دهمێ كو ل سالا بووری نهفتێ نزمترین ئاستێ فرۆشتنێ ل جیهانێ تۆماركری كو ب رێژهیهكا ئێكجار مهزن هاتیه خوار و ههرێما كوردستانێ ژی كهفتیه ڤێ قهیرانا دارایی و ئابووری یا دژوار، ههر چهنده ژێدهرێ سهرهكی یێ داهاتێ ههرێما كوردستانێ نوكه ل سهر فرۆشتنا نهفتێ یه و پتریا ژێدهرێن دی وهكی چاندنێ و پیشهسازی و كهرتێ گهشتوگۆزاری وهكو پێدڤی نهكهفتینه دخزمهتا داهاتیێ ههرێمێ دا و ب تایبهتی كهرتێ چاندنێ هاتیه پشتگوه خستن، لهورا زۆر جاران حوكمهتا ههرێمێ پشتا خوه ب نهفتێ گهرم دكر، كو دێ داهاتهكێ باش بۆ كوردستانێ ژێهێت و هزر ل هندێ نهدكر كو ههكه رۆژهك بهێت و بهایێ وێ گهلهك بهێته خوار ههرێما كوردستانێ دێ كهڤیته د رهوشهكا ئابووری یا خراب دا و وهلاتیێن وێ ژی دێ بنه قوَربانیێن وێ رهوشێ، لهورا پێدڤی بوو بهری چهندین سالان حوكمهتا ههرێمێ پشتا خوه بتنێ ب دهرخستنا نهفتێ گهرم نهكربا و پشتهڤانی ل كهرتێ چاندنێ و گهشتوگۆزارێ كربا و گرنگیهكا مهزن پێدابا.
ههر چهنده وهكو دیار ههرێما كوردستانێ و ب تایبهتی پارێزگهها دهوكێ و دهڤهرهكا وهك دهڤهرا بهرواری بالا گهلهك دهڤهرهكا گوَنجایه بۆ چاندنێ، لێ ئهڤه ماوێ 25 سال بوورین و هێشتا حوكمهتا ههرێمێ وهكو پێدڤی خزمهتا جۆتیاران و كهرتێ چاندنێ نهكریه. ههر چهنده ههولداینه لێ نه ب وی رهنگی بووینه كو جۆتیار بشێت ب بهرههمێ دهستێ خوه بژیت، لهورا پتریا خهلكێ گوندان كارێ جوَتكاریێ هێلا و پتریا وی خهلكێ ژی قهستا باژێران كر، ژبهركو سالانه ماندیبوونهكا مهزن ب كارێ چاندنێ ڤهدبرن و داهاتهكێ باش بۆ ژێ نهدهات و جۆتیار بتنێ پالێ پیشی بوون، ههروهسا بهری دهه سالان خهلكێ گوندان پتریا دهرامهتێ چاندنێ وهك گهنمۆك و كونجی و ماش و برنج و گیا جهریفك و گهلهك جرێن دی یێن دهرامهتی ل بهرواری بالا دچاندن و داهاتێ خوه ب دهستێ خوه پهیدادكر، پتریا ڤان دهرامهتان نوكه ناهێنه چاندن، ئهڤه ژبلی چاندنا سێڤان و جرێن دی یێن فێقی،ل ێ ههر حوكمهتێ پشتهڤانی ل كارێ چاندنێ نهكر و كهد و ماندیبوونا خهلكێ یا سالانه ئێدێ چ داهات بۆ ژێ نه دهات، لهورا نهچاربوون كارێ چاندنێ بهێلن، ژبهركو سالانه سێڤ و ب دههان جرێن دی یێن فێقی دناڤ زهڤیان دا دڕزن و چ ناگههیته جۆتیاران و ڤێ چهندێ وهكر كو خهلك پشت بدهنه كهرتێ چاندنێ.
ههروهسا پشتی كوردستان كهفتیه ڤێ رهوشا ئابووریا بهرتهنگ ژنوو پشتی 25 سالان بیرا حوكمهتێ ل كهرتێ چاندنێ هات، كو دڤێت گرنگیێ بدهنێ و ئێدی بهرێ خهلكێ بدهنه كارێ چاندنێ، ژبهركو كهرتێ چاندنێ ئێكه ژ كهرتێن ههره گرنگ د ئابوورێ ههر وهلاتهكی دا ل جیهانێ، لهوما ههر وهلاتهكێ كهرتێ چاندنێ یێ بهێزبیت زوو ب زوو ناكهڤیته قهیرانان و دێ شێن خوه ژ ههموو ئاستهنگێن ژیانێ قوَرتال كهتن، لێ ل كوردستانێ بهرۆڤاژیه و ئهڤ كهرتێ هندێ گرنگ هاتیه ژبیركرن و بتنێ هزرا حوكمهتێ مایه ل سهر دهرخستن و فرۆشتنا نهفتێ و ههموو كهرتێن دی یێن گرنگێن ژیانێ هاتینه ژبیركرن.
لهورا فهره حوكمهتا ههرێمێ بیر ل هندێ بكهت كو زوو ڤی كهرتی ڤهژاندنێ بێخیتێ و ئێدی چاندن ببیته كهرتێ ههره گرنگ یێ داهاتێ ههرێما كوردستانێ و پشتهڤانیهكا باش ل جۆتیاران بهێتهكرن و نه بتنێ ب گۆتن بیت، لێ دڤێت بكریار بیت و ئێدی خهلكێ ههرێمێ بهرههمێ دهستێ خوه بخۆت و ب هیڤیا بهر دهستێ خهلكێ ژدهرڤه نهبیت، ههكه مه كهرتێ چاندنێ بهێز ئێخست ئهم دێ شێین سهربهخۆیا ئابووریا ههرێمێ ژی تا رادهیهكێ باش پارێزین و پێدڤی بهردهستێ وهلاتێن دهوروبهر نابین.
نووترين نووچه
- سهرۆك بارزانی: گهفا قڕكرنا نهژادى ل دژى كوردان ل رۆژئاڤا ههيه
- پارتی یا بەرهەڤە هەر هاریكارییەكێ بۆ بڕێڤەچوونا پرۆسەیا ئاشتیێ ل توركیا پێشكێش بكەت
- هەڤڕكییا پۆستان ل ئیراقێ بۆ دەستكەفتێن كەسییە نەك بۆ خزمەتكرنا خەلكی
- دڤێت دەزگەهێ سەربازیێ ئیراقی پێگیری دەستووری بیت
- پارتی دو مەرجێن كوردانە بۆ پۆستێ سەرۆككۆماری هەنە
- مافێ پارتی یە وەك زۆرینەیا كوردان دەنگ داینێ پۆستێ سەرۆككۆماری دیار بكەت
- سەرۆك بارزانی و سام دەرمۆ پرسا پێكهاتەیان و رەوشا سیاسی گەنگەشەكر
- پارتی فوئاد حسێن و نەوزاد هادی بۆ پۆستێ سەرۆككۆماری بەربژار دكەت
- پارتی و ئێكەتی ل دۆر پێكئینانا كابینەیا نوو یا حوكمەتا هەرێمێ دێ كۆمبن
- گرنگە سەرۆككۆمارێ بهێت نوونەراتییەكا راستەقینەیا گەلێ كورد بكەت
زنار توڤي
ب زۆری شیام خۆ ژ دهستێ پهكهكێ قۆرتالكهم
پشتی كو ل شهڤا دهربازبووی 21. 12. 2015 گوندێ مه ژلایێ فرۆكێن توركیا ڤه ب دژواری هاتیه بوردۆمانكرن ب مهرهما ههبوونا چهكدارێن پهكهكێ،ك و گهلهك ژ وان بومبهیان ب دووراتیا كیلۆمهتر تا كیلۆمهترونیڤا ب نێزیكی گوندی كهفتینه، ژبلی زیانێن ماددی یێن گههشتینه خهلكی، گهلهك ترس ژی لدهف گوندیان پهیدابوو،لهورا لدهمژمێر 8:30 سپێدێ و پشتی بوردۆمانكرن بدوماهی هاتی من قهستا خانیێ پسمامێ خۆ كر،كو لدۆرێن 800 مهتران ژ گوندی دووره و ل سهر جادا سهرهكیه یا كو دچیته كانی ماسێ،پشتی ئهز نێزیكی خانی بوویم و ژ ترۆمبێلێ پهیابوویم كو رێكهكا ئاخێ دبهر خانی را دهربازدبیت،دهملدهست چهند ترۆمبێلێن پهكهكێ كو كوشتی بریندارێن وان تێدابوون،گههشتنه وی جهی،گوته من تو هاتیه ڤێرێ چ؟،تو یێ گرتی،ههر چهنده ئهو خانی یێ دووره ژ وان جهێن بۆمبه ڤێكهفتین،ئێك ژ چهكدارێن پهكهكێ ژ ترۆمبێلێ هاته خوار و راست بنك من ڤه هات و گوته من نهلڤه،من ژی گۆتێ ئهڤه خانیێ پسمامێ منه و هاتیمه سهحهكێ ژێ بكهم كا فرۆكان زیان گههاندینێ و جامێن خانی شكاندینه یان نه. لێ ئهو چهكدارێ پهكهكێ یێ رژد بوو ل سهر گۆتنا خۆ،كو من بگریت و گۆت دێ ته دگهل خۆ بهین،گۆته ههڤالێن خۆ ئهم دێ ڤی گرین،ههولدان من ب پشكنیت،ژ پێخهمهت بزانیت كا مۆبایل دگهل من ههیه و دگهل هندێ ئێكسهر گۆته من هوینن دبێژنه میتێ و فرۆكان ئهڤه جهێن پهكهكێ نه و هوین زانیاریان ددهنێ و باوهریا مه ب ڤی خهلكی ناهێت،پشتی شهرهدهڤهكا درێژ بۆ ماوێ پتر ژ نیڤ دهمژمێرێ دناڤ بهرا من و وان داو چهندین جاران من گۆتێ نه ئهز و نه خهلكێ مه چ جاران ڤێ چهندێ ناكهن و هوین ی كوردن و ئهم برایێن ئێكین،لێ ئهو قانع نهبوون،لهورا ئهز ژ خۆ بێهیڤی بووم و من زانی ئهو دێ من گرن و ئێدی گۆتن فایده نهكهن،لێ ب هێجهتا هندێ من گۆتێ ئهز دێ سهحا خانی كهم و دێ هێمه دهف ههوه،دناڤبهینهكێ را ئهز شیام ب زۆری خۆ ژ دهستێ وان قورتال بكهم و نوكه ژی نزانم چاوا شیام خۆ ژ دهستێ وان قورتال كهم،لهورا پهكهكه وێ هزرێ دكهت كو ئهڤ مللهته دۆژمنێ وانه و گۆت هوون ژی خائینن و دۆژمنن و مه ژی ڤی مللهتی وهكی توركان ددهینن خائین،ههروهسا ناهێلن مرۆڤ بچیته ئاقارێ خۆ و كارێ زهڤیان ژی بكهت.
مه پێدڤی ب كهنالهكێ گۆزاری ههیه
وهكو دیار ئهڤه چهندین ساله هێشتا چ پلانێن بهێز نههاتینه دانان بوَ سهرخستن و بهرفرههكرنا كهرتێ گهشت و گوَزاری ل كوردستانێ و هێشتا كهرتێ گهشت و گوَزارێ ب رهنگهكێ بهرچاڤ نهكهفتیه دخزمهتا وهلاتیێ كوردستانێ دا، ههروهسا ههتا نوكه هزر ل هندێ نههاتیهكرن كو كهنالهكێ تایبهت ب گوَزارێ ڤه ل كوردستانێ بهێته ڤهكرن و بكهڤیته دخزمهتا گهشتیاران دا، ژ پێخهمهت وێ چهندێ كو برێیا وی كهنالی خهلكیچ بیانی قهستا كوردستانێ بكهن، ڤێ چهندێ دێ مفایهكێ مهزن ههبیت ههم بوَ وی كهنالی و ههم بوَ وان كهسانێن كو كارێ گهشت و گوَزارێ دكهن، دێ شێن ب ساناهی ههمی جهێن گهشت و گوَزاری ل كوردستانێ ب پلانهكا سهركهفتی نیشا خهلكێ بیانی دهن و ب ڤی رهنگی دێ جهێن گوَزاری و سهرنجراكێش و دیروَكی یێن كوردستانێ بوَ خهلكی هێنه پێشچاڤكرن، ئهڤه دێ بیته پالپشتیهكا مهزن بوَ خهلكێ و حوكمهتا ههرێمێ ژی و ههروهسا دێ بیته دهرگهههك بوَ گهشهكرنا كهرتێ گهشت و گوَزاری ل كوردستانێ بوَ وهلاتیان.
ڤهكرنا كهنالهكێ گوَزاری دێ پتر سهرنجا خهلكێ بوَ كوردستانێ راكێشیت، چونكی كوردستان ب سروَشتێ خوه یێ جوانه و ئهڤه خوه ب خوه دێ بیته هوَكارهك بوَ ڤهژاندنا بارێ ئابووری ل ههرێمێ و ههروهسا سروَشتێ وێ یێ گوَنجایه بوَ ههمی وهرزێن سالێ كو خهلك قهست بكهنێ ب مهرهما گهشت و گوزارێ. لهورا پێدڤیه جهێن شوَلهژێ و كهسێن تایبهتمهند دڤی بواری دا خهمهكێ ژڤی بابهتی بخوَن و ههولبدهن كو كهنالهكێ گوَزاری ڤهكهن، داكو بشێن بهرێ خهلكێ بیانی بدهنه كوردستانێ، ئهڤه دێ رێكهكا سهركهفتی بیت بوَ حوكمهتێ و وهلاتیان، ژبهركو ههتا كو ڤێ گاڤێ ئهم نهشیاینه گهشت و گوَزارا خوه بێخینه دخزمهتا خهلكێ بیانی دا و بهرێ وان بدهینه كوردستانێ، چونكی ههتا نوكه ریكلامهكا باش ههم بوَ جهێن گوَزاری ههم بوَ بارێ ئارامێ كوردستانێ نههاتیه كرن، كو كوردستان دهڤهرهكا ئارامه و جودایه ژ عێراقێ،ههروهسا نوكه كوردستان درهوشهكا ئابووری یا نهخوَش دا دبوَریت و لهورا ب هاتنا گهشتیاران بوَ ههرێمێ دێ بیته هوَكارهك كو خهلك مفایهكێ باش یێ ئابووری ببینیت و دێ داهاتهكێ باش بوَ خهلكێ ژێ هێت و دێ شێن ژیارا خوه ژ ڤی كهرتی پهیدا كهن و دێ بیته ژێدهرێ ژیانێ بوَ خهلكێ مه.
ئهم ههمی سیاسهتمهدارین
ههر ژ دهمێ هاتنا تیرورستێن داعش و هێرشێن وێ بوَ سهر ئاخا ههرێما كوردستانێ، ههروهسا ههبوونا چهندین كێشهیان دناڤبهرا حوكمهتا ههرێمێ و بهغدا دا و نههنارتنا بهشه بوَدجهیێ خهلكێ كوردستانێ ژلایێ حوكمهتا عێراقێ ڤه، كو ئهڤه ماوهیهكێ درێژه وهلاتێ مه كهفتیه دناڤ چهندین قهیران و ئاریشهیێن مهزن دا، كو ههتا نوكه ئهڤ قهیرانه روَژ ب روَژ زێدهتر دبن و نههاتینه چارهكرن، ڤێ چهندێ كارتێكرنێن خوه یێن نهرێنی ههبووینه و رهوشا خهلكێ ئێخستیه د دهراڤهكێ تهنگ دا، لهورا ههبوونا ڤان كێشه و ئالوَزیان و ههر بوویهرهكا دی ئهڤروَ ل نافخوهیا كوردستانێ روو بدهت، ڤێجا بهرێ خوه بدێ ئهڤه دێ بیته هولكا خهلكێ مه و ههر كهسهك ل جهێ خوه دێ خامهیێ خوه تیژكهت و دێ بیته سیاسهتمهدار و دێ بوَ مه قانوونان دهرێخیت و دێ ل دووڤ حهزا دلێ خوه ئاخڤیت و دێ یا دلێ خوه دارێژیت بێی ل بهرچاڤ وهرگرتنا بارودوَخێ لایهنێ بهرامبهر، زوربهیا وان كهسان نزانن كانێ سیاسهت چییه و خهلك ل سهر چ بنهما سیاسهتێ دكهن و پرسیارێ ژێ بكه دێ بێژیت خهلك ههمی ڤی كاری دكهن و ئهز ژی دێ كهم و لهورا ل وهلاتێ مه سیاسهت ژی بوویه چاڤلێكرن، ههروهسا نابیت كهس رهخنێ ل بیر و بوَچوونێن وی ژی بگریت، ژبهركو سهیدا سیاسهتمهداره و وهسا هزر دكهت كو وهلات مایه ب هیڤیا وی ڤه، لهورا دێ ب تمتمكا ڤی و وێ هه دادهت و چ لێ بهێت ژی بو وی نهخهمه و ههر بهرهكی ل تراشهكێ وهردكهت، هندهك ژی دێ دهست خوشیێ لێ كهن و دێ سهرێ وی گهرم كهن، دێ وهلێ هێت كو ئێدی كابرا كهسێ ل بهر سنگێ خوه نابینیت و ههیی و نهیی بتنێ ئهوه و مهیدان بوَ وی ڤالا مایه.
ب راستی ئهڤه و گهلهكێن مینا وی دزانن كو كارێ وان نه ئهوه و چ ژ سیاسهتێ ژی نزانن، لێ دبینیت كو خهلكێ مه ههمی یێن بوویه سیاسهتمهدار و خودان پێشبینی نه و چ هزرا بوَ كهسێ ناكهن و ههر ئێك دبێژیت ههما ئهزم و كهس دینه، لهورا ههر دهمێ مروَڤ تهماشهی فێسبووكی یان ههر توَرهكا دی یا جڤاكی بكهت دێ بینیت كو ئهڤه یێ دی سوَچبار دكهت و ئهڤه یێ دبێژیت ئهز یێ دروستم و یێدی یێ دبێژیت ئهم د دروستین و مه خزمهتا كری و كهس خوه تومهتبار ناكهت، ئهرێ پا ئهگهر ههر ئێك ل جهێ خوه یێ دروست بیت پا كی یێ خهلهته و ئاریشه ژكێ دروست دبن، ئهرێ ئهگهر ئهم ههمی سیاسهتمهدار بین دێ وهلات چاوان برێڤه چیت؟. لهورا باشتره ئهم دهست ژ سیاسهتێ بهردهین و ڤێ چهندێ بوَ مروَڤین سیاسهتمهدار و زانا بهێلین و مایێ خوه د ههمی كاران دا نهكهین، لهورا ئهم كورد دبێژین:(نابیت مروَڤ دزبیت، حیزبیت، ب ههشتی بیت). ژبهركو ئهڤروَ ل كوردستانێ ههمی خهلك بووینه سیاسهتمهدار و كهس نابێژیت ئهڤه كارێ من نینه دا نهكهم، ههر چهنده من رێز بوَ ههمی خهلكێ ههنه، لێ دڤێت ژ ئهڤروَ پێڤه ئهم مایێ خوه د ههمی كاران دا نهكهین و ههمی تشتی رهش نهبینین و خوه نهكهینه زانایێن چ نهزان، دڤێت ههر ئێك ژ مه دبوارێ شارهزایا خوهدا كار بكهت و نه ههر تشتێ ههبیت خوه تێدا شارهزا بكهت، چونكی كهس نینه شارهزایی د ههمی بوارێن ژیانێ دا ههبیت، باشتره ئهم رێزێ ل بوَچوونێن ئێكدوو بگرین و ههستێ ئێك بریندار نهكهین و كارێ سیاسهتێ بوَ مروَڤێن سیاسهتمهدار بهێلین.
لیژنهیهك دێ هێته پێكئینان
ههر دهمێ ئالۆزی و قهیرانهك ل كوردستانێ پهیدا ببیت و ئهو قهیران زوو نههێته چارهكرن، پشتی بورینا دهمهكی ل سهر وان قهیرانان و بێدهنگیا حكومهتێ ل سهر چارهكرنا وان قهیرانان، دێ هند بینی كو جهێن بهرپرس و شولهژێ دێ بێژن لیژنهیهك دێ هێته پێكئینان و دێ دوڤچوونا وان ئالوَزیان كهت، ژ پێخهمهت چارهكرنێ؛ لهورا ل دهمێ بهحسكرنا پێكئینانا لیژنێ مروَڤ دزانیت ئهو ئالوَزی و قهیران دێ ڤهكێشیت و چارهسهری زوو بوَ ناهێته كرن ، چونكی پشتی بوَرینا دهمهكێ درێژ و بێزاربوونا خهلكێ ل سهر وان قهیرانان دێ ب دههان داخویانی ژلایێ جهێن شولهژێ ڤه هێنهدان و دێ دیاركهن كو ل دهمهكێ نێزیك ئهو قهیران دێ هێنه چارهسهركرن. بتنێ مهرهما وان پێ ئهوه كو خهلكێ ب گوَتنێن خوه هاویش بكهن، لێ ههر زوو ئهو ئاریشه چارهنابن و وهك خوه دمینن. براستی ژی سهیره د ماوێ شهڤهك و روَژهكێ دا هوَسا ب ساناهی قهیران روو بدهن، لێ وهسا یا دیاره كو بهری نوكه چ پلان نههاتینه دانان بوَ نههێلانا كێشه و ئالوَزیان و هێشتا مه پلانێن دومدرێژ نینن. ئهم وهسا هزر دكهین كو ئهڤروَ ب قهتیت ههتا سوَبههی خودێ كهریمه، لهوما دڤێت ئێدی پلانێن دومدرێژ بهێنه دانان بوَ نههێلانا قهیرانان و پێدڤیه دل ئارامیهك لدهف خهلكی پهیدا ببیت، وهسا بهێنه پشتراستكرن كو ئێدی ل ڤی وهلاتی قهیران پهیدا نابن. ئهگهر پهیدا ببن ژی دڤێت حكومهتێ پلان بهری هنگێ دانابن و هزر ل سهر هندێ كربیتن، كا دێ چاوا شێن خوه ژێ قوَرتال كهن؟،چونكی ب ههبوونا ڤان قهیرانان دلساریهك لدهف خهلكی پهیدا دبیت، ژبهركو هێشتا ئهو لیژنهیێن بهری نوكه بوَ چارهكرنا قهیرانان هاتینه پێكئینان نهشیاینه بدورستی كارێ خوه بكهن و دووماهیێ ب وان قهیران و كێشهیان بینن. ئهڤه چهندین ساله ئهو كێشه و قهیران یێن روو ددهن و ئهڤه چهند باره بوون و روَژ بوَ روَژرێ قهیران یێن پتر لێ دهێن و ئهڤ وهلاته بوویه وهلاتێ قهیرانان. ههروهسا مروَڤ نزانیت دێ ب چ رهنگ ئهڤ قهیرانه بدووماهی هێن و ئێدی بهحسێ پێكئینانا لیژنهیان ناهێته كرن و دێ سهرێ مه رحهت بیت ژ سرایێ و قهیرانان. لهورا ئێدی پێكئینا لیژنهیان نابیته چاره و دڤێت بهری كێشه و ئالوَزی پهیدا ببن، رێگه چاره بوَ هاتبنه دیتن و نههێلن ئهو قهیران وهسا مهزن ببن كو كارتێكرنهكا خراب ل سهر خهلكی پهیدا ببن و ببنه جهێ بێ ئومێدیێ لدهف خهلكی. لهورا دبێژم نه خوزیێن وێ روَژێ دهمێ جهێن شوَلهژێ ژنوو بوَ پهیدا بوونا قهیرانهكێ دبێژن ئهم دێ لیژنهیهكێ پێكئینین بوَ چارهكرنێ.
بهری ههر تشتهكی ئهز ژی وهك ته مرۆڤم!
هێشتا ل كوردستانێ واستهكاریێ و مروَڤ مروَڤكانێ گهلهك رولێ خوه ههیه و ئهگهر تو ئێكێ نه نیاسی ل جههكی زوو كارێن ته برێڤه ناچن، لهورا گهلهك ژ وان جهێن مروَڤ قهست دكهتێ بوَ برێڤهبرنا كارێن خوه یێن روَژانه چ وهك فهرمانگهه یان رێڤهبهریهكا حكومی یان ههر جههكێ دیتر بیت، یان ژی دهمێ مروَڤ دچیته ئاههنگهكا گشتی ل پاركهكێ یان ل یاریگهههكێ بیت، دێ ب چاڤێن خوه بینی كو واسته و واستهكاری لێ ههیه و مروڤ دێ نهچار بیت ب دوو چاڤێن زل و زیق تهماشه كهت دهمێ ئێك واستهكاریێ بوَ یێدی دكهت و ل بهر چاڤێن خهلكی كارێن وی برێڤه دبهت بێی سرا یان كابرایێ كار بدهست ههڤال و نیاسێ وی یه دێ كهته دژوورڤه و ل وی دهمی چ ژ مروَڤی ناهێت، ژبلی ئاخینكهكا كوور مروَڤ رابهێلیت و چهندهكێ دێ بێهنا مروَڤی تهنگ بیت، مروَڤ دێ وهسا هزر كهت كو خهلك ژ مروَڤی یێ جیاوازتره و پتر ماف و ئهركێن ژیانێ ل ڤی وهلاتی ههنه و دێ وهسا هزر كهت كو دادپهروهریێ هێشتا پهرێ خوه یێ دروست ب سهر ڤی وهلاتی دا رانهكێشایه، ههروهسا ئهڤ دیارده زوَر جاران ل دهمێ ئاههنگێن گشتی و ههلكهفتان پهیدا دبیت. دێ هند بینی كو كهسهكێ برهخ مروَڤی ڤه چوو ژوَر و مروَڤ ما ل جهێ خوه، چونكو وی كهسی واسته و نیاس ههبوون و ئهو گههشته مهرهما خوه و بوَ وی كهسێ دی خهم نینه و ئهڤ دیارده گهلهكا بهربهلاڤه. لێ دڤێت ئهڤ دیاردا كرێت نهمینیت، چونكو بهری ههر تشتی پێدڤیه مروَڤ رێزی ل بوَهایێ مروَڤایهتیێ بگریت و جوداهیێ نه ئێخیته دناڤبهرا كهسێ دا؛ لهورا ئهو كوردێن دناڤ ڤی وهلاتی دا دژین وان ههمیان وهكی ئێك مافێ خوه ههیه و نابیت مافێ وی بهێته پێشێلكرن، ژبهركو خودێ وهسا ژیان ئافراندیه كو ههمی كهس نابنه رێڤهبهر و بهرپرس و پلهدار. لهورا نابیت مروَڤێ ههژار و بێ رێ بهێته پشتگوه خستن، چونكو خودێ وهسا دونیا چێكریه كو كهسێن خودان شیان و زهنگین و كهسێن ههژار و بێ دهستههلات ههبن، لهورا نابیت ههر تشت ب واسته و ههڤالینی بهێتهكرن، چونكو ههر تشت دهمێ بوَ واسته، دڤێت ئهو كهس وێ هزرێ بكهن كو ئهو یێ سهرپێچیێ دكهن و ئهو یێ ههستێ كهسێ بهرامبهر دشكێنن و هیڤی و خوزیێن وان د دلدا دكوژن. گرنگه ل كوردستانێ ئێدی بوهایێ مروَڤی ژ واسته و واستهكاریێ مهزنتر بیت و ههر تشت ب دادپهروهرانه بیت، لهوما دبێژم بهری ههر تشتی ئهز ژی وهك ته مروَڤم و من ژی ماف ههیه مینا ته بژیم و من نهڤێت چ جاران واسته من ههبیت و دڤێت ژ ئهڤروَ پێڤه دڤێت ئهم خوه راست بكهین و شهرم ژ خوه بكهین و مودێلا واستهكاریێ نههێلین و بهرهف جڤاكهكێ ساخلهم و ئاڤاكهر ڤه بچین(مانشێت). ههر ئێكێ ژ مه ل جهێ خوه خوه دروست بكهت،ههر چهنده مه رێز بوَ وان ههنه یێن كارێ خوه دروست برێڤه دبهن و واستهكارێ نهكهن، لێ دڤێت ئێدی جڤاك ب یهكسانی برێڤه بچیت و فێربینه مهدهنیهتێ و بلا بهس بیت هزرا خوه زاڵكرنێ ل سهر یێ بهرامبهر، چونكو ههر جڤاكهك ب یهكسانیێ و وهكههڤیێ پێشكهفتیه و شیایه بگههیته بلندترین ئاستێ ژیانێ، ههر دهمێ مهژی ئهڤه بجهئینا ئهم ژی دێ بینه جڤاكهك مهدهنی و پێشكهفتی، دووباره دبێژم بهری ههر تشتهكی ئهز ژی وهك ته مروَڤم.
ب ڤی رهنگی كێشهیا كوردی ل توركیا چارهنابیت
ههر چهنده ل دهستپێكا قووناغا ئاشتیێ دا بهری سێ سالان توركیا نیازهكا باش نیشادا و هندهك پێنگاڤ هاڤێتن بوَ چارهكرنا كێشهیا كوردان ل وی وهلاتی و وهسا خوه دیاركر كو ئهو دێ مافێن كوردان دهنێ و كوردێن باكۆر دێ ب مافێن خوه شادبن و كێشهیا كوردی ل وی وهلاتی دێ گههیته كنارهكێ ئارام و شهر و شۆر ل وی وهلاتی دێ بدووماهی هێت و ئێدی خوینا گهنجان ناهێته رێشتن، لێ ئهڤه دهمهكێ درێژ بووری و هێشتا وهكی پێدڤی قووناغا ئاشتیێ نهكهفتیه كار و ب تنێ ئاك پارتی و ئهردۆگانی دڤێن ب ههلویست و گوتنێن خوه یێن وهكی جاران كوردان بێخنه بن چهنگێ خوه و سهرنجا وان بوَ لایێ خوه رابكێشن،مهرهما وان ژڤێ چهندێ ب تنێ مژوولكرنا كوردانه،چونكی ئهو داخوازیێن كوردان ژ ڤێ قووناغێ دڤێن هێشتا گهلهك ماینه و نههاتینه بجه ئینان،لهورا كوردێن باكۆر ڤێ قووناغێ ب قووناغا هاویشكرنا كوردان و بوَ دهم بوَراندنێ ددهنه خوهیاكرن،ههر دهمێ پارتا دهسههلاتدار ل توركیا و ب تایبهتی ئاك پارتی و هندهك جاران پارتێن ئوپوزسیۆنا وی وهلاتی ژی بهحسێ پیڤاژۆیا ئاشتێ دكهن،چ ههلۆیستێن باش كو خزمهتا دۆزا كوردی بكهن نابێژن و ههردهم لایهنێ كوردی ب ئهگهرێ تێكدانا ڤێ پێڤاژویێ ل قهلهمددهن. ههروهسا توركیا داخواز ژ پهكهكێ كریه كو چهكێ خوه بدانن،لێ پهكهكه زۆر بزهحمهت رازی ببیت چهكی بدانیت،چونكی كورد دزانن هێشتا توركیا ئهو نیازا پاقژ بوَ چارهكرنا كێشا كوردی نیشان نهدایه،یا خوهیایه كو ل دهمێ ههلبژارتنێن توركیا ل حهفتی ڤێ گولانێ و بهری نوكه ئاك پارتی و ئهردۆگانی گهلهك بهحسێ قوناغا ئاشتیێ كر و ب تایبهتی ل دهمێ سهرهدانا دهڤهرێن كوردان دكر،لێ كوردان ئهو باوهریا بهرێ ب ئهردوگانی نهمایه،چونكو ههتانوكه ژی ههردهم ئهردوگان دبێژیت ل وهلاتێ توركیا ئێك زمان و ئێك ئالا و ئێك نهتهوه ههیه،هندی ئهردوگان ل سهر ڤێ گۆتنێ یێ رژد بیت كو توركیا ب تنێ ژ ئێك نهتهوه و زمان پێكدهێت،ئهو پتر سستیێ دئێخیته قووناغا ئاشتیێ و دێ باوهریا كوردان ژ دهستدهت و ب ڤی رهنگی كێشهیا كوردی ل وهلاتێ توركیا چارهنابیت،چونكی ههتا نوكه توركیا دانپێدانێ ب ههبوونا نهتهوا كورد و كێمه نهتهوهیێن دی ل وی وهلاتی ناكهت،لهورا كورد ڤێ چهندێ ب گومان دزانن،كو توركیا نهیا رژده كێشهیا كوردی چارهبكهت،ژ لایهكێ دیڤه پهكهكه ژی نهیا بهرههڤه ب ساناهی چهكی بدانیت،چونكی هێشتا چ مافێن مسۆگهر توركیا بوَ كوردان نهداینه كو كورد پشتا خوه پێ گهرم بكهن،لهورا هندی قووناغا ئاشتیێ گیرۆ ببیت دێ پتر ئاستهنگ پهیدا بن و ئهڤ قووناغه ب دورستی ناهێته بجهئینان و ب ڤی رهنگی دێ توركیا و كورد جارهكادی ژێكدوور بنهڤه و ههول و بزاڤێن چهندین سالان دێ د بهر ئاڤێ دا چن.
زێرێ كهسك بۆ رۆژا رهش!
ههلبهت وهكو دیار ههتا نوكه ل كوردستانێ ئهو گرنگی و پووتهدان ب كهرتێ گهشتوگوزاری نههاتیه دان و ئهڤ چهنده ڤهدگهریت بۆ خهمساریا جهێن شۆلهژێ، چونكی وهكو پێدڤی كار د ڤی كهرتی دا نههاتیه كرن و نهكهفتیه د خزمهتا گهشتیاران دا ب رهنگهكێ كارانه، سهرهرای ڤێ چهندێ ژی كو كوردستان ژبلی ههبوونا زێرێ رهش ب زێرێ كهسك ژی دهێته نیاسین، چونكی كوردستان د سروشتێ خوه دا دهڤهرهكا گهلهكا زهنگینه ب ههبوونا چیا و دۆل و نهال و رووباران، ههروهسا گهلهك دهڤهرێن سار و هین لێ ههنه، ههبوونا كانی و ژێدهرێن ئاڤێ كو ئهڤه خوشیهكێ بۆ گهشتیاران چێدكهن ب تایبهتی ل وهرزێ هاڤینێ كو خهلك دشێن قهست بكهنێ، ئهڤه ئێكه ژبنهمایێن گهشتوگوزاری ل ههر وهلاتهكی، ههروهسا كوردستان یا ناڤداره ب چاندنێ و ههمی جۆرێن فێقی لێ ههنه، لهورا پتریا دهڤهرێن پارێزگهها دهۆكێ د گونجاینه بۆ گهشتوگوزارێ و پێدڤیه گرنگی پێ بهێته دان. لهورا بۆ مه دیار بوو، كو د ڤی ماوهیێ بووری دا پشتی مووچه هاتینه برین، وهلاتێ مه كهفتیه د دهراڤهكێ تهنگ دا، چونكی ب پلهیا ئێكێ مه گرنگی دابوو زێرێ رهش وهك داهاتێ وهلاتی دگهل دهولهتا عێراقێ، مه پشتبهستن ل سهر زێرێ كهسك و چاندنێ نهكریه، لێ پشتی گوهۆرین كهفتیه د زێرێ رهش دا ئابوورێ كوردستانێ گهلهك لاواز بوویه، لهورا دڤێت ژ ئهڤروَ پێڤه ئێدی گرنگی ب زێرێ كهسك بهێتهدان، چونكی گرنگی و بوهایێ وێ ژ بوهایێ زێرێ رهش كێمتر نینه، ب تایبهتی د ئهڤرۆ دا گهشتوگوزار بوویه ئێك ژ بنهمایێن ههره گرنگ بۆ ئاڤاكرن و پێشكهفتنا بارێ ئابووریێ ههر وهلاتهكێ ل جیهانێ و ل گهلهك وهلاتان داهاتیێ وان ل سهر گهشتوگوزارێ یه، ب تنێ كوردستان نهبیت، كو ههمی بنهمایێن گهشتوگوزارێ ههنه، لێ نهكهفتیه د وارێ جێبهجێكرنێ دا و مهنه شیایه بهرێ خهلكێ بیانی بدهینه وهلاتێ خوه. وهكو دیار ههتا نوكه حوكمهتێ و جهێن شولهژێ رێ نهبرینه پتریا جهێن گوزاری یان ژی رێیێن ئاخێ نه و ترومبێل نهشێن بچنێ و كارهب و خزمهتگوزاریێن دی نه برینه بۆ وان جهان و گهلهك جهێن گوزاری دبێ تابلۆنه و ئهڤه بووینه رێگر كو گهشتیار قهست نهكهنێ و نهزانن ئهڤ دهڤهره ل كیڤهنه، ئهڤه ئێكه ژ وان خالێن گرنگ كو دڤێت ههر نوكه كار ل سهر بهێته كرن و ب رهنگهكێ رێكوپێك ئێدی جهێن گهشتوگوزاری بكهڤنه د خزمهتا خهلكێ دا، ههروهسا كار بهێته كرن ل سهر وێ چهندێ كادێ چاوا شێین بهرێ خهلكێ بیانی دهینه گهشتوگوزارێ، پێدڤیه رێكێن سهرهكی یێن هاتن و چوونێ بهێنه خوشكرن و رێكێن ههمی جهێن گهشتوگوزاری بهێنه خۆشكرن. چونكی ئهڤ چهنده دێ بیته ئهگهرێ ڤهژاندنا بارێ ئابووریێ خهلكێ و ههروهسا یێ حوكمهتا ههرێما كوردستانێ، بۆ سهنجراكێشانا گهشتیاران دڤێت جهێن جوان و ب دیزاینێن سهردهمانه و باخچهیێن رێكوپێك بهێنه دروستكرن، ههروهسا دڤێت ئۆتێل و خوارنگهه بهێنه چێكرن، ژ پێخهمهت دهمێ خهلك قهست بكهنه جهێن گوزاری ل وان جهان بمینن و باشتره تشتێن كهلتوری بووان بهێنه نیشادان، داكو ژ نێزیك هایداری ژیانا كوردان ببن، ئهگهر ئهڤ چهنده نههێنه چێكرن و دروستكرن، ئهم نهشێین مفای ژ زێرێ كهسك ببینین و بێخینه د خزمهتا ئابوورێ وهلاتێ خوه دا و پێش بێخین، چونكی گرنگیدان ب زێرێ كهسك كێمتر نینه ژ وێ گرنگیدانا ب زێرێ رهش دهێته دان، لهورا ب دههان وهلاتێن جیهانێ ئهڤروَ خوه ب زێرێ كهسك خودان دكهن و چ داهاتیێن دی نینن. ههروهسا ههتا نوكه دهزگههێن راگههاندنێ ل كوردستانێ نه شیاینه وهكو پێدڤی گهشتوكوزارا كوردستانێ بۆ خهلكێ بیانی بدهنه دیاركرن، كو سهرنجا خهلكێ وان وهلاتان رابكێشن كو قهستا كوردستانێ بكهن، ب مهرهما گهشتوگوزاركرنێ، لهورا پێدڤیه جهێن شۆلهژێ كار ل سهر هندێ بكهن، كو جهێن جوان و سهرنجراكێشێن كوردستان ێ بو خهلكێ بدهنه خوهیاكرن و رۆژانه ریكلامهكا باش ل ههمی كهنالێن راگههاندنێ بهێته كرن، ژ پێخهمهت وێ چهندێ كو بهرێ خهلكێ بیانی بدهنه كوردستانێ، ڤێ چهندێ دێ رۆلهكێ مهزن ههبیت، بۆ ئینانا گهشتیارێ بیانی بۆ كوردستانێ ل دووڤ پلانهكا رێكخستی.
پانزین.. دێ ئهرزان بیت.. ئهرزان نابیت!
مژارهكا رۆژانه د ناڤا خهلكی دا، ههر رۆژ خهلك بهحسێ ئهرزانبوونا بهایێ پانزینێ دكهن و وهسا ددهنه خوهیاكرن، كو نوكه ل سهرانسهری جیهانێ بهایێ پترۆلێ گهلهك هاتیه خوار و لێ ههر بهایێ پانزینێ ل كوردستانێ وهكی خوه مایه و نههاتیه خوار، لهورا داخوازا خهلكێ ئهوه كو بهایێ پانزینێ بهێته خوار، چونكی بهایێ وێ بۆ ڤی دهمی یێ گرانه و ڤێ چهندێ كارتێكرنهكا نهرێنی ل سهر كارێ خهلكێ كریه، دڤێت جهێن پهیوهندیدار ب زووترین دهم چارهیهكێ بۆ ڤێ چهندێ ببینن. ههروهسا خالا ژ ههمیان گرنگتر ئهوه كو ئێدی خهلكێ باوهری ب ئهرزانبوونا بهایێ پانزینێ نینه و ههكه حوكمهت بهایێ وێ ئهرزان ژی بكهت، خهلك چ خۆشیێ ژ وێ بریارێ نابینن، ژبهر كو هندی دهزگههێن راگههاندنێ بهحسێ ئهرزانبوونا بهایێ پانزینێ كریه و وهسا ددا دیاكرن، كو سوبههی یان ڤێ حهفتیێ یان سهرێ ڤێ ههیڤێ یان ههیڤا بهێت بهایێ پانزینێ دێ هێته خوار، لێ ئهو سوبههی و حهفتی و ههیڤ ژی ههمی بوورین لێ ههر بهایێ وێ وهك خوما و چ گوهۆرین ب سهردا نههاتن، لهورا مرۆڤ نزانیت وان دهزگههێن راگههاندنێ ئهو پێزانین ژ كیژ لایهنی وهر دگرتن و ل سهر چ بنهما ئهو نووچه بهلاڤه دكرن، ب راستی وان دهزگههێن راگههاندنێ ئهڤ بابهته گهلهك تێك شێلاندیه و ئالۆز كریه، لهورا پشتی وان ههمی نووچهیان ههر بهایێ پانزینێ ب 900 دینارانه. ههروهسا زۆر جاران لیژنا سامانێن سروشتی ل پهرلهمانێ كوردستانێ ددا دیاركرن، كو دێ ل ڤان نێزیكان بهایێ پانزینێ هێته خوار و گهلهك جاران دهزگههێن راگههاندنێ ژ زاردهڤێ وان دگۆت سوبههی ئهڤ بریاره دێ هێته بجهكرن، لێ ل رۆژا ل دووڤ دا وهزارهتا سامانێن سروشتی دا بێژیت مه ههتا نوكه چ بریار ل سهر ئهرزانبوونا بهایێ پانزینێ نه داینه و مه ئاگهه ژێ نینه و چ گوهۆرین پهیدا نه دبوون، كهواته وهسا دیار دبیت كو لیژنا سامانێن سروشتی ل دهف خوه ئهو بریار ددان و وهزارهتێ ئاگهه ژێ نهبوو، چونكی زۆر جاران وهزارهتا سامانێن سروشتی بێ ئاگههیا خوه ژ ڤان بریاران رادگههاند، ئانكو ل سهر ئهرزانبوونا بهایێ پانزینێ كهسێ ئاگهه ژ كهسێ نهبوویه، نه راگههاندنێ و نه لیژنا سامانێن سروشتی ل پهرلهمانی و نه ژی وهزارهتا سامانێن سروشتی، لهورا ئهڤ بابهته وهكی یاریێ لێ هاتیه، كو دێ چێبیت یان ژی چێنابیت، ئانكو مرۆڤ دشێت بێژیت: پانزین ژی دێ ئهرزان بیت.. یان ئهرزان نابیت، لێ ئهم چاڤهرێی وێ رۆژێنه كو بهایێ وێ ئهرزان ببیت.
داود ئۆغلۆی دڤێت جارهكادی كوردان بخاپینیت!
ههردهمێ بهرپرسێن ئاك پارتیێ سهرا دهڤهرێن كوردان ددهن ل كوردستانا باكۆر وهسا ددهنه دیاركرن كو ئهو پشتهڤانێن دۆزا كوردینه و وێ چهندێ دیار دكهن كو ئهو دێ پێنگاڤێن باش هاڤێژن ژ پێخهمهت چارهكرنا كێشێن كوردان ل وهلاتێ توركیا، لێ ئهڤه چهندین سالن دهما نێزیكی ههلبژارتنان دبن ئهو ڤان درووشمان دبێژن و لێ دوارێ پراكتیكی دا ئهو پێنگاڤێن باش نههاڤێژتینه و ب تنێ ڤێ چهندێ دكهن ژبوو هاویژكرن و سهردابرنا كوردان، ههتا نوكه ب تنێ دهولهتا توركیا كهنالهكێ كوردی یێ حوكمهتێ ڤهكریه و وهكی دی هێشتا زمانێ كوردی وهك زمانهكێ فهرمی ل توركیا نهدایه ناساندن كو ل قوتابخانێن وی وهلاتی بهێته خواندن، مهرهما توركیا ب ڤان پێنگاڤێن هاڤێژتین ئهوه ب تنێ بچیته د ناڤ ئێكهتیا ئهورۆپی دا و مهرهما وێ ئهو نینه مافێ كوردان بدهتێ، ژبهر كو زۆر جاران دهولهتا توركیا و ههروهسا داود ئۆغلۆی دژایهتیا خوه ل بهرامبهر دهولهتا كوردستانێ راگههاندیه، كو بهری دهمهكێ ژی داود ئۆغلۆی دژایهتیا خوه ل بهرامبهر دهولهتا كوردی راگههاندیه، لهورا ئهڤه تێرا هندێ ناكهت كو وهلاتێ توركیا بێژیت ئهم دێ مافێ كوردان دهینێ، وهكو دیار د سهرهدانا ڤێ دووماهیێ دا یا سهروك وهزیرێن توركیا بۆ دیاربهكرێ كو گۆتارهك پێشكێشكر بوو د كۆنفرانسێ ئاك پارتیێ دا و تێدا بهحسێ زمانێ كوردی و قووناغێن ئاشتیێ كر، ههلبهت باژێرێ دیاربهكرێ بۆ ئاك پارتیێ گهلهك گرنگیا خوه ههیه، ژ بهر كو رێژا كوردان ل ڤی باژێری گهلهكه و د ههلبژارتنان دا كورد پتریا دهنگان بدهستڤه دئینن، لهورا ئاك پارتی ههردهم ههولدایه ب درووشمێن خوه یێن خاپینۆك كوردان بكێشته دبن چهنگێ خوه دا، ژ پێخهمهت پتریا دهنگێن كوردان بدهستخوهڤه بینیت، لێ ڤێ جارێ دڤێت كورد دهشیار بن و نهكهڤنه ل بن باندۆرا ئاك پارتی، ئهڤ چهنده دیار بوو دهمێ سهرهدانا سهرۆك وهزیرێ توركیا ئهحمهد داود ئۆغلۆی بۆ باژێرێ دیاربهكرێ كو تێدا دیاركر ئهم مللهتهك موسلمانین و ئهم براتیێ قهبوول دكهین و ههردهم مه ڤیایه ئاشتیێ بهرقرار بكهین، لێ ههردهم داود ئۆغلۆ و رژێما توركیا ب ناڤێ ئاینێ پیرۆز مللهتێ كورد خاپاندیه و نوكه ژی ههمان سیاسهت ل بهرامبهر مللهتێ كورد پهیرهو دكهن. ههروهسا داود ئۆغلۆی د لایهكێ گۆتارا خوه دا ئاشكراكر كو وی دڤێت خوه فێری زمانێ كوردی بكهت و دیاركریه، كو زمانێ كوردی نابیته ئهگهرێ پارچهكرنا وهلاتێ توركیا، لهورا پتر مهرهما وی ئهو بوویه، كو خوه فێری زمانی كوردی بكهت و بشێت ب ڤێ رێیێ جارهكا دی كوردێن باكۆر بخاپینیت و دهنگێن كوردان بدهستڤه بینیت، ئهڤه ژی فێلهكا دییه كو ئاك پارتی ل كوردان دكهت، لێ دڤێت كورد ژ پلانا وی مهزنتربن و نههێنه خاپاندن. ئانكو مهرهما داود ئۆغلۆی ئهوه بێژیته كوردان ئهم فێری زمانێ كوردی بووین، چ جوداهی د ناڤبهرا كورد و توركان دا نینه ل وی وهلاتی، لێ هینگێ ئهڤ چهنده دێ بیته راستی دهمێ ئاك پارتی و دهولهتا توركیا ههمی مافێن كوردان بدهنێ و زمانێ كوردی وهك زمانێ توركی ببیته زمانهكێ فهرمی ل وی وهلاتی و دانپێدانێ ب ههبوونا كوردان بكهت و ههمی مافێن ژیانێ ب كوردان ببهخشیت، ههمی دهسههلات ل دهڤهرێن كوردی بكهڤنه د دهستێن مللهتێ كورد دا، ئاها ل ڤی دهمی ژ نوو دڤێت كورد باوهریێ ب گۆتنێن وی بینن.
نيشاندان
WP Facebook Auto Publish Powered By : XYZScripts.com