بێوار حەمدی:
ڤەکۆلەرەکێ جڤاکی دیارکر کو گرنگیپێدانا زێدە بۆ کەسێ بەرامبەر هەکە ژ هەژی نەبیت ژ بهایێ مرۆڤی کێم دکەت، ڕاهێنەرەکا گەشەپێدانێ ژی گۆت؛ ئەوکەسێ گرنگیەکا زێدە ب کەسێ بەرامبەر ددەت وی ڤالاتیەکا دلینی یا هەی.
د. ئاواز حەجی جەعفەر، ڕاهێنەرا گەشەپێدانا کەسایەتی سەبارەت بابەتێ گرنگیدانێ بۆ ڕۆژنامەیا ئەڤرۆ دیارکر کو ئەو کەسێ گرنگیەکا زێدە بدەتە کەسەکی ژلایێ زانستێ دەرونیڤە وی ڤالاتیەکا دلینی هەیە و هەر ژ زارۆکینیێ جەڕکێ گرنگیدانێ بۆ نەهاتیە پڕکرن.
د. ئاوازێ گۆت؛ دەمێ کەسەک دبینیت کو کەسێ بەرامبەر گرنگیێ وەکو پێدڤی نادەتێ ئێکسەر دەروونێ وی تێکدچیت و خۆ کێمتر دبینیت، ژبەرکو بابەت دێ مەزنتر لێهێت و گەهیتە گرێدانێ، لەوما دڤێت هەر کەسەک بخۆ گرنگیێ بدەتە خۆ و ڤالاتیێن خۆ پڕ بکەت و بهایێ خۆ بزانیت.
د. ئاوازێ دیار کر ژی، بێگۆمان هەر تشتێ ئەم ژ قەبارێ وی مەزنتر لێبکەین دێ هەر د سەرێ مەدا شکێت، چونکە هندەک مرۆڤ فێری گرنگیدانا دروست نەبوینە و گۆت؛ جاران خەلک ژ وان دترسیت یێن گرنگیێ پێ ددەن، چونکە هزر دکەن وی کەسی بەرژەوەندیەک یا دگەل هەی یان ژبۆ مەرەمەکا دییە لەوما هێدی هێدی دێ خۆ ژێ دویرکەت.
بەیار باڤی، ڤەکۆلەرێ جڤاکی، دیار کر کو زێدە گرنگیدان ب کەسێ بەرامبەر ب تایبەت هەکە ژ هەژی نەبیت دێ مروڤ تووشی گەلەک خالێن نەرێنی بیت وەکو خۆ سڤک کرن، کەفتن و بێ بها بون د چاڤێ جڤاکیدا.
ڤەکۆلەرێ جڤاکی د بەردەوامیا ئاخفتنێن خۆدا گۆت؛ چارەسەریا درست ژبۆ سەرەدەریا دگەل کەسێ بەرامبەر نابیت گرنگیپێدان ژ قەبارێ وی پتر بیت و یا گرنگە کەسێ بەرامبەر د هندەک قوناغان دا بهێتە تاقیکرن کا کەسەکێ بەرژەوەند خوازە یان نە.
نيشاندان