هەولێر، قائید میرۆ:

پارێزه‌ره‌كی دیار کر کو ئینانا ژنا دویێ ل ده‌رڤه‌ی هه‌رێما كوردستانێ زێده‌ بوویه‌ و گۆت: ده‌لالێن په‌یداكرنا ژنان هه‌نه‌ و ب ئاشكرا ل تۆڕێن جڤاکی و سۆشیال میدیایێ ریكلامێ بۆ ئینانا ژنا دویێ یانژی ژنێن عه‌ره‌ب و سوری دكه‌ن.

پارێزه‌ر رێبین سه‌باح، د دیدارەکێ دا بۆ رۆژناما ئه‌ڤرۆ گۆت: “مه‌ داخوازه‌ك ئاراسته‌ی داخوازكارێ گشتی کریە كو لێپرسین دگه‌ل وان كه‌سان بهێته‌ كرن یێن ل ده‌زگه‌هێن راگه‌هاندنێ یانژی د تۆڕێن جڤاکی دا و ب ڕێیا سوشیال میدیایێ ریكلامێ بۆ ئینانا ژنا دویێ دكه‌ن یانژی ب هه‌ر شێوه‌یه‌كێ بیت خه‌لكی هان دده‌ن بۆ ئینانا ژنا دویێ”.
پارێزەری گۆتژی: “بێگومان ل گوره‌ی قانوونا ژماره‌ 15 یا سالا 2008ـێ کو ل په‌رله‌مانێ كوردستانێ ده‌رچوویه‌ ئینانا زێده‌تر ژ ژنه‌كێ ب قانوون هاتیه‌ قه‌ده‌غه‌ كرن و هەکە رێك ژی پێ بهێته‌ دان د هنده‌ك حاله‌تاندا مه‌رج بۆ هاتینه‌ دیاركرن”.
رێبین د بەردەوامیا ئاخفتنێن خۆدا دیار کر کو ئەڤجا هه‌ر كه‌سه‌كی ریكلامێ بكه‌ت یانژی وه‌لاتیان هان بده‌ت ئه‌ڤه‌ دچیته‌ د چوارچوڤێ بنپێكرنا قانوونێ و گۆت: داخوازكارێ گشتی ده‌سته‌یا مافێ گشتی هه‌یه‌ و مه‌ داخواز پێشكێشكریه‌ هه‌تا داخوازكارێ گشتی پێڕابوونێن قانوونی ل هه‌مبه‌ری وان كه‌سان وه‌ربگریت یێن قانوونێ پێشێل دكه‌ن، یانژی بلا ئه‌و قانوون بهێته‌ هه‌لوه‌شاندن یان نابیت به‌رۆڤاژی قانوونێ كار بۆ ئینانا هه‌ڤژینا دویێ بهێته‌كرن.
پارێزه‌ر رێبین گۆتژی: “به‌ری نوكه‌ ژی ئینانا هه‌ڤژینا دویێ هه‌ر هه‌بوویه‌ ئه‌ڤه‌ ناهێته‌ ڤه‌شارتن، به‌لێ ڤان سالێن دووماهیێ دیاره‌ بشێوه‌یه‌كێ به‌رچاڤ زێده‌كریه‌ و ب ئاشكرا ریكلام بۆ ئینانا ژنا دویێ دهێته‌كرن، نوكه‌ ده‌لال هه‌نه‌ بۆ په‌یداكرنا ژنان و ریكلامێ دكه‌ن بۆ ئینانا ژنێن سوری و عه‌ره‌ب و ژنێن باشور و ناڤه‌ڕاستا عێراقێ ئه‌ڤه‌ ژی بازرگانیه‌ ب ژنان دهێته‌كرن و به‌رۆڤاژی قانوونێ یه”‌.
پارێزه‌ر رێبین سه‌باح دیار کر ژی، هنده‌ك ژوان ژنان تنێ بۆ مه‌ره‌مێن ماددی پرۆسا هه‌ڤژینیێ پێك دئینن و بازرگانیێ دكه‌ن ب رێیا هه‌ڤژینیێ، حاله‌تێن زۆر سه‌یر هه‌نه‌ و ژن هه‌بوویه‌ ل ده‌ڤه‌رێن عێراقێ هاتیه‌ هه‌رێما كوردستانێ پرۆسا هه‌ڤژینیێ دگه‌ل زه‌لامێ كورد پێك ئینایه‌ و پاشی ئاشكرا بوویه‌ هه‌ڤژین هه‌یه، هەبۆیە ژی پشتی هەڤژینیێ زێر و پارێن زەلامی برینە و ڕەڤیە ئه‌ڤه‌ هه‌موو بازرگانیه‌كا سه‌خته‌یه‌ بناڤێ هه‌ڤژینیێ دهێته‌ كرن و پێدڤیه‌ رێكارێن قانوونێ هه‌بن ل هه‌مبه‌ر ئه‌ڤێ بازرگانیێ.
پارێزەری ئەو چەند ژی گۆت: “ مه‌ وه‌ك پارێزه‌ر بفه‌ر دیت سكالایێ تۆمار بكه‌ین، داکو چو كه‌سه‌ك ل ده‌زگه‌هێن راگه‌هاندنێ و سۆشیال میدیایێ ریكلامێ بۆ ئینانا هه‌ڤژینا دویێ نه‌كه‌ت، چونكه‌ به‌رۆڤاژی قانوونێ یه‌ و چه‌ندین ئاریشه‌یێن جڤاكی په‌یداكرینه‌ بۆ خه‌لكی، پتریا وان ژنێن دهێنه‌ هه‌رێما كوردستانێ هه‌ڤژینیێ پێك دئینن چو گه‌ره‌نتی نینه‌ و خه‌لك نانیاسیت تنێ بابه‌ت بازرگانیه‌“.
پارێزەری گۆت: “داخوازكارێ گشتی دشێت دووفچوونێ بكه‌ت لدۆر ئه‌ڤی بابه‌تی و هه‌ر كه‌سه‌كێ ریكلامێ بكه‌ت بۆڤێ مه‌ره‌مێ سكالا لسه‌ر بهێته‌ تۆماركرن و ل گوره‌ی قانوونێ بهێته‌ سزادان”.
ل گوره‌ی دووڤچونه‌كا رۆژناما ئه‌ڤرۆ ئه‌و كه‌سێن كارێ ده‌لالیێ دكه‌ن بۆ په‌یداكرنا ژنان مینا ده‌لالێن ئه‌رد و خانیان مه‌ره‌ما وان بده‌ستڤه‌ ئینانا کوژمه‌كێ پاره‌یه‌ و پێكئینانا ئه‌ڤێ هه‌ڤژینیێ ژی زۆر جارا بوویه‌ ئەگەرێ په‌یداكرنا ئاریشه‌یان دناڤا جڤاكێ هه‌رێما كوردستانێ، بتایبه‌تی ئه‌و زه‌لامێن زه‌نگین زێر و پارەیێن وان ژلایێ ژنێن عه‌ره‌ب و سوری هاتینه‌ دزین و ره‌ڤینه‌ بۆ ده‌رڤه‌ی هه‌رێما كوردستانێ، ئه‌ڤه‌ ژبلی جوداهیا داب و نه‌ریتێن وان جڤاكێن ئه‌و ژن په‌روه‌رده‌ كری دگه‌ل داب و نه‌ریتێن جڤاكێ كوردستانێ ناگونجن.

هێلین سالم:

خودانکرنا گیانەوەران دناڤ مالێ دا بویە دیاردەکا بەربەلاڤ د جڤاکی دا، و خەلکەک خوشیێ ژ خودانکرنا وان دبینیت و دبێژن گیانەوەر خەموکیێ لدەڤ مە کێم دکەن.

حەلیما عەلی کچەکا باژێرێ دهوکێ یە ئەڤە چەندین سالە پشیکا دناڤ مالدا بخودان دکەت بو روژناما ئەڤرۆ دیار کر کو دیتنا پشیکان و یاریکرن دگەل وان وێ کەیفخوش دکەن و خەموکیێ لدەف ناهێلیت گوت:” وێ دو جورێن پشیکا هەنە یێن سەرجاددەیان بو خو کەهی کرینە دناڤ باخچەیدا ب خودان دکەت و دەرزیک بو نە داناینە، و پشیکەکا ئەوروپی ژی هەیە دناڤ مالدا ب خودان دکەت و یا پشتراست کریە ژلایێ پزیشکیا فیتێرنەری ڤە، بەلێ خوارن و خودانکرنا وێ پتر یا ب مەزاختە وەکی یێن ژدەرڤە نینە”.
دلسوز گەنجەکە بلبلا ب خودان دکەت بو روژناما ئەڤرۆ دیار کر ئەڤە ١٥ سالە ئەو کارێ خودانکرنا پەلەوەران تایبەت (بلبل، فنجسک و کوکتێلان) دناڤ مالدا دکەت و جهەکێ تایبەت بو وان دناڤ حەوشا مالدا درستکریە و خوارنا وان بو دابین دکەت و خوشیێ ژێ دبینیت و گوت:” دەمێ هێکا دکەن و زور دبن ئەو دفروشیت ئەڤە ژی بو وی وەکی بازرگانیەکا بچووکە”.
لدور هەمان بابەت نوژدارێ گیانەوەران ل رێڤەبەریا ڤیتێرنەرییا دهوکێ هونەر محەمەد سەعید دیار کر لدەمێ مروڤ هزر د خودانکرنا گیانەوەرکی دا دکەت دڤێت هندەک رێنمایان لبەر چاڤ وەرگریت بەری گیانەوەری بینیتە د مالێدا و گوت:” ل دەسپێکێ دڤێت پشکنین بو گیانەوەری بهێنە کرن کا یێ ساخلەمە یان نە و هەکە یێ ساخلەم نەبیت دڤێت چارەسەریا وی بهێتە کرن پاشی بهێتە بخودان کرن و هەکە یێ ساخلەم بیت ژی دڤێت خشتەک ژلایێ نوژدارێن بەرپرسڤە بو بهێتە دروستکرن و لدووڤ ڤاکسین و دەرمانان بچیت و هەر چەند هەیڤان پشکنین بو بهێنە کرن”.
د. هونەر دا زانین ژی کو گەلەک یا گرنگە خوارنەکا ساخلەم و جهەکێ پاقژ بو حەواندنا گیانەوەری بهێتە دابینکرن چونکە هندەک نەخوشی ژوان یێن پیستی ب هاریکاریا میێن وان یان پیساتی یان لەق و پەنجێن وان بو مروڤی دهێنە ڤەگوهاستن و گوت:” لەوما هەر کەسەکێ گیانەوەر هەبن یان لبەر بیت گیانەوەرەکی دناڤ مالا خودا خودان کەت دڤێت پاقژی و ساخلەمیا گیانەوەری لبەر چاڤ وەرگریت دا یێ دوور بیت ژ نەخوشیێن گیانەوەران”.