژینگەهێ دوهی 10/8/2025 د. عەلی تەتەر، پارێزگارێ دهۆكێ ب ئامادەبوونا ئیسماعیل مەحەمەد ئەحمەد، دەڤەردارێ دهۆكێ و عەمید جەمال سعدۆ كوركی، فەرماندێ هێزا دهۆك یا پێشمەرگێ پاراستنا ژینگەهێ و عەمید حەسەن خورشید، رێڤەبەرێ بەرگریا شارستانی ل پارێزگەها دهۆكێ سەرپەرشتیا كۆمبوونەكا تایبەت ل گەل رێڤەبەرێ ناوچەداریا زاویتە و چەندین رێڤەبەر و لایەنێن پەیوەندار ل دۆر چاوانیا پاراستنا دارستان و ژینگەها پارێزگەهێ كر.
د كۆمبوونێ دا بەحسێ گرنگیا پاراستنا دارستان و ژینگەها پارێزگەها دهۆكێ ب گشتی و یا ناوچەداریا زاویتە ب تایبەتی و توندكرنا پێرابوونێن كارگێری و یاسایی هەمبەر هەر سەرپێچیكارەكی هاتە كرن.
پارێزگارێ دهۆكێ دوپاتكر كو ل دووڤ راسپاردێن مەسرور بارزانی، سەرۆكێ حكومەتا هەرێما كوردستانێ، دڤێت دووڤچوون و پێرابوونێن كارگێری و یاسایی یێن پێدڤی هەمبەر هەر كەسەكی بهێنە وەرگرتن، ئەوێن زیدەگاڤیا ل سەر ژینگەهێ و سۆتنا داراستانا دكەن و پشتەڤانیا پارێزگەهێ بۆ هەر هاریكاریەكێ دیار كر و بڕیار و رێنمایێن نوو هەمبەر سەرپێچكاران هاتنە دیاركرن.
دیسا هەر دوهی 10/8/2025 د. عەلی تەتەر، پارێزگارێ‌ دهۆكێ‌ پێشوازی ل وارشین سەلمان، دەڤەردارێ‌ ئامێدیێ و رێڤینگ هروری و سەلاح تیلەری كر و د كۆمبوونەكێ دا بەحسێ ئامادەكاریێن فەستیڤالا بەرهەمێن خومالی ل دەڤەرا بەرواری بالا هاتەكرن و پشتەڤانیا ئیدارا پارێزگەهێ بۆ هەر كارەكێ پێدڤی دیاركر.

زنار تۆڤی:

پەیڤدارێ رێڤەبەرییا حەج و عومرێ ل هەرێما كوردستانێ دیار كر، ئێدی وەلاتی دشێن ب شێوەیێ ئەلكترۆنی ناڤێن خۆ بۆ فەریزەیا حەجێ تۆمار بكەن و ئەڤرۆ ئەو پرۆسە دێ هێتە كارا كرن.
كاروان ستوونی، پەیڤدارێ رێڤەبەرییا حەج و عومرێ ل هەرێما كوردستانێ زێدەتر بۆ رۆژناما ئەڤرۆ گۆت: «ب مەرەما دیاركرنا شێوازێ نوو یێ ناڤ نڤیسینا حەجییان، كو ب شێوەیێ ئەلكترۆنییە، ئەڤرۆ ل دەمژمێر 11ی سپێدێ، زانیاری دەربارەی وی سیستەمی دێ هێنا چالاككرن».
ناڤهاتی گۆتژی: «ئێدی پێدڤی ناكەت وەلاتی بۆ ناڤ نڤێسینا حەجێ، سەرەدانا چو نڤێسنگەهێن حەج و عومرێ بكەن، سیستەمێ فۆرمان نامینیت، بەلكو هەموو سیستەم دێ بیتە دیجیتالی».

دوهی ١٠/٨/٢٠٢٥ ل باژێڕێ کەرکووکێ ب ئامادەبوونا د. سالار عوسمان، بەرپرسێ پشکا ڕەوشەنبیری و ڕاگەهاندنا پارتی و د. شاخەوان عەبدوللا، جێگرێ سەرۆکێ جڤاتا نوونەرێ ئیراقێ و محەمەد کەمال، بەرپرسێ لقێ سێ یێ پ. د. ک و سەرۆک و ئەندامێن فراکسیۆنا پ. د. ک ل جڤاتا پارێزگەها کەرکووکێ و هەژمارەکا بەرچاڤ ژ هونەرمەند و رەوشەنبیر و نڤیسەر و کەسایەتی و ڕۆژنامەنڤیس و بەرپرسێن حزبی و حکومی یێن باژێڕێ کەرکووکێ و مالباتا وی یا هێژا، د رێوڕەسمەکێ ژ هەژی دا پێنجەمین سالیا مالئاڤاییا هونەرمەندێ دیارێ کوردستانێ (سابیر کوردستانی) بلند هاتە راگرتن.
د. سالار عوسمان، بەرپرسێ پشکا ڕەوشەنبیری و ڕاگەهاندنا پ. د. ک د پەیڤەکێ دا دەربارەی وێ هەلکەفتێ گۆت: «ئەکەم چالاکیا پشکا ڕەوشەنبیری و ڕاگەهاندنا پارتی ل کەرکووکێ ڕامانەکا کوور یا هەی، چونکی مە ئەڤ چالاکیە کرە دەستکەکێ گولێن وەفاداریێ بۆ هندێ ب رێکا ڤێ هەلکەفتێ بێژینە هەموویان ئەم یێ ل کەرکووکێ و دێ ل ڤێرە مینین».
بەرپرسێ پشکا ڕەوشەنبیری و ڕاگەهاندنێ باس ل ئێکەم دەرکەفتنا خودێ ژێ ڕازی سابیرکوردستانی کر و گۆت: «مە دڤێت پێکڤە د ئێڤارەکا پڕ ڕەنگین یا کەرکووکا دلێ کوردستانێ دا ڤەگەڕینە سالێن ١٩٧٠ و ڕێککەفتننامەیا ئادارێ و ڤی دەستکەفتێ مەزنێ ئیلۆنێ کو مامۆستا سابیر کوردستانی ل وێرێ و ب رێکا سترانان خۆ دا نیاسین».
دیسا چەندین چالاکیێن دی د ڕێوڕەسمان دا هاتنە پێشکێشکرن و ڕێز ل مالباتا هونەرمەند سابیر کوردستانی هاتە گرتن و ل دوماهیێ ژی پەیڤا مالباتا هونەرمەند سابیر کوردستانی هاتە هاتە خواندن و سوپاسیا پشکا ڕەوشەنبیری و ڕاگەهاندنا پارتی کر.

دهۆك، لەزگین جۆقی:

رێڤەبەرێ گشتیێ چاندنێ ل پارێزگەها دهۆكێ بۆ رۆژناما ئەڤرۆ دیار كر، یا د شیان دابیت بۆ پشتەڤانیا جۆتیارێن دەڤەرا زاویتە و مانگێشكێ دێ هێتە كرن.
ئەحمەد جەمیل، رێڤەبەرێ گشتیێ چاندنێ ل پارێزگەها دهۆكێ ئاشكرا كر، دووڤچوونا كێشە و گرفتێن جۆتیارێن دەڤەرا زاویتە و مانگێشكێ هاتە كرن، هشكەسالیێ كارتێكرن ل بەرهەمێ جۆتیاران كریە و گۆت: «هەر تشتەكێ د شیان دابیت ب هەڤكاری و پشتەڤانیا پارێزگارێ دهۆكێ بۆ جۆتیاران دێ هێتە ئەنجامدان».
گۆتژی: «زیان و ئاریشێن جۆتیاران د جوراوجورن، ئەم ب هەمی شیانێن خۆ پشتەڤانێن جۆتیارانین بۆ چارەسەركرنا ئاریشەیێن وان بۆ پێشڤەبرنا كەرتێ‌ چاندنێ‌«.

پارێزگارێ دهۆكێ راگەهاند، پڕۆژەیێ گەشتیاریێ چێكرنا كەنالێ ئاڤێ ژ گوندێ پیرومەرا هەتا دگەهیتە بەنداڤا دهۆكێ د قووناغێن دوماهییێ دایە، كو درێژاهیا پڕۆژەی هزار و 200 مەترن.
د. عەلی تەتەر، پارێزگارێ دهۆكێ دیار كر، ئەڤ پڕۆژە ب گوژمێ ملیارەك و 79 ملیۆن دیناران ل سەر بودجەیا تایبەت یا پارێزگەها دهۆكێ دهێتە چێكرن.
پارێزگاری گۆت: «ب تمامبوونا پڕۆژەی ئاڤا رووبارێ دیجلەی دێ گەهیتە كەنالی و ژ بلنداهیێ بۆ ناڤ بەنداڤا دهۆكێ، جودا ژ زێدەكرنا ئاڤا بەنداڤێ، دێ دیمەنەكێ بالكێش بخوەڤە گریت، دیسا د قووناغا دویێ دا هەردو لایێن كەنالی ب داران دێ هێنە كەسككرن و ئەڤ پڕۆژەیێ گەشتیاری دێ سیمایەكێ نوو و جوان دەتە پارێزگەها دهۆكێ».