ئەڤرۆ نیوز، بارزان مزووری:

د روودانەکا ئاگربەربوونێ دا ل ناحیا قەسرۆکێ پتری ١٢٥ دۆنەمێن گەنمی ھاتنە سۆتن و بەرپرسێ بنگەھێ بەرگریا شارستانی ل ناحیا قەسرۆک ژی دبێژیت: ئەگەرێن روودانێ قۆپکێ جگارێ بوویە کو شۆفێرەکی د جاما ترۆمبێلێ را ھاڤێتیە.

نەقیب ئەرکان زێباری، بەرپرسێ بنگەھێ بەرگریا شارستانی ل ناحیا قەسرۆک بۆ ئەڤرۆ نیوز ئاشکرا کر، ئەڤرۆ ١٦/٦/٢٠١٩ تیمێن وان ھاتنە ئاگەھدارکرن کو ئاگر بەربوویە گەنمێ جۆتیارێن گوندێ “باجەلێ” یێ سەر ب ناحیا قەسرۆکێ ڤە و گۆت: “دو تیمێن مە ئێکسەر گەھشتنە جھێ روودانێ و د وی دەمی دا ھەوایەکێ بھێز دھات، لەو نەشیان ب سەناھی ئاگری کونترۆل بکەین، مە داخواز ژ بنگەھێ رۆڤیا و کەلەکچی کر، ھەردو گەھشتنە جھێ روودانێ و پێکڤە شیان وی ئاگری کونترۆل بکەین، لێ مخابن زێدەتری ١٢٥ دۆنەمێن گەنمی یێن پێنج جۆتیاران ھاتنە سۆتن و ئەم شیاین ژی ھزارەھا دۆنەمێن گەنمی ژ سۆتنێ قورتال بکەین”.

گۆتژی: “ل دووڤ پێزانینێن مە ژێدەرێ وی ئاگری قوپکێ جگارێ بوویە کو شۆفێرەکی جگارا خوە ب دووماھیک ئینایە و قۆپکێ جگارێ ھاڤێتیە و بوویە ئەگەرێ سۆتنا گەنمی”.

نەقیب ئەرکان خویا ژی کر، د ئەڤ سال دا ئەڤە روودانا سیێ یا ئاگربەربوونا گەنمی یە ل سنوورێ ناحیا قەسرۆک روو ددەت و تێدا زێدەتری ٤٠ دۆنەمێن گەنمی ھاتینە سۆتن.

ئەڤرۆنیوز، عەلی حاجی:

ل بن درووشمێ پەلاتینکێن ئێکرەنگ ل فیستەڤالا شانۆیا زارۆیان ل باژارێ دھۆکێ بۆ جارا ئێکێ دێ پێشانگەھەکا فوتۆیێن جێمک ب پشکداریا ١٦ فوتۆگرافەرێن چار پارێزگەھێن ھەرێما کوردستانێ ھێتەڤەکرن.

شێرزاد رەسول، جێگرێ سەرۆکێ رێکخراوا کوردستان فوتۆ بۆ ئەڤرۆ نیوز ئاشکرا کر، بڕیار بوو ل رۆژا ١/٦ رۆژا جیھانیا زارۆیان ئەڤ پێشانگەھا تایبەت ب فوتۆیان یا زارۆیێن جێمک ڤە ھاتبا ڤەکرن و گۆت: “ژ بەرکو ئەو رۆژە دکەفتە د ھەیڤا رەمەزانێ دا و نێزیکی جەژنێ بوو، ئەم نەچار بووین وێ پێشانگەھێ پاش بێخین، لەوڕا بڕیارە سوبەھی ١٧/٦/٢٠١٩ ب ھەلکەفتا رۆژا شانۆیا زارۆیان پیشانگەھا مە یا تایبەت ب فوتۆیێن جێمک ل پەیمانگەھا ھونەرێن جوان ل باژێرێ دھۆکێ بھێتە ڤەکرن”.

گۆتژی: “د وێ پێشانگەھێ دا دێ بەرھەمێ ١٦ فوتۆگرافەرێن چار پارێزگەھێن ھەرێما کوردستانێ یێ زارۆیێن جێمک، خووشک و برا د وێ پێشانگەھێ دا دێ ھێنە نیشاندان”.

شێرزادی ئاماژە ب وێ چەندێ ژی کر کو بۆ جارا ئێکێ پێشانگەھەکا ب ڤی رەنگی ل کوردستانێ دھێتە ڤەکرن و پێشانگەە بۆ دەمێ چار رۆژان دێ یا بەردەوام بیت، دێ وێنێن پڕانیا زارۆیێَن کوردستانێ تێدا ھێنە نیشاندان.

ئەڤرۆ نیوز:

د چارچوڤێ بەرنامێ لقێ ئێکێ پارتی دا؛ ژ بۆ ھاریکاریکرنا کەسوکارێن شەھیدان ئەڤرۆ ١٢/٦/٢٠١٩ ل سنوورێ لیژنا ناوچا تەناھی (سربست تروانشی) ئەندامێ جڤاتا سەرکردایەتیا پارتی و بەرپرسێ لقێ ئێک ب ھەڤالینیا کارگێرێ لقێ و بەرپرسێ پشکا شەھیدان دگەل ھژمارەکا مالباتێن شەھیدان کۆمبوو و ھاریکاری ل سەر وان بەلاڤکرن.

سەربەست تروانشی، بەرپرسێ لقێ ئێکێ پارتی دیار کر، شەھیدان روویێ سپی یێ گەلێ کوردستانێ ب دونیایێ دایە نیاسین، دیسا دایکێن شەھیدێن سەربلند، ب قیمەتترین دایکن د دونیایێ دا، چونکو وان دایکان عەگید و مێرخاس پەروەردەکرن، داکو ئەم ھەبین و گۆت: “ئەڤ کارێ ئەڤرۆ ئەم پێ رادبین ژ بۆ خزمەتکرنا کەسوکارێن شەھیدان ل دووڤ راسپاردێن راستەراستێن سەرۆک بارزانی یە و جەنابێ وی ھەموو شیان ئێخستینە کاری ژ بۆ خوشکرنا رەوشا ژیارا کەسوکارێن شەھیدێن سەربلند”.

دیسا کەسوکارێن شەھیدێن سەربلند سوپاسیا بەرپرسێ لقێ ئێکێ پارتی کرن ژ بۆ وان ھاریکاریێن بەردەوام پێشکێشی وان دکەت و پشتەڤانیا وان دکەت.