زاخۆ، دلۆڤان هالۆ:
مامۆستایەکێ زانکۆیێ دیار کر، مرۆڤان دوو جۆرێن هێزێ هەنە، هێزا فیزیکی و هێزا دەروونی، هێزا فیزیکی د زەڤلەکێن مرۆڤی دایە، لێ هێزا دەروونی د مێشکێ مرۆڤی دایە و مەرەم ژ هێزا دەروونی شێوێ هزر کرن و ئاخفتن و کەسایەتییا مرۆڤییە بەرامبەر ژیانێ و ئەڤ هێزە پێك دهێت ژ هزرێن ئەرێنی و نەرێنی.
دکتۆر نزار عسمەت، مامۆستایێ پشکا دەروونناسی ل زانکۆیا زاخۆ، د دیدارەکێ دا بۆ ڕۆژنامەیا ئەڤرۆ دیار کر، هزرا ئەرێنی ئەوە دەمێ مرۆڤ تەماشەی ژیانێ دکەت ب شێوەیەکێ ئەرێنی، و هزرا نەرێنی ژی ئەوە دەمێ مرۆڤ تەماشەی فشار و گڤاشتێن ژیانێ دکەت ب شێوەیەکێ نەرێنی، هزر ئانکو ئاخفتن، دەمێ مرۆڤ دئاخڤیت ئانکو مرۆڤ هزر دکەت.
د. نزار د بەردەوامیا ئاخفتنێن خۆدا گۆت: ئێك هزرا ئەرێنی دشێتە ملیۆن هزرێن نەرێنی، ئانکو ملیۆن مرۆڤێن نەرێنی نەشێنە مرۆڤەکێ ئەرێنی، ئەڤە ژی تشتەکێ گەلەك باشە د ژیانێ دا، چونکی، هەکە د خێزانەکێ دا کەسەك هەبیت یێ ئەرێنی و بەختەوەر بیت د ژیانێ دا، ئەو دێ شێت کارتێکرنێ ل هەموو ئەندامێن خێزانا خو و کەسێن دەوروربەرێن خۆ کەت و ڤێ هێزا دەروونی یا ئەرێنی دەتە وان ژی.
د. نزار دا زانین کو ٩٠% کۆنتڕۆلا دەروونی ددەستێ مرۆڤی بخۆ دایە، لەوما هندی هزر و تەماشەکرنا مرۆڤی بۆ ژیانێ یا نەرێنی بیت و ب شێوەیەکێ ڕەشبین تەماشەی ژیانێ بکەت، بێگۆمان دێ ئاخفتن و ڕەفتار و ژیانا مرۆڤی هەموو یا ڕەشبین بیت و گۆت: بەرۆڤاژی هەکە مرۆڤ ب شێوەیەکێ گەشبین تەماشەی ژیانێ و خۆشیێن وێ بکەت و یێ سۆپاسدار بیت د ژیانێ دا، هەکە کاودان چەند د نەخۆش ژی بن، بێگۆمان دێ ئاخفتن و ڕەفتار و ژیانا مرۆڤی پڕی گەشبینی و بەختەوەری بیت، چونکی مێشکێ مرۆڤی یێ ڤەشارتی وەکو بەبەغایە مرۆڤ چ بێژیتێ ئەو ژی ب هەمان شێوە بەرسڤا مرۆڤی ددەت، بۆ نموونە هەکە تو بێژی ئەز بەختەوەرم دێ مێشکێ تە ڤێ پەیڤێ وەکو مۆگناتیسی هەموو ئالاڤێن بەختەوەریێ ڕاکێشیت و زڤڕینیتە د مێشکێ تە دا.
ماموستایێ زانکۆیێ دیار کر ژی، پەیڤ نەک بتنێ ئەوە یا کو مرۆڤ دەربڕینێ ژێ دکەت، بەلکو پەیڤان سحرەکا دەروونی یا هەی ئەڤجا چ ب ئەرێنی بیت یان ژی نەرێنی، بۆ نموونە هەکە تو بێژیە کەسەکێ تو یێ گەش بووی و جلکێن تە دجوانن یان تە یا خۆ جوان کری، یان گڕنژینا تە یا جوانە، یان دەمێ تو دچیە سەرەدانا نەخۆشەکێ تو بێژیێ تو باشتر دیار دکەی، ئەڤ جۆرە پەیڤە ئێکسەر دێ چنە د مێشکی دا و هندەك گۆهۆڕینێن کیمایی دێ تێدا دروست دبن.
د. نزار گۆتژی: هەر ڕستەیەکا ژ پەیڤا ئەز دەستپێ بکەت مێشکێ مرۆڤی ئێکسەر وەردگریت و دبیتە ڕەفتار و سرۆشتێ مرۆڤی، لەوما هەر ڕستەیەکا ژ پەیڤا ئەز دەست پێ بکەت، پێدڤییە یا ئەرێنی بیت و مرۆڤ دوور بکەڤیت ژ گۆتنا ڕستەیێن نەرێنی.
نيشاندان