ل ژێر درووشمێ «هونەر د هەمبێزا ئێكدو قەبوولكرنێ دا» و دوهی 5/5/2025 فەستیڤالا دویێ یا كۆلیژا هونەرێن جوان ل زانكۆیا دهۆكێ، ل هۆلا پێشمەرگە ل ناڤەندا قوتابیان ب بەرهەڤبوونا قوتابیێن كۆلیژا هونەرێن جوان هاتە گێڕان و بۆ دەمێ سێ رۆژان دێ یا بەردەوام بیت.
ل دەمێ دەستپێكرنا فەستیڤالێ چەندین سترانێن كوردی ژ لایێ پشكا مۆزیكێ ل كۆلیژا هونەرێن جوان هاتنە گۆتن و د دووڤ دا پێشانگەها پڕۆژەیێن قوتابیێن پشكا شێوەكاری ل گۆڕەپانا ئاڤاهییێ كۆلیژا هونەرێن جوان ل زانكۆیا دهۆكێ هاتە ڤەكرن.
دیسا ئەڤرۆ سێشەمبی 6/5/2025 و ل دەمێ ئێڤاری شانۆگەرییا روح د مالبچووكێ شكسپیری دا ل هولا محەمەد عارفێ‌ جزیری دێ هێتە پێشكێشكرن.
سوبەهی رۆژا چارشەمبی 7/5/2025 ل دەمژمێر 11 سپێدێ شانۆگەرییا خەونەك ل دەرڤەی بازنەیی ل ناڤەندا قوتابیان، هولا پێشمەرگە دێ هێتە پێشكێشكرن و ل دەمژمێر 5ی ئێڤاری شانۆگەریا باران ل هولا محەمەد عارفێ‌ جزیری دێ هێتە پێشكێشكرن.

زاخۆ، دلۆڤان هالۆ:

ب ئامادەبوونا زەعیم عەلی، ئەندامێ مەكتەبا سیاسی یا پارتی دیموكراتی كوردستان و دكتۆر سالار عوسمان، بەرپرسێ بەشێ ڕەوشەنبیری و ڕاگەهاندنێ، و هەژمارەكا بەرپرسێن حزبی و بنەمال و هەڤالێن هونەرمەندێ خودێ‌ ژێ‌ رازی و نڤیسەر و ڕەوشەنبیر و هونەرمەندان، ل رۆژا 4/5/2025 ڕێوڕەسمێن پێنج سالییا مالئاڤاییا هونەرمەند سەعید گاباری ل هۆلا ڕاگەهاندنا بەشێ ڕەوشەنبیری و ڕاگەهاندنا پارتی دیموكراتی كوردستان بڕێڤە چوو.
ژ لایێ دكتۆر سالار عوسمان، بەرپرسێ بەشێ ڕەوشەنبیری و ڕاگەهاندنا پارتی پەیڤەك پێشكێشكر و گۆت: «سەعید گاباری دەنگەك بۆ ئەڤین و ئازادیێ بوو، ئەم تێدگەهین، ئەو دەنگێن بۆ ئەڤین و ژیاندۆستی و مرۆڤدۆستی و ڤیانێ ستران گۆتینە و شعر نڤیسینە و خەبات كرینە، ئەو مرۆڤێن نەمرن، دیسا ئەم تێدگەهین، ئەو هونەرمەند و نڤیسەر و ڕەوشەنبیرێن ل گەل پێشمەرگەی، وەكو پێشمەرگێن دلێر بەرگری ژ كوردستانێ كرینە، ئەو نەمرانە و كوورتر دچنە د ناڤ دیرۆكێ دا و ئەم هەمی شانازیێ پێ‌ دبەین».
د رێورەسمان دا دۆكیۆمێنتارییەك دەربارەی ژیان و بەرهەمێ خودێ‌ ژێ‌ رازی سەعید گاباری هاتە نیشادان، تابلۆیەكێ مۆزیك و سترانێ ژ لایێ هونەرمەند عەدنان سەعید هاتە پێشكێشكرن، دیسا بەشێ ڕەشەنبیری و ڕاگەهاندنا پارتی خەلاتێ ڕێزگرتنێ پێشكێشی مالباتا هونەرمەند سەعید گاباری كر.
ل دوماهیێ گۆتارا مالباتا خودێ‌ ژێ‌ رازی سەعید گاباری ژ لایێ ئیبراهیم گاباری هاتە پێشكێشكرن و تێدا سوپاسیا پارتی دیموكراتی كوردستان و بەشێ ڕەوشەنبیری و ڕاگەهاندنێ كر ژ بۆ ئەنجامدانا ڤێ ڕێوڕەسمێ و ڕێزگرتنێ ل خەباتا هونەرمەندێ وەغەر كری سەعید گاباری.

زنار تۆڤی:

رێڤەبەرێ گشتیێ چاندنێ ل پارێزگەها دهۆكێ دیار كر، پارێزگەها دهۆكێ بۆ‌ بەرهەمئینانا پتاتان ل‌ ‌سەر ئاستێ هەرێما كوردستانێ‌ و ئیراقێ یا ئێكێ یە و حكومەت هاریكارییا جۆتیاران دكەت‌ بۆهنارتنا بەرهەمێن ‌پتاتا‌ن بۆ دەرڤەی وەلاتی.
ئەحمەد جەمیل، رێڤەبەرێ گشتیێ چاندنێ بۆ رۆژناما ئەڤرۆ گۆت: «ئەڤ سالە 48 هزار دۆنەمێن ئەردی ب پتاتان‌ ل‌ سنۆرێ پارێزگەها دهۆكێ هاتینە چاندن‌، ئەم پێشبینی د‌كەین 600 هزار تەنێن پتاتان‌ بەرهەمێ ئەڤ سالە یێ جۆتیارێن پارێزگەها دهۆكێ بن، چونكی پارێزگەها دهۆكێ ئاخەكا ب خێر و بەركەت بۆ چاندنێ هەیە، ب ‌تایبەتی بۆ بەرهەمئینانا پتاتان».
ناڤهاتی گۆتژی: «حكومەتا هەرێما كوردستانێ پشتەڤانی و هاریكاریا جۆتیاران دكەت بۆ بەرهەمئینانا پتاتان و حكومەت یا هاریكاربوویە، كو پتاتێن جۆتیارێن دهۆكێ بهنێریتە بازارێن جیهانی و بازارێن باشوور و ناڤەراستا ئیراقێ».
ئەحمەد جەمیل هێشتا دبێژیت: «بۆ پشتەڤانیا جۆتیاران حكومەتا هەرێما كوردستانێ یا هاریكاربوویە بۆ دروستكرنا 126 عمبارێن ساركرنێ بۆ پاراستنا بەرهەمێ جۆتیاران و شیانێن هەلگرتنا 500 هزار تەنێن پتاتان هەنە».

دهۆك، لەزگین جوقی:

رێڤەبەرێ ڤێتێرنەری ل پارێزگەها دهۆكێ دیار كر، هەوەكا مەزن یا رەشاندنا جهێن خودانكرنا تەرش و كەوالی و شووشتنا هەمی تەرش و كەوالێ جۆتیارێن پارێزگەها دهۆكێ دەستپێكر.
د. نیشتمان عارف، رێڤەبەرێ ڤێتێرنەری ل پارێزگەها دهوكێ بۆ ئەڤرۆ گۆت: «نوكە 18 تیمێن رێڤەبەریا مە بۆ پاراستنا ساخلەمی و سەروەت و سامانێ جۆتیاران، دەست ب رەشاندنا تەرش و كەوالی كریە، داكو بەرهەمەكێ ساخلەم بگەهیتە دەستێ وەلاتیان، ب هزارەها سەرێن تەرش و كەوالی دێ هێنە شووشتن و جهێن خودانكرنا وان دێ هێنە رەشاندن».
گۆتژی: «هەوا رەشاندنا دەرمانێ ل سنۆرێ بنگەهێن ڤێتێرنەری ل قەسرۆك و ئاكرێ و زاویتە و مانگێشكێ و سێمێلێ و باعەدرێ و كانی ماسێ و چەندێن دەڤەرێن دێ ل پارێزگەها دهۆكێ دژی نەخوشیا تایا خوینبەربوونێ دەستپێكریە».
د. نیشتمان زێدەتر گۆت: «داخوازێ ژ خەلكێ خۆ دكەین، ب تایبەت جۆتیاران خۆ ب پارێزن، ئەم ژی دێ‌ هەمی رێكارێن پاراستنێ‌ بۆ جۆتیاران ب كارئینین».

هەولێر، قائید میرۆ:

پەیڤدارێ وەزارەتا كارەبا هەرێما كوردستانێ‌ دیار كر، ل نێزیك بهایەكێ گونجای بۆ كارەبا 24 دەمژمێری دێ هێتە دانان، ب شێوەیەكی بهایێ كارەبێ د بەرژەوەندیا خەلكێ هەژار و كێم دەرامەت دا بیت و دبێژیت: ژ بەر كێمیا ئاڤێ بەرهەمئینانا كارەبێ ل وەستگەهێ دوكان هاتیە راگرتن.
ئومێد ئەحمەد، پەیڤدارێ وەزارەتا كارەبێ بۆ رۆژناما ئەڤرۆ دیاركر، د دەمەكێ نێزیك دا بهایێ كارەبا 24 دەمژمێری دێ‌ هێتە دیاركرن و ئێكلاكرن، چونكی ل دۆر بهایێ كارەبا پڕۆژەیێ رۆناهی ل گەل هەموو لایەنێن پەیوەندیدار كۆمبووینە و بۆچوونا كەسێن بسپۆرێن كارەبێ و شارەزایێن ئابووری هاتیە وەرگرتن، هەتا بهایەك بهێتە دانان ل گەل رەوشا ئابووری یا وەلاتیان بگونجیت و بشێن كرێیا كارەبێ بدەن، هەموو بزاڤەك دهێتە كرن بهایێ كارەبا پڕۆژەیێ روناهی د بەرژەوەندیا خەلكێ هەژار دا بیت.
پەیڤدارێ وەزارەتا كارەبێ گۆت: «ژ بەر كێمبوونا ئاڤێ ل بەنداڤا دوكان بەرهەمئینانا كارەبێ، كو 40 میگاواتن هاتیە راگراتن و كاریگەریێن زۆر ل سەر بەرهەمئینانا كارەبێ نابیت و ب تنێ 10 هەتا 15 خولەكان ژ كارەبا نیشتیمانی دێ‌ كێم بن».