جەماوەرێ دەڤەرا ئامێدیێ یێن سنوورێ لقێ 18 یێ پارتی، ب هەموو پێكهات و تەخ و چینێن خوەڤە، سەرەدانا مەزارێ نەمران ل بارزان كر ژ بۆ نووكرنا سۆز و پەیمانان و ژ لایێ شێخ (خەلات بارزانی)ڤە پێشوازی لێ‌ هاتە كرن.
بەرەڤان حەمدی، بەرپرسێ لقێ 18 د پەیڤەكێ دا بناڤێ جەماوەرێ دەڤەرا ئامیدیێ، سۆزێن بەردەوامیێ ل سەر ڕێبازا راستەقینەیا كوردایەتیێ، رێبازا بارزانیێ نەمر دا و تەكەز كر، دەستكەفتێن ئەڤرۆ بەرهەمێ وێ خەباتێ یەن یا بارزانیێ نەمر بۆ پتر ژ نیڤ چەرخی كری و وێ رێ و رێبازا دروست یا گەهشتن ب هیڤی و ئومیدان، ئەوا دەستنیشان كری، هەروەسا بەحس ل بنەمایێن رێبازا بارزانی كر.

د. سالار عوسمان، بەرپرسێ پشكا ڕەوشەنبیری و ڕاگەهاندنا پارتی دیموكراتی كوردستان ب ئامادەبوونا هژمارەكا هەڤالێن پشكێ‌ پێشوازی ل هژمارەكا نڤیسەر و هونەرمەند و شاعیر و ڕۆژنامەنڤیس و وێنەكێش و باشنڤیس و بەهرەمەندێن ڕۆژهەلاتێ كوردستانێ‌ كر.
جهێ‌ ئاماژە پێ‌ كرنێیە، ئەو گروپێ‌ رەوشەنبیران ژ باژێڕێن جودا یێن ڕۆژهەلاتێ كوردستانێ‌ هاتبوون، ب مەرەما پشكداریكرنێ‌ ل كۆڕیادا 39مین سالیا مالئاڤاییا مامۆستا هێمن موكریانی ل باژێڕێ‌ هەولێرێ‌ و سەرەدانا پشكا ڕەوشەنبیری و ڕاگەهاندنا پارتی دیموكراتی كوردستان كر.
د. سالار عوسمان، پێشوازی و بخێرهاتن لێ‌ كر و ب گرنگی باس ل ڕۆل و شیانێن ڕەوشەنبیرێن ڕۆژهەلاتێ كوردستانێ‌ كر، ب تایبەت د بیاڤێ‌ كەلتوور و فەرهەنگ و ئەدەبیاتێ‌ دا ڕۆژهەلاتێ كوردستانێ‌ د ئاستەكێ مەزن و بلند دایە، دیسا پشتەڤانیا پشكا ڕەوشەنبیری و ڕاگەهاندنا پارتی بۆ نڤیسەر و ڕەوشەنبێرێن رۆژهەلات دووپاتكر.
ڕەوشەنبیر و نڤیسەر و ئەدیبێن ڕۆژهەڵاتێ كوردستانێ‌، ب گرنگی باس ل كار و چالاكی و بەرنامە و پڕۆژەیێن پشكا ڕەوشەنبیری و ڕاگەهاندنا پارتی كر.

هەولێر، قائید میرۆ:

جێگرێ سەرۆكێ لیژنا پەیوەندیان ل پەرلەمانێ ئیراقێ ئاشكراكر، باج ل سەر كۆمپانیێن گەهاندنێ هاتیە كێمكرن و پێدڤیە بهایێ كارتان ژی ل بازاڕی بهێتە ئەرزانكرن.
ئیبراهیم میرانی، جێگرێ سەرۆكێ لیژنا گەهاندنێ ل پەرلەمانێ ئیراقێ بۆ رۆژناما ئەڤرۆ دیاركر، پێداچوون د كۆمپانیێن گەهاندنێ دا دێ هێتە كرن و مافێ‌ كۆمپانیان دێ هێتە پاراستن، ب تایبەتی گرێبەستێن د ناڤبەرا كۆمپانیێن گەهاندنێ و حوكمەتا ئیراقێ دا هاتینە ئەنجامدان و گۆت: «ئەم دخوازین هەڤڕكیەكا ساخلەم د ناڤبەرا كۆمپانیان دا بۆ پێشكێشكرنا خزمەتگوزاریان هەبیت، دیسا نابیت دەستەیا گەهاندنا ئیراقێ ژی جوداهیێ د ناڤبەرا كۆمپانیان دا بكەت».
ئیبراهیم میرانی گۆتژی: «نێزكی نەه مەهانە 40%ێ باج ل سەر كۆمپانیێن گەهاندنێ هاتیە كێمكرن، بەلێ هەتا نوكە چو كاریگەری ل سەر بهایێ كارتێن مۆبایلێ نەبوویە و بهایێ وان نەهاتیە ئەرزانكرن، لەوڕا ئەم یێ كار دكەین بهایێ كارتان بهێتە ئەرزانكرن، چونكی باج هاتیە كێمكرن و دڤێت وەلاتی ژی مفاداربن».

بەرپرسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر كو گوهدار شێخۆ، سەرپەرشتێ ئیدارەیا سەربخوە یا زاخۆ، ل گەل هەر ئێك ژ ڕێڤەبەرێن پەیوەندیدار و لیژنا گەشەپێدان و پشتگیریكرنا پڕۆژەیێن پیشەسازی و دەڤەرا پیشەسازی ل زاخۆ كۆمبوو.
شڤان عەبدی، بەرپرسێ ڕاگەهاندنا ئیدارەیا سەربخوە یا زاخۆ، ئاماژە ب وێ چەندێ ژی كر كو مەرەم ژ ڤێ كۆمبوونێ ئەو بوو، گۆتوبێژ ل سەر بابەتێن پڕۆژەیێن گەشەپێدانا پیشەسازی و دەڤەرا پیشەسازی ل دووڤ ماستەرپلانا نوو ل سنوورێ ئیدارەیا سەربخوە یا زاخۆ هاتە كرن، كو دێ ئەڤ پڕۆژە كەڤنە د خزمەتا خەلكی دا.
ناڤهاتی گۆت: «بڕیارا ڕازیبوونێ‌ بۆ ڤەكرنا چەندین كارگەهێن پیشەسازی یێن هەمەجۆر د ڤێ كۆمبوونێ دا هاتەدان».

رەمەزان زەكەریا:

كابینەیا نەهێ یا حكومەتا هەرێما كوردستانێ گرنگیەكا باش ب كەرتێ ساخلەمیێ دایە، ل دەڤەرداریا بەردەڕەشێ نەخۆشخانەیا هەوارهاتنێ ب گوژمێ سێ ملیار دیناران دروستكریە.
د. خدر سالح، رێڤەبەرێ ساخلەمیا بەردەڕەشێ‌ بۆ ئەڤرۆ گۆت: «كابینەیا نەهێ یا حكومەتا هەرێما كوردستانێ گرنگیەكا باش ب كەرتێ ساخلەمیێ دایە، نەخۆشخانەیا هەوارهاتنێ، كو ژ 25 تەختان پێكهاتیە و هەموو ئامێرە و پێدڤیێن نۆشداری بۆ هاتینە دابینكرن؛ هاتیە دروستكرن و كەفتیە د خزمەتا خەلكێ بەردەڕەشێ دا».
ناڤهاتی گۆتژی: «پشكا هەوارهاتن و نەشتەرگەریێ و تیشك و دەرمانخانە و پێشوازییا نەخۆشان و تاقیگەهـ د ناڤ دا هەنە، حكومەتا هەرێما كوردستانێ چەندین كارمەند و پەرستار و ستاف بۆ نەخۆشخانا بەردەڕەشێ بەرهەڤكریە بۆ خزمەتكرنا وەلاتیان».

دهۆك لەزگین جوقی:

ب هەلكەفتا ڕۆژا ژینگەها كوردستانێ ل پارێزگەها دهۆكێ هژمارەكا كەوان بۆ ناڤ ژینگەهـ و سروشتێ جوان یێ كوردستانێ هاتنە ئازادكرن.
عەمید جەمال سەعدۆ، فەرماندێ هێزا دهۆكێ یا پاراستنا ژینگەهێ بۆ ئەڤرۆ خویا كر، كۆ ب هەلكەفتا ڕۆژا ژینگەها كوردستانێ 16 كەو بۆ ناڤ ژینگەها جوان یا كوردستانێ هاتنە ئازادكرن و گۆت: «ئەم شیاینە د سالا بۆری دا 58 ماسیگران و 34 كەوگیران دەستەسەر بكەن و بدەینە دادگەهێ».
گۆتژی: «ئەڤ سالە رێژەیا تێكدانا ژینگەهێ كێم بوویە و پتر ولاتی پاراستنا ژینگەهی دكەن».