ب هەلكەفتا رۆژا رۆژنامەڤانیا كوردی و ب چاڤدێریا د. عەلی تەتەر، پارێزگەرێ‌ دهۆكێ‌، سەندیكا رۆژنامەڤانێن كوردستانێ‌/ لقێ‌ دهۆك، دوهی 3/5/2025 سەیرانەك بۆ هژمارەكا زۆرا رۆژنامەڤانێن دهۆكێ‌، كو ژ هەموو حزب و لایەنان پشكداربوون ل سەیرانگەها بابلۆ رێكخست و هژمارەكا بڕگەیێن جودا هاتنە پێشكێشكرن.
ڤیان عەباس، بەرپرسا سەندیكا رۆژنامەڤانێن كوردستانێ‌/لقێ‌ دهۆك، د پەیڤەكێ‌ دا سلاڤ و رێزێن د. عەلی تەتەر، پارێزگارێ‌ دهۆكێ‌ گەهاندنە هەموو رۆژنامەڤانێن دهۆكێ‌ و رۆژا رۆژنامەڤانیا كوردی ل هەموویان پیرۆزكر، هەروەسا دیاركر، ئەو وەكو كارگێڕیا پارێزگەهێ‌ دێ‌ هەموو دەما پشتەڤانێن رۆژنامەڤانان بن، چنكو وان باوەری ب ئازادیا رۆژنامەڤانیێ‌ و ڕادەربڕینێ‌ هەیە و گۆت: «هەموو دەمان دەرگەهێ‌ پارێزگەهێ‌ بۆ هەر پشتەڤانیەكێ‌ بۆ وان یێ‌ ڤەكری یە».
حاكم ئازاد حەمە ئەمین، نەقیبێ‌ سەندیكا رۆژنامەڤانێن كوردستانێ‌، د پەیڤەكێ‌ دا سوپاسیا پارێزگارێ‌ دهۆكێ‌، هەروەسا سەندیكا رۆژنامەڤانێن كوردستانێ‌/لقێ‌ دهۆك كر بۆ رێكخستنا ڤێ‌ سەیرانێ‌ و دیاركر كو سەیرانێن هوسا گرنگیەكا ئێكجار زۆر هەیە و ژ رۆژنامەڤانێن دهۆكێ‌ خواست هەموو ب پیشەیانە كار و ئەركێن خوە یێن رۆژنامەڤانی بجه بینن، هەروەسا سوپاسیا حكومەتا هەرێما كوردستانێ‌ كر ژ بۆ پشتەڤانیا وانا بەردەوام بۆ سەندیكا رۆژنامەڤانان و گۆت: «مە هندەك پڕۆەژەیێن بۆ باشتركرنا رەوشا رۆژنامەڤانان و كەنالێن راگەهاندنێ‌ ل كوردستانێ‌ هەین، لێ‌ ئەم چاڤەڕێی پێكئینانا كابینەیا نوو یا حكومەتا هەرێما كوردستانێ‌ ینە و ئەو پڕۆژە دێ‌ كەڤنە د بیاڤێ‌ بجهئینانێ‌ دا».
د دووڤ دا هژمارەكا خەلاتان هاتنە پێشكێشكرن، هەروەسا چەند بڕگەیێن دی یێن هونەری و وێ‌ سەیرانێ‌ تا درەنگی ئێڤاری ڤەكێشا.

زاخۆ، دلۆڤان هالۆ:

دكتۆر ڕەمەزان جەعفەر، هاریكارێ سەرۆكێ زانكۆیا زاخۆ بۆ كاروبارێن قوتابیان بۆ ڕۆژناما ئەڤرۆ دیار كر كو دوهی 3/5/2025 ل یاریگەها دەلال یا وەرزشی، ل ژێر چاڤدێریا دكتۆر دیار عەبدولكەریم هالۆ، سەرۆكێ زانكۆیا زاخۆ و ب ئامادەبوونا گوهدار شێخۆ، سەرپەرشتێ ئیدارەیا سەربخوە یا زاخۆ، ئاهەنگا گەڕا 14 یا دەرچوونا قوتابیێن زانكۆیا زاخۆ بۆ سالا خواندنێ 2023 – 2024 هاتە گێڕان.
هاریكارێ سەرۆكێ زانكۆیا زاخۆ بۆ كاروبارێن قوتابیان ئاماژە ب وێ چەندێ ژی كر كو د ڤێ گەڕێ دا دو هزار و 104 قوتابیان ب بسپۆریێن جۆراوجۆر باوەرناما دەرچوونێ وەرگرت.

هەولێر، قائید میرۆ:

بەرپرسەكێ وەزارەتا باژێرڤانی و گەشتوگوزارێ خویاكر، هەتا نوكە زێدەتری 300 هزار فەرمانبەران رازیبوونا وەرگرتنا پارچەیێن ئەردی هەیە و دبێژیت: هەتا مەها داهاتی هەموو فەرمانبەر دێ‌ مفاداربن و رازیبوون ل سەر ناڤێن وانا دێ هێتە كرن.
سەربەست مەولود، سەرپەرشتیارێ پرۆسا بەلاڤكرنا پارچەیێن ئەردی بۆ رۆژناما ئەڤرۆ دیاركر، د دەمێ نوكە دا زێدەتری 300 هزار فەرمانبەران رازیبوون بۆ وەرگرتنا پارچەیێن ئەردی هەیە و ناڤێن وان دهێنە رەوانەكرن بۆ باژێرڤانیان هەتا ب تیرۆپشك بۆ بهێتە كرن و ئەرد بۆ بهێتە دیاركرن و گۆت: «زۆربەیا فەرمانبەرێن وەزارەتان دووماهی هاتینە و رازیبوون هەیە، ب تنێ وەزارەتا پێشمەرگەی و خانەنشین ماینە، ئەو ژی نوكە كار ل سەر دهێتە كرن بۆ وەرگرتنا رازیبوونێ‌«.
سەربەست مەولود گۆتژی: «ل چەند رۆژێن بۆری ناڤێن نێزیكی 40 هزار فەرمانبەرێن دی هاتیە پەسەندكرن و ئەم باوەرین د مەها گولانێ‌ دا، دێ رازیبوون بۆ هەموو فەرمانبەران دەركەڤیت، چونكی ئەو ناڤێن مای هەتا نوكە ژ لایێ تەكنیكی ڤە ئاریشە هەیە و پشتی چارەسەركرنێ ئەو ژی ژ وەرگرتنا پارچەیێن ئەردی دێ مفاداربن».

هەولێر، قائید میرۆ:

بەرپرسەكێ وەزارەتا كار و كاروبارێن جڤاكی یا حكومەتا هەرێما كوردستانێ‌ دیاركر، ل هەرێما كوردستانێ 28 هزار كرێكارێن بیانی هاتینە دەستەبەركرن و دبێژیت: بازرگانیكرن ب كرێكارێن بیانی ب هەموو شێوەیەكی قەدەغەیە.
مەریوان بەگۆك، رێڤەبەرێ گشتیێ كار و دەستەبەرا جڤاكی ل وەزارەتا كار و كاروبارێن جڤاكی بۆ رۆژناما ئەڤرۆ دیاركر، وەزارەتا ناڤخۆ لێپرسینێ ل گەل وان كەس و كۆمپانیان دكەت، یێن بازرگانیێ ب كرێكاران دكەن و گۆت: «لیژنەیێن وەزارەتێ ژی بەردەوام سەرەدانا جهێن كاری دكەن و هەر پێشێلكاریەك هەمبەری كرێكارێن بیانی و ناڤخۆ بهێتە كرن، دێ رێكارێن قانوونی هەمبەر هێنە وەرگرتن، ل گورەی بڕیارا حوكمەتا هەرێما كوردستانێ، رێژەیا 75%ێ پێدڤیە دەستێ كارێ ناڤخۆیی بیت و دەلیڤە بۆ خەلكێ هەرێمێ بهێتەدان كار ل هەموو پڕۆژەیەكی بكەت و رێژەیا 25%ێ كرێكار و كارمەندێن بیانی ماف هەیە كار بكەن».
مەریوان بەگۆك گۆتژی: «ل هەرێما كوردستانێ 28 هزار كرێكارێن بیانی هاتینە دەستەبەركرن و بازرگانی كرن ب ئەڤان كرێكارێن بیانی ب هەموو شێوەیەكی قەدەغەیە، لەوڕا ژی هەر سكالایەكا بهێتە تۆماركرن، دێ دووڤچوون بۆ هێتە كرن، چونكی كرێكار یێ ناڤخۆ بیت و یان بیانی، مافێ‌ وی ل گورەی قانوونێ یێ پاراستیە».

دهۆك، لەزگین جوقی:

ئەندامەكێ پەرلەمانێ ئیراقێ ئاشكرا كر، ژ سالا 2014ێ هەتا نوكە ئەڤە چەندین حكومەت ل ئیراقێ هاتنە پێكئینان و هێشتا كەیسا ئاوارەیێن شنگالێ چارەسەر نەكریە.
شەریف سلێمان، ئەندامێ پەرلەمانێ ئیراقێ بۆ رۆژناما ئەڤرۆ گۆت: «ئەم رۆژانە ل بەغدا كار بۆ خزمەتكرنا ئاوارەیان دكەین، دیسا هەمی بزاڤان بۆ چارەسەركرنا كەیسا ئاوارەیێن شنگالێ و قەرەبووكرنا خەلكێ ڤەگەڕیایە شنگالێ دكەین، لێ بەغدا یا رژد نینە، هەتا نوكە پتر ژ 20 هزار خێزانێن ئاوارە د ناڤ كەمپان دا ماینە و پتر ژ 35 هزار خێزانێن ئاوارە ل دەرڤەی كەمپان ئاكنجینە، ئەڤ رێژەیا مەزن یا ئاوارەیان ماینە و نەشیاینە ڤەگەڕن».

رەمەزان زەكەریا:

ل سنوورێ رێڤەبەریا پاراستن و سەخبێریا رێك و پران ل ئاكرێ هژمارەكا پڕۆژەیان دێ‌ هێنە بجهئینان.
ئەندازیار محسن میرانی، رێڤەبەرێ پاراستن و سەخبێریا رێك و پران ل ئاكرێ بۆ ئەڤرۆ گۆت: «كابینەیا نەهێ یا حكومەتا هەرێما كۆردستانێ گەلەك گرنگی دایە كەرتێ رێك و پران و ب گوژمێ شەش ملیار و 500 ملیۆن دیناران هژمارەكا جاددەیان ل هەردو دەڤەرداریێن ئاكرێ و بەردەڕەشێ‌ دهێنە بجهئینان و هەتا نوكە نزیكی 80% هاتینە دروستكرن و د دەمێن بهێن دا دێ تەمام بن و كەڤنە د خزمەتا ولاتیان دا».
ناڤبری گۆتژی: «پڕۆژە ژ قێركرن و نووژەنكرن و سەخبێركرنا رێكێن سنوورێ هەردو دەڤەرداریێن ئاكرێ و بەردەڕەشێ پێكهاتیە، ل ئاكرێ رێكێن هژمارەكا گوندێن سەر ب ناوچەداریا گردەسێن و بجیل و دینارتە دهێنە دروستكرن، هەروەسا چێكرنا رێكێن هژمارەكا گوندێن ناوچەداریا كەلەك و رۆڤیا سەر ب دەڤەرداریا بەردەڕەشێ‌ ڤە، دیسا د دەمێن داهاتی دا رێكێن هژمارەكا گوندێن سەر ب هەردو وان دەڤەرداریان ڤە دێ‌ هێنە دروستكرن و سەخبێریكرن».

دلۆڤان ئاكرەیی

قائیممقامێ‌ قەزا سێمێلێ‌ راگەهاند، سنۆرێ قەزا سێمێلێ یێ بەرفرەهە و ژمارەیا ئاكنجیێن وێ دگەل ئاوارە و پەنابەران دگەهیتە نێزیكی ٤٠٠ هزار كەسان و ئەو كۆژمێ پارەی كۆ بۆ پرۆژەیان ژلایێ حكومەتێڤە دهێتە دیاركرن بۆ ناحیە و گۆندان ژی دهێتە دەستنیشانكرن ب ئاوایەكی ژمارەیەكا زۆر یا پرۆژەیێن خزمەتگۆزاری جۆدا ژ سەنتەرێ قەزایێ ل ناحیە و گۆندێن سەر ب قەزایێڤە هاتینە چێكرن.

خەلیل مەحمود قائیممقامێ‌ قەزا سێمێلێ‌ بۆ رۆژنامەیا ئەڤرۆ دیار كر، ژ بەر رەوشا ئابووری ل سەر حوكمەتا هەرێمێ ل سالا ٢٠١٤ هەتا كۆ سالا ٢٠٢٠ دشێم بێژم گەلەك كێم پرۆژە ل ناڤا سەنتەرێ قەزایێ هاتینە جێبەجێكرن، بەلێ ئەڤە چەند سالەكە دوبارە دەست ب چێكرنا پرۆژەیان هاتیە كرن و د نۆكەدا ١٤ پرۆژە د قوناغێن جێبجێكرنێدانە ب كۆژمێ ١٤ ملیار دیناران و جۆدا ژ ڤان رازەمەندی هاتیە دان ژلایێ حكومەتا هەرێما كوردستانێڤە كۆ ٤ پروژەیێن دی یێن خزمەتگوزاری ب كۆژمێ ٤ ملیار دیناران ل سەنتەرێ قەزایێ ب كەڤنە كاری و كار ل سەر هندەك ل ڤان پرۆژەیان ٨٠٪ ب دووماهی هاتییە.
سەبارەت پاكێجا پرۆژەیێن جادەیا سەرەكییا دناڤا سەنتەرێ قەزایێ ئاشكرا كر كۆ ئەو پاكێج ژ ٤ پرۆژەیان پێك دهێت، وەكو تەماكرنا سایدێ دویێ ل ناڤا سەنتەرێ قەزایێ بۆ بنگەهێ وەرزش و لاوان ل سێمێلێ و چێكرنا پاركێ ناڤ سەنتەرێ قەزایێ كۆ ماوەیەك بۆ ژمارەیەكا فەرمانبەران دناڤا نەخوشخانەیا كەڤنا سێمێلێ بوون. سەرەرای هندێ‌ ئەرد مولكێ حكومەتێ بوو، ئەو رازی نەدبوون وی ئەردی ڤالا كەن هەتا نەهێنە قەرەبووكرن. هەر چەندە بەری هینگی وان سۆزنامە ئیمزا كربوون كو هەردەما حكومەت پێتڤی ب ئەردێ خۆ بوو، وی ئەردی رادەستی حكومەتێ بكەن، جۆدا ژ ڤان پرۆژێ جادەیا لاوەكی یا ل پڕا بەرنیاس ب مرنێ هەتا دگەهیتە رێڤەبەریا كارۆبارێن جڤاكی یا سێمێلێ ب هێتە تەمامكرن، هەروەها كار ل سەر راكرن و چێكرنا شوستەیێن جادەیا سەرەكی یا دناڤ سەنتەرێ قەزایێدا ژی دهێتە كرن كۆ دوبارە ب دیزاین و كەرەستەیێن نوو بهێتە نۆژەنكرن.
ل دۆر هەبوونا ژمارەیەكا زۆر یا ترومبێلێن بارهەلگر دناڤ كۆلان و گەرەكاندا گۆت: وان پارچە زەڤییەك ب بەرفرەهیا ٣٢ هزار مەتران تەرخانكریە بۆ چێكرنا گۆرەپانەكا مەزن بۆ ڤان جۆرە ترومبێلان كۆ دكەڤیتە نێزیكی سنۆرێ گۆندێ سێجێ و دنۆكەدا ئەو كاری بۆ رێكەڤتنەكێ و رادەستكرنا ڤی پروژەی بۆ بەلێندەرەكی دكەن.