د داخویانیەكێ‌ دا سەرۆكێ‌ لژنەیا ئۆلمپی لەقێ‌ دهۆك دیار كر دوهی دگەل سەرۆكێ‌ لژنەیا ئۆلمپییا ئیراقێ‌ كۆمبوو و گەنگەشە ل سەر چەند بابەتێن گریدایی ب وەرزشا پارێزگەها دهۆكێ‌ و موكمكرنا پەوەندیێن وەرزشی و پێشئێخستنا چالاكیێن ئۆلمپیێ‌ ل پارێزگەهێ‌ هاتنە بەحسكرن كو شاندێ‌ وان پێكهاتی بوون ژ فەرسەت عەلی سكرتێرێ‌ لژنەیا ئۆلمپییا دهۆكێ‌ و سلێمان رەمەزان ڕاهێنەرێ‌ نێڤدەولەتی و وەرزشڤانێ‌ بەرنیاس یێ‌ پارێزگەها دهۆكێ‌.
زێدەتر پ.د. ئەحمەد قاسم بۆ رۆژنامەیا ئەڤرۆ گۆت: ئەم دگەل د. عقێل مفتن و خالد كبیان راوێشكارێ‌ محەمەد شیاع ئەلسودانی سەرۆك وەزیرێن ئیراقێ‌ كۆمبووین كو ل سەر چەند تەوەرێن جودا و گرنك مە بەحسكرن هەموو ژی تایبەت بوون ب وەرزشا پارێزگەهێ‌ و كوردستانێ‌ و زێدەتر پشتەڤانی بهێتە كرن، تا ڕادەیەكێ‌ باش دگەل مە هەڤكاربوون.
هەروەسان ناڤهاتی گۆت: وەكو شاندێ‌ لژنەیا ئۆلمپی یا دهۆكێ‌ دگەل دو بەرپرسێن بلند یێن وەرزشا ئیراقێ‌ كۆمبووین بۆ بابەتێن جودا، ب گشتی مە ل سەر رەوشا وەرزشا پارێزگەهێ‌ و كوردستانێ‌ چڤین و بەحس ل ئەوان یاریزان و یانە و فدراسیۆنێن وەرزشی هاتە كرن تایبەت ئەوێن پشكداری د پرانییا قارەمانیێن ئیراقێ‌ و دەرڤە دا پشكدارن و ئەنجامێن سەرفەراز دەستڤە دئینن، ئەو تەوەرێن گرنگ یێن هاتینە بەحسكرن ژ وانا دڤێت یەكسانی دناڤبەرا وەرزشا كوردستانێ‌ ب گشتی و یا پارێزگەها دهۆك ب تایبەتی بەرانبەر یێن دی یێن ئیراقێ‌ بهێتە كرن، چو جوداهی دناڤبەرا وان دگەل یێن ئیراقێ‌ نە هێتە كرن، هەروەسان دۆپاتی ل سەر دوورئێخستنا دەست تێوەردانا سیاسەتێ‌ ژ وەرزشێ‌، یا پێدڤی هەر چەوا هاریكارییا یانە و فدراسیۆنێن وەرزشی یێن ئیراقێ‌ تایبەت ژی وەرزشا كچان دهێنە كرن دڤێت پشتەڤانییا یێن كوردستانی ژی بهێنە كرن.
ژلایەكێ‌ دووڤە سەرۆكێ‌ لژنەیا ئۆلمپییا دهۆكێ‌ ئەوچەندە ژی خویاكر داخواز ژ د. عقێل مفتن و خالد كبیان هاتە كرن سەرەدانا پارێزگەها دهۆكێ‌ بكەن پێخەمەت ژ نێزیك ل سەر ڕەوشا وەرزشا پارێزگەهێ‌ و ژێرخانەیا وەرزشی ببینن، پێنەڤێت ئەڤ پێنگاڤە ژی دێ‌ بیتە قۆناغەكا باش كو ئەم بشێن پشتەڤانییا لژنەیا ئۆلمپییا ئیراقێ‌ و سەرۆك وەزیرێن ئیراقێ‌ وەربگرین و زێدەتر بشێن كاربكەین ژبۆ پێشئێخستنا وەرزشا پارێزگەهێ‌ و دانانا چالاكیێن باشتر كو بكەڤیتە د خزمەتا وەرزشێ‌ دا و فدراسیۆنێن مە یێن وەرزشی كارێ‌ خوە زێدەتر ئەكتیڤ بكەن.
پرۆفیسۆر دكتور ئەحمەد قاسم ئاماژە پێ‌ دا كو ئەوان داخواز ژ وان كرییە پرۆژەیێ‌ قارەمانێ‌ ئۆلمپی ل پارێزگەها دهۆكێ‌ ژی بهێتە ڤەكرن و گۆت: ئەڤ داخوازییە مە كر ژبۆ هندێ‌ ببیتە پالدەر و پشتەڤانی بۆ یاریزانێن مە ئاستێ‌ خوە پێشبێخن و پاشەرۆژەكا باشتر بخوە ببینن و هەروەسان هندەك بابەتێن دی هەبوون هەر بۆ خزمەتا وەرزشا پارێزگەهێ‌ مە بەحسكرن.

قەیس وەیس:

د كۆنگرەیەكێ‌ رۆژنامەڤانی یا پشتی یاریێ‌ ڕاهێنەرێ‌ تیما فوتبۆلا یانەیا دهۆكێ‌ دەستخوەشییا هەموو یاریزانان كر و پیرۆزباهییا جەماوەرێ‌ بەرهەڤبوویی و هەمی حەز ژێكەرێن یانەیێ‌ كر پشتی شیاین سەركەفتنەكا گرنگ بەرانبەر مێڤانا خوە یانەیا كەربەلا بینن ب دو گۆلان بەرانبەر گۆلەكێ‌، د یارییا واندا ئەوا ل ئێكشەمبییا بۆری ژ چارچووڤەیێ‌ هەڤڕكیێن گەڕا 30ێ‌ ژ خولا ستێرێن ئیراقێ‌ ل یاریگەها دهۆك یا نێڤدەولەتی هاتییە كرن، هەردو گۆلێن دهۆكێ‌ ژلایێ‌ یاریزانان كەریم دەرویش و زانا عەلی هاتنە تۆماركرن.
مەسعۆد میرال ڕاهێنەرێ‌ دهۆكێ‌ گۆت: بۆ هەر یارییەكێ‌ ئەم تیما هەڤڕك: دخوینن ژبۆ زانینا خالا هێز و كێماسیێن وان، هەموو یاری ژی ب زەحمەتن، پشتی دو یاریێن ئەنجامێن نە باش ئەم شیایین ڤێ‌ یاریێ‌ تیما خوە ڤەگەرینە سەركەفتنان، ئەركێ‌ من پێشئێخستن و بلندكرنا ئاستێ‌ یاریزانایە پێخەمەت دەستڤە ئینانا ئەنجامێن باش و سەركەفتی، هەستەكێ‌ تایبەتە دەمێ‌ بەری یاریێ‌ ب دەمژمێرەك و نیڤان بهێنە دناڤ یاریگەهێ‌ و ببینی ئەو یاریگەهـ یا پڕ بووی ژ حەزژێكەر و پشتەڤانێن دهۆكێ‌ و ئەڤە ژی دبیتە ئەگەر باشتر خوە بەرهەڤ بكەین و ڕژدیێ‌ بۆ سەركەفتنێ‌ بكەین، بۆ یاریێن بهێت دێ‌ هەموو بزاڤان كەین بەردەوامیێ‌ بدەینە سەركەفتنان.
یاریێن دهۆكێ‌ یێن پاشئێخستی
ژبەركو تیما فوتبۆلا یانەیا دهۆكێ‌ موژیلی یاریێن كۆپا كەنداڤی بوو و شیابوو ب سەرفەرازی ناسناڤێ‌ كۆپایێ‌ ب دەستڤە بینت، د دەمێ‌ قارەمانیێ‌ دا فدراسیۆنا فوتبۆلا ئیراقێ‌ دەلیڤە دابوو دهۆكێ‌ یاریێن وێ‌ بهێنە پاشئێخستن بوخاترا ئەڤێ‌ قارەمانیێ‌ كو سەرجەمێ‌ و بوونە شەش یاری و ب ڤی رەِنگی، بەرانبەر تەلەبە ل بەغدا، دگەل شورتە ل دهۆكێ‌، بەرانبەر هەولێرێ‌ ل هەولێرا پایتەخت، دگەل نەفت میسان ل دهۆكێ‌ و دێ‌ بیتە مێڤانا یانەیا دیالا و یارییا شەشێ‌ مێڤاندارییا یانەیا مینا یە بەسرایی بكەت.
گۆلكەرێن ئەلهۆیێن چیا د خولێ‌ دا
تیما دهۆكێ‌ خوانا دەهـ یاریزانێن پشكداری د تۆماركرنا 32 گۆلان دا هەیە بڤی ڕەنگی، پیتەر گۆرگیس حەفت گۆل، پاشەنگ عەبدوللا شەش گۆل، كەریم دەرویش پێنچ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید، زانا عەلی و لۆكاس هێنریك گۆلەك تۆماركرینە، گۆلەك بۆ یاریزانەكێ‌ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.

رەمەزان زەكەریا

د داخوایانیەكێ دا سەرۆكێ یانەیا بەردەڕەش ئاشكرا كر ئەڤ سالە تیما وان یا فوتبۆلێ‌ ل سەر پلانەكا ڕێكخستی دچیت و ئاستەكێ گەلەك باش پێشكێش كریە و ل سەرێ لیستێ دهێت، هەروەسان شیایە پێگەهێ خوە ب پارێزیت و هیڤیێن مەزن هەنە كو ئاستەكێ باشتر پێشكەش بكەت و بەر ب دەربازبوون بۆ پلا ئێكا كوردستانێ‌ .
زێدەتر سەمیر عەبدولقادر بۆ رۆژناما ئەڤرۆ گۆت: ئەو ئاستێ ئەڤ سالە تیما مە یا فوتبۆلێ‌ د خولا پلا دو یا كوردستانێ‌ دا پێشكەش كری ڤەدگەرێت بۆ باشی و زیرەكیا یاریزان و راهێنەرێ ب ئەزموونێ یانەیێ و مە هیڤیێن باش هەنە كو یاریێن داهاتی ژی دا بشێن ئاستێ خوە یێ باش هەر بهێلن هەتا دگەهیت ئارمانجا خوە كو خولا پلە ئێكا كوردستانێ یە.
ناڤبری گۆتژی: ل دەستپێكا وەرزێ خولا پلە دو یا كوردستانێ ئارمانجا یانەیا بەردەڕەش ئەو بووە بگەهیت خولا پلە ئێك و نێزیكە سەركەڤیت، وەرزێ بهێت بۆ سەركەفتنێ یاریا بكەت نەك مانەڤەیێ دخوازین بگەهینە خولا نایاب ژی پشتی ئەڤ سالە سەركەڤین بۆ پلە ئێك.
ناڤهاتی خویاكر: دخوازین كو جهێن شولەژی هژمارەكا پرۆژێن وەبەرهێنانێ بۆ یانەیا بەردەڕەش ئەنجامبدەن بۆ وێ چەندێ ببیتە خودان داهاتەكێ بەردەوام هەتا ئاستێ یانەیێ ب هەموو رەنگا باشتر بكەین و ئەنجامێن باشتر ب دەستڤەبینین.

شاهۆ فەرید:

د داخویانیەكێ دا دادڤانێ‌ پارێزگەهێ‌ و كوڕێ‌ باژێرێ‌ سێمێلێ‌ محەمەد حەسەن یێ‌ بەرنیاس ب كولینا بۆ رۆژنامەیا ئەڤرۆ دیاركر ئەڤە بۆ ماوەیێ چەندین سالە خول بۆ دادڤانان ناهێنە ڤەكرن نە ل ناڤخوەیی و نە ل دەرڤەژیی هەروەسا، ئەگەر دادڤانی قەستا پشكینان بۆ خولی كر لسەر مەزاختیێ خوەیێ تایبەت پشكدارن و فدراسیۆنا فوتبۆلا دهۆكێ ژی دادڤان پشت گوهێ خوە هاڤێژتینە رژدی كار نەكریە مافێ دادڤانێن دهۆكێ پارێزن وەكۆ پارێزگەهێن دێ.
زێدەتر ناڤهاتی گۆت: ئەڤە دو وەرزە تنێ كوژمەكێ كێمێ پارەیی مەزاختینە خول ب دووماهیی ژی هات هێشتا شایستێن دارایی نەداینە مە مافێ دادڤانان یێ خوارییە، سەبارەتی ئەو هێرشا لسەر مە دەستەكا دادڤاننا دیاریا دناڤبەرا یانەیێن خلێفان و حەلبجە ژ خولا پلا دو مە هاتیەكرن، پشتی یانەیا خلێفان تووشی خوسارەتیێ بوویی دو گۆلا بەرامبەر گولەكێ هێرش ژلایێ كارگێریێ و جەماوەرێ وان مە هاتەكرن، ئەز هاتمە برینداركرن و هێزێن ئەمنی ژی چ رۆل بەرامبەری پاراستنا مە نەبوون، سكالا مە توماركریە لسەر یانەیا خلێفان و سەروكێ وێ لێ پشتی لژنەیا خولی و سەرپەرشتێ یاریێ كومبووین یانە هاتە سزادان لێ ئەوا من لسەر سەروك یانەیی توماركری چ بریار سەرنەداینە، سكالا مە دەڤ داوەكاریێ گشتی توماركریە و ناڤەكێشین هەتا بگەهینە مافیێ خوە، نەبوونا ڤارێ كارتێكرن مە دادڤانان كریە هەبوونا وێ دێ شاشێن مەیێن كێم چارەسەركەن، ئەڤە چەندیین سالە دادڤان بێ بەرامبەر یاریا ئەنجامدەن.
هەروەسان محەمەد حەسەنی گۆت: ئەڤە ماوەیێ پازدە سالانە ئەز كارێ دادڤانیێ دكەم، هەتا نوكە پتریا یانەیا و جەماوەریی یاسا و رێسایێن دادڤانیێ نوزانن هەردەم توندوتێژیێ بەرامبەریی وان بكاردئینن، هێزێن ئەمنی ژیی رۆلێ خوە نارابن باشی بۆ پاراستنا دادڤانا و یانەیێن مێهڤان، پشتی هێرشا من هاتیەكرن خولا پلەیا دو یا كوردستانێ فێدراسیونا فوتبۆلا دهۆكی نە هاتینە سەر هێلێ بۆ بەرگریكرنێ ژمن و هەلوەست نینە، داخوازیێ ژ لژنا ئۆلمپی یا دهۆكێ دكەین بۆ پاراستنا دادڤانێن دهۆكێ بهێنە دەنگ و رژدی لسەر كاربكەن، هەر یانەیەكا تووشی خوسارەتیێ بۆ بلا شاشیێن خوە دادڤانا نە ڤەشێرن، دخوازیین دادگەهەكا وەزشی بهێتە دامەزراندن مافێ هەموو وەرزشڤانان تێدا یێ پاراستی بیت.

رەمەزان زەكەریا

د داخویانیەكێ دا ڕاهێنەری تیما جۆدۆیا یانەیا ئاكرێ ئاشكراكر وەكو پێدڤی گرنگی ب وەرزشا جۆدۆیێ ناهێتە دان مە پشكداری د چەندین قارەمانیێن ناڤخۆە و دەرڤە كرینە و چەندین جاران ناسناڤ ژی هەبوونە لێ كەسێ‌ پشتەڤانیا جۆدۆیێ نەكریە، هەرچەندە بەردەوامین ل سەر ڕاهێنان و پشكداریكرن د پشكداریێن دەرڤە و نافخوە و نێڤدەولەتی ، دخوازین پتر گرنگی بڤێ‌ یاریێ‌ بهێتە دان و قارەمانی بۆ یاریزان، راهێنەر و دادڤانان بهێنە ڤەكرن هەتا پتر شارەزایێ زانستێن جودوێ ببن.
ئیڤان عەبدولكەریم بۆ رۆژناما ئەڤرۆ گۆت: تیما جۆدۆیا ئاكرێ هولەك هەیە كو راهێنەرێن خوە ل ئەنجامێن بدەت لێ ئەگەر پشتەڤانی لێ نەهێتە كرن ئەنجام باش نابن، ل سەر ئاستێ كوردستانێ ئەم هژمارەكا دیار ین و بهێزین.
ناڤبری گۆتژی: مە گەلەك ناسناڤ ل سەر ئاستێ كوردستانێ و ئاسیا ب دەستڤە ئیناینە، نوكە ژی تیما مە بەرهەڤیان دكەت بۆ پشكداریكرن د قارەمانییا نێڤدەولەتی ل وەلاتێ ئیرانێ دخوازین كو پتر پشتەڤانیا تیمێ و یاریزانا بهێتە كرن بۆ وێ چەندێ ئاستەكێ باشتر پێشكەش بكەین ل داهاتی.

كارگێرییا یانەیا زاخۆ یا وەرزشی دەست ژ كاركێشانا ڕاهێنەرێ‌ خوە یێ‌ تیما فوتبۆلێ‌ یێ‌ قەتەری تەلال ئەلبلۆشی قەبوولكر و بڕیارە ئەڤرۆ ڕاهێنەرەكێ‌ دی بهێتە دەستنیشانكرن بۆ یاریێن مایی ژ خولا ستێرێن ئیراقێ‌، ئەڤچەندە هات پشتی د یارییا شەڤا دەربازبووی دا ژ گەڕا 30ێ‌ تیما زاخۆ بەرانبەر دیالا ب گۆلەكێ‌ بێ‌ بەرانبەر تووشی خوسارەتیێ‌ بووی.
ل دووڤ ژێدەرێن باوەرپێكری ل یانەیا زاخۆ بۆ رۆژنامەیا ئەڤرۆ دیار كر پشتی رازیبوون ل سەر دەستكاركێشانا ڕاهێنەرێ‌ تیما خوە تەلال ئەلبلۆشی پەیوەندی ب ڕاهێنەرێ‌ بەرنیاس یێ‌ ئیراقی عەبدولغەنی شەهەد هاتییە كرن و ڕازیبوویە جهێ‌ وی ڕاهێنەرێ‌ پێشتری خوە بگریت و بڕیارە ئەڤرۆ ب شێوەكێ‌ فەرمی بهێتە دەستنیشانكرن و گرێبەست بهێتە ڕاگەهاندن.
هەمان ژێدەری دیاركر ژبەر كورتییا دەمی یانەیا زاخۆ نە چارە زووترین دەمدا ڕاهێنەری دەستنیشان بكەن پێخەمەت هەرزو بچیتە دناڤ پێكهاتیێ‌ تیمێ‌ دا بۆ ئەنجامدانا راهێنانان بەری یارییا بهێت یا رۆژا ئەینی دگەل یانەیا زەورا ژ چارچووڤەیێ‌ گەڕا 31ێ‌ ژ خولا ستێرێن ئیراقێ‌، عەبدولغەنی شەهەد د گەڕا بۆری یا 29ێ‌ دا ڕاهێنەرێ‌ یانەیا نەجەف بوو لێ‌ ئەوی دەست ژ كارێ‌ خوە كێشا ئەوێ‌ ئەگەرێ ڤێ‌ چەندێ ژبەر نە پێگێر و نە هاریكارییا هندەك یاریزانان دگەل وی كو نە شیا دروستی پلانێن خوە بجهبینت.
ژلایەكێ‌ دووڤە بەری دەست ژ كاركێشانا خوە د كۆنگرەیەكێ‌ رۆژنامەڤانی دا تەلال ئەلبلۆشی گۆت: داخوازا لێبۆرینێ‌ ژ جەماوەرێ‌ یانەیێ‌ دكەین، خوسارەتیەكا نە چاڤەڕێ‌ كری بوو، لێ‌ یاریزان نە ل دووڤ ئاستێ‌ بەرپرسیارەتیێ‌ بوون، هندەك خەلەتی هەنە دڤێت دگەل كارگێریێ‌ ب روونین و چارەسەر بكەین، یاریزان ب گیانێ‌ تیمێ‌ یاریێ‌ ناكەن ئەڤچەندە بوویە ئەگەر خوسارەتی بهێتە تۆمار كرن.
بۆ زانین د نوكە دا تیما زاخۆ ب كۆمكرنا 53 خالان رێزا سێیێ‌ دهێت ئەوا یانەیا زەورا ب64 خالان سەرێ‌ لیستێ‌ دهێت، سەرجەمێ‌ گشتی یێ‌ یاریێن ڤی وەرزی هەتا نوكە زاخو ب سەرپەرشتیا ڕاهێنەرێ‌ خوە یێ‌ دەستكاركێشایی تەلال ئەلبلۆشی 15 سەركەفتن، هەشت وەكهەڤی، حەفت خوسارەتی هەنە، 43 گۆل تۆماركرینە و 24 گۆل ل سەر تیمێ‌ هاتینە تۆمار كرن.