نۆرا جەعفەر شیمۆ
ڕاگەهاندن تنێ ئامرازەكێ گەهاندنا دەنگوباسان نینە، بەلكو ئاوێنەیا جڤاكی یە, پرسا «ئافرەت و ڕاگەهاندن» د جڤاكا مۆدێرن یا كوردی دا، بابەتەكێ فرەڕەهەندە، د لایەكی دا ئافرەتێ شیانییێن خۆ چەسپاندنێ یێن هەیین، بەلێ د لایێ دی دا ل سەر سۆشیال میدیایێ ڕووبەڕووی هێرش و دیتنەكا گەلەك كرێت دبیت ل سەر دەستێ پشكەكا جڤاكێ.
ئەگەر بپرسین بۆچی جڤاك ب ڤی شێوەی بەرێ خۆ ددەتە ئافرەتێ ل سەر سۆشیال میدیایێ و ئەگەر چنە.
ئێك ژ ئەگەرێن هەرە سەرەكی ئەوە كۆ جڤاكێ مە ( تەڕ و هشكان پێكڤە دسۆژیت)، ئەڤە ئێك ژ مەزنترین ئاریشەیێن جڤاكێ مەیە، دەما كچەك یان ئافرەتەك ل سەر سۆشیال میدیایێ تشتەكێ نەشرعی ڕەفتارەكا نەجوان، یان ناڤەڕۆكەكا بێ رامان و نزم پێشكێش دكەت بتنێ ژ بۆ زێدەكرنا لایك و بینەران، جڤاك ب شێوازەكێ گشتی حوكمی ل سەر هەمی ئافرەتان دكەت، ئەڤ رەفتارە ب رامانا وێ چەندێ یە كو دبێژن «ئەگەر ئێكی خرابی كر، نەخۆش هەمی وەك ئێكن»، ئەڤە ژی دبیتە ئەگەرێ وێ چەندێ كو ناڤێ كچ و ئافرەتێن خۆدان شیان بهێنە بەراوردكرن ل گەل ئافرەتێن رەفتار نە شیاو و ناڤێ وان بهێتە زڕاندن و مافێ وان یێ دەربڕینێ بهێتە خوارن.
هەروەسا هێشتا پشكەكا هزركرنا جڤاكی د بن كارتێكرنا تێگەهشتنێن كەڤن دایە، دەمێ ئافرەت دبیتە خۆدان دەنگ و ڕەنگ ل سەر سۆشیال میدیایێ و ب ئازادی دئاخڤیت، هندەك ڤێ چەندێ وەك لادان ژ دابونەریتان دبینن و ب كۆمێنت و پەیڤێن نەجوان هێرشێ دكەنە سەر.
تەكنەلۆژیا و سۆشیال میدیا گەلەك ب لەز هاتنە د ناڤ ژیانا مە دا، بەلام كولتوورێ دروست پێشڤەنەهات، مرۆڤ هێشتا فێر نەبووینە ڕێزێ ل ئازادییا تایبەتا كەسێ بەرامبەر بگرن، نەخاسمە ئەگەر كەسێ بەرانبەر ئافرەتێ بیت.
لەوما دبێژم بۆ ڕاستكرنا ڤێ دیتنا نەرێنی، پێدڤییا مە ب گوهۆرینەكا فەرهەنگی و پەروەردەیی هەیە، دڤێت جڤاك فێرببیت كو «خرابیا كەسەكێ ل سەر كەسەكا دی ناهێتە حسابكرن»، ئافرەتا كورد خۆدان ئەقل و هزرە، پێدڤییە میدیا و سۆشیال میدیا ببنە جهێ ڕێزگرتنێ و پێشخستنا شیانێن وێ، نەك ببیتە گۆڕەپانا شكاندنا كەرامەت و كەسایەتییا وێ، ڕێزگرتن ل ئافرەتێ ل سەر جیهانا دیجیتاڵی، نیشانا پێشكەفتنا شارستانی یا جڤاكی یە.