قەیس وەیس:
ب دووماهی هاتنا یاریێن گەڕا 19ێ و دووماهییێ ژ قۆناغا ئێكێ یا خولا ستێرێن ئیراقێ یا فوتبۆلێ، تیما یانەیا زاخۆ ناسناڤێ قارەمانێ وەرزێ زڤستانێ ب دەستڤە ئینا و دهۆك ئێك ژ باشترین یانەیان و هەولێر تیمەكا پێشكەفتی و نەورۆز بەردەوامی دا ئاستەنگا.
بۆ جارا ئێكێ د دیرۆكا خوە دا زاخۆ قارەمانا وەرزێ زڤستانێ
تیما یانەیا زاخۆ ب فەرمی ناسناڤێ قارەمانا وەرزێ زڤستانێ یا خولێ ب دەستڤە ئینا پشتی سەركەفتنەكا مەزن ل سەر مێڤانا خوە یانەیا ئەلقاسم یا نەجەفی ئینایی ب شە گۆلان بەرانبەر دو گۆلان، د یارییا واندا ئەوا ل ئێكشەمبییا بۆری ژ چارچووڤەیێ هەڤڕكیێن گەڕا19ێ و دووماهییا قۆناغا ئێكێ ل یاریگەها زاخۆ هاتیە كرن، گۆلێن زاخۆییان ژلایێ یاریزانان گۆلكەرێ وێ یێ بەرازیلی گۆستاڤۆ هێنریك هاتریك د خولەكێن هەشتێ، 35 و 62ێ ، پاتریك مارسێلۆ دخولەكا نەهێ دا، دیبیۆتی ئۆگۆنا دخولەكا 14ێ دا، ئەحمەد یاسین د خولەكا 28ێ دا تۆماركرن، بڤێ سەركەفتنێ كوڕێن خابووری بۆ جارا ئێكێ د دیرووكا خوە دا ناسناڤێ قارەمانا وەرزێ زڤستانێ ب دەستڤە ئینا، پشتی سەرێ لیستێ پاراستی ب كۆمكرنا 38 خالان ژ11 سەركەفتن، پێنج وەكهەڤییان و یاریزانێن وان 36 گۆلكرینە و 19 گۆل ل سەر هاتینە تۆماركرن.
تەلال ئەلبۆلشی: بووینە قارەمانێن وەرزێ زڤستانێ لێ هێشتا كاروانەكێ درێژ مایە
د كۆنگرەیێ رۆژنامەڤانی دا ڕاهێنەرێ تیما یانەیا زاخۆ یێ قەتەری تەلال ئەلبلۆشی گۆت: سۆپاس هەموو یاریزانا و جەماوەرێ مەزن یێ بەرهەڤبووی دكەین و ئەڤێ سەركەفتنێ بۆ وان دكەینە دیاری، سۆپاس بۆ خودێ ئەم بووینە قارەمانێن وەرزێ زڤستانێ لێ مە كاروانەكێ درێژ مایە و ب هەڤكارییا كارگێرییا یانەیێ و جەماوەری دێ بەردەوامبین ل سەر ئاستێ خوە یێ جوان و ئەنجامێن سەركەفتنی، یاریەكا دیرووكی بوو ژبەركو هەموو یاریزانان ل دووڤ ئامۆژگاریێن بۆ هاتینە دان ب جهئینان، راستە بووینە قارەمانێن وەرزێ زڤستانێ لێ هێشتا پلانا مە ب دووماهی نە هاتییە و هێشتا قۆناغەكا درێژ مایە.
گۆستاڤۆ ژی ل سەرێ لیستا گۆلكەرانە
ب دووماهی هاتنا گەڕا 19ێ و تۆماركرنا هاتریك د یارییا خوە بەرانبەر ئەلقاسم دا ستێرێ یانەیا زاخۆ یێ بەرازیلی گۆستاڤۆ هێنریك پێشڤە هاتە سەرێ لیستا گۆلكەران ب تۆماركرنا 14 گۆلان، هەڤالێ وی و یاریزانێ هەلبژارتیێ ئیراقێ ئەمجەد عتوان ب تۆماركرنا 10 گۆلان رێزا دویێ ل سەر لیستا گۆلكەرێن تیما زاخۆ دهێت، ناسر محەمەدو چار گۆل، ئەحمەد یاسین دو گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز، پاتریك مارسێلۆ و دیبیۆتی ئۆگۆنا هەر ئێك گۆلەك تۆماركرینە كو سەرجەمێ گۆلێن زاخۆ بووینە 30 گۆل د خولێ دا.
ئەلهۆیێن چیا ل سەر ڕێبازا سەركەفتنان نا ڕاوەستن
تیما فوتبۆلا یانەیا دهۆك بەردەوامە ل سەر ئەنجامێن خوە یێن باش و پێشڤەچوون بەر ڕێزێن پێشیێ پشتی د یارییا ڤێ گەڕێ دا شیایی سەركەفتنەكا گرنگ ل سەر مێڤانا خوە یانەیا نەفت یا بەغدایی ئینایی ب گۆلەكێ بێ بەرانبەر، د یارییا واندا ئەوا ل یاریگەها یانەیا دهۆكێ هاتیە كرن، گۆلا دهۆكێ ژلایێ پیشەكارێ وێ یێ بەرازیلی لۆكاس هێنریك د خولەكا 21ێ دا تۆماركر، ئەڤێ ئەنجامی تیما دهۆكێ پێشڤە چوو رێزا چارێ ب كۆمكرنا 34 خالان ژ 10 سەركەفتن، چار وەكهەڤییا و 25 گۆل هاتینە تۆمارمكرن و 15 گۆل ل سەر هەنە، ئەلهۆیێن چیا یارییەكا پاشئێخستی بەرانبەر یانەیا تەلەبە مایە، دوور نینە هەكە ب سەركەڤیت و تیمێن رێزێن ل سەر دا خوسارەتبن ئەوێن دیاركری د لیستەیا خوارێ یا گشتی، تیما دهۆكێ پێشڤە بچیتە رێزا دویێ ل سەر لیستێ.
مەسعۆد میرال: ئاست ب دلێ من نەبوویە لێ سێ خال د گرنگ بوون
د كۆنگرەیێ رۆژنامەڤانێ یێ پشتی یارییا دهۆك و نەفت ڕاهێنەرێ تیما دهۆكێ مەسعۆد میرال پیرۆزباهییا تیما خوە و جەماوەری كر و گۆت: هەرچەندە ئەز ژ ئاستێ تیما خوە ڕازی نەبووم و ب دلێ من نە هاتبوو نیشان دان، لێ ب دەستڤە ئینانا سێ خالان یا گرنگە و پێنگاڤە بۆ رێزێن باشتر، بۆ یارییا بهێت دڤێت ئاستێ خوە یێ جاران ڤەگەڕینن، پیرۆزباهییا تیما خوە و جەماوەرێ مەزن یێ بەرهەڤبووی دكەم، ئەم ڕژدین ل سەر پێشڤەچوونێ و گەشبینن دێ بەردەوامبین ل سەر رێزێن پێشیێ، قۆناغەكا تەمام ژ 19 یارییان ماینە لەوما كاروانێ مە یێ درێژە و ئەم بهێنفرەهین.
چەنكاوەرێن دهۆكییا گۆلكەرێن خولێ كینە؟
تیما دهۆكێ خوانا دەهـ یاریزانێن پشكداری د تۆماركرنا 25 گۆلان دا هەیە بڤی ڕەنگی، پاشەنگ عەبدوللا شەش گۆل، پیتەر گۆرگیس پێنج گۆل، كەریم دەرویش سێ گۆل، هەر ئێك ژ و شەرقی ئەلبەحری و مارلۆن دۆسانتۆس دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، كێلبرت كۆمسۆن، سیابەند عەگید، ئیبراهیم غازی و لۆكاس هێنریك گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
شرۆڤەكارەكێ ئیراقی پەسنا ئاستێ تیم و پشتەڤانێن دهۆك و زاخۆ دكەت
ژلایێ خوەڤە نبراس شەلمان شرۆڤكارێ وەرزشی یە بەرنیاس د ناڤا وەرزشا فوتبۆلا ئیراقێ دا پەسنا ئاست و شیانێن یاریێن كوردستانی ب گشتی و یانەیا زاخۆ و دهۆك ب تایبەتی دكەت و گۆت: هەبوونا هەرچار یانەیێن كوردستانی د خولا ستێرێن ئیراقێ دا تامەكا تایبەت و هێز ئێخستیە د خولێ دا، هەروەسان جەماوەرێن زاخۆ و دهۆك جوانی و گیانەكێ هەڤڕكیێ و پێشكەفتنێ ئێخستیە د یارییان دا، ئەوا من دیتی د یارییا زاخۆ یا ڤێ دووماهیێ دا هەروەكو یا خولا ئنگلتەرایێ بوو، ئاست، تەكتیك، شێواز و گۆلێن جوان، هەروەسان یاریێن دهۆكێ ژی ئاستێن مەزن و پێشكەفتی و تەكتیكەكا بلند، ئەڤە ژی جهێ شانازیێ یە كو خولا ئیراقێ بەر ب پێشڤەچوونەكا باش دچیت، هەڤڕكییەكا ب هێز ل سەر رێزێن ئێكێ هەتا 10ێ یا هەیی و بەلگەژی خالێن نێزیك دناڤبەرا یانەیێن پشكدار، ب هیڤی نە بۆ قۆناغا دویێ ئەڤ مۆرالە و هێزە یا بەردەوام بیت، ئەڤەیە وەرزشا ئیراقێ یا ڤە دڤێت.
یاریێن گەڕا ئێكێ ژ قۆناغا دویێ هاتنە دەستنیشانكرن
فدراسیۆنا فوتبۆلا ئیراقێ ب فەرمی یاریێن گەڕا ئێكێ ژ قۆناغا دویێ كود بینە هەڤڕكیێن گەڕا 20ێ یا خولا ستێرێن ئیراقێ دەستنیشانكرن، ل ئەینییا بهێت تیما یانەیا دهۆك دێ ژ دەرڤەیی یاریگەها خوە بەرانبەر یانەیا ئەلقاسم ل یاریگەها فەیحاو دەمژمێر پێنجێ ئێڤاری كەت، د هەمان رۆژدا یانەیا زاخۆ دێ ل یاریگەها شەهید فرانسۆ حەریری بیتە مێڤانا یانەیا هەولێر د هێزترین یاریێن ڤێ ڤەگەرێ و كلاسیكۆیا كوردستانی دا ئەوا دێ ل دەمژمێر 7:30 شەڤ هێتە كرن، ل شەمبییا بهێت یانەیا نەورۆز دناڤ ئەرد و جەماوەرێ خوە دا دێ مێڤاندارییا یانەییا زەورا ل دەمژمێر دو یێ پشتی نیڤرۆ كەت.
ژ یاریێن دی یێن گەڕِا 20ێ، رۆژا پێنج شەمبییا بهێت، كەرخ- نەفت ئەلبەسرا، شورتە- كارەبا، ل ئەینییا بهێت، نەفت- نەجەف، تەلەبە- دیالا، شەمبییا بهێت، حدود- مینا، ئەلكەرمە- جەوییە، كەربەلا- نەفت میسان.
نيشاندان