پشتی ب دووماهی هاتنا یاریێن گەڕا 28ێ‌ ژ هەڤڕكیێن خولا ستێرێن ئیراقێ‌ یا فوتبۆلێ‌، هیچ یانەیەكا كوردستانی نەشیا سەركەفتنێ‌ د یاریێن خوە دا بینت، ئەوێن ب دو خوسارەتی و دو وەكهەڤی ب دووماهی هاتین، د بەرانبەر دا یانەیێن بەغدایی رێزێن پێشیێ‌ كونترۆل كریە، هەروەسان بڕیارە ئەڤرۆ دەست ب هەڤڕكیێن گەڕا 29ێ‌ بهێنە كرن.
دهۆك و زاخۆ مفا ژ ئەرد و جەماوەرێ‌ خوە وەرنەگرت
تیما یانەیا دهۆكێ‌ قارەمانا كۆپا كەنداڤی مفا ژ ئەرد و جەماوەرێ‌ خوە وەرنەگرت پشتی د خولەكێن دووماهیێ‌ دا ئەنجامێ‌ خوسارەتییا خوە بكەتە وەكهەڤی بەرانبەر یانەیا حدود، گۆلا دهۆكێ‌ ژلایێ‌ یاریزانێ‌ وێ‌ یێ‌ پێكگۆر ئیبراهیم غازی تۆماركربوو، د یارییا واندا ئەوا ل شەمبییا بۆریی یاریگەها دهۆك یا نێڤدەولەتی هاتییە كرن، د ڤێ‌ یاریێ‌ دا وەستیانا پرانییا یاریزانان یا دیاربوو پشتی یارییا فینالا كەنداڤی و شیابوون بۆ جارا ئێكێ‌ ل سەر ئاستێ‌ كوردستانێ‌ و ئیراقێ‌ ناسناڤی ب دەستڤە بینن.
ژلایێ‌ خوەڤە یانەیا زاخۆ بەردەوامی دایە ئەنجامێن خوە یێن لاواز بۆ یارییا سێیێ‌ نەشیایە چو سەركەفتنان بینت پشتی دگەل مێڤانا خوە یانەیا نەفت میسان ب گۆلەكێ‌ تووشی خوسارەتیێ‌ بیت، د یارییا واندا ئەوا ل چارشەمبییا بۆری یاریگەها زاخۆ یا نێڤدەولەتی هاتبوو كرن.
هەولێر و نەورۆز سەركەڤتی نەبوون
ژلایەكێ‌ دووڤە تیما یانەیا هەولێر دناڤ ئەرد و جەماوەرێ‌ خوە دا خوسارەتیەكا نە چاڤەڕێ‌ كری بەرانبەر یانەیا نەفت یا بەغدایی دا ئەوا ب2-3 تووشی خوسارەتیێ‌ بووی، د یارییا واندا ئەوا ل چارشەمبییا بۆری یاریگەها شەهید فرانسۆ حەریری هاتییە كرن، دبەرانبەر دا یانەیا نەورۆز ب خالەكێ‌ ژ پایتەختێ‌ ئیراقێ‌ ڤەگەڕیا پشتی دگەل یانەیا كەرخ ب دو گۆلان وەكهەڤبووی، ئەڤ یارییە ل ئەینییا بۆری هاتبوو كرن.
ب دووماهی هاتنا یاریێن گەڕا 28ێ‌ رێزبەندی بڤی شێوەیە.
1- شورتە 59 خال، كێمتر ئێك یاری.
2- زەورا 58 خال.
3- زاخۆ 52 خال.
4- تەلەبە 47 خال.
5- جەوییە 44 خال.
6- ئەلقاسم 43 خال.
7- نەفت میسان 42 خال، كێمترییا یارییەكێ‌.
8- دهۆك 41 خال، كێمترییا شەش یارییان.
9- نەفت 38 خال.
10- كەرخ 38 خال.
11- ئەلگەرمە 37 خال.
12- نەجەف 36 خال.
13- نەورۆز 35 خال.
14- هەولێر 35 خال كێمتر یارییەكێ‌.
15- كارەبا 34 خال.
16- مینا 28 خال كێمتر یارییەكێ‌.
17- نەفت ئەلبەسرا 24 كێمتر یارییەكێ‌.
18- دیالا 22 خال كێمتر یارییەكێ‌.
19- كەربەلا 21 خال.
20- حدود 14 خال.
گۆلكەرێن ئەلهۆیێن چیا د خولێ‌ دا
تیما دهۆكێ‌ خوانا دەهـ یاریزانێن پشكداری د تۆماركرنا 30 گۆلان دا هەیە بڤی ڕەنگی، پیتەر گۆرگیس حەفت گۆل، پاشەنگ عەبدوللا شەش گۆل، كەریم دەرویش چار گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید و لۆكاس هێنریك گۆلەك تۆماركرینە، گۆلەك بۆ یاریزانەكێ‌ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
كوڕێن خابووری 43 گۆل هەنە
پیشەكارێ‌ یانەیا زاخۆ یێ‌ بەرازیلی گۆستاڤۆ هێنریك ل سەرێ‌ لیستا گۆلكەرێن تیما خوە دهێت ب تۆماركرنا 16 گۆلان، هەڤالێ‌ وی و یاریزانێ‌ هەلبژارتیێ‌ ئیراقێ‌ ئەمجەد عتوان ب تۆماركرنا 13 گۆلان رێزا دویێ‌ دهێت، ناسر محەمەدو پێنج گۆل، ئەحمەد یاسین دو گۆل، دیبیۆتی ئۆگۆنا سێ‌ گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز، پاتریك مارسێلۆ هەر ئێك گۆلەك تۆماركرینە كو سەرجەمێ‌ گۆلێن زاخۆ بووینە 43 گۆل د خولێ‌ دا.
یاریێن گەڕا 29ێ‌ دێ‌ هێنە ئەنجامدان
بڕیارە ئەڤرۆ دەست ب هەڤڕكیێن گەڕا 29ێ‌ یا خولا ستێرێن ئیراقێ‌ بهێتە كرن، دەمژمێر پێنجێ‌ ئێڤاری یانەیا نەفت مێڤاندارییا تەلەبە كەت، د هەمان دەمدا دیالا دێ‌ بیتە مێڤانا نەفت میسان، ل دەمژمێر 7:30 شەڤ یانەیا جەوییە دێ‌ ل یاریگەها شەعب ل پایتەختێ‌ ئیراقێ‌ بەغدا مێڤاندارییا نەجەف كەت.
یاریێن دهۆكێ‌ یێن پاشئێخستی
ژبەركو تیما فوتبۆلا یانەیا دهۆكێ‌ موژیلی یاریێن كۆپا كەنداڤی بوو و شیابوو ب سەرفەرازی ناسناڤێ‌ كۆپایێ‌ ب دەستڤە بینت، د دەمێ‌ قارەمانیێ‌ دا فدراسیۆنا فوتبۆلا ئیراقێ‌ دەلیڤە دابوو دهۆكێ‌ یاریێن وێ‌ بهێنە پاشئێخستن بوخاترا ئەڤێ‌ قارەمانیێ‌ كو سەرجەمێ‌ و بوونە شەش یاری و ب ڤی رەنگی، بەرانبەر تەلەبە ل بەغدا، دگەل شورتە ل دهۆكێ‌، بەرانبەر هەولێرێ‌ ل هەولێرا پایتەخت، دگەل نەفت میسان ل دهۆكێ‌ و دێ‌ بیتە مێڤانا یانەیا دیالا و یارییا شەشێ‌ مێڤاندارییا یانەیا مینا یە بەسرایی بكەت.

قەیس وەیس:

د داخویانیەكێ‌ دا سكرتێرێ‌ یانەیا ئافرەتێن دهۆكێ‌ بۆ رۆژنامەیا ئەڤرۆ دیار كر پاشئێخستنا یاریێن خولا فوتسالا كچان بۆ دو حەفتیێن دی دربەكێ‌ كۆژەكە ب خولێ‌ كەڤتییە و مۆرال و هێزا خولێ‌ كێم كرییە، ئەڤ بڕیارە دێ‌ كارتیكرنا نەرێنی ل سەر ئاست و پێشڤەچوونا وەرزشا كچان كەت، بۆ زانین پشتی بۆرینا چار یارییان د نوكە دا ئافرەتێن دهۆكێ‌ سەرێ لیستا كۆما خوە دهێت ب 12 خالان و دەربازبوون بۆ چارگۆشەیا زێرین مسۆگەر كرییە، د وەرزێ‌ ئەڤ سالە دا هیڤیێن وان و ڕژدی بۆ پاراستنا ناسناڤێ‌ خوە یێ‌ پارسالن.
زێدەتر سلێمان زەكی گۆت: ئەم ئێك ژ ئەوان شەش یانەیێن دی یێن بەردەوام بەرهەڤی بۆ خولا فوتسالێ‌ كرییە، هەرچەندە بەری دەستپێكرنا مەها ڕەمەزانێ‌ فدراسیۆنا فوتبۆلا كوردستانێ‌ بڕیاردا بۆ درێژاهییا مەها رەمەزانێ‌ خول بهێتە پاشئێخستن و هەر پشتی جەژنێ‌ ئێكسەر یاری بهێنە كرن، لێ‌ ل حەفتییا بۆری د بڕیارەكا نە چاڤەڕێ‌ كری دا فدراسیۆنێ‌ بۆ جارا دویێ‌ یاری پاشئێخستن و پێشڤە بریە دووماهییا ڤێ‌ هەیڤێ‌ بێ‌ وەرگرتنا بۆچوونێن یانەیێن پشكدار ئەوێن 90% دگەل ڤێ‌ بڕیارێ‌ نەبووینە كو دێ‌ بیتە ئەگەر دربەك ب خولێ‌ ب كەڤیت و ئەو مۆرال و زاخا یاریزانان نە مینیت.
لدۆر هیڤیێن وان بۆ خولێ‌ ناڤهاتی گۆت: بەری دەستپێكرنا خولێ‌ مە بەرنامەك و پلان دانایە كو وەرزێ‌ ئەڤ سالە پشكدارییا مە بۆ پاراستنا ناسناڤێ‌ خولێ‌ بیت، هەرچەندە دبیت ئەركێ‌ مە ب سانەهی نابیت و هەڤڕكییەكا بهێز دناڤبەرا هەتا چار یانەیان هەبیت بۆ ناسناڤی، لێ‌ ئەڤ پاشئێخستنە بوویە ئەگەر كارتیكرنێ‌ ل سەر بەرهەڤیێن تیمێ‌ و پلانێن راهێنەری بكەت، ژلایەكێ‌ دووڤە لایەنێ‌ دارایی بوویە بارگرانییەكا ل سەر مللێن كارگێریێ‌، ژبەركو مە چو داهات نینن بتنێ‌ ب سۆپاسی ڤە پارێزگارێ‌ دهۆكێ‌ پشتەڤانییا مە یا ماددی ل دووڤ شیانان دكەت، ئەڤە ژی یا دەمكییە و ئەو پشتەڤانییا بۆ مە دهێت نە چارین گەلەك پێنگاڤا نە هاڤێژین سەرباری پێدڤییا مە بۆ خاترا هندێ‌ بشێن بەردەوامیێ‌ بدەینە ڕاهێنانان و مووچەیێ‌ یاریزان و كادرێ‌ راهێنانێ‌ بۆ پارڤەبكەین.
ل دووماهیێ‌ سكرتێرێ‌ یانەیێ‌ گۆت: سەرباری هەموو ئاستەنگان ئەم یێ‌ هەموو بزاڤان دكەین یا د شیان دا بیت بۆ باشترین بەرهەڤییا تیمێ‌ و بلندكرنا مۆرالا یاریزانێن خوە بهێتە ئەنجامدان، ب هیڤییا وێ‌ یەكێ‌ ئەڤ یانە پشتەڤانییەكا باش بۆ بهێتە كرن تایبەت دابینكرنا جهی و ترۆمبێلا ڤەگۆهاستنێ‌ پێخەمەت كچێن مە ب ئاسانی بهێنە راهێنانان و یارییان.

شاهۆ فەرید:

بڕیارە ئەڤرۆ یاریێن گەڕا شەشێ‌ ژ هەڤڕكیێن خولا پلا دو یا فوتبۆلا كوردستانێ‌ بهێنە ئەنجامدان، د كۆما ئێكێ‌ دا یانەیا شێلادزێ‌ دێ‌ ژدەرڤەیی یاریگەها خوە بیتە مێڤانا یانەیا هەریر، ل دۆر دووماهی پێشهاتیێن تیما شێلادزێ‌ كاروان باڤی سكرتێرێ‌ یانەیێ‌ بۆ رۆژنامەیا ئەڤرۆ ئەڤ داخویانیە داییە.
ل دەستپێكێ‌ ناڤهاتی دیاركر تیما وان یا فوتبۆلێ‌ د قۆناغەكا هەستیار دایە ل خولا پلا دو یا كوردستانێ‌ و بەردەوام ڕاهێنانان دكەن پێخەمەت ب دەستڤە ئینانا پلێتا دەربازبوونێ‌ و دخوازیت پشتەڤانییا دارایی بۆ یانەیێ‌ هەبیت دا ب گەهنە ئارمانجێن خوە.
كاوران باقی ل دۆر كێشەیەكا دناڤ تیمێ‌ دا پەیدابووی گۆت: پشتی هەردو یاریێن بوری كێشەیەك دناڤبەرا یاریزانان و راهێنەرێ تیمێ یێ‌ ئیرانی عەلی سولتان پناهی ڤەگەریا وەلاتێ خوە دووڤدا ئەم ئاگەهدار كرین كو دەستكاریێ خوەكیشا نەشێت دگەل مە بەردوام بیت و چەند ئاریشەیێن دی یێن ڤێ‌ دوومایهێ‌، هەر ئێكسەر مە راهێنەرێ كوڕێ باژێرێ دهۆكێ د سەبری گرێبەست ئیمزاكر، سوپاسیا ئەوی جەماوەرێ‌ خوە دكەین یێن ئامادەبووین ل یاریگەهێ و سوزێ دەینە وانا لسەر هەڤڕكیێ بەردەوامبین، ئەم بێ هیڤی نەبووینە دێ جەنگیین بۆ پلێتا دەبازبوونێ.
ژلایەكێ‌ دووڤە سكرتێرێ‌ یانەیێ‌ گۆت: ئەم یێن هاتینە سزادان ب دوورئێخستنا یاریزانەكی و ماددی ژلایێ فێدراسیونا كوردستانێ ژبەر چەند ئەگەران، سەرەرایی باردوخێ خرابێ یانەیێ دێ وان كێشەیان چارەسەركەین، دێ بزاڤان كەین یاریێن مە ژ یاریگەها مە نە دەركەڤن جەماوەرێ خوە بێ بەهرنەكەین، سەرەرایی باردوخێ مە یێ نە خوەش ژی ئەم یێ یانەیێ ب ڕێڤە دبەین، داخازێ ژ جهێن پەیوەندیدار دكەین هاریكاریا مە بكەین بشێن خزمەتا وەرزشی دەڤەرێ بكەین یانەیا خوە بگەهینە پلەیا ئێك، سوپاسیەكا هەر پایە بلند بۆ بەرپرسێ لەقا هەژدە یا پارتی دیموكراتی كوردستان زۆر بەرێز بەرەڤان حەمدی دكەین و دام و دەزگاهیێن ئیمناهی دكەین كۆ هاریكار ل گەل مە.

ب فه‌رمی دو یاریزانێن یانه‌یا دهۆك یا فرۆكه‌ڤانی ژلایێ فدراسیۆنا ئیراقێ یا هه‌مان یاری بۆ ناڤ ڕێزێن هه‌لبژارتیێ خوه‌ داخوازكرن،پشتی ب دووماهی هاتنا هه‌ڤڕكیێن قاره‌مانییا ئیراقێ یا فرۆكه‌ڤانییا په‌ره‌شۆتان پاراگلایده‌ر ئه‌وا 82 یاریزان ژ 18 یانه‌یێن كوردستانێ و ئیراقێ هه‌ڤڕكی بۆ‌ ناڤ ڕێزێن هه‌لبژارتیێ ئیراقێ دا كرن كو سه‌رجه‌مێ حه‌فت یاریزانان ژ وانا دو یه‌ك هاتینه‌ داخوازكرن، د هه‌ڤڕكیێن واندا ئه‌وا حه‌فتیا بۆری بۆ ماوه‌یێ سێ رۆژان ل چیایێ زاوا یێ پارێزگه‌ها دهۆكێ هاتبوونه‌ كرن.
ئه‌و یاریزانێن رێزێن ئێكێ هه‌تا حه‌فتێ هاتین و جهێ خوه‌ دناڤ ڕێزێن هه‌لبژارتیێ ئیراقێ دا كرین ئه‌و ژی ل دووڤ ڕێزبه‌ندیێ، رێبین ره‌شید فه‌تاح یێ سلێمانیێ، زه‌ید عه‌بد کامل یێ دهۆكێ، عه‌بدوللا ئه‌یاد سالح یێ سلێمانیێ، هه‌ژار جه‌بار عه‌زیز یێ هەولێر، محه‌مه‌د مه‌جید محه‌مه‌د یێ دهۆ، یاریزانێن یه‌ده‌ك، عه‌بدولره‌حمان سامر ژ مووسل و به‌هێز به‌هزاد عه‌باس ژ هەولێرێ.
د داخویانیه‌كێ دا بۆ رۆژنامه‌یا ئه‌ڤرۆ جه‌مال سلێمان ڕێڤه‌به‌رێ وه‌رزشی ل پارێزگه‌ها دهۆكێ ده‌ستخوه‌شییا هه‌موو یاریزانان كر و پیرۆزباهییا سه‌ركه‌فتیێن ئێكێ كرن و گۆت: ژبه‌ر پشته‌ڤانی و رۆلێ وان یێ به‌رچاڤ ژبۆ سه‌ركه‌فتنا قاره‌مانییا فرۆكه‌ڤانییا په‌ڕه‌شۆتان سۆپاسییا رێزدار د. عه‌لی ته‌ته‌ر پارێزگارێ دهۆكێ و ئیسماعیل محه‌مه‌د قائیمقامێ دهۆكێ دكه‌ین دیسان سۆپاسییا هه‌موو ئه‌و ده‌زگه‌هـ و لایه‌نێن هه‌ڤكاری د ڕێڤه‌به‌رنا قاره‌مانیێ دا كرین وهه‌موو لابوونه‌ ئه‌گه‌رێن سه‌ركه‌فتنا ڤێ قاره‌مانیێ و خۆیاكر هه‌رده‌م پارێزگه‌ها دهۆكێ بوویه‌ جهێ مێڤانداریكرنا قاره‌مانییان و ب سه‌ركه‌ڤتیانه‌ بڕێڤه‌چووینه‌.
بۆ زانین ئه‌ڤ قاره‌مانییه‌ بۆ جارا ئێكێ یه‌ ل پارێزگه‌ها دهۆكێ دهێته‌ ڕێكخستن ژلایێ فدراسیۆنا وه‌رزشا فرۆكه‌ڤانییا یا ئیراقێ ب هه‌ڤكاری دگه‌ل ڕێڤه‌به‌رییا وه‌رزشی ل پارێزگه‌ها دهۆكێ هاتبوو ڕێكخستن.