زاخۆ، دلۆڤان هالۆ:

یونس محەمەد، سەرۆكێ باژێڕڤانیا زاخۆ بۆ ڕۆژناما ئەڤرۆ دیاركر كو قووناغا سێیێ یا كۆڕنیشێ زاخۆ دێ هێتە دروستكرن و دبێژیت: ل 20ی ئیلۆنا ئەڤ سالە ب هەلكەفتا سالڤەگەڕا ئیدارەبوونا سەربخوە یا زاخۆ دێ هێتە ڤەكرن، ب ڤێ چەندێ ژ پرا دەلال هەتا پرا خانی دێ بیتە كۆڕنیشێ گەشتیاری.
سەرۆكێ باژێڕڤانیا زاخۆ، ئاماژە ب وێ چەندێ ژی كر كو نێزیكی 30 خانیێن وەلاتیێن دەڤەرێ دكەڤنە د سنۆرێ قووناغا سێیێ یا كۆڕنیشێ زاخۆ دا، خودانێن هەموو وان خانیان دێ‌ هێنە قەرەبووكرن و گۆت: «قووناغا ئێكێ یا كۆڕنیشێ زاخۆ ب درێژاهیا هزار و 500 مەتران ل هەردو لایێن خابیری ب گوژمێ 11 ملیار و 500 ملیۆن دیناران هاتیە دروستكرن، ب ڕێژەیا 70% كەسكاتیە، بەنداڤەك ژی ب درێژاهیا 73 مەتران و بلنداهیا سێ‌ مەتران هاتیە دروستكرن، قووناغا دووێ ب درێژاهیا سێ‌ كیلۆمەتران و ب گوژمێ شەش ملیار دیناران هاتیە دروستكرن و ب ڕێژەیا 50% كەسكاتیە».

دهۆك، دلۆڤان ئاكرەیی:

ئەندامەكێ فراكسیۆنا پارتی ل لژنەیا نەفت و غازێ ل جڤاتا نوونەرێن ئیراقێ دیاركر، پشتی ڕاگرتنا بەرهەمئینانا غازا سروشتی ژ لایێ كۆمپانیا «دانەغاز» ڤە، ب بزاڤێن وەزیرێ سامانێن سروشتی یێن هەرێما كوردستانێ و ب هەماهەنگی ل گەل وەزیرێ نەفتا فیدرال، ڕازیبوون هاتیەدان ل سەر پڕكرنا ڤالاهیا غازا شل یا مالان ل هەرێما كوردستانێ.
سیپان شێروانی، ئەندامێ فراكسیۆنا پارتی ل لژنەیا نەفت و غازێ ل جڤاتا نوونەرێن ئیراقێ بۆ رۆژنامەیا ئەڤرۆ گۆت: «ب شێوەیەكێ كرداری دەست ب هنارتنا رێژەیا 140 تەنێن غازێ بۆ هەرێما كوردستانێ هاتیە كرن، ئەم دێ بەردەوام ل سەر هێل بین، دا كو ئەڤ رێژەیە د ڕۆژێن بهێن دا بهێتە زێدەكرن، چونكی ئەڤ رێژەیە نوكە یا كێمە و تێرا پێدڤیێن تەمام یێن هەرێما كوردستانێ ناكەت».

هەولێر، قائید میرۆ:

بریكارێ وەزارەتا شەهید و ئەنفالكریان ئاشكراكر، هەر زیندانیەكێ سیاسی ئەگەر پێشینەیا مەهانە ژی نەبیت، ب تنێ بڕیارا دادگەهێ هەبیت و كۆد هەبیت دێ پارچەیا ئەردی وەرگریت.
ناڤسەر نوری عەبدال، بریكارێ وەزارەتا شەهیدان بۆ رۆژناما ئەڤرۆ دیاركر، بزاڤێن حوكمەتا هەرێما كوردستانێ ژ بۆ وەكهەڤكرنا مووچەیێ زیندانیێن سیاسی ل گەل بەغدا د بەردەوامن، بەلێ پێدڤی ب تەرخانكرنا دارایی هەیە و گۆت: «وەزیرێ دارایی فالح ساری ل گەل شاندێ ئیراقێ سەرەدانا ئەمریكا كربوو، بڕیارە وەزارەتا شەهید و ئەنفالكریێن هەرێما كوردستانێ ل گەل دەزگەهێ زیندانیێن سیاسی یێ ئیراقێ بۆ ڤێ مەرەمێ سەرەدانا وەزارەتا داراییا فیدرال بكەن».
ل دۆر بەلاڤكرنا پارچەیێن ئەردی ژی ناڤسەر نووری عەبدال گۆت: «ئێك ژ وان بابەتێن بەغدا گوتیە ئەم پارچەیێن ئەردی نادەینە زیندانیێن سیاسی یێن هەرێما كوردستانێ، ب تنێ مووچە و شایستەیێن دارایی دێ چنە سەر بەغدا، لەوڕا ب فەرمانا سەرۆكێ حوكمەتا هەرێما كوردستانێ بڕیار هاتە دان پارچەیێن ئەردی بۆ هەموو وان زیندانیێن سیاسی و راگرتیان دەربچیت یێن هەتا نوكە مفادار نەبووین، هەر زیندانیەكێ سیاسی بەس بڕیار هەبیت و هەتا نوكە مفادار نەبیت ژ وەرگرتنا پێشینەیا مەهانە ژی دێ پارچەیا ئەردی وەرگریت».

دهۆك، لەزگین جۆقی:

رێڤەبەریا گشتی یا وەبەرهێنانێ ل پارێزگەها دهۆكێ راگەهاند؛ ژ لایێ كۆمپانیێن نەمساوی ڤە ب هەڤكاری ل گەل كۆمپانیێن ناڤخۆیی دێ پڕۆژەیێ تلفریكا چیایێ‌ گارەی ل سەرسنكێ هێتە دانان.
هەڤال سەدیق، رێڤەبەرێ گشتی یێ‌ وەبەرهێنانێ ل پارێزگەها دهۆكێ بۆ ئەڤرۆ دیاركر كو تلفریك دێ ژ سەرسنكێ بەرەڤ هەرسێ شكەفتێن چیایێ گارەی چیت، بهایێ ئەڤی پڕۆژەی 25 ملیۆن دۆلارن، دێ بزاڤا گەشتیاری گەلەك بهێز كەت و گۆت: «ل نێزیك تلفریكا چیایێ گارەی ل سەرسنكێ دێ هێتە بجهئینان».
زێدەتر گۆت: «پێنگاڤێن كابینەیا نەهێ د وارێ ئاڤەدانیێ و پێشئێخستنا كەرتێ گەشتیاری دا بەردەوامن، لەوما كۆمپانیایەكا نەمساوی ب هەڤكاری ل گەل كۆمپانیا «یوبی هۆلدینگ» یا خۆمالی، دێ پڕۆژەیێ تلفریكا چیایێ گارەی ل سەرسنگێ بجه ئینن».
ئەڤ پڕۆژە دێ ب گوژمێ 25 ملیۆن دۆلاران و د دو قووناغان دا هێتە چێكرن، قووناغا ئێكێ: د دەمێ‌ سالەكێ دا دێ‌ هێتە بجهئینان، ئەو ژی، وەستگەهەك د ناڤ سەرسنكێ دا دێ‌ هێتە دانان و تلفریك دێ چیتە سەر چیایێ گارۆكی، قووناغا دووێ: د دەمێ‌ 20 مەهان دا دێ‌ هێتە بجهئینان و هێلا تلفریكێ دێ ژ چیایێ گارۆكی هێتە درێژكرن بۆ سێ شكەفتێن سەرێ گارەی.

دهۆك، لەزگین جۆقی:
سەرۆكێ باژێڕڤانییا قەسرۆكێ دیاركر، وان داخواز كریە ل سنۆرێ باژێرڤانیێ‌ بهێتە مەزنكرن، داكو رێكارێن یاسایی بهێنە وەرگرتن، داكو بشێین خزمەتا وان هەموو كەسان بكەین ئەوین فورمێن وان هاتینە بەردەستی مە بۆ بەلاڤكرنا پارچەیێن ئەردی ل سنۆرێ ناوچەداریا قەسرۆكێ‌.
غەیاس، سەرۆكێ باژێڕڤانییا قەسرۆكێ بۆ ئەڤرۆ گۆت: «راستە ئەم پیچەكێ گێروبووین، لێ رازیبوونا جهێن پەیوەندیدار گەلەك پێدڤیە، چونكی بابەت گرێدایە ب بەرفرەهكرنا سنۆرێ باژێرڤانیا مە ڤە، مە دڤێت كارێ مە هەموو ب دووماهی بهێت، داكو بشێین ب باشترین شێوە خزمەتا خەلكێ خۆ بكەین، ب تایبەت فەرمانبەر و پێشمەرگەیان».

ئامێدیێ، مەحمود نهێلی:

وەك نەریتەكێ سالانە و ب پشكدارییا هەژمارەكا زۆرا كریستیانان، شانەدێرا مار قریاقۆس ل دێرا گوندێ كوانێ یێ گرێدایی دەڤەردارییا ئامێدیێ برێڤەچوو و تێدا چەندین رێورەسمێن ئایینی هاتنە كرن.
عەودیش ئێك ژ پشكدارێن ڤێ شاندێرێ بۆ رۆژناما ئەڤرۆ گۆت: «ئەڤ شانەدێرە ل گوندێ كانێ سەر ب دەڤەرداریا ئامێدیێ سالانە دهێتە گێڕان، ئێكە ژ شانەدێرێن دێرۆكی و ئایینی یێن گرنگ ل دەڤ كرستیانان».
گۆت ژی: «ڤێ شانەدێرێ بهایەكێ‌ گرنگ یا ئایینی و كەلتووری ل نك كریستیانان هەیە، ژ بەر هندێ ژی سالانە د ڤێ روژێ دا هەژمارەكا زۆرا كرستیانان د رێورەسمێن ڤێ شانەدێرێ دا پشكدار دبن».